မြန်မာ့ရုပ်ရှင် ခေတ်ဟောင်း

August 24, 2020

မြန်မာ့ရုပ်ရှင် ခေတ်ဟောင်း၊ ခေတ်လယ်က မင်းသားမင်းသမီးများအကြောင်း “လိပ်ပြာကူးထူးခြား သူများ”စာအုပ်ထွက်ရှိ

       မြန်မာ့ရုပ်ရှင်လောကမှာ တခေတ်တခါက ထင်ရှားကျော်ကြားခဲ့သူ သရုပ်ဆောင် မင်းသားမင်းသမီးတွေကို အင်တာဗျူးမေးမြန်းတင်ဆက်ထားတဲ့ “လိပ်ပြာကူး ထူးခြား သူများ” စာအုပ်ထွက်ရှိလာခဲ့ပါတယ်။        ရုပ်ရှင်ချစ် ပရိသတ်တွေအနေနဲ့ သူတို့ချစ်ခင်ကြတဲ့ သရုပ်ဆောင်တွေအကြောင်း၊ အသံတိတ်ခေတ် ကနေ အသံထွက်ခေတ်အထိ၊ အဖြူ အမည်းခေတ်ကနေ ဆေးရောင်စုံ ခေတ်အထိ မြန်မာ့ရုပ်ရှင်လောကရဲ့ တိုးတက်မှုအရွေ့ကို သိမြင်ရမှာဖြစ်ပြီး မေးမြန်းတင် ဆက်ခဲ့သူကတော့ ရွှေအမြူတေမဂ္ဂဇင်းရဲ့ ပဲ့ကိုင်ရှင် ဆရာဝင်းငြိမ်း ဖြစ်ပါတယ်။ မေးမြန်းတင်ဆက်ထားတဲ့ သရုပ်ဆောင်မင်းသားမင်းသမီး အယောက် ၂၀ ထဲမှာ တော့ မြင့်မြင့်ခင်၊ ကျော်ဆွေတို့ကနေစလို့ မေဝင်းမောင်၊ ကျော်သူ၊ ခင်သီတာထွန်း တို့အလယ်၊ မေသန်းနု၊ စိုးမြတ်သူဇာ၊ ရန်အောင်တို့ အထိ ပါဝင်ပါတယ်။ အမေကလည်း နာမည်ကြီး မင်းသမီး၊ သမီးလည်း နာမည်ကြီး မင်းသမီး ဖြစ်တဲ့ မြင့်မြင့်ခင်နဲ့ မေဆွိ။ ကလေး လေးယောက် မွေးပြီးမှ မင်းသမီး ဖြစ်လာတဲ့ ချိုပြုံး။ မင်းသားမဖြစ်ခင် ဆေးသမားဖြစ် ၊ အိမ်ထောင်ကျတော့မှ ရုပ်ရှင် စရိုက်တဲ့ ကျော်သူ၊ စတဲ့ ကြောင်းခြင်းရာတွေအပြင် မြန်မာ့ရုပ်ရှင်လောကသားတွေ ကြုံတွေ့ရတတ်တဲ့ အဆင်ပြေ မှုမပြေမှုတွေ၊ တိုးတက်ပြောင်းလဲသွားတဲ့ နည်းပညာ၊ နောက်ပြီး ရုပ်ရှင်လောကသား တွေရဲ့ အပြုအမူ၊ ဓလေ့စရိုက် စတာတွေကိုလည်း ဖတ်ရှုနိုင်မှာဖြစ်တယ်လို့ မဟာစာပေ က ညွှန်းထားခဲ့ပါတယ်။ အသက် ၇၄ နှစ်အရွယ် ရှိနေပြီဖြစ်တဲ့ ဆရာဝင်းငြိမ်းဟာ ၁၉၆ဝ ပြည့်နှစ်က စတင် ပြီး  စုံထောက်မဂ္ဂဇင်းမှာ ဘာသာပြန်ဝတ္ထုတို စတင်ရေးသားခဲ့ကာ စာပေလောကထဲ ဝင်ရောက်ခဲ့သူ ဖြစ်ပြီး ၁၉၈၁ ခုနှစ်မှာ စတင်ထုတ်ဝေတဲ့ ပေဖူးလွှာမဂ္ဂဇင်းမှာ စာဖတ် သူများနှင့် တွေ့ဆုံမေးမြန်းခြင်း ကဏ္ဍကို တာဝန်ယူခဲ့တာ ဖြစ်ပါတယ်။ အဲဒီမဂ္ဂဇင်းမှာ တခြားကလောင်ခွဲတွေနဲ့ ပေါ့ပ်ကဏ္ဍတွေ ရေးသားခဲ့တဲ့အပြင် ရုပ် ရှင်အမြုတေ၊ စန္ဒာ၊ ရင်ခွင်သစ်၊ အရိန္ဒမာ၊ ရုပ်ရှင်၊ ရွှေစည်းစိမ် မဂ္ဂဇင်းတွေမှာလည်း အယ် ဒီတာအနေနဲ့ တာဝန်ယူခဲ့တာပါ။ ၁၉၈၉ ခုနှစ်၊ ဇူလိုင်လ မှာတော့ ရွှေအမြု‌တေ ရုပ်စုံမဂ္ဂဇင်းကို စီစဉ်တည်း ဖြတ်ထုတ်ဝေခဲ့ပြီး ရွှေအမြုတေ ဝတ္ထုတိုတစ်ခေတ်နဲ့ မျိုးဆက်သစ်စာရေးဆရာတွေကို မွေးထုတ်ပေးတဲ့ ရွှေအသစ်ကဏ္ဍတွေက ထင်ရှားပါတယ်။ နောက်ပိုင်းမှာတော့ ဆရာဝင်းငြိမ်းဟာ ရွှေအမြုတေမဂ္ဂဇင်းအပြင် အလင်းတန်း အနုပညာဂျာနယ်၊ ဖူးငုံဆယ်ကျော်သက် မဂ္ဂဇင်းတွေကို စီစဉ်တည်းဖြတ်သူအဖြစ် ဆောင်ရွက်ခဲ့ပြီး ဘာသာပြန်စာပေတွေကိုလည်း ရေးသားထုတ်ဝေခဲ့တာ ဖြစ်ပါတယ်။   ရေးသားထုတ်ဝေခဲ့တဲ့ စာအုပ်တွေထဲက စာရေးဆရာတွေနဲ့ စာပေအင်တာဗျူး စာအုပ်တွေနဲ့ ဘာသာပြန်စာအုပ်တွေဖြစ်တဲ့ ကမ္ဘာကျော် အဆိုတော် အဲလ်ဗစ် ပရက်စ လေအကြောင်း “အထီးကျန်ည”၊ ဗြိတိန်အိမ်ရှေ့မင်းသားကတော် ဒိုင်ယာနာအကြောင်း “အချစ်နှင့်စစ်”၊ “မင်းမှုထမ်း”၊ မြန်မာနိုင်ငံ၏ နောက်ဆုံးရှင်ဘုရင် သီပေါမင်း၏ ပါတော်မူပြီး ဘဝအကြောင်း “နန်းကျဘုရင်” ဘာသာပြန်ဝတ္ထုတွေက ထင်ရှားပါတယ်။ သိပ်မကြာသေးခင်ကတော့ ကမ္ဘာကျော်အဆိုတော် အယ်လ်တန်ဂျွန်ရဲ့  ကိုယ်ရေး အတ္ထုပ္ပတ္တိ ဘာသာပြန်စာအုပ်တအုပ် ထွက်ရှိထားခဲ့တာပါ။ ခုလတ်တလော ထွက်ရှိလာတဲ့ စာမျက်နှာ ၄၇၃ မျက်နှာပါ လိပ်ပြာကူး ထူးခြားသူများ” စာအုပ်ကိုတော့ တန်ဖိုးကျပ် ၆,၀၀၀ နဲ့ မဟာစာပေကနေ ဖြန့်ချိလိုက်တာ ဖြစ်ပါတယ်။
1 year Ago
Up