မြန်မာကျပ်ငွေ

August 17, 2022

ဗဟိုဘဏ် ဖြေလျှော့ပေးသည့် ပို့ကုန်ရငွေ ၃၅ ရာခိုင်နှုန်းကို ရက် ၃၀ အတွင်း သုံးစွဲရမည်

တရက်အတွင်း မြန်မာကျပ်ငွေ မဖြစ်မနေ လဲလှယ်ရမယ်ဆိုတဲ့ သတ်မှတ်ချက်ကနေ ကင်းလွတ်ခွင့်ရထားတဲ့ ပို့ကုန်ရငွေ ၃၅ ရာခိုင်နှုန်းကို ပို့ကုန်ရငွေ ဝင်ရောက်ပြီး ရက်ပေါင်း ၃၀ အတွင်း သုံးစွဲရမယ်လို့ စစ်ကောင်စီလက်အောက်ခံ ဗဟိုဘဏ်က အသိပေးထုတ်ပြန်ပါတယ်။

ဗဟိုဘဏ်က ပို့ကုန်တင်ပို့မှုကနေ ရရှိတဲ့ နိုင်ငံခြားငွေအားလုံးကို ဗဟိုဘဏ် သတ်မှတ်ငွေလဲနှုန်းနဲ့ တရက်အတွင်း မဖြစ်မနေ လဲလှယ်ရမယ်ဆိုတဲ့ သတ်မှတ်ချက်ကို သြဂုတ် ၅ ရက်ကစတင်ပြီး ၆၅ ရာခိုင်နှုန်းကိုသာ မြန်မာကျပ်ငွေနဲ့ မဖြစ်မနေ လဲလှယ်ရမယ်လို့ ပြင်ဆင်သတ်မှတ်ခဲ့ပါတယ်။

ကျန် ၃၅ ရာခိုင်နှုန်းကိုတော့ ပို့ကုန်တင်ပို့သူက ကိုယ်တိုင်အတွက် သုံးစွဲနိုင်သလို လွှဲပြောင်းရောင်းချနိုင်တယ်လို့ ဆိုပါတယ်။

ပို့ကုန်တင်ပို့သူအနေနဲ့ ပို့ကုန်ရငွေ ပမာဏရဲ့ ၃၅ ရာခိုင်နှုန်းကို မိမိကိုယ်တိုင်အတွက် သုံးစွဲတာ၊ AD လိုင်စင်ရ ဘဏ်မဟုတ်တဲ့ တခြားသူတွေဆီ လွှဲပြောင်းတာနဲ့ AD လိုင်စင်ရ ဘဏ်တွေထံ ရောင်းချတာတွေကို ဆောင်ရွက်နိုင်မယ်လို့ အသိပေး ထုတ်ပြန်ထားတာပါ။

ပို့ကုန်တင်ပို့သူတွေထံကနေ လွှဲပြောင်းရယူထားတဲ့ ကုမ္ပဏီ၊ အဖွဲ့အစည်း၊ လူပုဂ္ဂိုလ်တွေကတော့ သူတို့လွှဲပြောင်းရယူထားတဲ့ ပို့ကုန်ရငွေကို မိမိကိုယ်တိုင်အတွက် သုံးစွဲတာနဲ့ AD လိုင်စင်ရဘဏ်တွေထံ ပြန်ရောင်းချတာကိုပဲ ဆောင်ရွက်နိုင်မယ်လို့ ဆိုပါတယ်။

ဒါပေမဲ့ အဲဒီလိုဆောင်ရွက်မှုတွေကို ပို့ကုန်ရငွေ ဝင်ရောက်ပြီး ရက်ပေါင်း ၃၀ အတွင်း လုပ်ဆောင်ရမှာဖြစ်ပြီး သတ်မှတ်ကာလအတွင်း သုံးစွဲမှုမရှိတဲ့ ကျန်ငွေကို AD လိုင်စင်ရ ဘဏ်တွေကို မဖြစ်မနေ ရောင်းချရမယ်လို့ သတ်မှတ်ထားပြန်ပါတယ်။

ဒါ့အပြင် အဲဒီပို့ကုန်ရငွေနဲ့ နယ်စပ်ဖြတ်ကျော် ငွေလွှဲပို့တာတွေ ဆောင်ရွက်ရာမှာလည်း နိုင်ငံခြားသုံးငွေ ကြီးကြပ်မှုကော်မတီရဲ့ အတည်ပြုချက် ရယူရမယ်လို့လည်း ဆိုပါတယ်။

2 months Ago

March 24, 2022

ငွေစက္ကူများကို စိုးရိမ်ပူပန်မှုမရှိဘဲ ယုံကြည်စွာ သုံးစွဲနိုင်ဟု စစ်ကောင်စီ ပြော

နိုင်ငံတော်က တရားဝင်ထုတ်ဝေထားတဲ့ ငွေစက္ကူတွေကို ပြည်သူလူထုအနေနဲ့  စိုးရိမ်ပူပန်မှု မရှိဘဲ ယုံကြည်စွာ သုံးစွဲနိုင်တဲ့ အကြောင်း စစ်ကောင်စီခန့် ပြန်ကြားရေး ဒုဝန်ကြီး ဗိုလ်ချုပ် ဇော်မင်းထွန်းက  မတ်လ ၂၄ ရက် ဒီနေ့ ပြုလုပ်တဲ့ သတင်းစာရှင်းလင်းပွဲမှာ ပြောပါတယ်။

“ကျနော် ပြောလိုတာက အရင်တခေါက်ကလည်း ကျနော်တို့ ငွေစက္ကူနဲ့ ပတ်သက်ပြီး ကောလာဟလတွေ ထွက်လာတုန်းက ပြောထားပြီးသားဖြစ်ပါတယ်။ ဒါက ၂၀၀၈၊ ဖွဲ့စည်းပုံအခြေခံဥပဒေ ပုဒ်မ- ၃၆ (င) အရ နိုင်ငံတော်သည် တရားဝင်ထုတ်ဝေထားတဲ့ ငွေကြေးကို တရားမဝင် ငွေကြေးအဖြစ် သတ်မှတ်ခြင်း မပြုလို့ ဖော်ပြထားပါတယ်။ ဒါကြောင့် ပြည်သူလူထုအနေနဲ့ စိုးရိမ်ပူပန်မှု မရှိဘဲ ယုံကြည်စွာ သုံးစွဲနိုင်ကြောင်း အသိပေးလိုပါတယ်” လို့ ဗိုလ်ချုပ် ဇော်မင်းထွန်းက ပြောဆိုခဲ့တာပါ။ 

ဒါပေမဲ့ လူထုအကြားမှာတော့  ငွေစက္ကူအတုတွေ ပိုမိုပျံ့နှံ့လာနေပြီး ဒါဟာ ဘဏ်တွေပေါ် လူထုရဲ့ ယုံကြည်မှု မရှိတာနဲ့ ဆက်စပ်မှု ရှိနေတယ်လို့ ဘဏ်ဝန်ထမ်းတဦးက သုံးသပ်ပြောပါတယ်။

“အရင်တုန်းကတော့ ဘဏ်တွေဆီကို လာရောက်အပ်နှံတဲ့အထဲ ငွေအတုတွေ ပါလာပြီဆိုရင် ဗဟိုဘဏ်က ချမှတ်ထားတဲ့ စည်းကမ်းတွေအတိုင်း လိုက်နာဆောင်ရွက်ပြီး ဖြေရှင်းခဲ့ပေမဲ့ အခုချိန်မှာတော့ ပြည်သူတွေဟာ ဘဏ်ကိုမယုံကြည်တော့တဲ့အတွက် ဘဏ်မှာလည်း ငွေအတုတွေ လာမစစ်နိုင်သလို၊ ဘဏ်တွေကလည်း ပြည်သူတွေ လိုအပ်ချက်ရှိတဲ့အတိုင်း ငွေကို အလုံအလောက် မထုတ်ပေးနိုင်တော့လို့ အခုလို ပြဿနာတွေ ဖြစ်ပေါ်လာရတာပါ။”

စစ်တပ်အာဏာမသိမ်းခင်အချိန်ကာလတွေမှာ ငွေအတုတွေရှိခဲ့ပေမဲ့ ပြည်သူတွေကြားထဲ လျင်လျင်မြန်မြန်မရောက်ခဲ့သလို အခုလို ငွေစက္ကူအတုတွေကို အွန်လိုင်းမှာ ပေါ်ပေါ်တင်တင် ရောင်းချတာတွေလည်း မရှိခဲ့ပါဘူး။

လူမှုကွန်ယက်စာမျက်နှာမှာ ပျံ့နှံ့နေတဲ့ ငွေစက္ကူအတုနဲ့ပတ်သတ်ပြီး တွေ့ရှိတဲ့အခြေအနေအပေါ် ပြန်ကြားရေး ဒုဝန်ကြီးက “လူမှုကွန်ယက်စာမျက်နှာတွေပေါ်မှာ ငွေစက္ကူအတု ရောင်းဝယ်ရေး၊ ဒါ ဖေ့စ်ဘွတ်ခ်ပေ့ချ်တွေ ဖွင့်ပြီးတော့ ကြော်ငြာ ရောင်းချပေး နေတာ တွေ့ရပါတယ်။ ငွေစက္ကူအသစ်တွေကို ဓါတ်ပုံရိုက်ပြီး ပေ့ချ်မှာ လိမ်လည်ဖော်ပြခြင်းနဲ့ ပုံအဟောင်းတွေ ကူးယူပြီး ဖော်ပြထားခြင်းကို တွေ့ရပါတယ်။ အင်တာနက်စာမျက်နှာပေါ်မှာ ငွေစက္ကူအတုများ ရောင်းချတယ် ဆိုပြီး အရောင်းအဝယ်ပြုလုပ်တာ မဟုတ်ဘဲ အွန်လိုင်းပေါ်မှာ ယုံကြည်အောင် ပြောဆိုပြီး ကြိုတင်လွှဲပို့တဲ့ ငွေတွေကို လိမ်လည် ရယူနေတာကိုလည်း တွေ့ရပါတယ်။ ငွေ ၃ သောင်း စရံ တောင်းခံပြီး ငွေရရှိပါက ကျနော်တို့ ထပ်မံ ဆက်သွယ်မှုမရဘဲ ဖုန်းပိတ်ထားတာမျိုးတွေ အကောင့်ဖျက်ပြီး ပြေးတာမျိုးတွေ လုပ်ဆောင်တာ ကျနော်တို့ တွေ့ပါတယ်။ နောက်တခုကတော့ ငွေစက္ကူအတုတွေကို ဘယ်နေရာမှာ ချထားမယ်၊ သွားယူပါ ဆိုပြီး ငွေကြိုလွှဲခိုင်းတာ၊ ပိတ်သွားတာ၊ လိမ်သွားတာ မျိုးတွေလည်း ကျနော် တို့ တွေ့ရှိရပါတယ်” လို့ ဆိုပါတယ်။

ဗဟိုဘဏ်ရဲ့ မှတ်တမ်းတွေအရ ငွေတုဖမ်းဆီးရရှိမှုက ၂၀၁၉-၂၀၂၀ ဘဏ္ဍာရေးနှစ်မှာ ၁၉ ကြိမ်၊ ၂၀၂၀-၂၀၂၁ ဘဏ္ဍာ ရေးနှစ်မှာ  ၆ ကြိမ် နဲ့ ၂၀၂၁-၂၀၂၂ ဘဏ္ဍာရေးနှစ်မှာ ၂၅ ကြိမ် ရှိခဲ့တာကြောင့် ငွေစက္ကူအတုဖမ်းဆီးရမှုက ပိုမိုများပြားလာကြောင်း တွေ့ရပါတယ်။

6 months Ago
More News
Up