ကမ္ဘာလုံးဆိုင်ရ မြန်မာ့နွေဦးတော်လှန်ရေး Second Wave ဒုတိယလှိုင်းအနေနဲ့ မြန်မာပြည်တွင်းနဲ့ ပြည်ပနိုင်ငံတွေမှာပါ တပြိုင်နက် ပြန်လည်အသက်သွင်း ဆန္ဒထုတ်ဖော်ပွဲတွေကို မေလ ၇ ရက်နဲ့ ၈ ရက်တွေမှာ သတ်မှတ်လှုပ်ရှားကြပါတယ်။
အမေရိကန်ပြည်ထောင်စု၊ နယူးယောက်မြို့လယ်က အထင်ကရနေရာတခုဖြစ်တဲ့ Time Square မှာလည်း မေ ၇ ရက်က မြန်မာပြည်ဖွားတိုင်းရင်းသားတွေ စုစည်းပြီး NYCBC (New York City Burmese Community) အစီအစဉ်နဲ့ မိုးတွေသည်းနေတဲ့ကြားက လူအင်အား ၂၀၀ လောက်နဲ့ စစ်အာဏာရှင်ဆန့်ကျင်ရေး ဆန္ဒပြလှုပ်ရှားခဲ့ပါတယ်။
ပြည်သူ့ဆန္ဒနဲ့ ပြည်သူသာအဓိက၊ အာဏာရှင်စနစ်ဟာ မြန်မာပြည်နဲ့ကမ္ဘာပေါ်မှာ လုံးဝ၊ လုံးဝ မရှိစေရ၊ တတိုင်းပြည်လုံးတွန်းလှန်နေတာ၊ ဒီတကြိမ်ဟာငါတို့အောင်ပွဲစတဲ့ သံန္နိဋ္ဌာန်ခံယူချက်တွေကို ကျယ်ကျယ်လောင်လောင်အတူတကွကြွေးကြော်ခဲ့ကြပြီး စစ်အာဏာရှင်ကို အဆုံးထိတိုက်ဖို့ ထပ်မံဆန္ဒပြုခဲ့ကြပါတယ်။
စစ်အာဏာသိမ်းပြီးနောက် မြန်မာ့နွေဦးတော်လှန်ရေး အခြေအနေ၊ အဖြစ်အပျက်တွေကို ပုံဖော်ရိုက်ကူးထားတဲ့ မှတ်တမ်းရုပ်ရှင် “Myanmar Diaries” ဟာ ဂျာမနီနိုင်ငံ ဘာလင်ရုပ်ရှင်ပွဲတော်မှာ အကောင်းဆုံးဆုရရှိသွားခဲ့ပါတယ်။
ရုပ်ရှင်အကြောင်းအညွှန်းမှာတော့ ဒီမှတ်တမ်းရုပ်ရှင် “Myanmar Diaries” ဟာ ၁၀ နှစ် လောက်သာ ရရှိခဲ့တဲ့ မြန်မာနိုင်ငံ လွတ်လပ်မှုအတွက် “နွေဦးအိပ်မက်” ကို တုံ့ပြန်ပုံဖော်ထားတဲ့ ဇာတ်ကားဖြစ်ပြီး ဒါဟာ မျိုးဆက်သစ်လူငယ်တွေရဲ့ စိတ်အားထက်သန်မှုနဲ့ မျှော်လင့်ချက်တွေကို ရက်ရက်စက်စက် ဖြိုခွင်းခဲ့တဲ့အကြောင်း ဖြစ်တယ်လို့ ဆိုပါတယ်။
ဒီမှတ်တမ်းရုပ်ရှင်ကားကိုတော့ လုံခြုံရေးအခြေအနေအရ အမည်မဖော်လိုတဲ့ မြန်မာလူငယ်ရုပ်သံရိုက်ကူးသူတွေက စုပေါင်းဖန်တီးရိုက်ကူးထားတာဖြစ်ပြီး ဆုကြေးအနေနဲ့ ယူရိုငွေ ၄ သောင်းရရှိမှာ ဖြစ်ပါတယ်။
ဘာလင်ရုပ်ရှင်ပွဲတော်ရဲ့ ဝက်ဘ်ဆိုက်မှာတော့ ဒီမှတ်တမ်းရုပ်ရှင်ကို The Myanmar Film Collective က ရိုက်ကူးပြီး နယ်သာလန်နိုင်ငံ ZIN Documentaire က ထုတ်လုပ်သူအဖြစ် ဖော်ပြထားကာ တကမ္ဘာလုံးမှာ ပြသခွင့်မူပိုင်ခွင့်အနေနဲ့ ဩစတီးယားနိုင်ငံ Autlook Filmsales လို့ ဖော်ပြထားပါတယ်။
Photo Credit- berlinale
