မွန်ပြည်နယ်အစိုးရအဖွဲ့

March 7, 2020

ယာဉ်တိုက်မှု သက်သေခံပစ္စည်း ဖျောက်ဖျက်သည့် ရဲဝန်ထမ်းများကို အရေးယူပေးရန် တောင်းဆို

ယာဉ်တိုက်မှုဖြစ်စဉ်မှာ သက်သေခံပစ္စည်းဖြစ်တဲ့ မွန်ပြည်နယ်အစိုးရအဖွဲ့ ယာဉ်တံဆိပ်ကို ဖျောက်ဖျက်ခဲ့တဲ့ ရဲဝန်ထမ်းတွေကို အရေးယူပေးဖို့ လူမှုကယ်ဆယ်ရေးအဖွဲ့တွေက တောင်းဆိုလိုက်ပါတယ်။ မော်လမြိုင်မြို့ ဒေါင်းဇရပ်မီးပွိုင့်မှာ မတ် ၄ ရက်နေ့ ည ၁၁ နာရီအချိန်လောက်မှာ ဗိုလ်ချုပ်ထိန်မောင် ဦးဆောင်တဲ့ ကရင်အမျိုးသားလွတ်မြောက်ရေးတပ်မတော် KNLA/PC အဖွဲ့မှ ဗိုလ်မှူးစောငွေကြည် မောင်းလာတဲ့ကားဟာ ဆိုင်ကယ်တစီးကိုတိုက်ပြီး ထွက်ပြေးလာတာကို ဘိုဘိုဝင်း လူမှုကယ်ဆယ်ရေးအဖွဲ့က ဖမ်းဆီးနိုင်ခဲ့တာပါ။ ဒီယာဉ်တိုက်မှုဖြစ်ခဲ့တဲ့ ဗိုလ်မှူးစောငွေကြည် မောင်းလာတဲ့ ကားမှာ  တပ်ဆင်ထားတဲ့ သက်သေခံပစ္စည်းဖြစ်တဲ့ မွန်ပြည်နယ်အစိုးရအဖွဲ့ယာဉ်တံဆိပ်၊ ဆောက်လုပ်ရေးဌာန တံဆိပ်တွေကို ဘိုဘိုဝင်း လူမှုကယ်ဆယ်ရေးအဖွဲ့က သက်ဆိုင်ရာယာဉ်ထိန်းရဲတပ်ဖွဲ့ကို လွှဲပြောင်းပေးအပ်ခဲ့ပေမယ့် မတ် ၅ ရက်နေ့မှာ ဒီကတ်ပြားတွေ ပျောက်ဆုံးသွားခဲ့တာပါ။ ဒါကြောင့် ယာဉ်တိုက်မှု ဖြစ်စဉ်မှာ သက်သေခံပစ္စည်းဖြစ်တဲ့ မွန်ပြည်နယ်အစိုးရအဖွဲ့ ယာဉ်တံဆိပ်ကို ဖျောက်ဖျက်ခဲ့တဲ့ ရဲဝန်ထမ်းတွေကို အရေးယူပေးဖို့ ဘိုဘိုဝင်း လူမှုကယ်ဆယ်ရေးအဖွဲ့ ဥက္ကဋ္ဌ ဦးဘိုဘိုဝင်းကက မတ် ၆ ရက်မှာ သတင်းစာရှင်းလင်းပြီး တောင်းဆိုလိုက်ပါတယ်။ “သက်သေခံပစ္စည်းကို ဖျောက်ဖျက်မှတော့ ပြည်သူပါဝင်မှု၊ ကျနော်တို့ပါဝင်မှုအနေနဲ့ကျတော့ ဘာထူးတော့မှာလဲ။ ကျနော်တို့က ဖမ်းပေးတယ်။ ရဲအလုပ်ကိုလည်း ကိုယ့်အလုပ်လို သဘောထားပြီး ကူညီဆောင်ရွက်ပေးတယ်။ အခုတော့ ရဲက သက်သေခံ‌ပစ္စည်းတွေ ဖျောက်ဖျက်တဲ့အတွက် ကျနော်တို့လည်း ပါဝင်တဲ့အတွက် အများကြီးလည်း နစ်နာတယ်။ ပိုပြီးတော့လည်း ဆုတ်ယုတ်တယ်။ မြို့အတွက်လည်း ဂုဏ်သိက္ခာကျပါတယ်။ ဒီလို အကျင့်ပျက်ဝန်ထမ်းတွေ ကျနော်တို့မြို့အပေါ်ရော၊ အစိုးရအပေါ်ရော သစ္စာစောင့်သိမှု မရှိဘူး။ အရေးကြီးတဲ့ သက်သေခံပစ္စည်းတွေကို ဖျောက်ဖျက်တဲ့ ဝန်ထမ်းတွေကို ထိထိရောက်ရောက် အရေးယူပေးဖို့ ဒီနေရာကနေ ပြင်းပြင်းထန်ထန် ပြောချင်တယ်။” ယာဉ်တိုက်မှု ဖြစ်စဉ်တွေမှာလည်း လူမှုကယ်ဆယ်ရေးအဖွဲ့တွေဟာ သက်သေခံပစ္စည်းတွေကို ဘယ်တုန်းကမှ ယူဆောင်ခဲ့တာမရှိတဲ့အပြင် ရဲတပ်ဖွဲ့ကလည်း ယူပိုင်ခွင့် မပေးအပ်ထားတဲ့အတွက်ကြောင့် အခုကိစ္စရပ်အပေါ် မေးခွန်းထုတ်စရာ ဖြစ်နေတယ်လို့ လူမှုကယ်ဆယ်ရေးအဖွဲ့မှ မသော်တာက ဆိုပါတယ်။ “ကျမတို့က သူတို့ကို ယုံကြည်လို့ သက်သေခံပစ္စည်းတွေ အကုန်လုံးပုံပြီး အပ်လိုက်တာ။ ကျမတို့လည်း ယူပိုင်ခွင့်မရှိဘူးဆိုတာ သိတယ်။ တခု မေးချင်တာက ကယ်ဆယ်ရေးအဖွဲ့တွေ ယူသွားလား၊ ပျောက်သွားတယ် ဆိုတာက အဲဒီလို မတော်တဆဖြစ်တဲ့အချိန်မှာ ဒီပစ္စည်းတွေကို ကျမတို့ ယူပိုင်ခွင့်၊ သိမ်းပိုင်ခွင့်ရှိလား၊ သူတို့ကရော လက်ခံလား။” မွန်ပြည်နယ် လုံခြုံရေးနဲ့ နယ်စပ်ရေးရာဝန်ကြီးကတော့ အခုယာဉ်တိုက်မှု ဖြစ်စဉ်နဲ့ မွန်ပြည်နယ်အစိုးရအဖွဲ့ ယာဉ်တံဆိပ်အတု တပ်ဆင်မောင်းနှင်မှုကို စုံစမ်းစစ်ဆေးနေပြီး ဥပဒေနဲ့အညီ တရားစွဲဆိုသွားမယ်လို့ မွန်ပြည်နယ် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးနေထွဋ်ဦးက ပြောပါတယ်။ “အတုလုပ် ဆောင်ရွက်တယ်ဆိုတာတော့ အကြမ်းဖျင်း သိရတယ်။ ဒါကိုတော့ သက်ဆိုင်ရာ ရဲတပ်ဖွဲ့က စစ်ဆေးနေတဲ့အပိုင်းတွေ ရှိပါတယ်။ စိစစ်လို့ အတုဖြစ်တယ် သေချာရင် ဒါနဲ့ပတ်သက်ပြီး အစိုးရအဖွဲ့ကနေ ထုတ်ပေးတဲ့ဌာနအနေနဲ့ တရားစွဲဆိုသွားဖို့ ရှိပါတယ်။” လက်ရှိမှာတော့ ယာဉ်တိုက်မှုဖြစ်ခဲ့တဲ့ ယာဉ်မောင်း ဗိုလ်မှူးစောငွေကြည်ကို မုပွန် နယ်မြေရဲစခန်းမှာ ရာဇသတ်ကြီးဥပဒေပုဒ်မ ၂၇၉ ၊ ၃၃၇ ၊ ၃၃၈ အပြင် လိုင်စင်မဲ့ယာဉ် အသုံးပြုမှု သွင်းကုန်ထုတ်ကုန် ဥပဒေ ပုဒ်မ ၈ တို့နဲ့ အမှုဖွင့် အရေးယူထားတယ်လို့ သိရပါတယ်။ ဇော်လွင်ထွဋ်
1 year Ago

February 23, 2020

မွန်ပြည်နယ်အစိုးရအဖွဲ့၏ သဘာဝဘေးရန်ပုံငွေ သုံးစွဲမှု ပြန်စိစစ်မည်

မွန်ပြည်နယ် အစိုးရအဖွဲ့ရဲ့ သဘာဝဘေးရန်ပုံငွေ သုံးစွဲမှုတွေကို ပြန်လည် စိစစ်သွားမယ်လို့ မွန်ပြည်နယ်လွှတ်တော် ပြည်သူ့ငွေစာရင်းကော်မတီ အတွင်းရေးမှူးက ပြောပါတယ်။  မွန်ပြည်နယ်ဟာ ပြီးခဲ့တဲ့နှစ် သြဂုတ်လဆန်းပိုင်းမှာ ရေကြီးရေလျှံတာနဲ့ မြေပြိုတာတွေ ဖြစ်ပေါ်ခဲ့တာ ဖြစ်ပြီး လမ်း၊ တံတား၊ နေအိမ် အဆောက်အဦများစွာ ထိခိုက်ပျက်စီးခဲ့ပါတယ်။  အခုအခါမှာတော့ အစိုးရအဖွဲ့ဟာ ပြန်လည်ထူထောင်ရေးလုပ်ငန်းတွေကို ပြည်နယ် ရန်ပုံငွေအပြင် သဘာဝဘေးမှာ နိုင်ငံတဝန်းက လှူဒါန်းထားတဲ့ အလှူငွေ ကျပ်သန်းပေါင်း ၁၈၀၀ ကျော်နဲ့ ပြန်လည်ထူထောင်ရေးလုပ်ငန်းတွေ လုပ်ဆောင်နေတာပါ။ ဒါကြောင့် ရန်ပုံငွေ သုံးစွဲဆောင်ရွက်မှုတွေကို ပွင့်လင်းမြင်သာစွာ ချပြပေးဖို့ ဒေသခံတွေက တောင်းဆိုနေကြပါတယ်။ အခုလို အခြေအနေကြောင့် အစိုးရရဲ့ သဘာဝဘေး ပြန်လည်ထူထောင်ရေး လုပ်ငန်းတွေမှာ သုံးစွဲခဲ့တဲ့ ရန်ပုံငွေတွေကို ပြန်လည်စိစစ်သွားမယ်လို့ မွန်ပြည်နယ် လွှတ်တော် ပြည်သူ့ငွေစာရင်း စိစစ်ရေးကော်မတီအတွင်းရေးမှူး ဦးဇော်ဇော်ထူးက ပြောပါတယ်။ “အချက်အလက် တောင်းခွင့်ရှိတယ်။ သုံးထားတဲ့ ဘီလီယံ ၉ ထောင်ကျော်နဲ့ပတ်သက်ပြီး လူထုတွေအတွက် သုံးထားတဲ့ ငွေပမာဏကိုပဲ ဘယ်ဘတ်ဂျက်ခေါင်းစဉ်အောက်က သုံးထားလဲ၊ ဘယ်လိုတွေ သုံးတာလဲဆိုတာ ပြန်လည်စိစစ်ဖို့တော့ရှိတယ်။” မွန်ပြည်နယ် အစိုးရအဖွဲ့ကတော့ သဘာဝဘေး ပြန်လည်ထူထောင်ရေးလုပ်ငန်းတွေထဲမှာ ပညာရေးကဏ္ဍမှာ အများဆုံး အသုံးပြုထားတယ်လို့ ဆိုပါတယ်။ ဒါ့အပြင် မလတ်တောင် ပြိုကျမှုကြောင့် နေအိမ်ပျက်စီးခဲ့တဲ့ ဒေသခံတွေကို ကျပ်သိန်း ၁၂၀ ဝန်းကျင်၊ အိမ်ရာ ၂၃ လုံးအတွက် ငွေကျပ် သိန်း ၉၀၀၀ ကျော် ကုန်ကျခံ တည်ဆောက်ပေးထားတယ်လို့ မွန်ပြည်နယ် စည်ပင်သာယာရေးနှင့်ဆောက်လုပ်ရေး ဝန်ကြီး ဦးမင်းကျော်လွင်က ပြောပါတယ်။ “ပျက်စီးဆုံးရှုံးသွားတာတွေကို အစိုးရအနေနဲ့ ရရှိထားတဲ့ သဘာဝဘေးဒဏ် ရန်ပုံငွေထဲကနေ အတတ်နိုင်ဆုံး ကြိုးစားပြီး ဆောင်ရွက်ပေးထားပါတယ်။ သိန်း ၁၂၀ လောက် ကုန်တယ်။ အဲဒီနေရာရောက်တဲ့အထိ ရေရယ်၊ လမ်းရယ်၊ မီးတွေကအစ အဆင်သင့် နေထိုင်နိုင်အောင် ဆောင်ရွက်ပေးထားတာပါ။ သိန်း ၉ ထောင်ကျော် ပြန်သုံးထားပါတယ်။” မွန်ပြည်နယ်လွှတ်တော် ဒုဥက္ကဋ္ဌ ဒေါက်တာအောင်နိုင်ဦးကတော့ အစိုးရအနေနဲ့ သဘာဝဘေးမှာ ရရှိခဲ့တဲ့ အလှူငွေတွေနဲ့ သုံးစွဲဆောင်ရွက်မှုကို ပြည်သူတွေကို ပြန်လည်ချပြသင့်တယ်လို့ အကြုံပြုပါတယ်။ “အစိုးရအဖွဲ့က ကိုယ့်ရဲ့စီမံခန့်ခွဲပိုင်ခွင့်ရှိတဲ့အနေအထားနဲ့ စီမံပေးတဲ့ ကိန်းဂဏန်းပမာဏ၊ တနည်းအားဖြင့် ပြန်လည်ထူထောင်ရေးလုပ်ငန်းပဲဖြစ်ဖြစ်၊ ချက်ချင်း ဖြစ်သွားတဲ့ကိစ္စတွေမှာ သွားထောက်ပံ့တာတွေပေါ့။ အဲဒီကိန်းဂဏန်းတွေ အကုန်လုံး လူထုကို ပြန်ချပြသင့်တယ်လို့ ကျနော် ယူဆတယ်။” ဒါ့အပြင် လွှတ်တော်အနေနဲ့ သဘာဝဘေးမှာ အစိုးရအဖွဲ့က သုံးစွဲ ဆောင်ရွက်ခဲ့တဲ့ ရန်ပုံငွေနဲ့ ကိန်းဂဏန်း အချက်အလက်တွေကို တောင်းဆိုခဲ့ပေမယ့် ယနေ့အချိန်အထိ ပို့ပေးလာခြင်း မရှိသေးဘူးလို့ ဆိုပါတယ်။ မွန်ပြည်နယ်ဟာ ပြီးခဲ့တဲ့နှစ် သဘာဝဘေးကြောင့် လူပေါင်း ၈၀ အထိ သေဆုံးခဲ့ပြီး၊ ပျက်စီးဆုံးရှုံးမှုအနေနဲ့ ကျပ်သန်း ၁၂၀၀၀ လောက် ဆုံးရှုံးခဲ့တာပါ။  ဇော်လွင်ထွဋ်
1 year Ago
Up