မြန်မာနိုင်ငံဆိုင်ရာ ကုလအထူးသံတမန်

August 16, 2022

ကုလအထူးကိုယ်စားလှယ်၏ မြန်မာနိုင်ငံခရီးစဉ် စစ်ကောင်စီအား အသိအမှတ်ပြုသလို မဖြစ်စေရန် သတိထားသင့်ဟု NUG ပြော

ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် ဒေါက်တာနိုလင်းဟေဇာရဲ့ ခရီးစဉ်ဟာ တာဝန်အရ သွားရောက်တယ်ဆိုတာ နားလည်ပေမဲ့ အချိန်အခါကောင်း ဟုတ်၊ မဟုတ်ကို စောင့်ကြည့်နေတယ်လို့ NUG သမ္မတရုံး တာဝန်ရှိသူက ပြောပါတယ်။

ဒေါက်တာနိုလင်းဟေဇာဟာ မြန်မာနိုင်ငံကို ဩဂုတ် ၁၆ ရက်နေ့မှာ ရောက်ရှိမယ်လို့ ကုလသမဂ္ဂ အတွင်းရေးမှူးချုပ်ရုံးက သတင်းထုတ်ပြန်ထားတာပါ။

ဒေါက်တာနိုလင်းဟေဇာဟာ မြန်မာနိုင်ငံရဲ့ ဆိုးရွားလာတဲ့ အခြေအနေအတွက် မြန်မာနိုင်ငံကို သွားတာလို့ ကုလသမဂ္ဂ ပြောရေးဆိုခွင့်ရှိသူတဦးက ပြောဆိုထားပါတယ်။

စင်ကာပူနိုင်ငံသူ ဒေါက်တာနိုလင်းဟေဇာဟာ မြန်မာနိုင်ငံဆိုင်ရာ အထူးကိုယ်စားလှယ်အဖြစ် ၂၀၂၁ အောက်တိုဘာလမှာ တာဝန်ပေးအပ်ခံရတာဖြစ်ပြီး အချိန် ၉ လကျော်ကြာမှ မြန်မာနိုင်ငံအတွင်းကို ဝင်ရောက်ခွင့်ရခဲ့တာပါ။

NUG သမ္မတရုံး ပြောခွင့်ရှိသူ ဦးကျော်ဇော်က “ဒေါက်တာနိုလင်းဟေဇာ မြန်မာနိုင်ငံကို ရောက်မယ့်ကိစ္စ ကျနော်တို့ ကြားသိရပါတယ်။ သူ့တာဝန်ကို သူထမ်းဆောင်တာ နားလည်ပေမဲ့ အခုအချိန်ဟာ အချိန်အခါကောင်း ဟုတ်ချင်မှဟုတ်မယ်ဆိုတာ ပြောချင်ပါတယ်။ ပြီးခဲ့တဲ့ရက်ကပဲ အတိုင်ပင်ခံ ဒေါ်အောင်ဆန်းစုကြည်ကို စစ်ကောင်စီက ထောင်ဒဏ် ၆ နှစ် ထပ်ပြီးချမှတ်လိုက်တယ်။ မုံရွာသပိတ်ခေါင်းဆောင် ကိုဝေမိုးနိုင်ကိုလည်း ထောင်ဒဏ် ၁၀ နှစ် ချမှတ်တယ်။ အဲဒါတွေက ကုလနဲ့ အာဆီယံခေါင်းဆောင်တွေ ပြောနေတဲ့ကြားကနေပြီးတော့ ဒီရက်ပိုင်းမှာ တမင်လုပ်တယ်။ လုပ်ပြီးတော့ ကုလသမဂ္ဂ အတွင်းရေးမှူးချုပ်ရဲ့ ကိုယ်စားလှယ်ကို မြန်မာပြည်ကို ပေးလာတယ်။ ဒီတော့ ဒါက အချိန်ကောင်းမဟုတ်ဘူးလို့ ကျနော်တို့ ထင်ပါတယ်” လို့ ပြောပါတယ်။

မြန်မာပြည်တွင်းက အကြမ်းဖက်မှုအားလုံး ချက်ချင်းရပ်တန့်ဖို့နဲ့ လူသားချင်း စာနာထောက်ထားမှု အကူအညီတွေကို စစ်ကောင်စီက ခွင့်ပြုဖို့ ကုလသမဂ္ဂ လုံခြုံရေးကောင်စီက တောင်းဆိုခဲ့ပြီး နောက်ပိုင်းမှာ စစ်ကောင်စီရဲ့ သဘောတူညီချက်နဲ့ ဒေါက်တာနိုလင်းဟေဇာဟာ မြန်မာပြည်တွင်း ဝင်ရောက်ခွင့်ရခဲ့တာ ဖြစ်ပါတယ်။ ဖမ်းဆီးခံ နိုင်ငံ့ခေါင်းဆောင်တွေနဲ့ တွေ့ခွင့်ရ မရ၊ နိုင်ငံရေးအစုအဖွဲ့တွေ၊ အရပ်ဘက်အဖွဲ့တွေနဲ့ တွေ့ခွင့်ရ မရ ဆိုတာကို အတည်မပြုနိုင်သေးပါဘူး။

“အထူးကိုယ်စားလှယ်ရဲ့ မြန်မာပြည်ခရီးစဉ်က စစ်ကောင်စီကို အသိအမှတ်ပြုသလို မဖြစ်အောင် အထူးသတိထားရပါလိမ့်မယ်။ အာဆီယံအထူးကိုယ်စားလှယ် မြန်မာပြည်သွားတာ ၂ ကြိမ်ရှိခဲ့ပြီ။ ဘာမှ ထူးထူးထွေထွေ မရလာတဲ့အပြင် ဒီမိုကရေစီခေါင်းဆောင်တွေဖြစ်တဲ့ ကိုဂျင်မီ၊ ကိုဖြိုးဇေယျာသော်တို့ အပါအဝင် စုစုပေါင်း ၄ ယောက်ကို အာဆီယံ အထူးကိုယ်စားလှယ် သွားပြီးတော့မှပဲ ကွပ်မျက်လိုက်တယ်။ အဲဒါလည်း ဒေါက်တာနိုလင်းဟေဇာအနေနဲ့ သတိထားဖို့ လိုပါလိမ့်မယ်” လို့ ဦးကျော်ဇော်က ပြောပါတယ်။

ကုလသမဂ္ဂနဲ့ အာဆီယံက မြန်မာစစ်ဘေးသင့်ပြည်သူတွေကို လူသားချင်း စာနာထောက်ထားမှု အကူအညီတွေပေးဖို့ အကြိမ်ကြိမ်ကြိုးစားခဲ့ပေမဲ့ အာဏာသိမ်းပြီး ၁၈ လကျော် ကြာတဲ့အချိန်အထိ ဒုက္ခသည်တွေကို ထိရောက်တဲ့ အကူအညီတွေ မပေးနိုင်ခဲ့ပါဘူး။

ဇွန်လမှာ အကူအညီတချို့ကို ခွင့်ပြုခဲ့ပေမဲ့ စစ်ကောင်စီက သူတို့ဖွဲ့စည်းထားတဲ့အဖွဲ့နဲ့ပဲ အကူအညီတွေပေးဖို့ ထိန်းချုပ်ခဲ့တဲ့အတွက် တကယ်ဒုက္ခရောက်နေတဲ့သူတွေဆီ ဘာအကူအညီမှ ရောက်မလာခဲ့ဘူးလို့ ကရင်နီ စစ်ဘေးရှောင်တွေကို အကူအညီပေးနေတဲ့ အရပ်ဘက်အဖွဲ့တွေက ပြောဆိုထားပါတယ်။

4 months Ago

October 26, 2021

မြန်မာနိုင်ငံဆိုင်ရာ ကုလအထူးသံတမန်အဖြစ် စင်ကာပူနိုင်ငံသူ မစ္စ နိုလင်းဟေဇာကို ခန့်အပ်

မြန်မာနိုင်ငံဆိုင်ရာ ကုလသမဂ္ဂ အထူးသံတမန်အဖြစ် စင်ကာပူနိုင်ငံသူ ဝါရင့်သံတမန် မစ္စ နိုလင်း ဟေဇာကိုခန့်အပ်ကြောင်း ကုလအတွင်းရေးမှူးချုပ် အန်တိုနီယို ဂူတားရက်စ်က ကြေညာလိုက် ပါတယ်။  

ဒေါက်တာ နိုလင်း ဟေဇာဟာ မစ္စ ခရစ္စတင်းရှရနာဘာဂီနာရဲ့ နေရာကို ဆက်ခံသူဖြစ်လာပြီး မြန်မာပြည်သူတွေကို ကူညီနိုင်ဖို့ရာ တာဝန်တွေကို တစိုက်မတ်မတ် ထမ်းဆောင်ခဲ့တဲ့အတွက် မစ္စ ဘာဂီနာ အပေါ် ကျေးဇူးများစွာ တင်ရှိကြောင်းလည်း မစ္စတာ ဂူတားရက်စ်က ဆိုပါတယ်။    

ဒေါက်တာဟေဇာဟာ မြန်မာပြည်နဲ့ ပတ်သက်ပြီးတော့လည်း ထိတွေ့ ဆက်ဆံဖူးသူဖြစ်ပြီး ဖွံ့ဖြိုးရေးနဲ့ ဆင်းရဲမွဲတေမှု လျှော့ချနိုင်ရေး ကိစ္စတွေ၊ နာဂစ်မုန်တိုင်းအလွန် ပြန်လည် ထူထောင်ရေး ကိစ္စတွေမှာ အာဆီယံ၊ ကုလနဲ့ အဲဒီအချိန်က မြန်မာအာဏာပိုင်တွေကြား နီးနီးကပ်ကပ် အလုပ်လုပ်ကိုင်ခဲ့သူ ဖြစ်ပါတယ်။

ဒေါက်တာဟေဇာဟာ ကုလသမဂ္ဂရဲ့  အာရှနဲ့ ပစိဖိတ်ဒေသဆိုင်ရာ စီးပွားရေးနဲ့ လူမှုရေးရာ ကော်မရှင် အကြီးအကဲတာဝန်ကို ၂၀၀၇ ကနေ ၂၀၁၄ အထိ ထမ်းဆောင်ခဲ့ပြီး ဒီရာထူးကို အမျိုးသမီးတွေထဲ ပထမဆုံး စတင်ရရှိနိုင်ခဲ့သူ ဖြစ်ပါတယ်။

အာဆီယံဒေသတွင်း အရှေ့တီမော  ငြိမ်းချမ်းရေး တည်ဆောက်မှုမှာလည်း ကုလ အတွင်းရေးမှူးချုပ်ရဲ့ အထူးအကြံပေးအဖြစ် ဒေါက်တာဟေဇာဟာ ၂၀၁၃ ကနေ ၂၀၁၅ အထိ တာဝန်ထမ်းခဲ့သူ ဖြစ်ပါတယ်။ 

ဒေါက်တာဟေဇာဟာ ကုလအတွင်းရေးမှူးချုပ်ရဲ့ ကြားဝင်ညှိနှိုင်းရေး အဆင့်မြင့်အကြံပေး ဘုဒ်ရဲ့ လက်ရှိ အဖွဲ့ဝင်တစ်ယောက် ဖြစ်သလို၊ စင်ကာပူနိုင်ငံ NUS တက္ကသိုလ်က လူထုရေးရာ မူဝါဒ လီကွမ်ယုကျောင်းရဲ့ အုပ်ချုပ်ရေး ဘုတ်အဖွဲ့ဝင်လည်း ဖြစ်ပါတယ်။

1 year Ago
Up