မြန်မာ-ထိုင်းချစ်ကြည်ရေးတံတား

October 30, 2019

မြန်မာ- ထိုင်းချစ်ကြည်ရေးတံတား အမှတ် ၂ စတင်ဖွင့်လှစ်

မြန်မာ၊ ထိုင်းနဲ့ အာရှနိုင်ငံတွေအကြား ကုန်စည်စီးဆင်းမှု ပိုမိုမြန်ဆန်နိုင်ဖို့အတွက်  မြဝတီ-မဲဆောက် ချစ်ကြည်ရေးအမှတ် ၂ တံတားကို အောက်တိုဘာ ၃၀ ရက် ဒီနေ့ မနက် ၉ နာရီမှာ စတင်ဖွင့်လှစ်လိုက်ပါတယ်။ ချစ်ကြည်ရေးတံတားအမှတ်(၂)ဖွင့်ပွဲမှာ ထိုင်းကုန်တင်ကားကြီး ၃ စီးနဲ့ မြန်မာ ကုန်တင်ကားကြီး ၃ စီးနဲ့ နှစ်နိုင်ငံ သွားလာမှု စတင်လိုက်တာပါ။  တံတားဖွင့်ပွဲမှာ ထိုင်းနိုင်ငံဘက်က ပို့ဆောင်ရေးဝန်ကြီး စဆရမ်ချစ်ချော့က ဦးဆောင်ပြီး လမ်းဦးစီးဌာန၊ အကောက်ခွန်၊ လဝကနဲ့ စစ်တပ်အပါအဝင် အုပ်ချုပ်ရေးပိုင်းဆိုင်ရာ တာဝန်ရှိသူတွေ တက်ရောက်ကြပြီး မြန်မာနိုင်ငံဘက်ကတော့ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး  ဦးဟန်ဇော် ဦးဆောင်တက်ရောက်ပါတယ်။ ထိုင်းနိုင်ငံ ပို့ဆောင်ရေးဝန်ကြီး ပို့ဆောင်ရေးဝန်ကြီး စဆရမ်ချစ်ချော့က “မြန်မာ-ထိုင်း  ကုန်စည်ပို့ဆောင်ရေးမှာ လျှင်မြန်စွာ ပို့ဆောင်နိုင်ဖို့အတွက် ဖြစ်တယ်။ နယ်စပ်ကုန်စည်ပို့ရာမှာ  ဝင်ငွေတွေ တိုးတက်လာတာမျိုးရှိပါတယ်”လို့ ပြောပါတယ်။ မဲဆောက်- မြဝတီနယ်စပ်မှာ တံတား အမှတ် ၁ ကနေ အရင်က ကားအဝင်အထွက် တနှစ် အစီးရေ ၂၃၀၀၀ ရှိပြီး တရက်ကို ကားအစီးရေ ၆၃၀ အဝင်အထွက်ရှိတယ်လို့ သိရပါတယ်။ လတ်တလောဖွင့်လှစ်ထားတဲ့ တံတားသစ်ကနေ မြန်မာ-ထိုင်း နှစ်နိုင်ငံ ကုန်တင်ကားကြီး တနိုင်ငံကို အစီး ၁၀၀ ဖြတ်သန်းသွားလာခွင့် ပြုဖို့ နှစ်နိုင်ငံ သဘောတူထားပါတယ်။ အခုဖွင့်လှစ်လိုက်တဲ့ တံတားသစ်ကနေ ထိုင်းကုန်တင်ကားတွေဟာ မြဝတီမှ မော်လမြိုင် အထိ ကုန်စည်တွေ သွားရောက်ပို့ဆောင်နိုင်မှာဖြစ်သလို မြန်မာကုန်တင်ကားကြီးတွေလည်း  မဲဆောက်မှ မွန်ဒါဟန်နဲ့ မဲဆောက် လန်ချဘန် အထိ ကုန်စည်ပို့ဆောင်နိုင်မှာ ဖြစ်ပါတယ်။ မြန်မာ- ထိုင်းချစ်ကြည်ရေးတံတားအမှတ်(၂)နဲ့ လမ်းတံတား အဆောက်အဦတွေ တည်ဆောက်ဖို့  ထိုင်းအစိုးရက ဘတ်ငွေသန်းပေါင်း ၄၃၀၀၀ အကုန်အကျခံထားတာ ဖြစ်ပါတယ်။ သတင်း - ဖိုးစီ၊ ဓာတ်ပုံ - သန့်ဇင်အောင်
2 years Ago

October 4, 2019

မြန်မာ-ထိုင်းချစ်ကြည်ရေးတံတားသစ်  အောက်တိုဘာလကုန် ဖွင့်လှစ်မည်

မြန်မာ-ထိုင်းချစ်ကြည်ရေးတံတားအမှတ် (၂)ကို အောက်တိုဘာ ၃၀ ရက်နေ့မှာ ဖွင့်လှစ်နိုင်ဖို့အတွက်   ထိုင်းဒုတိယဝန်ကြီးချုပ်က တံတားရှိရာနေရာကို မနေ့က လာရောက်ကြည့်ရှု စစ်ဆေးသွားပါတယ်။ ထိုင်းနိုင်ငံ  ဒုတိယဝန်ကြီးချုပ် ဂျူရင် လခ်စနာဝိစစ်က “နှစ်နိုင်ငံ ပြည်သူတွေအတွက် ကောင်းမွန် ပျော်ရွှင်စေမယ့် သတင်းကောင်းပါ။ အကျိုးရှိတဲ့ နယ်စပ်စီးပွားရေး အတိုင်းအတာ တခုထိတိုးတက် လာမှာဖြစ်တယ်။ နှစ်နိုင်ငံနယ်စပ် ကုန်သွယ်မှု ၃၀ ရာခိုင်နှုန်း အထိ တိုးတက်လာမှာဟာ ထိုင်းတွေတင်မကပဲ  မြန်မာတွေအတွက်လည်း သန်းပေါင်းများစွာသော ကုန်တင်ပို့မှုတွေ တိုးတက်လာမှာဖြစ်တယ်” လို့ပြောပါတယ်။ နှစ်နိုင်ငံကုန်သွယ်မှု မြှင့်တင်နိုင်ရေးအတွက် မြန်မာ-ထိုင်း အမှတ်(၂)တံတားကို နှစ်နိုင်ငံအစိုးရ တာဝန်ရှိသူတွေ အောက်တိုဘာ ၁ ရက်နေ့မှာ MOU သဘောတူ လက်မှတ်ရေးထိုးနိုင်ခဲ့ပြီး  အောက်တိုဘာ ၃၀ ရက်နေ့ တရားဝင် တံတား ဖွင့်လှစ်တော့မှာဖြစ်ပါတယ်။ အဆိုပါတံတား တည်ဆောက်ပြီးစီးခြင်း အခမ်းအနားကိုတော့ ပြီးခဲ့တဲ့ မေ ၁၉ ရက်က နယ်စပ် ချစ်ကြည်ရေးတံတားပေါ်မှာ ကျင်းပခဲ့ရာမှာ  ထိုင်းဝန်ကြီးချုပ် ပရာရွတ်နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ တက်ရောက်ခဲ့ပါတယ်။ ကရင်ပြည်နယ်၊ မြဝတီမြို့နဲ့ ထိုင်းနိုင်ငံ မဲဆောက်မြို့ကို ဆက်သွယ်ထားတဲ့ အချက်အခြာကျတဲ့တံတားကိုဖြစ်လို့ တံတားဖွင့်လှစ်ပြီးသွားရင် နှစ်နိုင်ငံကုန်သွယ်မှု မြင့်တက်လာနိုင်တယ်လို့ ကုန်သည်တွေက ခန့်မှန်းနေကြပါတယ်။ ထိုင်းကုန်သည်လုပ်ငန်းရှင် နိုင်းကရစ်ကတော့ “   မြန်မာ- ထိုင်းချစ်ကြည်ရေးတံတား အမှတ် ၂ ဖွင့်တာနဲ့ မြန်မာစိုက်ပျိုးကုန်တွေ ထိုင်းဘက်ကို တရားဝင်တင်သွင်းတော့မှာဖြစ်လို့  နှစ်နိုင်ငံပြည်သူတွေနဲ့ စီးပွါးရေးသမားတွေအတွက် အားလုံး အဆင်ပြေသွားမယ်” လို့ပြောပါတယ်။ တံတားပေါ်ကနေ မြန်မာစိုက်ပျိုးရေးထွက်ကုန်တွေတင်ဆောင်လာတဲ့ မြန်မာကုန်တင်ကားကြီးတွေ  ထိုင်းနိုင်ငံဘက်ကို တရားဝင် ဝင်ရောက်နိုင်ရေးအတွက်လည်း ဒီရက်ပိုင်းမှာ နှစ်နိုင်ငံ တာဝန်ရှိသူတွေ ဆွေးနွေးဖို့ ရှိတယ်လို့ သိရပါတယ်။  ဒါ့အပြင် ထိုင်းခရီးလုပ်ငန်းပိုမိုတိုးတက်ဖို့အတွက်  မြန်မာနိုင်ငံကလာမယ့် ကားတွေကို နယ်စပ်မြို့ရဲ့ အတိုင်းအတာတခုထိ  ၆ ညအိပ် ၇ ရက်သက်တမ်း ဝင်ထွက်သွားလာခွင့်ပြုဖို့ လည်း ရှိနေပါတယ်။  မြန်မာ-ထိုင်း ချစ်ကြည်ရေးတံတားအမှတ် ၂ ဟာ  နှစ်နိုင်ငံစီးပွါးရေးအတွက် အဓိကကျတဲ့ လမ်းကြောဖြစ်တာနဲ့အညီ မြဝတီ-ကော့ကရိတ်လမ်း။ ကော့ကရိတ်-မော်လမြိုင်- ဘားအံလမ်းတွေကိုလည်း အဆင့်မြင့်လမ်းကြောအဖြစ် အဆင့်မြှင့်တင် ဆောက်လုပ်ဖို့ အစီအစဉ်ရှိတယ်လို့လည်း သိရပါတယ်။  ဓာတ်ပုံ- Bangkok Post
2 years Ago
Up