မြန်မာစစ်အုပ်စု

May 8, 2021

မြန်မာစစ်အုပ်စုအား လက်နက်ရောင်းချမှု ချက်ခြင်းပိတ်ပင်ရန် ကုလလူ့အခွင့်အရေးကိုယ်စားလှယ် တိုက်တွန်း

မြန်မာစစ်အုပ်စုအပေါ်လက်နက်ရောင်းချမှု ပိတ်ဆို့အရေးယူဖို့ အရပ်ဘက်လူ့အဖွဲ့ အစည်းတွေရဲ့ တောင်းဆိုချက်ကို ကြိုဆိုခဲ့ပြီး ကုလလုံခြုံရေးကောင်စီဝင်နိုင်ငံတွေအနေနဲ့ ချက်ချင်းအရေးယူဆောင်ရွက်ပေးဖို့ မြန်မာနိုင်ငံလူ့အခွင့်အရေးဆိုင်ရာ ကုလသမဂ္ဂအထူး ကိုယ်စားလှယ် တွမ်အင်ဒရူးစ်က တိုက်တွန်းလိုက်ပါတယ်။ 

မြန်မာစစ်အာဏာရှင်လက်ထဲကို လက်နက်တွေနဲ့ လက်နက်အသုံးချနည်းပညာတွေ ပေးအပ်နေတာကို ရပ်တန့်လိုက်ဖို့ဟာ သေရေးရှင်ရေးကိစ္စဖြစ်တာကြောင့် အချိန်ဆွဲနေလို့ မရတော့ဘူးလို့လည်း ဆိုပါတယ်။ 

ဒါကို ကုလသမဂ္ဂလုံခြုံရေးကောင်စီအနေနဲ့ အာရုံစိုက်မိလာအောင် အားထုတ်ကြိုးပမ်းခဲ့တဲ့ အဖွဲ့အစည်းပေါင်း ၂၀၀ ကျော်ကိုလည်း ချီးကျူးပါကြောင်းနဲ့ ကိုယ့်ပြည်သူကိုယ် သတ်ဖြတ်ပစ်မယ့် လက်နက်တွေကို အသုံးပြုမယ့်သူတွေလက်ထဲ အသက်တွေ သေစေမယ့် လက်နက်ပစ္စည်းတွေ စီးဆင်းနေမှုကို ရပ်တန့်ပစ်ဖို့ ဆောင်ရွက်ချက်ကို ခုပဲလုပ်ဆောင်ဖို့လိုနေပါပြီလို့ ပြောထားပါတယ်။ 

ရက်စက်ကြမ်းကြုတ်တဲ့ စစ်အာဏာရှင်ဆီ လက်နက်တွေ ပေးအပ်နေတာကို ဖြတ်တောက်ပစ်ဖို့ ထောက်ခံအားပေးတဲ့ အစိုးရတွေအနေနဲ့ အာဏာသိမ်းစစ်အုပ်စီဆီ လက်နက်တင်ပို့မှုကို ကိုယ့်နိုင်ငံနဲ့ကိုယ် ပိတ်ဆို့အရေးယူဖို့ကိစ္စ ချက်ချင်းစဉ်းစားသုံးသပ်ဖို့နဲ့ တချိန်တည်းမှာပဲ ကုလလုံခြုံရေးကောင်စီရဲ့ အရေးယူမှုကို အားပေးဖို့လည်း တိုက်တွန်းလိုက်ပါတယ်။

 တွမ်အင်ဒရူးစ်ဟာ လက်ရှိမှာ မြန်မာနိုင်ငံဆီ လက်နက်တင်ပို့မှု ပိတ်ပင်ထားတဲ့ နိုင်ငံများ စာရင်းကို ပြန်လည်သုံးသပ်ပြုစုနေပြီး လူ့အခွင့်အရေးကောင်စီသို့ မတ်လအစီရင်ခံစာမှာ  မြန်မာနိုင်ငံအပေါ် လက်နက်တင်ပို့မှု ပိတ်ပင်ထားပြီးသော နိုင်ငံတွေကို ဖော်ထုတ်ခဲ့ပါတယ်။

 လက်နက်ရောင်းချမှု ပိတ်ဆို့ဖို့ မချမှတ်ရသေးတဲ့ သူတွေအနေနဲ့လည်း မြန်မာစစ်တပ်ဟာ သူ့ နိုင်ငံသားတွေကို နေ့စဉ်ရက်ဆက် ဒုက္ခပေးနေပြီး ဒီလိုတွေ ဆက်လုပ်နေလိမ့်မယ် ဆိုတာကို သိအောင်ရည်ရွယ်မျှော်လင့်ပါတယ်လို့လည်း  မြန်မာနိုင်ငံလူ့အခွင့်အရေးဆိုင်ရာ ကုလသမဂ္ဂ အထူးကိုယ်စားလှယ် တွမ်အင်ဒရူးစ်က တိုက်တွန်းထားပါတယ်။ 

6 hours Ago

April 7, 2021

မြန်မာစစ်အုပ်စုကို လူ့အခွင့်အရေးချိုးဖောက်သူများအဖြစ် ဂျပန်လွှတ်တော်အမတ်များသတ်မှတ်

ဂျပန်အနေနဲ့ နိုင်ငံရပ်ခြားမှာ လူ့အခွင့်အရေးချိုးဖောက်နေသူတွေကို အရေးယူအပြစ်ပေး နိုင်မယ့် ဥပဒေမူကြမ်းကို လွှတ်တော်မှာ အတည်ပြုနိုင်ရေးအတွက် အရေးယူပိတ်ဆို့နိုင်ရေး ဥပဒေကြမ်းတခုကို ရေးဆွဲတင်ပြ ကြားနာပွဲကို တိုကျိုမြို့ ချီယိုဒရှိ လွှတ်တော်အမတ်များ အဆောက်အုံအမှတ်(၁)မှာ ဧပြီလ ၆ ရက်နေ့က ပြုလုပ်ခဲ့ပါတယ်။

“ဂျပန်လွှတ်တော်အမတ်တွေအနေနဲ့  အာဏာသိမ်းမြန်မာစစ်အုပ်စုကို လူ့အခွင့်အရေး ချိုးဖောက်သူတွေအဖြစ် ပဲသတ်မှတ်ထားပြီး အစိုးရတရပ်အဖြစ်မသတ်မှတ်ဘူး။ ဒါကြောင့် ဒီဥပဒေ မူကြမ်းကိုလွှတ်တော်မှာ အတည်ပြုနိုင်ရေးအတွက်ဒီနေ့ ပါတီပေါင်းစုံ စုဝေးအတည်ပြုရယူ ကြတာမှာ မြန်မာနိုင်ငံမှာလည်း လူ့အခွင့်အရေးအကြီးအကျယ် ချိုးဖောက်နေတာတွေရှိတာကြောင့် ကျနော်တို့ကို သူတို့က ခေါ်ပြီးတင်ပြဆွေးနွေးစေတာပါ”လို တက်ရောက်တင်ပြခဲ့သူ ဦးသန်းဆွေက ဒီဗွီဘီကိုပြောပါတယ်။

ကြားနာပွဲကို CRPH အထောက်အကူပြုကော်မတီ (ဂျပန်)အဖွဲဝင်နဲ့ ပြည်ထောင်စု မြန်မာနိုင်သားများအသင်း(ဂျပန်)ဥက္ကဋ္ဌ ဦးသန်းဆွေနဲ့ မြန်မာ့အရေးဆောင်ရွက်နေတဲ့ ကုလသမဂ္ဂ UNHCR ပြည်သူ့ဆက်ဆံရေးကိုယ်စားလှယ် Shibuya ဇာနည်တို့က လက်ရှိ မြန်မာနိုင်ငံမှာ အာဏာသိမ်းစစ်အုပ်စုက  နေ့စဉ်ပြည်သူတွေကို အကြမ်းဖက်သတ်ဖြတ်နေတာ ၅၀၀ ကျော်ရှိနေကြောင်း တင်ပြဆွေးနွေးခဲ့ပြီး CRPH ကိုသာ ဂျပန်အစိုးရ အနေနဲ့ အသိအမှတ်ပြု ဆက်ဆံဖို့ ပြောဆိုခဲ့ကြတာကိုလည်း တွေ့ရပါတယ်။

တင်ပြဆွေးနွေးခဲ့သူနောက်တဦးဖြစ်တဲ့ Shibuya ဇာနည် ကတော့ အခုမကြာခင် ဂျပန် ဝန်ကြီးချုပ် ဆုဂ က အမေရိကန်သွားပြီး သမ္မတ ဘိုင်ဒန်နဲ့ နိုင်ငံတကာလူ့အခွင့်အရေးဆိုင်ရာ အခြေအနေတွေ ဆွေးနွေးရာမှာ မြန်မာနိုင်ငံအကြောင်းလည်း ပါဝင်မှာမို့ ဒီနေ့ပွဲမှာ တင်ပြခွင့်ရတာ မြန်မာနိုင်ငံအတွက် အရမ်းကံကောင်းလှတယ်လို့လည်း ဒီဗွီဘီကိုပြောပြခဲ့ပါတယ်။

လူ့အခွင့်အရေးဆိုင်ရာ သံတမန်ဆက်ဆံရေးကို ပြန်လည်သုံးသပ်ဆွေးနွေးတဲ့ ပါတီပေါင်းစုံမှ ပါလီမန်အမတ်များအသင်းအဖွဲ့လို့ အမည်ပေးထားပြီး ပထမဆုံးအကြိမ် အစည်းအဝေးဖြစ်ကာ၊ ဂျပန်နိုင်ငံမှာ နိုင်ငံရေးဩဇာကြီးမားပြီး အာဏာရ LDP ပါတီခေါင်းဆောင်မစ္စတာအိချီဘ၊ ဂျပန် မြန်မာပါလီမန်အမတ်များ ချစ်ကြည်ရေးအဖွဲ့ဥက္ကဋ္ဌ မစ္စတာ အအိဆဝ၊ ကာကွယ်ရေး ဝန်ကြီးဟောင်း မစ္စတာ နခတန်နီ၊ အစိုးရ ရှေ့နေချုပ်ဟောင်း မစ္စယမအို ချီအိုရီတို့ပါတက်ရောက် ဦးဆောင်ဆွေးနွေးခဲ့ကြပါတယ်။

1 month Ago
Up