မြို့မဈေး

A d v e r t i s e m e n t With Us

December 9, 2020

ကိုဗစ်-၁၉ ကူးစက်ခံရသူ တွေ့ရှိသဖြင့် လက်ပံတန်း မြို့မဈေးကို ၁၄ ရက်ပိတ် 

ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့နယ်က မြို့မဈေးအတွင်း ဈေးရောင်းချသူတွေမှာ ကိုဗစ်-၁၉ ရောဂါပိုး စစ်ဆေးတွေ့ရှိခဲ့တဲ့အတွက် အပြင်ဆိုင်တန်းတွေပါမကျန် ဈေးတစ်ခုလုံးကို ၁၄ ရက် ပိတ်ဖို့ အာဏာပိုင်တွေက အရေးပေါ်အစည်းအဝေးခေါ်ယူ ဆုံးဖြတ်လိုက်ပါတယ်။  လက်ပံတန်းမြို့မှာ ဒီဇင်ဘာ ၈ ရက်နေ့ မနက်ပိုင်းက မြို့မဈေးအတွင်း ငါးခြောက်ဆိုင်က အမျိုးသားတစ်ဦး နှာစေးပြီး အနံ့မရတာကြောင့် ဆေးရုံကို သွားရောက်ပြသခဲ့ရာ RDT နဲ့ စစ်ဆေးမှုအဖြေအရ ကိုဗစ်-၁၉ ရောဂါပိုး တွေ့ရှိခဲ့ပါတယ်။ အဲဒီရောဂါပိုးတွေ့ရှိသူ အမျိုးသားနဲ့ ထိတွေ့ဆက်စပ်ခဲ့တဲ့ မိသားစုဝင်တွေ၊ မြို့မဈေးအတွင်းက ဈေးဆိုင်တွေက လူ ၂၆ ဦးကို ဆေးစစ်မှု ဆက်လက်လုပ်ဆောင်ခဲ့ရာ ရောဂါပိုးရှိသူ ၁၀ ဦး ထပ်မံတွေ့ရှိတယ်လို့ သိရပါတယ်။ အဆိုပါကိစ္စနဲ့ပတ်သက်ပြီး မြို့နယ်အထွေထွေအုပ်ချုပ်ရေးဦးစီးဌာန တာဝန်ရှိသူတွေ၊ မြို့နယ်ကျန်းမာရေးဦးစီးဌာနက တာဝန်ရှိသူတွေ၊ ကိုဗစ်-၁၉ ​ထိန်းချုပ်ရေးနှင့် အရေးပေါ်တုံ့ပြန်ရေး ကော်မတီဝင်တွေ၊ လူမှုရေးအဖွဲ့အစည်းတွေ၊ မြို့နယ်မီးသတ်တပ်ဖွဲ့ဝင်တွေ၊ ရဲတပ်ဖွဲ့ဝင်တွေ၊ မြို့နယ်စည်ပင်တာဝန်ရှိသူတွေက  မြို့နယ်အထွေထွေအုပ်ချုပ်ရေးဦးစီးဌာနရုံးခန်းမှာ ဒီဇင်ဘာ ၈ ရက် ည ၇ နာရီမှ စတင်ပြီး  အရေးပေါ်အစည်းအဝေး ပြုလုပ်ရာမှာတော့  မြို့နယ်အုပ်ချုပ်ရေးမှူး ဦးသူရထွန်းလင်းက သတင်းယူဖို့ ရောက်ရှိနေတဲ့ သတင်းထောက်ကို တားမြစ်ပိတ်ပင်ခဲ့ပါတယ်။ ဒီအစည်းအဝေးမှာ ဒီဇင်ဘာ ၉ ရက် နေ့လယ် ၁၂ နာရီကစတင်ပြီး မြို့မဈေးကို အပြင်ဆိုင်တန်းတွေပါမကျန်  ၁၄ ရက် ပိတ်ဖို့နဲ့ လက်ဖက်ရည်ဆိုင်၊ စားသောက်ဆိုင်တွေကို ပါဆယ်စနစ်နဲ့သာ ရောင်းချဖို့ ဆုံးဖြတ်ခဲ့ကြောင်း သိရပါတယ်။ လက်ပံတန်း မြို့မဈေးကို ကိုဗစ်-၁၉ ရောဂါ ကူးစက်မှုတားဆီးကာကွယ်ဖို့အတွက် ပိတ်ထားခဲ့ပြီး အောက်တိုဘာ ၂၉ ရက်နေ့က ပြန်လည်ဖွင့်လှစ်ခဲ့တာ ၁ လကျော်ရှိချိန်မှာ ကိုဗစ်-၁၉ လူနာတွေ့တာကြောင့် ထပ်ပိတ်လိုက်တာ ဖြစ်ပါတယ်။   သတင်း၊ ဓာတ်ပုံ- ဝဏ္ဏထွန်း
3 months Ago

April 11, 2020

COVID-19 ရောဂါကာကွယ်ရန် မကွေးမြို့မစျေး စျေးသည်များကို Mask များ အခမဲ့ ဖြန့်ဝေ

မကွေးတိုင်း၊ မကွေးမြိုမစျေးမှာ ဧပြီ ၁၀ ရက်နေ့ မနက်ပိုင်းက စျေးရောင်းချသူတွေကို နှာခေါင်းစည်း Mask တွေ အခမဲ့ ဖြန့်ဝေပေးခဲ့တယ်လို့ မကွေးမြို့နယ် စည်ပင်သာယာရေး ဦးစီးဌာန ဒုတိယဦးစီးမှူး ဦးအောင်မျိုးသိန်းက ပြောပါတယ်။ “တိုင်းဒေသကြီး အစိုးရအဖွဲ့မှ စျေးရောင်း စျေးဝယ်တွေ နှာခေါင်းစည်း Mask တပ်ပြီးမှ ရောင်းဝယ်ကြဖို့ ပန်ကြားလွှာ ထွက်လာပါတယ်။ အလှူရှင်တဦး ပေါ်ပေါက်လာတဲ့အတွက် မကွေးမြို့မစျေးမှာ နှာခေါင်းစည်း Mask ခုရေ  ၂၅၀ အခမဲ့ ဖြန့်ဝေပေးခဲ့တာပါ။” အလှူရှင် ပေါ်ပေါက်လာပါက မြို့ပေါ်မှာရှိတဲ့ တခြားစျေးတွေကိုလည်း ထပ်မံဝေငှပေးသွားမှာ ဖြစ်သလို COVID-19 ရောဂါ ကာကွယ်နိုင်အောင် စျေးပိတ်ရက်တွေမှာ ကလိုရင်း ပိုးသတ်ဆေးတွေလည်း ဖျန်းပေးထားတယ်လို့ ပြောပါတယ်။ “စည်ပင်သာယာအဖွဲ့အနေနဲ့ COVID-19 ရောဂါကြိုတင်ကာကွယ်နိုင်အောင် မြို့ပေါ်ရပ်ကွက်တွေကို နေ့စဉ် လှည့်လည်ပညာပေးတာတွေ လုပ်ဆောင်နေပါတယ်။ အများပြည်သူ အပန်းဖြေတဲ့ ပန်းခြံတွေကိုလည်း ယာယီပိတ်ထားပြီး ဖောက်ဖျက်ကျူးလွန်ရင်တော့ အရေးယူသွားမှာပါ” လို့  ဦးအောင်မျိုးသိန်းက ဒီဗွီဘီကို ပြောပါတယ်။ COVID-19 ရောဂါကြိုတင်ကာကွယ်နိုင်ဖို့ မကွေးတိုင်းအစိုးရအဖွဲ့က ခရီးအသွားအလာ ကန့်သတ်ချက်တွေ အပါအဝင် အချက် ၉ ချက် ပါဝင်တဲ့ ပန်ကြားလွှာတစောင် ထုတ်ပြန်ထားပါတယ်။ မင်းထီး
11 months Ago
Up