အန်အယ်လ်ဒီပါတီကို ထောက်ခံအားပေးတဲ့အနေနဲ့ နေပြည်တော်ကောင်စီ နယ်မြေ လုပ်ငန်းရှင်များအဖွဲ့ချုပ်က လုပ်ငန်းသုံးမြေသယ်ယာဉ် အစီး ၂၀၀ ကျော်နဲ့ အောက်တိုဘာ ၂၁ ရက် မနက်ပိုင်းက နေပြည်တော်မှာ လှည့်လည် အင်အားပြခဲ့ကြပါတယ်။
အစောပိုင်းက အစီး ၁၀၀ ခန့်လောက်နဲ့ လှည့်လည် အင်အားပြဖို့ စီစဉ်ထားခဲ့ပေမယ့် နောက်ထပ် ပူးပေါင်းပါဝင်လာသူတွေ ရှိလာတဲ့အတွက် အစီး ၂၀၀ ကျော်သွားတာဖြစ်တယ်လို့ လှည့်လည်ပွဲမှာ ဦးဆောင်ပါဝင်သူတစ်ဦးဖြစ်တဲ့ ကိုတိုးဝင်းက ပြောပါတယ်။
ကိုဗစ်-၁၉ ကပ်ရောဂါကာလမှာ လူစုလူဝေးမပြုလုပ်ဖို့ ကျန်းမာရေးနဲ့ အားကစားဝန်ကြီး ဌာနက တားမြစ်ထားပေမယ့် နိုင်ငံရေးပါတီအသီးသီးရဲ့ ဝန်းရံသူတွေကတော့ လှည့်လည်နေကြမြဲ ဖြစ်ပါတယ်။
ဒီအတွက် ဝေဖန်မှုတွေရှိနေပြီး ဒီနေ့အစီအစဉ်မှာ ပါဝင်တဲ့ ဝန်းရံသူတစ်ဦးဖြစ်တဲ့ ကိုဇော်ကြီးကတော့ ကိုဗစ်စည်းမျဉ်းစည်းကမ်းတွေနဲ့အညီ လှည့်လည်တာဖြစ်တယ်လို့ ပြောပါတယ်။
နေပြည်တော်ကောင်စီနယ်မြေ လုပ်ငန်းရှင်များအဖွဲ့ချုပ်ရဲ့ လုပ်ငန်းသုံးမြေသယ်ယာဉ်တွေနဲ့ လှည့်လည်မှုကို တပ်ကုန်းမြို့နယ်ကလွဲပြီး ကျန် ၇ မြို့နယ်ကို လှည့်လည်သွားမှာဖြစ်တယ်လို့လည်း သိရပါတယ်။
သတင်း - ဖြိုးသက်ပိုင်မြင့် (နေပြည်တော်)
2 years Ago
