မြေပုံမြို့နယ်

September 8, 2020

မြေပုံမြို့နယ် ညောင်ကန်ရွာတွင် လက်နက်ကြီးကျည်ထိမှန်ပြီး လူ ၄ ဦး သေ၊ ၈ ဦးဒဏ်ရာရ

ရခိုင်ပြည်နယ်၊ မြေပုံမြို့နယ်၊ ကမ်းထောင်းမြို့အနီးရှိ ညောင်ကန်ကျေးရွာမှာ စက်တင်ဘာ ၈ ရက်မနက်က လက်နက်ကြီးကျည်ကျရောက်ပေါက်ကွဲခဲ့ပြီး လူ ၄ ဦး သေဆုံးကာ ၈ ဦး ဒဏ်ရာရရှိသွားတယ်လို့ ကျေးရွာနေပြည်သူတွေက ပြောပါတယ်။ ဒဏ်ရာရသူ တွေထဲက လူ ၄ ဦး ကမ်းထောင်းကြီးမြို့ဆေးရုံမှာ ဆေးကုသဖို့ ရောက်ရှိနေပြီး ၁ ဦးမှာ ဦးခေါင်းဒဏ်ရာ ပြင်းထန်စွာရရှိထားတယ်လို့ မြေပုံမြို့နယ် ပြည်နယ် လွှတ်တော်ကိုယ်စားလှယ်လောင်း  ဦးရန်နိုင်စိုးက ပြောပါတယ်။ “ဒီနေ့ ၁၀ နာရီလောက်က အမ်းမြို့နယ်၊ ကဇူးကိုင်း ကျောက်ဆည်တောင်ဆိုတာ ရှိတယ်။ အဲဒီမှာတပ်စွဲထားတဲ့ စစ်တပ်ကနေပြီးတော့ လက်နက်ကြီးနဲ့ ပစ်တယ်။ အဲဒီအသံကို ကျနော်တို့ ကမ်းထောင်ကြီးက ကြားရတယ်။ ကျနော်တို့ကတော့ ဘယ်ဘက်ကို ပစ်တာလဲဆိုတာကို မသိဘူး ပေါ့။ ခဏနေတော့ ကျနော်တို့ဆီကို ဖုန်းလာတယ်။ ဒဏ်ရာရနေကြပြီ၊ သေနေကြပြီ ဆိုပြီးတော့ ပြောလာလို့ ကျနော်တို့ ကမ်းထောင်းကြီးနာရေးအသင်းက ကားတွေနဲ့သွားယူကြတော့ ညောင်ကန် ကနေပြီး လူနာတွေ လာပို့ကြတယ်။ သေတဲ့လူတွေထဲမှာတော့ ပေါက်တူးတောင်ကလည်း ပါတယ်။ ရူးကလည်း ပါတယ်လို့ သိရတယ်။” မြေပုံမြို့နယ် ညောင်ကန်ကျေးရွာကို တပ်မတော်မှ လက်နက်ကြီးနဲ့ ပစ်ခတ်ခဲ့ပြီး လူ ၄ ဦး သေဆုံးကာ လူ ၈ ဦး ဒဏ်ရာရရှိသွားတယ်ဆိုတဲ့ ပြောဆိုချက်တွေနဲ့ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့မှ ဗိုလ်ချုပ်ထွန်းထွန်းညီနဲ့ ဗိုလ်ချုပ်ဇော်မင်းထွန်းတို့ကို ဆက်သွယ်မေးမြန်းလို့  မရခဲ့ပါဘူး။ ရခိုင်ပြည်နယ်မှာ တပ်မတော်နဲ့ ရခိုင့်တပ်တော်တို့ တိုက်ပွဲပြင်းထန်စွာ ဖြစ်ပွားလာတာ ၂ နှစ်ဝန်းကျင်ရှိလာပြီးနောက် အရပ်သား ထိခိုက်သေဆုံးတာတွေ မကြာခဏ ရှိနေပါတယ်။ ဒေသခံပြည်သူတွေကတော့ တပ်မတော်က ကျေးရွာတွေကို ပစ်ခတ်တာလို့ စွပ်စွဲပြောပေမဲ့  တပ်မတော်သတင်းမှန်ပြန်ကြားအဖွဲ့က ဗိုလ်ချုပ်ထွန်းထွန်းညီကတော့ တပ်မတော်အနေနဲ့ ကျေးရွာတွေနဲ့ ပြည်သူတွေကို ပစ်ခတ်တာမရှိဘူးလို့ ပြောဆိုထားပါတယ်။ သတင်း- နောင်နောင်
8 months Ago

July 14, 2020

မြေပုံမြို့နယ် စစ်ဘေးရှောင်စခန်း ၂ ခုတွင် စားနပ်ရိက္ခာပြတ်လပ်နေ 

ရခိုင်ပြည်နယ်၊ မြေပုံမြို့နယ်ရှိ ရက်ချောင်းနဲ့ စညှင်း စစ်ဘေးရှောင်စခန်း နှစ်ခုမှာ စားနပ်ရိက္ခာ ပြတ်လပ်နေပြီး အကူအညီလိုအပ်နေတယ်လို့ လူမှုကယ်ဆယ်ရေးအဖွဲ့တွေက ပြောပါတယ်။ အဆိုပါ စစ်ဘေးရှောင် စခန်း နှစ်ခုမှာ လောလောဆယ် စားနပ်ရိက္ခာ ၁၅ ရက်လောက်စာကျန်ရှိပြီး အခုဆိုရင်နိုင်ငံတကာအဖွဲ့အစည်းတွေ အကူအညီပေးဖို့ မရောက်ရှိတာ ၅လကျော်ကြာသွားပြီလို့ စခန်းတာဝန်ခံ မြတန်ဆောင်းဆရာတော်က မိန့်ပါတယ်။ “လိုအပ်တာကတော့ အိမ်သာမရှိ အခက်အခဲဖြစ်တယ်။ နောက်တစ်ခုက စားနပ်ရိက္ခာ။ မနေ့ကတော့ ဒေသတွင်းကတစ်ဖွဲ့ စားနပ်ရိက္ခာနည်းနည်း လာလှူလာတယ်။ ဒေသတွင်းအဖွဲ့ အကူအညီနဲ့တော့ အဆင်မပြေနိုင်ပါဘူး။ သူတို့ကတော့ တပိုင်တနိုင် လာလှူကြ တာပါ။ နိုင်ငံတကာ အဖွဲ့တွေ အကူအညီလိုအပ်တယ်။ အခုကတော့ သူတို့လည်း ရောက်မလာကြဘူး စားနပ်ရိက္ခာကလည်း ၁၅ ရက်စာလောက်ကျန်တော့တယ်။” အခုအချိန်မှာတော့ အစိုးရခွင့်ပြုချက်မရလို့ နိုင်ငံတကာ အဖွဲ့အစည်းတွေဖြစ်ကြတဲ့ WFP, ICRC အဖွဲ့အစည်းတွေက အကူအညီ မပေးကြတာကြောင့် ပြည်တွင်းက အလှူရှင်တွေဆီကရတာနဲ့ စားရေးသောက်ရေးကိုဖြေရှင်းနေရတယ်လို့ မြတန်းဆောင်ဆရာတော်က မိန့်ပါတယ်။ တိုက်ပွဲကြောင့်အသစ်ထွက်ပြေးလာကြတဲ့ စစ်ဘေးရှောင်တွေက စစ်ရှောင်စခန်းတွေမှာ နေရာမရှိတာကြောင့်နီးစပ်ရာ မြို့ပေါ်ရပ်ကွက်တွေနဲ့ အနီးဝန်းကျင်က ကျေးရွာတွေမှာ နေကြရပြီး  မရရှိနိုင်တာကြောင့် ရေရှည်မှာ အခက်အခဲဖြစ်လာနိုင်တယ်လို့ ရခိုင်တိုင်းရင်းသားများအစည်းအရုံးက REC အတွင်းရေးမှူး ဦးဇော်ဇော်ထွန်းက ပြောပါတယ်။ “အသစ်ထွက်ပြေးလာသူတွေ အများစုက စခန်းတွေကို မရောက်ရှိကြဘူးလေ။ နီးစပ်ကျေးရွာ၊ မိတ်ဆွေနေအိမ်တွေမှာနေကြတယ်။ သူတို့နဲ့ ပတ်သတ်တဲ့ အချက်အလက်တွေလည်း ကျတော်တို့ သေသေချာချာစာရင်းမရကြဘူး။ ရေရှည်မှာ အခက်အခဲဖြစ်လာနိုင်တယ်။” စစ်ဘေးရှောင်စခန်း နှစ်ခုထဲက ရက်ချောင်းစစ်ဘေးရှောင်စခန်းမှာ လူဦးရေ ၄၅၁ ယောက်၊ အိမ်ထောင်စု ၁၁၈ စု၊ အမျိုးသား ၂၂၁ ဦး၊ အမျိုးသား  ၂၃၀  ဦးရှိပြီး စညှင်းစစ်ဘေးရှောင် စခန်းမှာတော့ လူဦးရေ ၄၀၂ ဦး၊ အိမ်ထောင်စု ၁၂၅ စု၊ ကျား ၁၆၇ ) ဦး ၊ မ ၂၃၅ ဦးရှိပါတယ်။ ပြီးခဲ့တဲ့ ဇူလိုင် ၅ ရက်နေ့ကလည်း မိုးသည်းထန်စွာရွာသွန်းပြီး တောင်ကျရေစီးဆင်းမှုကြောင့် မြေပုံမြို့နယ် ရက်ချောင်းလေးတောင် ကျေးရွာအနီးမှ စစ်ဘေးရှောင်ဒုက္ခသည် ၄၀၀ ကျော် ဘေးလွတ်ရာ ထွက်ပြေးခဲ့ရပါတယ်။ သတင်း-ဝဏ္ဏခွာညို- ဓာတ်ပုံ- ခိုင်ကောင်းစံ
10 months Ago
More News
Up