မြောက်ဥက္ကလာပ

November 30, 2022

‌မြောက်ဥက္ကလာနှင့် ရွှေပေါက္ကံမြို့သစ်ရှိ ရပ်ကွက်များတွင် စစ်ကောင်စီ ဧည့်စာရင်းဝင်စစ်

မင်္ဂလာဒုံက အိမ်ဖျက်ခံလိုက်ရတဲ့ သူတွေ ရန်ကုန်၊ မြောက်ဥက္ကလာပမြို့နယ်၊  (ည)ရပ်ကွက်၊ ရွှေပေါက္ကံမြို့သစ်နဲ့ ပုရွက်ဆိတ်ကုန်းရပ်ကွက်တွေမှာ ရွှေ့ပြောင်းနေထိုင်နေတယ်ဆိုပြီး နိုဝင်ဘာ ၂၉ ရက်ညပိုင်းက စစ်ကောင်စီအုပ်ချုပ်ရေးနဲ့ လ.ဝ.က အဖွဲ့ဝင်တွေ ဧည့်စာရင်းဝင်စစ်ခဲ့ပေမဲ့ ဖမ်းဆီးခံရသူတော့ မရှိဘူးလို့ ဒေသခံတွေက ပြောပါတယ်။ 

မြောက်ဥက္ကလာပ၊ ည ရပ်ကွက်ရှိ ဘုမ္မာလမ်းသွယ်တွေကို ည ၁၀ နာရီခွဲဝန်းကျင်နဲ့ ရွှေ‌ပေါက္ကံမြို့သစ်နဲ့ ပုရွက်ဆိတ်ကုန်းရပ်ကွက်တွေမှာတော့ ည ၁၂ နာရီလောက်မှာ ဝင်စစ်ဆေးခဲ့တာဖြစ်ပါတယ်။

ဧည့်စာရင်းမတိုင်သူတွေထဲက တချို့ကို စစ်ဆေးစရာရှိတယ်လို့ဆိုကာ ရုံးခေါ်သွားပြီး အဲဒီညပဲ ပြန်လွှတ်ပေးခဲ့တယ်လို့ သိရပါတယ်။

မြောက်ဥက္ကလာဒေသခံတစ်ဦးက “သူတို့က သတင်းအတိကျနဲ့ကို လာတာ၊ ဘယ်လမ်း၊ ဘယ်အိမ်မှာ ဘယ်သူ‌တွေ ပြောင်းလာသလဲပေါ့။ ဒီက လမ်းမှူးနဲ့ အုပ်ချုပ်ရေးမှူးတွေတောင် မသိရကောင်းမလား ဆိုပြီး အော်ငေါက်သွားသေးတယ်”လို့ ပြောပါတယ်။ 

လက်နက်ကိုင် ၈ ယောက်လောက် လိုက်ပါလာပြီး ရပ်ကွက်အုပ်ချုပ်ရေးနဲ့ လ.ဝ.က ဝန်ထမ်းတွေဟာ ရပ်ကွက်တွေထဲ ညပိုင်း ဝင်စစ်ဆေးခဲ့တာဖြစ်ပါတယ်။

ပုရွက်ဆိတ်ကုန်းရပ်ကွက်က ရပ်ကွက်ဓမ္မာရုံနဲ့ သံလမ်းဟောင်းက အိမ်တွေကို  ဒီဇင်ဘာလအတွင်း ဖျက်သိမ်းဖို့ သတ်မှတ်ထားတဲ့ နောက်ဆုံးရက်မှာ  မဖျက်ပေးပါက ဖျက်ခ ကျပ် ၃ သိန်းပေးရမယ်လို့  ခြိမ်းခြောက်‌သွားကြောင်း သိရပါတယ်။  

ရပ်ကွက်နေသူတဦးက “ဟိုတလောက ပျဉ်းမပင်မှာ ဖျက်တဲ့အိမ်တွေ ဒီဘက် ပြောင်းလာလား မေးတယ်။ ဒီရပ်ကွက်ထဲ မရှိသေးဘူးလို့ ပြောတော့ ရောက်လာတာနဲ့ သူတို့ကို အကြောင်းကြားဖို့ ပြောတယ်။ ဧည့်စာရင်းကိုလည်း စာအုပ်နဲ့အပြင် ဓာတ်ပုံနဲ့ပါ တိုင်ဖို့ ပြောသွားတယ်”လို့ ပြောပါတယ်။ 

ပြီးခဲ့တဲ့ နိုဝင်ဘာ ၂၅ ရက်ကစပြီး မြောက်ဥက္ကလာပမြို့နယ်အတွင်းက ရပ်ကွက်တချို့မှာ မင်္ဂလာဒုံမြို့နယ်က လာနေသူတွေကို ဧည့်စာရင်းမပေးဖို့နဲ့ အိမ်တွေ၊ အဆောင်တွေ ငှားရမ်းနေထိုင်ခွင့် မပေးဖို့ ညွှန်ကြားထားခံရတယ်လို့ အုပ်ချုပ်ရေးအဖွဲ့ထံက သိရပါတယ်။

18 hours Ago

November 28, 2022

မြောက်ဥက္ကလာပ၌ ၄ ရက်အတွင်း လုယက်ခံရမှု ၁၁ ကြိမ် ဖြစ်ပွား

ရန်ကုန်မြို့၊ မြောက်ဥက္ကလာပမြို့နယ်မှာ နိုဝင်ဘာလ ၂၅ ရက်ကနေ ၂၈ ရက်နေ့အတွင်း လုယက်မှု ၁၁ မှု ဖြစ်ပွားခဲ့ပြီး ကျူးလွန်သူတွေကို စစ်ကောင်စီလက်အောက်ခံ မြောက်ဥက္ကလာပရဲစခန်းက ဖမ်းဆီးအရေးယူတာမျိုး မတွေ့ရသေးဘူးလို့ ဒေသခံတွေက ပြောပါတယ်။

နိုဝင်ဘာလ ၂၅ ရက်နေ့က မြောက်ဥက္ကလာ ခေမာသီလမ်းမမှာ ရှိတဲ့ မြန်မာ့စီးပွားရေးဘဏ်မှာ ပင်စင်လာထုတ်သူတဦးရဲ့ ဖုန်းနဲ့ ပိုက်ဆံအိတ် အလုခံရတာ၊ သီရိရတနာကားဝန်းက ဘဏ်မှာ ပိုက်ဆံထုတ်လာတဲ့ ဝန်ထမ်းတဦး လုယက်ခံရတာ၊ အဝေးပြေးဝန်းအဝင် ကားဂိတ်မှာ ဆိုင်ကယ်ကယ်ရီသမား ဟန်ဆောင်ပြီး ဓားထောက်အလုခံရတာ၊ နိုဝင်ဘာ ၂၆ ရက်နေ့က ခြောက်ကွေ့၊ သုနန္ဒာလမ်းဆုံနဲ့ မေဓာဝီလမ်းမတွေမှာ ဆွဲကြိုးနဲ့ ဖုန်း အလုခံရမှု ၆ ကြိမ်၊ နိုဝင်ဘာ ၂၇ ရက်နေ့ ညပိုင်းမှာ အဝေးပြေးကားဂိတ်က တက္ကစီစီးရင်း လမ်းမှာ ဓားထောက်အလုခံရမှုနဲ့ နိုဝင်ဘာ ၂၈ ရက်နေ့ မနက်ပိုင်းမှာ မြောက်ဥက္ကလာရဲစခန်းရှေ့ ခေမာသီလမ်းမပေါ်က မြန်မာ့စီးပွားရေးဘဏ်အနားမှာ ပင်စင်ထုတ်ပြီး ပြန်လာသူရဲ့ ဖုန်းအပါအဝင် ပိုက်ဆံအိတ်နဲ့ ငွေသား ကျပ် ၂ သိန်းလောက် လုယက်ခံခဲ့ရတာလို့ သိရပါတယ်။

လုယက်ခံရသူတဦးက “သုနန္ဒာလမ်းဆုံမှာ ညနေ ၄ နာရီလောက်ပဲ ရှိသေးတယ် ညီမရဲ့ကောင်လေး ဖုန်းကိုင်ထားရင်းနဲ့ ဆွဲအလုခံလိုက်ရတာ၊ ဆိုင်ကယ်နဲ့ ကြိုးတံတားဘက် မောင်းပြေးသွားတယ်၊ အော်ပြီး အကူအညီတောင်းသေးတယ်။ ဘယ်သူမှ မလိုက်ပေးဘူး၊ စခန်းသွားတိုင်တော့ ဖုန်းရဲ့ IMEI ကုတ်မေးတယ်၊ ဝယ်ခဲ့တဲ့ ဘောက်ချာကိုတောင်းတယ်၊ အဲ့အချိန် သူတို့လိုက်ပေးရင်‌တောင် မိနေလောက်ပြီ" လို့ ပြောပါတယ်။

စစ်အာဏာသိမ်းပြီးနောက် အလုပ်အကိုင်ရှားပါးမှုနဲ့ အထွေထွေအကျပ်အတည်းတွေကြောင့် ရန်ကုန်မြိုရဲ့ ဆင်ခြေဖုံးနေရာတွေမှာ ခိုးဆိုးလုနှိက်သူတွေ ပေါများလာတာကို တွေ့ရပြီး လုယက်ခံရနေတဲ့ မြောက်ဥက္ကလာပ မြိုနယ်ရဲ့ နေရာအများစုက လမ်းဆုံတွေ ဖြစ်တဲ့ သုနန္ဒာ၊ ခြောက်ကွေ့၊ မေဓာဝီ၊ ဈ ဈေးလမ်းဆုံ၊ အဝေးပြေး၊ မြန်မာ့စီးပွား‌ရေးဘဏ်အရှေ့တို ဖြစ်တယ်လို့ သိရပါတယ်။

မြောက်ဥက္ကလာ အမှတ်၉ ရဲစခန်းနဲ့ နီးစပ်သူတဦးက “စခန်းက လုံးဝ မဖမ်းတာတော့ မဟုတ်ပါဘူး။ ဖမ်းတယ်၊ ပြီးရင် နည်းနည်းပါးပါး ဆုံးမပြီး ပြန်လွှတ်လိုက်တာ၊ တရားရုံးလည်း အသစ်ဆောက်တုန်းလေ၊ အမှုကြီးသမားတွေပဲ အထဲမှာ ထားတာ၊ အမှုပေါ်လို ဖုန်းဆက်ခေါ်ရင်တောင် အပိုင်နယ်ထိန်းနဲ့ တာဝန်ကျတဲ့သူ ၅ ယောက်တစ်စု လက်နက်နဲ့သွားဖို ညွှန်ကြားထားတာ" လို ပြောပါတယ်။

မြောက်ဥက္ကလာပမြို့နယ်ဟာ တောင်နဲ့မြောက်ဘက် အလျားလိုက်ဧရိယာအတွင်း ရပ်ကွက် ၁၉ ခု၊ မြိုသစ် ၂ ခု ပါဝင်ပြီး အောင်မင်္ဂလာအဝေးပြေး ကားဂိတ်နဲ့ လက်ကားဈေးဝန်းကြီးတွေ၊ ဘဏ်အများစု ရှိတာကြောင့် နယ်မှ လာသူတွေ၊ ငွေထုတ်သူတွေနဲ့ ဆိုင်တွေက ပြန်လာသူတွေကို ပစ်မှတ်ထားလုယက်နေတယ်လို့ ဈေးကဆိုင်ပိုင်ရှင်တဦးက ပြောပါတယ်။

“ဆိုင်သိမ်းပြီး ပြန်မလို ဈေးအဝလည်းရောက်ရော တယောက်က အနောက်က ကပ်လာပြီး တွန်းလိုက်တာ ‌အရှေ့ကို ယိုင်သွားတဲ့အချိန်မှာ ပိုက်ဆံအိတ်နဲ့ ဆွဲကြိုးကို ဖြတ်လုပြီး ပြေးတာ၊ နောက်တယောက်က ဆိုင်ကယ်နဲ့ စောင့်နေတယ်၊ အ‌နောက်က ကယ်ရီသမားတွေ လိုက်သေးတယ်၊ မမီတော့ဘူး။”

ပြီးခဲ့တဲ့ အောက်တိုဘာ ၂၀ ရက်မှ နိုဝင်ဘာ ၂၀ ရက်အတွင်း ရန်ကုန်မှာ လုယက်ခံရမှု အကြိမ် ၇၀ ကျော် ဖြစ်ပွားခဲ့ပြီး စစ်ကောင်စီဘက်က ဖမ်းဆီးအရေးယူမှု အားနည်းတဲ့အတွက် ရန်ကုန်မြို့က လူငယ်တချိုဟာ ခိုးဆိုးလုနှိုက်အန္တရာယ်ကာကွယ်ရေး ကိုယ်ထူကိုယ်ထအသင်း Fight the Theives FTT လို အသင်းတွေ ဖွဲစည်းလာခဲ့ကြပါတယ်။

3 days Ago
More News
Up