မြောက်ဦးမြို့

November 24, 2022

မြောက်ဦးမြို့တွင် ခမီနှစ်သစ်ကူးပွဲ အကျဉ်းရုံးကျင်းပ

ရခိုင်တိုင်းရင်းသားမျိုးနွယ်စုဝင် တခုဖြစ်တဲ့ ခမီလူမျိုးတို့ရဲ့ ၆ ကြိမ်မြောက် နှစ်သစ်ကူးပွဲ အခမ်းအနားကို မြောက်ဦးမြို့ မြို့တော်ခန်းမမှာ နိုဝင်ဘာ ၂၃ ရက် မနက်က ပထမဆုံးအကြိမ် အကျဉ်းရုံးကျင်းပခဲ့ပါတယ်။

 ပွဲကျင်းပရေးကော်မတီ တာဝန်ရှိသူလည်းဖြစ်၊ ခမီစာပေနှင့် ယဉ်ကျေးမှုအသင်း ဥက္ကဋ္ဌလည်းဖြစ်သူ ဦးလေကျော်အောင်က “ကျနော်တို့က ​အစကတည်းက မြောက်ဦးမှာကျင်းပဖို့ ပြည်နယ်အစိုးရကို ခွင့်ပြုချက် တင်ထားတာ။ ခွင့်ပြုချက်မရရင် စစ်တွေမှာ ကျင်းပမယ်ဆိုပြီး စစ်တွေကို ကျနော်ကိုယ်တိုင် ဆင်းလာပြီး ပြည်နယ်အစိုးရအဖွဲ့နဲ့ သွားတွေ့တယ်။ အစိုးရအဖွဲ့က မြောက်ဦးမှာပဲ လုပ်ပါဆိုပြီး ထောက်ပံ့ငွေတွေပါပေးပြီး တရားဝင်ခွင့်ပြုလိုက်လို့ မြောက်ဦးမှာ ပထမဆုံးအကြိမ် အကျဥ်းရုံး ကျင်းပခဲ့ကြရတယ်။”လို့ပြောပါတယ်။

စိတ်သစ်၊ အတွေးသစ်တွေနဲ့ အဖျားရောဂါတွေ ကင်းဝေးပြီး ဘေးအန္တရာယ် မကျရောက်နိုင်စေဖို့နဲ့ မိသားစုတခုလုံး တရွာလုံး၊ တမျိုးသားလုံး ရှေးယခင် ဘိုးဘွားဘီဘင် လက်ထက်ကတည်းက အခုလိုမျိုး အစဥ်အလာမပျက် ကျင်းပရတာလို့ ခမီတိုင်းရင်းသားလူကြီးတဦးက ​ပြောပါတယ်။

မြောက်ဦးမြို့မှာကျင်းပတဲ့ ခမီ နှစ်သစ်ကူးပွဲ အခမ်းအနားမှာ ရခိုင်နဲ့ ခမီလူမျိုးစုတွေရဲ့ ရိုးရာအကတွေနဲ့ ဖြေဖျော်ခဲ့ကြပြီး ဌာနဆိုင်ရာတွေ အပါအဝင် လူဦးရေ ၂၀၀ ခန့်သာ တက်ရောက်ခဲ့ကြပါတယ်။

အရင်နှစ်တွေက ကျင်းပခဲ့ကြတဲ့ ခမီနှစ်သစ်ကူးနေ့မှာ ရခိုင်မျိုးနွယ်စုဝင်တွေ ဖြစ်ကြတဲ့ မရာမာကြီး၊ သက္ကမ၊ ဒိုင်းနက် စတဲ့ တိုင်းရင်းသားတွေအပြင် ချင်းတိုင်းရင်းသား စာပေနှင့် ယဥ်ကျေးမှုအဖွဲ့ပါ တက်ရောက်နိုင်ခဲ့ကာ စည်ကားစွာ ကျင်းပနိုင်ခဲ့ပြီး အခုနှစ်မှာတော့ လမ်းပန်းဆက်သွယ်ရေးနဲ့ လုံခြုံရေးအခြေအနေအရ တက်ရောက်နိုင်ခြင်းမရှိကြဘူးလို့ ဦးလေကျော်အောင်က ဆိုပါတယ်။

နတ်တော်လဆန်း ၁ ရက်မှာ ကျရောက်တဲ့ ခမီနှစ်သစ်ကူးနေ့ ပထမအကြိမ်နဲ့ ဒုတိယအကြိမ်ကို ဘူးသီးတောင်မြို့နယ် လောင်းချောင်းကျေးရွာမှာ ကျင်းပခဲ့ပြီး တတိယအကြိမ်ကို ပုဏ္ဏားကျွန်းမြို့နယ် ကျင်းပခဲ့ကြပါတယ်။

စတုတ္ထအကြိမ်ကို ကိုဗစ်ကာလကြောင့် ကျင်းပနိုင်ခြင်းမရှိခဲ့ဘဲ ပဥ္စမအကြိမ်မြောက်ကိုတော့ စစ်တွေမြို့မှာ ပြုလုပ်ခဲ့ပြီး အခုနှစ်မှာတော့ မြောက်ဦးမြို့မှာ ပထမဆုံးအကြိမ် ပြုလုပ်တာ ဖြစ်ပါတယ်။

ခမီလူမျိုးတွေဟာ ရခိုင်ပြည်နယ်အတွင်း မြောက်ဦးအပါအဝင် ကျောက်တော်၊ ပုဏ္ဏားကျွန်း၊ ပေါက်တောနဲ့ ဘူးသီးတောင်မြို့နယ်တွေမှာ နေထိုင်ကြပြီး တပြည်လုံးမှာ လူဦးရေ ၁ သိန်းကျော်ရှိတယ်လို့ သိရပါတယ်။

2 weeks Ago

September 23, 2022

မြောက်ဦးမြို့ မြို့ဦးခေါင်း စစ်ဘေးရှောင်စခန်းတွင် ရိက္ခာပြတ်တောက်

ရခိုင်ပြည်နယ်၊ မြောက်ဦးမြို့ ​မြို့ဦးခေါင်း စစ်ဘေးရှောင်စခန်းမှာ ဆန်ရိက္ခာပြတ်တောက်ပြီး မလုံလောက်တာကြောင့် စစ်ဘေးရှောင်တွေ ဆန်ပြုတ်စားသုံးနေကြရတယ်လို့ စခန်းတာဝန်ခံတွေနဲ့ စစ်ဘေးရှောင်တွေက ပြောပါတယ်။

​မြို့ဦးခေါင်း စစ်ဘေးရှောင်စခန်းဟာ ICRC ရဲ့ ရိက္ခာထောက်ပံမှုကို အဓိကမှီခိုနေကြရပြီး လက်ရှိမှာ စစ်ကောင်စီက NGO/INGO အဖွဲ့တွေကို ရခိုင်ပြည်နယ်က မြို့နယ်ခြောက်ခုကို ကူညီထောက်ပံ့မှုတွေ ပိတ်ပင်လိုက်တာကြောင့် ရိက္ခာပြတ်တောက်ပြီး ဆန်ပြုတ်ကိုသာ စားသုံးနေကြရတယ်လို့ စစ်ဘေးရှောင်အမျိုးသမီးတယောက်က ပြောပါတယ်။

“အရင်တုန်းကတော့ ကျမတို့စခန်းကို ICRC က ဆန်နဲ့ တခြားအသုံးအဆောင်တွေ ထောက်ပံ့နေတာဖြစ်တယ်။ အခု NGO တွေကိုလည်း ကူညီခွင့် ပိတ်ပင်လိုက်တော့ ကျမတို့မှာ စားသောက်ဖို့ ဆန်က မရရှိတော့ဘူး။ အခု ရှိတာလေးကိုပဲ ဆန်ပြုတ်ကျိုပြီးတော့ မဝ ဝမ်းစာ စားသောက်နေကြရတာဖြစ်တယ်။ အပြင်မှာထွက်ပြီး အလုပ်လုပ်ဖို့ကလည်း ဒေသမတည်ငြိမ်တာကတကြောင်း၊ ကုန်စျေးနှုန်းကလည်း အဆမတန် မြင့်တက်နေတော့ ကျမတို့မှာ တော်တော်လေးကို အခက်အခဲတွေ တွေ့နေကြရတယ်” လို့ ပြောပါတယ်။

ရခိုင်ပြည်နယ်မှာ တိုက်ပွဲတွေ ပြင်းထန်လာပြီးနောက် စစ်ကောင်စီက လုံခြုံရေး အကြောင်းပြပြီး မောင်တော၊ ဘူးသီးတောင်၊ ရသေ့တောင်၊ မြောက်ဦး၊ မင်းပြား၊ မြေပုံ စတဲ့ ခြောက်မြို့နယ်ကို NGO/INGO တွေ ခရီးသွားလာခွင့်၊ ကူညီထောက်ပံ့ခွင့်တွေ စက်တင်ဘာ ၁၆ ရက်နေ့ကတည်းက ပိတ်ပင်လိုက်တာ ဖြစ်ပါတယ်။

လက်ရှိမှာ ကျန်ရှိနေတဲ့ ဆန်တွေကို ဆန်ပြုတ်ကြိုပြီး ကလေးတွေနဲ့ သက်ကြီးရွယ်အိုတွေကို အဓိက ကျွေးနေကြရတယ်လို့ စခန်းတာဝန်ခံ ဦးဝင်းနိုင်က ပြောပါတယ်။

“ကျနော်တို့မှာ ဆန်ရိက္ခာက မနေ့ကတည်းက ပြတ်သွားတာ။ အခါက တချို့အိမ်တွေမှာ ကျန်ရှိနေသေးတဲ့ဆန်တွေကို ပေါင်းပြီးတော့ ဆန်ပြုတ်ကြိုပြီး ကလေးတွေနဲ့ အိုမင်းနေသူတွေကို အဓိကကျွေးနေကြရတယ်။ လောလောဆယ်မှာတော့ အရပ်ဘက် CSO တွေထံမှာတော့ အကူအညီ တောင်းခံထားတာတွေရှိတယ်။ ဒီနေ့မှာလည်း ဆရာတော်တပါးက စစ်ဘေးရှောင်တွေအတွက် ငွေ ၅ သိန်း လာလှူသွားတယ်။ အဲဒါကိုတော့ မနက်ဖြန်မှပဲ စားသောက်ဖို့ စီစဉ်ရမယ်။”

မြို့ဦးခေါင်း စစ်ဘေးရှောင်စခန်းမှာ ပလက်ဝ၊ ကျောက်တော်၊ မြောက်ဦး မြို့နယ် ၃ ခုရှိ ကျေးရွာ ၁၁ ရွာက အိမ်ထောင်စု ၁၉၁ စုက လူဦးရေ ၇၉၂ ယောက် ခိုလှုံနေကြတာ ဖြစ်ပါတယ်။

3 months Ago
More News
Up