မွန်ပြည်သစ်ပါတီ

A d v e r t i s e m e n t With Us

December 3, 2020

ငြိမ်းချမ်းရေးအတွက် စိတ်ရင်းစေတနာမှန်ဖြင့်လုပ်ဆောင်ရန်  မွန်ပြည်သစ်ပါတီတိုက်တွန်း 

ငြိမ်းချမ်းရေးအတွက် အပြန်အလှန်ဆွေးနွေးပြီးတော့ တကယ့်ကိုစိတ်ရင်းစေတနာမှန်နဲ့ လုပ်ဆောင်ဖို့ အရေးကြီးတယ်လို့ မွန်ပြည်သစ်ပါတီ (NMSP) ဗဟိုအလုပ်အမှုဆောင်ကော်မတီဝင်နဲ့ NCA-S EAO ညှိနှိုင်းရေးအဖွဲ့ရဲ့ ပြောရေးဆိုခွင့်ရှိသူ နိုင်အောင်မငေးက ပြောပါတယ် လက်ရှိအစိုးရလက်ထက် နိုင်ငံရေးဆွေးနွေးပွဲတွေရဲ့ရလဒ်က ထူးထူးခြားခြားမရှိသေးပေမယ့် စေတနာမှန်နဲ့ ရိုးသားမှုပေါင်းစပ်သွားမယ်ဆိုပါက အကောင်းဆုံးနည်းလမ်းတစ်ခုရလာမှာ ဖြစ်တယ်လို့လည်းပြောပါတယ် ။ အန်အယ်လ်ဒီ အစိုးရလက်ထက် တိုင်းရင်းသားလက်နက်ကိုင်အဖွဲ့ နှစ်ဖွဲ့ဖြစ်တဲ့ မွန်ပြည်သစ်ပါတီ (MNSP) နဲ့ လားဟူဒီမိုကရက်တစ်အစည်းအရုံး (LDU) တို့ ၂၀၁၈ ခုနှစ် ဖေဖေါ်ဝါရီလ ၁၃ ရက်နေ့မှာ တစ်နိုင်ငံလုံးအပစ်အခတ်ရပ်စဲရေးဆိုင်ရာသဘောတူစာချုပ် (NCA) လက်မှတ်ရေးထိုးနိုင်ခဲ့ပေမယ့် နိုင်ငံရေးဆွေးနွေးပွဲတွေက ရှေ့ဆက်ညှိနှိုင်းဆွေးနွေးစရာတွေ များစွာကျန်ရှိ နေပါတယ်။ နောက်ဆုံးရလဒ်တွေအရ ဖက်ဒရယ်တည်ဆောက်ဖို့ လမ်းညွှန်အခြေခံမူ ၅ ရပ်ရလာပြီး ၂၀၂၀ အလွန်အကောင်အထည်ဖော်ဖို့အတွက် ဇယား(၁)ရလာကြောင်း မူဘောင်အနေနဲ့ သဘောတူညီချက် ၁၂ ချက်ရလာပြီး အချင်းချင်း နားလည်မှုရယူကာ တဆင့်ပြီးတဆင့်သွားမှာဖြစ်တယ်လို့ နိုင်အောင်မငေးက ဒီဗွီဘီကို ပြောပါတယ်။ “တပ်မတော်ကလည်း ကျနော်ထင်တယ် ဒီအတွေ့အကြုံတွေနဲ့ ရင့်ကျက်မှုရှိလာပြီ ဆိုတော့ တဖြည်းဖြည်းဖြစ်လာမယ်၊ တကယ့်စေတနာမှန်နဲ့ ရိုးသားမှုနဲ့ ကျနော်တို့နိုင်ငံကို ပေါင်းစပ် သွားမယ်ဆိုရင် ဒါကအကောင်းဆုံးနည်းလမ်းတစ်ခုပေါ့။ နိုင်ငံတကာအခြေအနေနဲ့ ကြည့်မယ်ဆိုရင် အိမ်နီးချင်းနိုင်ငံတွေထက် အများကြီးနောက်ကျနေတယ်။ ဒါကို ကျနော်တို့အနေနဲ့ သင်ခန်းယူပြီး ကိုယ့်အချင်းချင်းညီညွတ်ဖို့၊ တစ်ဆို့နေတဲ့အခြေအနေကိုကျော်ဖြတ်ဖို့အတွက် အပေးအယူ လုပ်ပြီးတော့ အပြန်အလှန်ဆွေးနွေးပြီးတော့ တကယ့်ကိုစိတ်ရင်းစေတနာမှန်နဲ့လုပ်ဆောင်ဖို့ အရေးကြီးတယ် '' လို့ သူက ဆိုပါတယ်။ ပြီးခဲ့တဲ့အစိုးရနှစ်ဆက်အတွင်း တိုင်းရင်းသားလက်နက်ကိုင်အဖွဲ့ ၁၀ ဖွဲ့နဲ့ အစိုးရအကြား    အန်စီအေလက်မှတ်ထိုးထားပြီး ကျန်အဖွဲ့တွေနဲ့ လက်မှတ်ရေးထိုးနိုင်ရေးလည်း  တွေ့ဆုံညှိနှိုင်းဆွေးနွေးဖို့ ကြိုးစားနေဆဲဖြစ်ပါတယ်။ စကားဝိုင်းဆွေးနွေးပွဲတွေကထွက်ပေါ်လာတဲ့ရလဒ်တွေက ကောင်းပေမယ့် အသီးအပွင့်ကို ပြည်သူတွေက မခံစားရသေးကြောင်း တိုင်းရင်းသားတွေနဲ့ လူနည်းစုတွေအပေါ် ထူးခြားမှု တစုံတရာလုပ်ပေးနိုင်မယ်ဆိုပါက လာမယ့်အစိုးရအနေနဲ့ ထောက်ခံမှုပိုမိုရရှိလာမှာဖြစ်ကြောင်း၊ အစိုးရအနေနဲ့ လုပ်ပေးနိုင်တဲ့အခွင့်အရေးနဲ့အာဏာကို ကောင်းစွာအသုံးချတတ်ဖို့လိုကြောင်း နိုင်အောင်မငေးက ပြောပါတယ်။ သတင်း/ဓာတ်ပုံ - ဝင်းနိုင်သက်
3 months Ago

October 16, 2020

မွန်ပြည်သူ့စစ်အဖွဲ့နှင့် မွန်ပြည်သစ်ပါတီတပ်ဖွဲ့တို့ ပစ်ခတ်မှုဖြစ်ပြီး  ၁ ဦးသေ

မွန်ပြည်နယ်၊ ရေးမြို့နယ်မှာ  မွန်ငြိမ်းချမ်းကာကွယ်ရေး ပြည်သူ့စစ်အဖွဲ့နဲ့ မွန်ပြည်သစ်ပါတီ လက်နက်ကိုင်တပ်ဖွဲ့တို့ အောက်တိုဘာ ၁၅ ရက်ညက ပစ်ခတ်မှုဖြစ်ပွားခဲ့ပြီး မွန်ပြည်သစ်ဘက်က ၁ ဦး သေဆုံးသွားတယ်လို့ နယ်မြေရဲစခန်းကနေ သိရပါတယ်။  ရေး-မော်လမြိုင် သွားကားလမ်း အာယုတောင်ကျေးရွာရှိ ခမ်းသင်းတံတားအနီး မွန်ငြိမ်းချမ်းရေးကာကွယ်ရေး မွန်ပြည်သူ့စစ်ဌာန အမှတ်(၃) တပ်ရင်းက တပ်ဖွဲ့ဝင်တွေနဲ့ မွန်ပြည်သစ်ပါတီ တပ်ဖွဲ့ဝင်တွေ မနေ့ည ၇ နာရီလောက်က  ၅ မိနစ်အကြာ အပြန်အလှန် ပစ်ခတ်မှုဖြစ်ခဲ့တာပါ။ နှစ်ဖက် အပြန်အလှန် ပစ်ခတ်မှုဖြစ်ပွားခဲ့ကြရာမှာ  မွန်ငြိမ်းရေး ကာကွယ်ရေး ပြည်သူ့စစ်တပ်ဖွဲ့ဘက်က ထိခိုက်ဒဏ်ရာရသူမရှိပေမယ့် မွန်ပြည်သစ်ပါတီဘက်က တပ်ဖွဲ့ဝင် တစ်ဦး သေနတ် ဒဏ်ရာ ၂ ချက်နဲ့ သေဆုံးသွားတယ်လို့ ရေးမြို့မရဲစခန်းက   အတည်ပြုပြောပါတယ်။ သေဆုံးသူရဲ့ အလောင်းနဲ့အတူ  ပစ္စတို လက်နက်ငယ် ၁ လက်ကိုလည်း ရဲတပ်ဖွဲ့က စစ်ဆေးတွေ့ရှိခဲ့ပါတယ်။  အခင်းဖြစ်ပွားပြီးနောက် နယ်မြေခံတပ်ရင်းနဲ့ ရဲတပ်ဖွဲ့ဝင်တွေ နယ်မြေရှင်းလင်းပြီးနောက် မွန်ငြိမ်းချမ်းကာကွယ်ရေး ပြည်သူ့စစ်အဖွဲ့ကို စစ်ဆေးမှုပြုလုပ်ခဲ့ပြီး သေဆုံးသူရဲ့ ရုပ်အလောင်းကိုတော့ ရေးမြို့ပြည်သူ့ဆေးရုံကို လွှဲပြောင်းပေးအပ်ခဲ့တယ်လို့ ရဲတပ်ဖွဲ့ဝင်က ပြောပါတယ်။ သေဆုံးသူဟာ မွန်ပြည်ပါတီဗဟိုရုံးအဖွဲ့က ခရိုင်ကော်မတီဝင် ဖြစ်ပြီး ပစ်ခတ်မှုဖြစ်ရတဲ့ အကြောင်းရင်းကို ထုတ်ဖေါ်ပြောဆိုခြင်းမရှိပေမဲ့ မွန်ပြည်သစ်ပါတီဘက်က အရင်မပစ်ခဲ့ဘူးလို့ မွန်ပြည်သစ်ပါတီ ရေးမြို့ နယ်ဆက်ဆံရေးရုံး တာဝန်ရှိသူတစ်ဦးက ပြောပါတယ်။ အခုလို တပ်ဖွဲ့ဝင်တဦး သေဆုံးသွားတဲ့ အပေါ်မှာ မွန်ပြည်သစ်ပါတီဘက်က ရေးမြို့မရဲစခန်းမှာ တရားလိုပြုလုပ် အမှုဖွင့်ထားတယ်လို့လည်း  ပြောပါတယ်။ လက်နက်ကိုင်အဖွဲ့နှစ်ဖွဲ့ အပြန်အလှန်ပစ်ခတ်မှုဖြစ်ပွားရတဲ့ အကြောင်းရင်းကို သက်ဆိုင်ရာ အဖွဲ့စည်းတွေက စုံစမ်းစစ်ဆေးမှုတွေပြုလုပ်နေဆဲဖြစ်ပါတယ်။  ၂၀၂၀ ပြည့်နှစ်အတွင်း  မွန်ပြည်သစ်ပါတီတပ်ဖွဲ့နဲ့  မွန်ငြိမ်းချမ်းရေးကာကွယ်တပ်ဖွဲ့ဝင်တွေ အကြားပစ်ခတ်မှုဟာ  ပထမအဆုံးအကြိမ် ဖြစ်ပါတယ်။  သတင်း- နေမျိုးထွဋ် (ရေး)
5 months Ago
More News
Up