မြန်မာ့စီးပွားရေး

November 23, 2021

စစ်အာဏာသိမ်းမှုကြောင့် မြန်မာ့စီးပွားရေး ဆိုးရွားစွာထိခိုက်၊ လူသန်းပေါင်းများစွာ ဆင်းရဲတွင်း ကျဆင်း

၂၀၂၁ ခုနှစ် ဖေဖော်ဝါရီ ၁ ရက်နေ့  စစ်တပ်အာဏာသိမ်းမှုဟာ ၂၀၂၀ ပြည့်နှစ် ကိုဗစ်-၁၉ ကပ်ရောဂါ စတင်ချိန်ကတည်းက ဆုတ်ယုတ်နေတဲ့ မြန်မာ့စီးပွားရေးကို ပိုမိုဆိုးရွားစွာ ထိခိုက်စေခဲ့တယ်လို့  နိုင်ငံတကာစီးပွားရေးသုံးသပ်ချက် သတင်းတပုဒ်မှာ ဖော်ပြပါတယ်။

ဘဏ်လုပ်ငန်း၊ ကုန်သွယ်ရေးနဲ့ အသက်မွေးဝမ်းကျောင်းလုပ်ငန်းတွေဟာ နိုင်ငံရေး မငြိမ်သက်မှုတွေနဲ့ အကြမ်းဖက်မှုတွေကြောင့် ထိခိုက်နစ်နာခဲ့ရပြီး ၀င်ငွေရင်းမြစ်တွေလည်း ကျဆင်းလာပြီးတော့ လူသန်းပေါင်းများစွာ ဆင်းရဲတွင်းထဲ ကျဆင်းသွားခဲ့ရတယ်လို့ဆိုပါတယ်။ 

အာဏာသိမ်းမှု ရလဒ်ကြောင့် တရားဝင် ဖွံ့ဖြိုးတိုးတက်ရေး အကူအညီပေးရေး မိတ်ဖက် အဖွဲ့အစည်းတွေလည်း သူတို့ရဲ့ချေးငွေများနဲ့ စီမံကိန်းတွေကို ရပ်ဆိုင်းခဲ့ပါတယ်။ နိုင်ငံတော်သုံးငွေ ကျပ်ငွေတန်ဖိုး ကျဆင်းတာ၊ စားနပ်ရိက္ခာဖောင်းပွမှု ပြင်းထန်လာတာတို့ကြောင့် အလုပ်လက်မဲ့ဖြစ်ရတဲ့ လူဦးရေကို ဆိုးဆိုးရွားရွား ထိခိုက်စေခဲ့ပါတယ်။ 

အကျိုးအမြတ်ရှိတဲ့ ခရီးသွားကဏ္ဍလည်း ချည့်နဲ့နေပါတယ်။ မြန်မာနိုင်ငံရဲ့စီးပွားရေးဟာ အခုနှစ်မှာ ၁၈ ဒသမ ၄ ရာခိုင်နှုန်း ကျုံ့သွားလိမ့်မယ်လို့ အာရှဖွံ့ဖြိုးရေးဘဏ်က ခန့်မှန်းထားပါတယ်။

ကုလသမဂ္ဂ လူသားချင်းစာနာထောက်ထားမှုဆိုင်ရာ အကြီးအကဲ မာတင်ဂရစ်ဖစ်က ပဋိပက္ခနဲ့ မလုံခြုံမှု၊ ကိုဗစ်-၁၉ နဲ့ စီးပွားရေး မအောင်မြင်မှုတွေကြောင့် အသက်ကယ်အကူအညီ လိုအပ်နေတဲ့ လူ ၃ သန်းကျော်ဆီ အတားအဆီးမဲ့ ဝင်ရောက်ခွင့်ပြုဖို့ မြန်မာစစ်ခေါင်းဆောင်တွေ ကို မကြာသေးမီက မေတ္တာရပ်ခံခဲ့ပါတယ်။ 

မြို့ကြီးတွေမှာ စားနပ်ရိက္ခာ မလုံလောက်မှု မြင့်တက်လာမှု သတင်းတွေနဲ့ ပတ်သက်လို့ ပိုပြီးစိုးရိမ်လာရပါတယ်။ မြန်မာနိုင်ငံရှိ နိုင်ငံခြားစီးပွားရေးလုပ်ငန်းကြီးတွေရဲ့ ဧပြီလ အစီရင်ခံစာ မှာ အာဏာသိမ်းမှုဟာ ပြည်တွင်းမှာဖြစ်စေ၊ ပြည်ပဖြစ်စေ ကုမ္ပဏီအားလုံးကို ထိပါးစေခဲ့ပြီး အခြေအနေမတည်ငြိမ်လို့ နိုင်ငံတွင်းကနေ ထွက်ခွာသွားကြောင်း ထင်ရှားနေပါတယ်။ 

မြန်မာနိုင်ငံရဲ့ဘဏ္ဍာရေးနှစ်ဟာ ၁၉၇၄ ခုနှစ်မှ ၂၀၁၉ ခုနှစ်အထိတိုင် ဧပြီ ၁ ရက်နေ့မှ မတ်လ ၃၁ ရက်နေ့အကြား တည်ရှိခဲ့ပေမယ့် ၂၀၁၈ ခုနှစ်မှာ အမျိုးသား ဒီမိုကရေစီအဖွဲ့ချုပ် အစိုးရက ဘဏ္ဍာနှစ်ကို အောက်တိုဘာလ ၁ ရက်နေ့မှ စက်တင်ဘာလ ၃၀ ရက်နေ့အထိ ပြောင်းလဲသတ်မှတ်ခဲ့ပါတယ်။ 

၂၀၂၁ ခုနှစ်၊ အောက်တိုဘာလ ၁ ရက်မှ ၂၀၂၂ ခုနှစ် မတ်လ ၃၁ ရက်နေ့အထိ ခြောက်လတာကာလအတွင်း အသေးစားဘတ်ဂျက်ကို ရေးဆွဲခဲ့ပါတယ်။ မြန်မာနိုင်ငံဟာ ပို့ကုန်နဲ့သွင်းကုန် နှစ်ခုစလုံး ကျဆင်းနေတာကြောင့် လွန်ခဲ့တဲ့ တစ်လတာ ကာလအတွင်း နိုင်ငံခြား ကုန်သွယ်မှုတန်ဖိုးဟာ အမေရိကန်ဒေါ်လာ သန်း ၃၁၀ နီးပါး ကျဆင်းသွားကြောင်း စီးပွားရေးနဲ့ကူးသန်းရောင်းဝယ်ရေး ဝန်ကြီးဌာနက ထုတ်ပြန်တဲ့ ကိန်းဂဏန်းတွေအရ သိရပါတယ်။ 

အခုနှစ် အောက်တိုဘာ ၁ ရက်မှ နိုဝင်ဘာ ၅ ရက်အထိ ပို့ကုန်တန်ဖိုး ကန်ဒေါ်လာ ၁ ဒသမ ၃ ဘီလီယံကျော်သာ ရှိပေမယ့် သွင်းကုန်တန်ဖိုးမှာ ကန်ဒေါ်လာ ၁၆၄ သန်းကျော် လျော့နည်းပြီး သွင်းကုန်တန်ဖိုး ကန်ဒေါ်လာ ၁ ဒသမ ၂၅ ဘီလီယံနဲ့ ကန်ဒေါ်လာ ၁၄၅ သန်းကျော် လျော့နည်းခဲ့ပါတယ်။ 

Ref- Fibre2fashion.com

2 months Ago

November 5, 2021

မြန်မာ့စီးပွားရေး ဆုတ်ယုတ် ဆိုးရွားလာ

မြန်မာနိုင်ငံရဲ့စီးပွားရေးဟာ ၂၀၂၁ ခုနှစ်မှာ အာရှတိုက်အတွင်း အပြင်းထန်ဆုံး ထိုးနှက်ခံ ခဲ့ရတဲ့အထဲက တစ်ခုဖြစ်ပြီး လစဉ်ဆုတ်ယုတ် ဆိုးရွားလာတယ်လို့  နိုဝင်ဘာ ၁ ရက်က ထုတ်ပြန်ထားတဲ့ HIS Markit မြန်မာထုတ်လုပ်မှု PMI အညွှန်းကိန်းတွေအရ သိရပါတယ်။  

ဖေဖော်ဝါရီလက စစ်တပ်က အာဏာသိမ်းပြီးနောက် နိုင်ငံရေးမတည်ငြိမ်မှုတွေနဲ့  ကိုဗစ်-၁၉ အကျပ်အတည်းကြားမှာ ၂၀၂၀  စက်တင်ဘာလမှစတင်ပြီး မြန်မာနိုင်ငံရဲ့ ကုန်ထုတ်လုပ်မှု အခြေအနေတွေဟာ  လစဉ်ဆုတ်ယုတ် ဆိုးရွားလာခဲ့တယ်လို့ဆိုပါတယ်။ 

အောက်တိုဘာလအတွင်း မြန်မာနိုင်ငံရဲ့ ကုန်ထုတ်လုပ်မှု PMI အညွှန်းကိန်းမှာ ၄၃ ဒသမ ၃ ရှိပြီး ပြီးခဲ့တဲ့ စက်တင်ဘာရဲ့ PMI အညွှန်းကိန်း ၄၁ ဒသမ ၁ ထက် မြင့်တက်ခဲ့ပေမဲ့လည်း အရေးကြီးတဲ့ အပြောင်းအလဲမရှိ အမှတ် ၅၀ အောက်သာ သိသာစွာနိမ့်ကျနေကြောင်း ဖော်ပြထားပါတယ်။  

ဒါ့အပြင် အောက်တိုဘာလအတွင်း ဝယ်လိုအားပျော့လာတာ၊ ကုန်ကြမ်းရှားပါးမှုနဲ့ ကျွမ်းကျင်လုပ်သား မလုံလောက်မှုကြောင့် ထပ်မံထိုးနှက်ခံခဲ့ရကြောင်း သိရပါတယ်။ 

Purchasing Manager Index (PMI) အညွှန်းအကိန်းဟာ   ကုန်ထုတ်လုပ်မှုကဏ္ဍရဲ့  စွမ်းဆောင်ရည်ကို တိုင်းတာပြီး ထုတ်လုပ်မှု ကုမ္ပဏီပေါင်း ၄၅၀  ရဲ့ စစ်တမ်းက ကောက်ယူ ထားတာဖြစ်ပါတယ်။

3 months Ago
More News
Up