မြောက်ဦး

November 23, 2022

မြောက်ဦးတွင် ကျောင်းသူ ၁၂ ဦး အသက်ရှူကျပ်ပြီး အရေးပေါ် ဆေးရုံတင်ထားရ

ရခိုင်ပြည်နယ်၊ မြောက်ဦးမြို့နယ်၊ ကျွဲတဲ အ.ထ.ကကျောင်းက ကျောင်းသူ ၁၂ ဦး နိုဝင်ဘာ ၂၃ နက် မနက်ပိုင်းက စာသင်နေချိန်မှာ အသက်ရှူမွန်းကျပ်လာတာကြောင့် မြောင်ဘွေ့တိုက်နယ်ဆေးရုံးမှာ အရေးပေါ်ဆေးကုသမှု ခံယူနေကြရတယ်လို့ ကျွဲတဲ အ.ထ.က ကျောင်းမှ ဆရာတဦးက ပြောပါတယ်။

အခု အသက်ရှူမွန်းကျပ်ပြီး ဆေးကုသမှု ခံယူနေကြရသူတွေအားလုံးဟာ ကျောင်းသူတွေ ဖြစ်ကြပြီး ဘာကြောင့် အသက်ရှူမွန်းကျပ်လာကြတယ်ဆိုတာ မသိကြသေးဘူးလို့ ကျွဲတဲ အ.ထ.က က အထက်တန်းပြဆရာတဦးဖြစ်တဲ့ ဦးရွှေထွန်းကျော်က ပြောပါတယ်။

“ကလေးတွေက ကျောင်းတက်ဖို့ ရောက်ခါစပဲ ရှိကြသေးတယ်။ အဲဒီမှာ နဂိုရောဂါအခံရှိတဲ့ ကျောင်းသူတဦးက စပြီး အသက်ရှူ မွန်းကျပ်လာပြီးတော့ နောက်ထပ် ‌ရောဂါအခံရှိတဲ့ ကျောင်းသူနှစ်ဦး၊ သုံးဦးက ထပ်ပြီး မွန်းကျပ်လာကြတာဖြစ်တယ်။ အဲဒီနောက် ကျောင်းသူ နောက်ထပ် သုံးလေးယောက် တိုးလာပြီး အဲဒီလိုဖြစ်လာတဲ့ ကျောင်းသူတွေကို မြောင်ဘွေ့ဆေးရုံကို အရေးပေါ်ပို့ဆောင်လိုက်ရတယ်။ ကျောင်းကိုလည်း အဲဒီအချိန်ကတည်းက လွှတ်လိုက်ရတယ်။ နောက်ထပ် အိမ်ကိုရောက်ပြီး အသက်ရှူမွန်းကျပ်လာတဲ့သူတွေလည်း ရှိတယ်။ ဆေးရုံတင်ထားရတာ အားလုံးပေါင်းက ၁၂ ယောက် ရှိတယ်။ ဘာကြောင့်ဖြစ်တယ်ဆိုတာလည်း မသိရသေဘူး။”

အသက်ရှူမွန်းကျပ်တာကြောင့် ဆေးကုသမှုခံယူနေကြရသူတွေကတော့  Grade 10 ကျောင်းသူ ၇ ဦး  Grade 9 ကျောင်းသူ တဦး၊ Grade 7 ကျောင်းသူ ၄ ဦးတို့  ဖြစ်ကြပါတယ်။

အဆိုပါကျောင်းသူ ၁၂ ဦးရဲ့ ရောဂါအခြေအနေနဲ့ပတ်သက်ပြီး မေးမြန်းဖို့ မြောင်ဘွေ တိုက်နယ်ဆေးရုံ ဆရာဝန်ကို ဖုန်းနဲ့ဆက်သွယ်ခဲ့ပေမဲ့ လက်ခံဖြေကြားခဲ့ခြင်း မရှိပါဘူး။

ကျွဲတဲ အ.ထ.က ကျောင်းမှာ မူလတန်းမှ အထက်တန်းအထိ ကျောင်းသား ကျောင်းသူ ၅၀၀ ကျော်လောက် ပညာသင်ကြားနေတယ်လို့ သိရပါတယ်။

2 weeks Ago

မြောက်ဦးတွင် စစ်ကောင်စီတပ် ဖမ်းထားသည့် လူငယ် ၁ ဦး ပြန်လွတ်မြောက်

ရခိုင်ပြည်နယ်၊ မြောက်ဦးမြို့မှာ နိုဝင်ဘာ ၂၂ ရက် ညပိုင်း စစ်ကောင်စီတပ် ဖမ်းဆီးထားတဲ့ လူငယ်တယောက် ပြန်လည်လွတ်မြောက်လာတယ်လို့ ဒေသခံတွေဆီကနေ သိရပါတယ်။

မြောက်ဦးမြို့နယ် ညောင်ပင်လယ်ကျေးရွာက အသက် ၁၇ နှစ်အရွယ် ကိုမောင်ဆန်းဝင်းကို နိုဝင်ဘာ ၂၂ ရက် ည ၇ နာရီခွဲလောက်မှာ ခမရ ၃၇၇/၃၇၈ တပ်ရင်းက ပြန်လွှတ်ပေးလိုက်တာလို့ ဒေသခံတယောက်က ပြောပါတယ်။

ကိုမောင်ဆန်းဝင်းဟာ နိုဝင်ဘာ ၂၁ ရက် မနက် ၁၀ နာရီလောက်မှာ ညောင်ပင်လယ်ရွာကနေ စက်လှေနဲ့ မြောက်ဦးမြို့ကို မှတ်ပုံတင်ပြုလုပ်ဖို့ သွားတဲ့အချိန် စစ်ကောင်စီတပ်သားတွေနဲ့ ရဲ ၃၀ လောက်က အေအေတပ်ဖွဲ့ဝင်လို့ စွပ်စွဲပြီး မြောက်ဦးဆိပ်မှာ ဖမ်းဆီးခဲ့ကြတာလို့ ဆိုပါတယ်။

ဖမ်းဆီးခံရတဲ့အချိန်မှာ မျက်နှာကိုအုပ်ပြီး စစ်ကောင်စီတပ်သားတွေက ရိုက်နှက်နှိပ်စက်တာတွေ ပြုလုပ်ခဲ့ကာ အဲဒီလူငယ်လေး ပြန်လယ်လွတ်မြောက်ဖို့အတွက် ညောင်ပင်လယ်ရွာ အုပ်ချုပ်ရေးမှူးက အာမခံခဲ့ရပြီး ငွေ ၄၀၀,၀၀၀ ကျပ် ပေးခဲ့ရတယ်လို့ သတင်းကြားကြောင်း ဒေသခံက ပြောပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင့်တပ်တော် (အေအေ) တို့ တကျော့ပြန်တိုက်ပွဲတွေ ပြန်လည်စတင်ပြီးနောက်ပိုင်းမှာ သံဃာတော်တွေ၊ ပရဟိတသမားတွေ၊ သတင်းသမားတွေနဲ့ လူငယ်တွေကို ရက္ခိုင့်တပ်တော် (အေအေ) နဲ့ ဆက်စပ်တယ်လို့ စွပ်စွဲပြီး မတရားဖမ်းဆီးတာတွေ ဆက်တိုက်ပြုလုပ်နေတယ်လို့ သိရပါတယ်။

2 weeks Ago

October 20, 2022

မြောက်ဦးတွင် ပညာရေးဝန်ထမ်း ၂ ဦးအပါအဝင် ၃ ဦး ဖမ်းဆီးခံရ

ရခိုင်ပြည်နယ် မြောက်ဦးမြို့မှာ အောက်တိုဘာ ၁၉ ရက်နေ့ မနက်ပိုင်းမှာ ပညာရေးဝန်ထမ်း ၂ ယောက်နဲ့ ပြည်သူတယောက်ကို စစ်ကောင်စီတပ်က ဖမ်းဆီးသွားတယ်လို့ ​ဒေသခံတွေက ပြောပါတယ်။

​မြောက်ဦးမြို့ကနေ ဝေသာလီရွာဘက်ကို စာသွားသင်တဲ့ ဆရာ၊ ဆရာမတွေ စီးနင်းလာတဲ့ကားကို မနေ့ မနက် ၉ နာရီကျော်လောက် စစ်ကောင်စီတပ်က ထမ္မရာဇ်လမ်းဆုံမှာ စစ်ဆေးခဲ့ရာမှာ ကားလိုင်စင်မပါတာကြောင့် ပိုင်ရှင် ကျောင်းဆရာနဲ့ ဆရာမလင်မယား ၂ ယောက်ကို ဖမ်းဆီးလိုက်တာလို့ မြောက်ဦးဒေသခံ တယောက်က ဒီဗွီဘီကိုပြောပါတယ်။

ကားပေါ်မှာလိုက်ပါလာတဲ့ တခြား ဆရာ၊ ဆရာမတွေကိုတော့ ပြန်လွှတ်ပေးလိုက်ပြီး ကားသိမ်းဆည်းကာ ကျောင်းဆရာနဲ့ ဆရာမလင်မယားကို မြောက်ဦးမြို့မရဲစခန်း ခေါ်သွားကြတယ်လို့ ဆိုပါတယ်။

ဝေသာလီကျေးရွာက အသက် ၁၉ နှစ်အရွယ် မောင်ကိုနိုင်ကိုလည်း မနေ့က မွန်းတည့် ၁၂ နာရီလောက်မှာ မြောက်ဦးမြို့က ဆေးဝယ်ပြီး ပြန်လာတဲ့အချိန် ထမ္မရာဇ်လမ်းဆုံမှာ စစ်ကောင်စီတပ်က ဆေးဝါးတွေ တွေ့ရှိသွားလို့ AA အဖွဲ့ဝင် သံသယနဲ့ ဖမ်းဆီးသွားကြတာလို့ ပြောပါတယ်။

မောင်ကိုနိုင်ဟာ AA တပ်ဖွဲ့ဝင်မဟုတ်ဘဲ ကျန်းမာရေးဝန်ထမ်း မလုံလောက်လို့ ဆေးပညာသင်ယူကာ ကျေးရွာတွေကို လှည့်လည် ဆေးကုပေးနေတဲ့ သာမန်အရပ်သား လူငယ်တယောက်သာ ဖြစ်တယ်လို့ ဆိုပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင်တပ်တော် AA တို့ အခုနှစ် သြဂုတ်က စတင်ကာ တကျော့ပြန်တိုက်ပွဲတွေ ပြန်ဖြစ်ပြီးနောက်ပိုင်းမှာ မြို့အများအပြားမှာ စစ်ကောင်စီက လက်နက်ကြီးနဲ့ ပစ်ခတ်တာတွေ၊ ဧည့်စာရင်းစစ်ဆေးတာတွေ၊ ပရဟိတသမားတွေနဲ့ အပြစ်မဲ့ပြည်သူတွေကို မတရားဖမ်းဆီးတာတွေ၊ ခရီးသည်တင်ယာဥ်တွေနဲ့ ကုန်တင်ယာဥ်တွေ ကုန်းလမ်း၊ ရေလမ်းတွေအားလုံးကို ပိတ်ဆို့ပြီး စားနပ်ရိက္ခာနဲ့ ဆေးဝါးသယ်ယူခွင့် ဖြတ်တောက်တာတွေ ဆက်တိုက်ပြုလုပ်နေတယ်လို့ သိရပါတယ်။

2 months Ago
More News
Up