မြန်မာအရေး

November 12, 2022

မြန်မာအရေးကိုင်တွယ်ရာတွင် ခေါင်းဆောင်မှုပျက်ကွက်ခဲ့သည့် အာဆီယံကို ပြစ်တင်ရှုတ်ချ

အရှေ့တောင်အာရှနိုင်ငံများအသင်း (အာဆီယံ)ဟာ မြန်မာပဋိပက္ခကိုကိုင်တွယ်ရာမှာ ခေါင်းဆောင်မှု ပျက်ကွက်ခဲ့တဲ့အတွက် လူ့အခွင့်အရေးအဖွဲ့တဖွဲ့ဖြစ်တဲ့  Fortify Rights အဖွဲ့က နိုဝင်ဘာလ ၁၁ ရက်မှာ အာဆီယံကို ပြစ်တင်ရှုတ်ချလိုက်ပါတယ်။

အာဆီယံခေါင်းဆောင်တွေနဲ့ ကမ္ဘာ့ခေါင်းဆောင်တွေဟာ နိုဝင်ဘာ ၁၁ ရက်က ကမ္ဘောဒီယားနိုင်ငံ ဖနွမ်းပင်မြို့မှာ တွေ့ဆုံခဲ့ပြီး မြန်မာနိုင်ငံက မအောင်မြင်တဲ့ ငြိမ်းချမ်းရေးအစီအစဉ်နဲ့ ဒေသတွင်းတင်းမာမှုတွေ အပေါ် တုံ့ပြန်မှုတွေကိုဖြေရှင်းဖို့တွေအကြောင်း ဆွေးနွေးခဲ့ကြတာပါ။ 

Fortify Rights က သူ့ဆီမှာ ပေါက်ကြားလာတဲ့ အာဆီယံအဖွဲ့တွင်း သီးသန့်စာတမ်းကို ရရှိထားပြီး အဲဒီစာတမ်းထဲမှာ အာဆီယံရဲ့ ထိပ်သီးအစည်းအဝေးတွေနဲ့ နိုင်ငံခြားရေးဝန်ကြီးများ အစည်းအဝေးတွေကလွဲလို့ တခြား အာဆီယံအစည်းအဝေးတွေ အားလုံးမှာ မြန်မာစစ်အာဏာရှင်အုပ်စုကို အပြည့်အ၀ ပါဝင်ခွင့်ပြုဖို့ အဆိုပြုထားတယ်ဆိုပါတယ်။

အာဆီယံအနေနဲ့ အစုအဖွဲ့တလျှောက်လုံးမှာ မြန်မာရဲ့ပါဝင်မှုကို ဆိုင်းငံ့ထားသင့်ပြီး ငြိမ်းချမ်းရေး အတွက် တိုးတက်မှုကို စစ်အာဏာရှင်အုပ်စုက ဆက်ပြီး တားဆီး ဟန့်တားနိုင်မှာမဟုတ်ကြောင်း Fortify Rights မှ အရာရှိ  ပတ်ထရစ် ပွန်းဆာသွန်းက ပြောပါတယ်။

“အာဆီယံက ဒီလူသတ် စစ်အစိုးရကို ဒီအစုအဖွဲ့ရဲ့ အစိတ်အပိုင်းအဖြစ် ဘယ်လို ဆက်ခွင့်ပြုနိုင်မှာလဲ။”  

အာဆီယံခေါင်းဆောင်တွေအနေနဲ့ အာဏာသိမ်းစစ်တပ်က မြန်မာနိုင်ငံ အကျပ်အတည်းရဲ့ အဖြေမဟုတ်ဘဲ အဓိကတရားခံဖြစ်တာကို လက်တွေ့ကျကျ နားလည်လက်ခံဖို့ လိုအပ်တယ်လို့လည်း  ပတ်ထရစ်က  ပြောပါတယ်။  

အင်ဒိုနီးရှားနိုင်ငံခြားရေးဝန်ကြီး မာဆူဒီက မြန်မာနိုင်ငံနဲ့ပတ်သက်တဲ့ ဆွေးနွေးပွဲတွေဟာ ပွင့်ပွင့်လင်းလင်းနဲ့ အကြိတ်အနယ်ရှိကြောင်း ပြောကြားခဲ့ပါတယ်။ 

အစည်းအဝေးအပြီး ထုတ်ပြန်တဲ့ ကြေညာချက်အရ အာဆီယံဟာ အချက် ၅ ချက် သဘောတူညီမှုကို ဆက်ထောက်ခံသွားမှာဖြစ်ပေမယ့် ခိုင်မာတိကျပြီး လက်တွေ့ဆန်တဲ့ လုပ်ဆောင်ချက် လိုအပ်နေကြောင်း ကောက်ချက်ချသွားပါတယ်။

အာဆီယံဟာ ကနဦး အကြံပြုချက်မူကြမ်းမှာ စစ်ကောင်စီက အကြမ်းဖက်သမားတွေလို့ ယူဆထားသူတွေနဲ့ တွေ့ဆုံဆွေးနွေးဖို့ မပါဝင်ပေမယ့်လည်း အာဆီယံအစည်းအဝေး အဆင့်ဆင့်မှာ မြန်မာနိုင်ငံကိုယ်စားပြုမှုကို သုံးသပ်သွားမယ်လို့ ဆိုပါတယ်။ 

Photo- Cambodia Prime Minister 

3 weeks Ago

November 11, 2022

စင်ကာပူဝန်ကြီးချုပ်နှင့်အင်ဒိုနီးရှားသမ္မတ ဒေသတွင်းဖွံ့ဖြိုးတိုးတက်ရေးနှင့် မြန်မာ့အရေး ဆွေးနွေး

စင်ကာပူဝန်ကြီးချုပ် လီရှန်လွန်းနဲ့ အင်ဒိုနီးရှားသမ္မတ ဂျိုကိုဝီဒိုဒိုတို့ နိုဝင်ဘာ ၁၀ ရက်က တွေ့ဆုံပြီး မြန်မာနိုင်ငံအရေးနဲ့ပတ်သက်လို့ အာဆီယံရဲ့ နောက်ထပ်ခြေလှမ်းတွေအပါအဝင် ဒေသတွင်းဖွံ့ဖြိုးတိုးတက်ရေး ကိစ္စရပ်တွေကို ဆွေးနွေးခဲ့ကြတယ်လို့ သိရပါတယ်။ 

အာဆီယံခေါင်းဆောင်များ ညီလာခံအတွက် ကမ္ဘောဒီးယားနိုင်ငံ ဖနွမ်းပင်ကို စင်ကာပူဝန်ကြီးချုပ်လီ ရောက်ရှိခဲ့ပြီး မကြာခင်မှာပဲ တွေ့ဆုံခဲ့ကြတာလို့ ဆိုပါတယ်။ 

မစ္စတာလီနဲ့ သမ္မတ ဂျိုကိုဝီတို့ဟာ အာဆီယံအဖွဲ့ဝင်တွေအဖြစ်နဲ့ရော နှစ်နိုင်ငံမိတ်ဖက်အဖြစ်နဲ့ပါ နှစ်အတော်ကြာအောင် ကောင်းမွန်တဲ့ ဆက်ဆံရေးရှိခဲ့ကြောင်း စင်ကာပူဝန်ကြီးချုပ်ရုံးက ပြောပါတယ်။ 

ခေါင်းဆောင်နှစ်ဦးဟာ ကောင်းမွန်တဲ့ နှစ်နိုင်ငံဆက်ဆံရေးအကြောင်းဆွေးနွေးခဲ့ပြီး စင်ကာပူနဲ့ အင်ဒိုနီးရှားတို့ရဲ့ စီးပွားရေးပြန်လည်ကောင်းမွန်လာရေး၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးတို့အပြင် နှစ်နိုင်ငံပူးပေါင်းဆောင်ရွက်ခဲ့တဲ့ လုပ်ငန်းတွေရဲ့ ပြောင်းလဲတိုးတက်မှုတွေကို ဆွေးနွေးခဲ့ကြကြောင်းနဲ့ မြန်မာ့အရေးအပေါ် အာဆီယံက တုံ့ပြန်မယ့် နောက်ထပ်ခြေလှမ်းတွေကို ဆွေးနွေးခဲ့ကြကြောင်း စင်ကာပူဝန်ကြီးချုပ်ရုံးက ထုတ်ပြန်ပါတယ်။

လာမယ့်ရက်သတ္တပတ်အတွင်း အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပမယ့် G20 အစည်းအဝေးကိုလည်း မစ္စတာလီက တက်ရောက်မယ်လို့ ဆိုပါတယ်။ 

လာမယ့် ၂၀၂၃ ခုနှစ်မှာ အင်ဒိုနီးရှားနိုင်ငံက အာဆီယံဥက္ကဋ္ဌ ဖြစ်လာမှာကိုလည်း စင်ကာပူက ကြိုဆိုထောက်ခံကြောင်း ဖော်ပြခဲ့ပြီး အာဆီယံဥက္ကဋ္ဌ ဖြစ်ရခြင်းနဲဆိုင်တဲ့ လုပ်ငန်းတာဝန်တွေအကြောင်းကိုလည်း ဆွေးနွေးခဲ့ကြတယ်လို့ စင်ကာပူဝန်ကြီးချုပ်ရုံးက ပြောပါတယ်။

အဲဒီအစည်းအဝေးကို စင်ကာပူနိုင်ငံခြားရေးဝန်ကြီး ဗီဗီယန်ဘာလာခရစ်ရှ်နန်နဲ့ အင်ဒိုနီးရှားနိုင်ငံခြားရေးဝန်ကြီး ရတ္တနိုမာဆူဒီတို့လည်း တက်ရောက်ခဲ့ကြပြီး ဒေါက်တာဘာလာခရစ်ရှ်နန်က သူ့ရဲ့ Facebook စာမျက်နှာမှာ အင်ဒိုနီးရှားနိုင်ငံခြားရေးဝန်ကြီးနဲ့အတူ မြန်မာ့အရေးအပါအဝင် ကိစ္စရပ်အတော်များများကို အသေးစိတ်ဆွေးနွေးခဲ့ကြတယ်လို့ တွေ့ဆုံဆွေးနွေးမှုအပြီး နိုဝင်ဘာ ၁၀ ရက်နေ့ ညနေမှာ ရေးသားဖော်ပြခဲ့ပါတယ်။ 

စင်ကာပူ နိုင်ငံခြားရေးဝန်ကြီးဟာ ယူကရိန်း နိုင်ငံခြားရေးဝန်ကြီး Dmytro Kuleba နဲ့လည်း မနေ့ ညနေက တွေ့ဆုံခဲ့ပါတယ်။ သူ့ရဲ့ Facebook စာမျက်နှာမှာ ပြီးခဲ့တဲ့ စက်တင်ဘာလအတွင်း နယူးယော့ခ်မှာ တွေ့ဆုံပြီးနောက်ပိုင်း ယူကရိန်းမှာ အပြောင်းအလဲတွေအများကြီးရှိခဲ့တာကို ယူကရိန်းနိုင်ငံခြားရေးဝန်ကြီးက ပြောပြခဲ့တယ်လို့ ရေးသားခဲ့ပါတယ်။ 

ကုလသမဂ္ဂရဲ့ လမ်းညွှန်ချက်အတိုင်း ငြိမ်းချမ်းတဲ့ အဖြေရရှိဖို့ မျှော်လင့်ကြောင်း၊ နိုင်ငံတနိုင်ငံရဲ့ ပိုက်နက်၊ အချုပ်အခြာအာဏာနဲ့ နိုင်ငံရေးလွတ်လပ်ခွင့်ကို တခြားနိုင်ငံတွေအားလုံးက လေးစားကြရမယ်လို့ ဆိုပါတယ်။

အာဆီယံနိုင်ငံခြားရေးဝန်ကြီးတွေဟာ အရှေ့တောင်အာရှမှာ ယူကရိန်းရဲ့ ချစ်ကြည်ရင်းနှီးစွာ ပူးပေါင်းဆောင်ရွက်ရေး TAC သဘောတူညီချက် လက်မှတ်ရေးထိုးမှုမှာလည်း မျက်မြင်သက်သေအဖြစ်ရှိခဲ့ကြပါတယ်။ 

ယူကရိန်းဟာ ကမ္ဘာလုံးဆိုင်ရာ ငြိမ်းချမ်းစွာအတူယှဉ်တွဲနေထိုင်ပြီး ချစ်ကြည်ရင်းနှီးစွာ ပူးပေါင်းဆောင်ရွက်ရေး မူဝါဒတွေလို့ အဓိပ္ပာယ်ရတဲ့ TAC သဘောတူညီချက်မှာ ပါဝင်လက်မှတ်ရေးထိုးတဲ့ နိုင်ငံ ၅၀ မြောက် ဖြစ်ပါတယ်။

အခုနှစ် အာဆီယံခေါင်းဆောင်များ ညီလာခံအပြင် အခြားသက်ဆိုင်ရာ ညီလာခံတွေကို နိုဝင်ဘာ ၁၁ ရက်ကနေ နိုဝင်ဘာလ ၁၃ ရက် တနင်္ဂနွေနေ့အထိ ကျင်းပသွားမှာဖြစ်ပြီး ဒီနှစ်ဟာအာဆီယံရဲ့ ၅၅ နှစ်မြောက်တဲ့ နှစ်လည်းဖြစ်ပါတယ်။ 

အာဆီယံခေါင်းဆောင်များ ညီလာခံမှာ မြန်မာ့အရေးဆွေးနွေးဖို့အပြင် ပြင်ပမိတ်ဖက်နိုင်ငံတွေဖြစ်တဲ့ အမေရိကန်၊ တရုတ်၊ အိန္ဒိယ၊ ဂျပန်၊ တောင်ကိုရီးယား၊ ဩစတြေးလျ၊ ကနေဒါနိုင်င်ငံတွေနဲ့လည်း တွေ့ဆုံဆွေးနွေးသွားကြမယ်လို့ ချန်နယ်နယူးအေးရှားရဲ့ သတင်းမှာ ဖော်ပြထားပါတယ်။

3 weeks Ago
More News
Up