မြဝတီ

January 10, 2022

ကရင်ပြည်နယ်တွင် တိုက်ပွဲပြင်းထန်၊ လက်နက်ကြီးကျည် ထိုင်းဘက်ကျ

မြန်မာ-ထိုင်းနယ်စပ် ကရင်ပြည်နယ်မြဝတီမြို့နယ်မှာ ဇန်နဝါရီ ၁၀ ရက်က တိုက်ပွဲပြင်းထန်ဖြစ်ပွားပြီး စစ်ကောင်စီ တပ်ဘက်က ပစ်ခတ်တဲ့ လက်နက်ကြီးကျည် ထိုင်းနိုင်ငံဘက်မှာ ကျရောက်ခဲ့လို့  ထိုင်းတပ်မတော်ဘက်က သတိပေးတဲ့အနေနဲ့ ပြန်လည်ပစ်ခတ်ခဲ့ပါတယ်။

စစ်ကောင်စီတပ်ဘက်က ပစ်ခတ်တဲ့ လက်နက်ကြီးကျည် ထိုင်းနိုင်ငံဘက် မဲ့ကော့ကင်းရွာအနီးမှာ ကျရောက်ပေါက်ကွဲခဲ့တာဖြစ်ပြီး  ထိုင်းစစ်တပ်က သတိပေးတဲ့အနေနဲ့ လက်နက်ကြီးတလုံး ပြန်ပစ်ခတ်ခဲ့တယ်လို့ ထိုင်းနယ်ခြားစောင့်တပ်နဲ့ နီးစပ်သူထံက သိရပါတယ်။

မြဝတီမြို့တောင်ဘက် လေးကေ့ကော်ဒေသ ဖလူးလေးရွာအနီးမှာ ဒီနေ့မနက်ကနေ  မွန်းလွဲအထိ KNLA၊ PDF ပူးပေါင်းတပ်တွေနဲ့ စစ်ကောင်စီတပ်တွေ တိုက်ပွဲဖြစ်ပွားခဲ့တယ်လို့ လေးကေ့ကော်စခန်း တာဝန်ရှိသူက ပြောပါတယ်။ 

စစ်ကောင်စီရဲ့တပ်တွေက နယ်မြေကျော်ဝင်ရောက်လာတဲ့အတွက် နှစ်ဖက်တိုက်ပွဲတွေဖြစ်ပွားနေ တာဖြစ်ပြီး ညနေ ၃ နာရီလောက်မှာ ထပ်မံပြန်လည်ဖြစ်ပွားနေတယ်လို့ ဆိုပါတယ်။ 

တိုက်ပွဲအတွင်း စစ်ကောင်စီအမြောက်တပ်က ပစ်ခတ်ခဲ့ရာမှာ ဖလူးလေးရွာရှိ  လူနေအိမ်၂ လုံးထက်မနည်း ပျက်စီးသွားပြီး တိုက်ပွဲကြောင့် ဒေသခံပြည်သူတွေ ၅၀၀ လောက် နီးစပ်ရာတောထဲ ထွက်ပြေးတိမ်းရှောင်နေရသလို ဝပ်ကျင်းတွေထဲမှာ ပုန်းအောင်နေရတယ်လို့ ဒေသခံတွေဆီက သိရပါတယ်။

အလားတူကော့ကရိတ်မြို့တောင်ဘက်မှာလည်း တိုက်ပွဲဖြစ်ပွားပြီး စစ်ကောင်စီတပ်က ရဟတ်ယာဉ်နဲ့ လာရောက်ပစ်ခတ်လို့  ဒေသခံပြည်သူတွေ မြို့တွင်းနဲ့ တောနယ်တွေဘက်ကို တိမ်းရှောင်နေကြရပါတယ်။

ကော့ကရိတ်မြို့နယ်၊ အာရှလမ်းမကြီးအနီးက ကော့နွဲ့ကျေးရွာနဲ့ ရွာသစ်ကျေးရွာကို ဒီနေ့ မွန်းလွဲ ၂ နာရီလောက်က  စစ်ကောင်စီက ရဟတ်ယာဉ်နဲ့ လာရောက် ပစ်ခတ်တိုက်ခိုက်ခဲ့တယ်လို့ ကော့ကရိတ်မြို့ဒီကေဘီကေဆက်ဆံရေးရုံးတာဝန်ရှိသူက ပြောပါတယ်။

“လေယာဉ် နှစ်စီးနဲ့လာပစ်တာ ဟုတ်တယ်။ နာရီဝက်လောက်တော့ ကြာတယ်။ ဒေသခံတွေနဲ့ လူနေအိမ်တွေ ထိခိုက်တာတော့မသိရသေးဘူး။”

ပစ်ခတ်မှုကြောင့် ပြည်သူတချို့ ထိခိုက် ဒဏ်ရာတွေရခဲ့တယ်လို့  တိုက်ပွဲဝင်နေတဲ့ KNLA တပ်ဖွဲ့ဝင် တဦးက ပြောပါတယ်။

ဇန်နဝါရီ ၉ ရက်ကလည်း ကော့ကရိတ်မြို့အနီး မြို့ဟောင်းရွာနဲ့ တခြားရွာတွေဘက်မှာ စစ်ကောင်စီတပ်ဘက်မှ ပစ်ခတ်လိုက်တဲ့ လက်နက်ကြီး ကျည်ဆန် စထိမှန်တဲ့ ပြည်သူ ၆ ယောက်အနက် ဇန်နဝါရီ ၁၀ ရက်မှာ တယောက်သေဆုံးပြီး   နောက်တယောက်က  အသက်လုနေ  ရတယ်လို့ သိရပါတယ်။

ဇန်နဝါရီ ၈ ရက် မနက်ကလည်း ကော့ကရိတ်မြို့နယ် အာရှလမ်းမကြီးအနီးက မြို့‌ဟောင်းကျေးရွာကို စစ်ကောင်စီရဲ့ စကခ ၁၂ အမြောက်ကုန်းနဲ့ နယ်မြေခံ ခလရ ၉၇ က လက်နက်ကြီးနဲ့ ပစ်ခတ်ခဲ့တဲ့အတွက် ဒေသခံ  ၈ ယောက် ထိမှန်ဒဏ်ရာ ရရှိခဲ့ပါတယ်။

1 week Ago

January 6, 2022

လေးကေ့ကော်ဒေသကို စစ်ကောင်စီတပ်များ အင်အားဖြည့်တင်း ထပ်မံဝင်ရောက်လာ

ကရင်ပြည်နယ်၊ မြဝတီမြို့နယ်၊ ကေအန်ယူတပ်မဟာ ၆ နယ်မြေ လေးကေ့ကော်ဒေသမှာ စစ်ကောင်စီရဲ့တပ်တွေ အင်အားဖြည့်တင်းထပ်မံဝင်ရောက်လာပြီး စစ်ရေးလှုပ်ရှားလာတဲ့အတွက်  တိုက်ပွဲတွေ  ထပ်ဖြစ်လာမှာကို စိုးရိမ်တယ်လို့  ဒေသခံတွေက ပြောပါတယ်။ 

စစ်ကောင်စီရဲ့တပ်တွေဟာ ဇန်နဝါရီ ၅ ရက်က တပ်ရင်း ၃ ရင်းပူးပေါင်းကာ စစ်သည်အင်အား  ၄၀၀ နီးပါးနဲ့အတူ လက်နက်ခဲယမ်းဖြည့်တင်းပြီး ဖလူးကြီးကျေးရွာဘက်ကို ဝင်ရောက်လှုပ်ရှားလာတာလို့ ဆိုပါတယ်။

လေးကေ့ကော်မြို့သစ် စခန်းတာဝန်ရှိသူတစ်ဦးက "“ဖလူးကျေးရွာဖက်မှာ တပ်အင်အားတိုးချဲ့လာတာ ရှိတယ်။ လက်ရှိတော့ မနေ့ကကော ဒီနေ့အထိတော့ ဘာမှမဖြစ်သေးဘူး”လို့ ပြောပါတယ်။

ဖလူးကြီးကျေးရွာသားတစ်ဦးက”ရွာကို မနေ့က စကစကလူတွေ အများကြီးနဲ့ဝင်လာတယ်။ အရင်က ထက်ပိုများတယ်။ သူတို့ဝင်လာရင် စစ်လားဆေးလားနဲ့ ထပ်ပြီးတိုက်ပွဲဖြစ်မှာကို စိုးရိမ်တယ်။ စစ်ရှောင်နေရတဲ့ သူတွေ စစ်ရှောင်နေရတုန်း”လို့ ဆိုပါတယ်။

လေးကေ့ကော်မြို့သစ်ကို ဇန်နဝါရီ ၆ ရက် ဒီကနေ့မနက် စစ်ကောင်စီတပ်က သိမ်းယူလိုက်ပြီလို့ သတင်းတွေ ထွက်ပေါ်နေပါမယ့် ကေအန်ယူတာဝန်ရှိသူတဦးတော့ မဟုတ်မှန်ကြောင်းနဲ့ နှစ်ဖက်တပ်တွေ နေရာယူတဲ့အနေအထားရှိနေတာလို့ ပြောပါတယ်။ 

ကေအန်ယူ ဒူးပလာယာခရိုင်ရုံးက တာဝန်ရှိသူတဦးက “သိမ်းလိုက်တယ်ဆိုတာကိုတော့ မဟုတ်ဘူးလို့ထင်တယ်။ ဘာဖြစ်လို့လဲဆိုတော့ လေးကေ့ကော် အမြောက်ကုန်းမှာ ဗမာစစ်တပ်တွေ ရှိတယ်။ လေ့ကေ့ကော်က အရှေ့ပိုင်းမှာစစ်တပ်တွေရှိတယ်။ အနောက်ဘက်ပိုင်းမှာတော့ ကျနော့် ကေအန်ယူရှိတယ်။ ပြီးတော့ အဲဒီသိမ်းဆည်းတယ်ဆို မဟုတ်နိုင်ဘူး။ ဘာလို့လဲဆိုတော့ ပတ်ပတ်လည်မှာ ကျနော်တို့လူတွေ ရှိတယ်။ တခုပဲ ရှိတာက သူတို့က လေးကေ့ကော်အုပ်ချုပ်ရေးရုံးကို ဝင်နေတယ်။ ပြီးတော့ လေ့ကေ့ကော် အ.ထ.ကကျောင်း၊ ဒူပလာရာ အထက်တန်းကျောင်းဝင်းထဲ ဝင်ပြီးနေတယ်။ ပြီးတော့ လမ်းမကြီးဘေးတွေ သူတို့နေတယ်။ ဒါပေမဲ့ အင်အားအများကြီး နဲ့မဟုတ်ဘူး။ ”လို့ ပြောပါတယ်။

လက်ရှိလေးကေ့ကော်မှာ လက်ရှိ နှစ်ဘက်စစ်တပ်က လွဲပြီး  ဒေသခံတွေ မရှိကြတော့ဘူးလို့လည်း ဒူးပလာယာခရိုင်တာဝန်ရှိသူက ပြောပါတယ်။ 

“အခုလေးကေ့ကော်ထဲမှာတော့ ဒေသခံ ပြည်သူတွေမရှိကြတော့ဘူး။  ဗမာစစ်တပ်နဲ့ ကေအန်ယူတပ်ပဲ ရှိတော့တယ်။ မဲ့ထော်သလေးမှာလည်း ဒေသခံတယောက်စ နှစ်ယောက်စပဲ ပြန်ပြီး ပြန်ထွက်သွားကြတာပဲ ရှိတော့တယ်။ ”

လေးကေ့ကော်နဲ့ မဲ့ထော်သလေးအပါအဝင် ကျေးရွာတွေမှာ   စစ်ပွဲကြောင့် ထွက်ပြေးတဲ့ ဒေသခံတွေရဲ့ နေအိမ်ခြံဝင်းတွေအတွင်းရှိ မော်တော်ကား၊ ဆိုင်ကယ်နဲ့ တခြား အဖိုးတန်ပစ္စည်းတွေကို စစ်ကောင်စီတပ်တွေက  ခိုးယူတာ၊ စားသုံးတာနဲ့ ဖျက်ဆီးတာတွေ လုပ်နေတယ်လို့  ကေအန်ယူဘက်ကရော၊   စစ်ရှောင်သူတွေကပါ  အတည်ပြုပြောပါတယ်။

တိုက်ပွဲတွေ ဆက်လက်ဖြစ်ပွားနေမယ်ဆိုရင် စစ်ဘေးရှောင်နေရတဲ့ ဒေသခံတွေဟာ ရေရှည်မှာ နေထိုင်စားသောက်ရေးအပြင် လက်ရှိဖြစ်ပွားနေတဲ့ ကိုဗစ်ရောဂါနဲ့ တခြားကျန်းမာရေးဆိုင်ရာ ပြဿနာတွေ ရှိလာနိုင်တယ်လို့ ဒေသခံတွေက ဆိုပါတယ်။

ဇန်နဝါရီ ၃ ရက်ကလည်း ထိုင်းနိုင်ငံ စစ်ဘေးရှောင်စခန်းကနေ နေရပ်ပြန်လာခဲ့တဲ့ အသက် ၄၀ အရွယ်အမျိုးသမီးတယောက်  နေအိမ်မှာနေထိုင်နေစဉ် စစ်ကောင်စီရဲ့တပ်က ပစ်ခတ်လိုက်တဲ့ လက်နက်ကြီးကျည်ဆန်စ ထိမှန်ပြီး သေဆုံးခဲ့ပါတယ်။

ဒီဇင်ဘာ ၁၅ ရက်ကစတင်ပြီး လေးကေ့ကော်ဒေသကို ကျူးကျော်ဝင်ရောက်လာတဲ့ စစ်ကောင်စီတပ်တွေနဲ့  KNLAပူးပေါင်းတပ်ဖွဲ့တို့ နေ့စဉ်တိုက်ပွဲတွေဖြစ်ပွားခဲ့ရာမှာ စစ်ကောင်စီတပ်ဘက်က လက်နက်ကြီတွေနဲ့ရော လေကြောင်းကပါ ဗုံးကြဲတိုက်ခိုက်ခဲ့လို့ ဒေသခံပြည်သူတွေ သောင်ရင်းမြစ်ကမ်း ဘေးလွတ်ရာမှာ ရှောင်ပုန်းနေရသလို အယောက်   ၅၀၀၀ လောက်ဟာ  ထိုင်းနိုင်ငံဘက်မှာ စစ်ရှောင်ခိုလှုံနေရပါတယ်။

2 weeks Ago
More News
Up