မြန်မာကုန်တင်ကား

October 28, 2021

တရုတ်ဘက်ပိတ်မိ မြန်မာကုန်တင်ကားများ၏ ယာဉ်မောင်းမိသားစုများ စားဝတ်နေရေးခက်ခဲ

တရုတ်ဘက်မှာ ပိတ်မိနေတဲ့ မြန်မာကုန်တင်ကားတွေရဲ့ ယာဉ်မောင်း မိသားစုတွေ စားဝတ်နေရေး အခက်အခဲ ကြုံနေကြတယ်လို့ သိရပါတယ်။

လက်ရှိ ဝမ်တိန်အထွက် ကျင်စန်းကျော့မှာ ကားအထွက်ကို စောင့်ဆိုင်းနေရတဲ့ မြန်မာကုန်တင်ယာဉ်မောင်း ကိုစိုင်းခေးက "ကျနော်က ယာဥ်မောင်းတစ်ယောက်ဆိုတော့ ကိုယ့်မိသားစု စားဝတ်နေရေးက ရှိသေးတယ်လေ။ မိသားစု စားဝတ်နေရေးအတွက် တော်တော် အခက်အခဲဖြစ်နေပါတယ်။" လို့ ပြောပါတယ်။

ကားက တရုတ်ဘက်ထဲ ပိတ်မိနေတော့ ကားကိုလည်း စိတ်ပူရတဲ့အပြင် ယာဉ်မောင်းတွေအနေနဲ့ ၆ လတာအချိန်ကာလမှာ ဝင်ငွေ ၁ ပြား ၁ ကျပ်မှ မရှိဘဲ အဲဒီကားတစီးကိုပဲ စောင့်ဆိုင်းနေရကာ တခြား အလုပ်လုပ်ဖို့လည်း အဆင်မပြေကြဘူးလို့ ဆိုပါတယ်။

မေလ ၂၁ ရက်နေ့က မန္တလေးကနေ ကျင်စန်းကျော့ကို တက်သွားပြီးနောက် ဇွန်လ ၂၉ ရက်နေ့ ကားက တရုတ်နိုင်ငံထဲ ကုန်တင်ပြီး ထွက်ခါနီး ဇူလိုင် ၆ ရက်နေ့ကတည်းက လက်ရှိထိ ပိတ်မိနေတာလို့ မြန်မာကုန်တင် ယာဉ်မောင်း နောက် ၁ ဦးက ပြောပါတယ်။

"ကားက ပိတ်မိနေတာလည်း နည်းနည်းနော်နော် အကြာ မဟုတ်တော့ဘူးလေဗျ။ ၆ လ လောက်ရှိနေပြီဗျ။ အခက်ခဲတော့ အများကြီးပေါ့။"

တရုတ်ထဲ ကာလကြာရှည် ကုန်တင်ပြီး  ပိတ်မိနေတဲ့ ကားတွေ ထိခိုက်ပျက်စီးမှုအတွက်လည်း စိုးရိမ်ပူပန်နေကြရတယ်လို့ ဆိုပါတယ်။

ကုန်တင်ယာဉ်မောင်းတစ်ဦးက “ဟိုဘက်မှာ ပိတ်မိနေတဲ့ ကားတွေတော့ များသေးတယ်။ ကျနော် သိသလောက် ၂၀၀ လောက်ရှိအုန်းမယ်ဗျ။ ကုန်စုံတွေပဲပိတ်မိနေတာပါ။ အဝင်ကားတွေကတော့။ ကြာကြာထားလို့ရတဲ့ ဟာတွေပေါ့။ ကုန်ခြောက်တွေ၊ အထည်အလိပ်၊ လျှပ်စစ်ပစ္စည်း အဲလိုပေါ့။ ကျွန်တော့်ကားက မိုးကာလိပ်တင်ထားတာပါဗျ။"

တရုတ်ဘက်ထဲ ပိတ်မိနေတဲ့ မြန်မာကုန်တင်ယာဉ်တွေကို ထွက်ခွင့်ရဖို့ နှစ်နိုင်ငံ တာဝန်ရှိသူတွေ အမြန်ဆုံး ညှိနှိုင်းစေလိုတယ်လို့ ဆိုပါတယ်။

တရုတ်နိုင်ငံဘက်က COVID-19 ကပ်ရောဂါ ကာကွယ်ထိန်းချုပ်မှုကို အကြောင်းပြပြီး မြန်မာနဲ့ တရုတ်နိုင်ငံ ထိစပ်နေတဲ့ ကုန်သွယ်ရေး ဂိတ်ပေါက်တွေဖြစ်တဲ့ မန့်ဝိန်းဂိတ်ကို ဧပြီလဆန်းပိုင်းက ပိတ်ခဲ့ပြီး ကျင်စန်းကျော့နဲ့ ကြူကုတ် (ပန်ဆိုင်း) ဂိတ်ကို ဇူလိုက် ၈ ရက်နေ့ကစ ရက်အကန့်အသတ်ပိတ်ခဲ့တာလည်း ဖြစ်ပါတယ်။

တရုတ်နိုင်ငံ လင်ချန်းခရိုင်နဲ့ထိစပ်နေတဲ့ ချင်းရွှေဟော်ဂိတ်ကိုတော့ အောက်တိုဘာ ၆ ရက်နေ့ကစ ပိတ်ခဲ့ကာ ကျန်းမာရေး ဆေးဝါးပစ္စည်းကလွဲလို့ မြန်မာ-တရုတ် နှစ်နိုင်ငံ ကုန်သွယ်မှု ရပ်တန့်သွားခဲ့တာ ဖြစ်ပါတယ်။ 

3 months Ago

June 2, 2021

ဝမ်တိန်ဂိတ် အဝင်၊ အထွက် ပြောင်းလဲသတ်မှတ်သဖြင့် မြန်မာကုန်တင်ကားများ ပြန်လှည့်ရ

မြန်မာ-တရုတ် နှစ်နိုင်ငံနယ်စပ် ဝမ်တိန်ဂိတ်ကို  အဝင်၊ အထွက်  ပုံစံ​ ပြောင်းလဲ သတ်မှတ်လိုက်တာကြောင့် မြန်မာဘက်က ကုန်တင်ကားတွေ ပြန်လှည့်ရတယ်လို့ ဒေသခံကုန်သည်တွေထံ သိရပါတယ်။ 

“၀မ်တိန်ဘက် မြန်မာကားတွေ အ၀င်ပိတ်မယ်လို့ကြားလို့ မြန်မာကားဆရာတွေ နောက်ကြောင်းပြန်လှည့်နေရတယ်” လို့ ဒေသခံ တစ်ဦးက ပြောပါတယ်။

မြန်မာဘက်မှ တရုတ်နိုင်ငံကို ကုန်တင်ပို့ဖို့ စီတန်းနေတဲ့ ကားတွေ ဝင်မရလို့ ပြန်လှည့်လာရတယ်လို့ မျက်မြင်တစ်ဦးက ပြောပါတယ်။

နယ်စပ် ဂိတ် အဝင်၊ အထွက်ကို လိုအပ်ချက်အရ ဇွန်လ ၅ ရက်နေ့က စပြောင်းလဲ သတ်မှတ်မယ်လို့ ဝမ်တိန်အုပ်ချုပ်ရေးဌာနဘက်ကလည်း ထုတ်ပြန် စာထုတ် အသိပေးထားပါတယ်။

လာမယ့် ဇွန်လ ၅ ရက်ကနေ စပြီး ဝမ်တိန် နှစ်နိုင်ငံ နယ်စပ် အဝင်၊ အထွက် ဂိတ်မှ တရုတ် နံပါတ် တပ်ဆင်ထားတဲ့ ကားတွေကိုသာ  တရုတ်နိုင်ငံထဲ ဝင်ရောက်ခွင့်ပြုမှာဖြစ်ပြီး ပြန်လည်ထွက်ခွာခွင့် ရပ်ဆိုင်းထားမယ်လို့ဆိုပါတယ်။

 Export ကုန်ကားတွေအားလုံးကို နှစ်နိုင်ငံ ဝင်၊ ထွက် ဂိတ်ဖြစ်တဲ့ ကျင်စန်းကျော့မှသာ ဝင်ရောက်၊ ထွက်ခွာခွင့်ပြုကာ ခါလီကားတွေကိုတော့ ဝမ်တိန်ဂိတ်မှလည်း ထွက်ခွာခွင့်ပြုသွားမှာဖြစ်ကြောင်း ထုတ်ပြန်စာမှာ ပါရှိပါတယ်။

“ဝမ်တိန်ဂိတ် ပိတ်တာတော့ မဟုတ်ဘူး။ တစ်နှစ်လုံး ပိတ်မယ်လို့ ပြောနေတာပဲ။ စာလည်း ထုတ်နေတာပဲ။ မပိတ်ဘူး။ ပုံစံတော့ နည်းနည်း ပြောင်းသွားတာပေါ့နော်။ အထွက်ပဲ ပေးတာ” လို့ စိုင်းမြင့်ဗိုလ် သစ်သီးပွဲရုံမှ မနန်းခမ်းခင်က ပြောပါတယ်။

ကျယ်ဂေါင်၊ ရွှေလီမှာ နေထိုင် အလုပ်လုပ်သူ ကိုကိုကျော်သက်က “၀မ်တိန် ဂိတ်ပေါက် အ၀င်၊ အထွက် ပိတ်ရင် ကျယ်ဂေါင်က လူတွေ ဘယ်လို လုပ်ကြမလဲ။ ဇွန်လ ၅ ရက်နေ့ဆိုရင် မန်ဝိန်းလည်းပိတ်၊ ၀မ်တိန်လည်းပိတ်၊ ဘယ်မှ ပစ္စည်းပို့မရရင် ဘာမှလုပ်မရဘူး” လို့ ပြောပါတယ်။

ဒေသတွင်း စားနပ်ရိက္ခာ ဖူလုံရေးအတွက် ဟင်းသီးဟင်းရွက် ပို့ဆောင်မယ့် ကားတွေကိုတော့ အရေအတွက် ကန့်သတ်ပြီး ဝင်၊ ထွက်ခွင့်ပြုမှာ ဖြစ်ကြောင်း၊ လုပ်ငန်းရှင်တွေ လိုက်နာ ဆောင်ရွက်ကြဖို့နဲ့ အဆင်မပြေပါက လုပ်ငန်းရှင်တွေ ကိုယ်တိုင် ဖြေရှင်းရမှာ ဖြစ်ကြောင်း စာထုတ်ပြန်ထားပါတယ်။

ကိုဗစ်-၁၉ ကြောင့် နှစ်နိုင်ငံ လူဝင်၊ ထွက်ဂိတ်ဖြစ်တဲ့ မူဆယ်မြို့နန်းတော် ပေါက်နဲ့ ဆင်ဖြူပေါက်ကို နှစ်နိုင်ငံ အကျဉ်းသားလွှဲတာမှအပ ၂၀၂၀ ကတည်းက အဝင်အထွက် ပိတ်ထားတာ ဖြစ်ပါတယ်။

နှစ်နိုင်ငံ အဓိက ကုန်သွယ်စီးဆင်းရာဖြစ်တဲ့ မန့်ဝိန်းဂိတ်ကိုတော့ ၂၀၂၁ မတ်လကုန်ပိုင်းကစ အဝင်၊ အထွက် ပိတ်လိုက်ကာ တရုတ်ဘက်ခြမ်း ပိတ်မိနေတဲ့ ကုန်တင်ကားတွေကို ၂ ကြိမ် ထွက်ခွာခွင့်ပြုခဲ့ပြီး ဖြစ်ပါတယ်။

ကျင်စန်းကျော့နဲ့ ဝမ်တိန်ဂိတ်တွေကနေ  မြန်မာ့ ပင်လယ်ထွက်ကုန်နဲ့ သစ်သီးတွေကို အဓိက တင်ပို့နေတာဖြစ်ပါတယ်။

Photo : KKKTh

8 months Ago
Up