မြစ်ကြီးနားသတင်းထောက်များ

February 15, 2021

မြစ်ကြီးနားသတင်းထောက်များ ပြန်လွတ်လာ

ကချင်ပြည်နယ်၊ မြစ်ကြီးနားမြို့မှာ ဖေဖော်ဝါရီ ၁၄ ရက် ည ၉ နာရီက တပ်မတော်က ဖမ်းဆီးခဲ့တဲ့ သတင်းထောက်တွေ ဒီကနေ့ နေ့လယ် ၁၂ နာရီကျော်မှာ ပြန်လွတ်မြောက်လာ ခဲ့တယ်လို့ သိရပါတယ်။

မြစ်ကြီးနားမြို့၊ မန်ခိန်ရပ်ကွက်၊ မလိရေအားလျှပ်စစ်စက်ရုံကို ဖေဖော်ဝါရီ ၁၄ ရက်နေ့မှာ စစ်တပ်ကဝိုင်းထားတဲ့အတွက် စစ်သားတွေပြန်ထွက်ပေးဖို့တောင်းဆိုကြတဲ့ ပြည်သူတွေရဲ့ အခြေအနေကို သတင်းရယူနေတဲ့ သတင်းထောက် ၅ ယောက် ဖမ်းခံရတာဖြစ်ပါတယ်။

“ကျနော်တို့ကို အချုပ်ကားပေါ်မှာတင်ပြီး တစ်ညလုံးနီးပါး တစ်မြို့လုံး ပတ်မောင်းနေတာပါ။ ပြီးတော့ မြောက်ပိုင်းတိုင်းစစ်ဌာနချုပ်တပ်ထဲကို ခေါ်သွားတာအခု ငြိမ်းချမ်းရေး အကျိုးတော်ဆောင်အဖွဲ့ (PCG) က ကျနော်တို့ကို လာခေါ်ပေးတာပါ”လို့ Mizzmia သတင်းထောက် ကိုဆိုင်းလတ်အောင်က ပြောပါတယ်။

မြစ်ကြီးနားအခြေစိုက် ထာဝရငြိမ်းချမ်းရေးသတင်းကွန်ရက်မှ သတင်းထောက် ၂ ယောက်၊ The 74 media က သတင်းထောက် ၂ ယောက်နဲ့ Mizzmia က သတင်းထောက်တစ်ယောက်တို့ကို ဖမ်းဆီးခဲ့တာဖြစ်ပြီး ဖုန်းတွေ၊ ကင်မရာတွေ သိမ်းဆည်းခဲ့ပေမဲ့ ဖုန်းထဲက အချက်အလက်တွေတော့ မဖျက်ထားဘူးလို့ သိရပါတယ်။

မြစ်ကြီးနားမြို့ မန်ခိန်ရပ်ကွက်က မလိရေအားလျှပ်စစ်စက်ရုံထဲကို ဝင်ရောက်နေတဲ့ စစ်ကားတွေနဲ့ တပ်မတော်သားတွေ ပြန်ထွက်ခွာဖို့ ဝန်းရံပြည်သူတွေက သံပုံးတီးနေစဉ် လုံခြုံရေးတပ်ဖွဲ့တွေက သေနတ်ပစ်ဖောက် လူစုခွဲတာ၊ ရေကားတွေအသုံးပြုပြီး ဖြိုခွင်းတာနဲ့ မျက်ရည်ယိုဗုံးတွေနဲ့ ပစ်ခတ်ဖြိုခွင်းတာတွေ ပြုလုပ်ခဲ့ ပါတယ်။

သတင်း - မီးမီး

10 months Ago
Up