မြစ်ကြီးနားမြို့

November 19, 2022

မြစ်ကြီးနားမြို့ပေါ် ကုန်မာဆိုင်တွင် ဗုံးပေါက်ကွဲပြီး ၁ ဦးသေဆုံး

ကချင်ပြည်နယ် မြစ်ကြီးနားမြို့၊ ဘူတာတိုက်တန်းရှိ ကုန်မာဆိုင်တဆိုင်မှာ နိုဝင်ဘာ ၁၉ ရက် ညနေ ၄ နာရီက ဗုံးပေါက်ကွဲခဲ့ပြီး ဒဏ်ရာရသူ အမျိုးသား ၄ ယောက်ထဲက ဆိုင်ဝန်ထမ်း အသက် ၁၇ နှစ်ရှိ လူငယ် ၁ ယောက် သေဆုံးခဲ့တယ်လို့ မြို့ခံတွေက ပြောပါတယ်။

မြို့ခံအမျိုးသားတဦးက "ဆိုင်ခေါင်မိုးပေါ်ကနေ ဗုံးက ကျလာတာလို့ ပြောတယ်။ ထိခိုက်မိတဲ့ သူတွေကို အရေးပေါ်ကားနဲ့ တင်သွားတယ်။ တယောက်က စိုးရိမ်ရပြီး တယောက်က နားစည်ကွဲ သွားတယ်" လို့ ပြောပါတယ်။

ထိခိုက်ဒဏ်ရာရသူ ၄ ယောက်ကို မြစ်ကြီးနားပြည်သူ့ဆေးရုံပို့ဆောင်ကာ ဆေးကုသမှုခံယူနေစဉ် ဆိုင်ဝန်ထမ်းလူငယ် သေဆုံးခဲ့တယ်လို့ နီးစပ်သူတဦးက ပြောပြီး ကျန်သုံးယောက်ကိုတော့ ဈေးလာဝယ်သူလား ဆိုင်ရှေ့ဖြတ်သွားသူတွေလားဆိုတာ မသိဘူးလို့ ဆိုပါတယ်။

ဖြစ်စဉ်နဲ့ပတ်သက်လို့ အဲဒီဆိုင်မှာ ထားခဲ့တဲ့အထုတ် တထုတ်ကနေ ပေါက်ကွဲခဲ့တယ်လို့လည်း ပြောဆိုနေတာရှိသလို ဒါနဲ့ပတ်သက်ပြီး ဘယ်အဖွဲ့က လုပ်တယ်ဆိုတာ မသိရသေးဘူးလို့ မြို့ခံ တချို့က ပြောပါတယ်။

ပေါက်ကွဲမှုဖြစ်ပြီးနောက် အဲဒီလမ်းပိုင်းကို စစ်ကောင်စီတပ်က ပိတ်ထားတယ်လို့ သိရပါတယ်။

အောက်တိုဘာ ၃၁ ရက်ကလည်း မြစ်ကြီးနားမြို့နယ် အထွေထွေအုပ်ချုပ်ရေးမှူးရုံး ဗုံးပေါက်ကွဲ ခဲ့ပြီး လူတယောက် သေဆုံးခဲ့ပါတယ်။

2 months Ago

May 17, 2022

မြစ်ကြီးနားမြို့ပေါ်တွင် လုယက်မှုနှင့်နေအိမ်ဖောက်ထွင်းမှု ပိုများလာ

ကချင်ပြည်နယ်၊ မြစ်ကြီးနားမြို့ပေါ် ရပ်ကွက်တွေမှာ လမ်းပေါ် ဆိုင်ကယ်၊ ဖုန်း၊ ပိုက်ဆံအိတ် လုယက်မှုတွေနဲ့ နေအိမ်ဖောက်ထွင်းမှုတွေ နေ့စဉ်လို ဖြစ်ပွားနေတယ်လို့ မြို့ခံတဦးက ပြောပါတယ်။

"အခုနောက်ပိုင်းပေါ့၊ ဒီလိုဖြစ်နေတာကြာပြီ၊ ဆိုင်ကယ်လုခံရလိုက်၊ ကားလုခံရလိုက်၊ ဖုန်းလုခံ ရလိုက်နဲ့ သတင်းတွေက နေ့တိုင်းကြားနေရတာ၊ မြစ်ကြီးနားမှာ ဆိုက်ကယ်၊ ဖုန်း တခုခု မပျောက်တဲ့နေကို မရှိသလိုပဲ။” 

လက်ကိုင်ဖုန်း၊ ဆိုင်ကယ်နဲ့ လက်ဆွဲအိတ်တွေ လုယက်ခံရမှုအများစုဟာ မြို့ပေါ်လမ်းမတွေနဲ့ လူပြတ်တဲ့ လမ်းကြားတွေမှာ ဖြစ်လေ့ရှိတယ်လို့ ဆိုပါတယ်။

မြစ်ကြီးနားမြို့မှာ လမ်းပေါ်လုယက်မှုတွေအပါအဝင် နေအိမ်တွေကို ဖောက်ထွင်းပြီး ခိုးယူမှုတွေနဲ့ ကြုံတွေ့နေရသလို လူသူပြတ်တဲ့လမ်းတွေမှာ ဓားပြတိုက်တာတွေလည်း ရှိနေတယ်လို့ အိမ် ဖောက်ထွင်းခံရတဲ့ မြို့ခံတဦးက ပြောပါတယ်။

“ဒီတလော မိုးတွေ အရမ်းရွာတော့ ညဆိုရင် မိုးသံကလွဲပြီး ဘားမကြားတော့ဘူး။ ဟိုနေ့ည ကံကောင်းလို့ ဆိုင်ကယ် မပါသွားတာ။ မိုးသံကြောင့် ဘာမှမကြားရတော့ သူခိုးက သံဆန်ကာနဲ့ ခြံတံခါးကို ညှပ်ပြီးဖြတ်ထားပြီး အထဲတောင်ရောက်နေပြီ၊ လူကနှစ်ယောက်၊ အိမ်သာ ထသွားလို့ ကံကောင်းသွားတာ။ အခုက ကျနော့်အိမ်မှမဟုတ်ဘူး လမ်းပေါ် ဖျာလိုက်ရောင်းတဲ့သူတွေ၊ ပလတ်စတစ်ကောက်တဲ့သူတွေပါ လုခံရတာ။” 

လုယက်တိုက်ခိုက်မှုတွေကြောင့် မတ် ၂၄ ရက်က ရမ်ပူရပ်ကွက်မှာ ပလတ်စတစ်ဘူးခွံတွေ ကောက်တဲ့ အမျိုးသမီး အသက်ဆုံးရှုံးခဲ့ရသလို ထိခိုက်ဒဏ်ရာရှိတဲ့ သူတွေလည်း အများအပြား ရှိနေပါတယ်။ 

လုယက်တိုက်တဲ့သူ အများစုဟာ လူပြတ်တဲ့ နေရာတွေနဲ့ အားနွဲ့တဲ့ အမျိုးသမီးတွေကိုအဓိကထား လုယက်ကြတယ်လို့ မြို့ခံတွေကနေ ပြောပါတယ်။

မြစ်ကြီးနားမြို့ပေါ်မှာ အခုလိုရာဇဝတ်မှုတွေများလာတာဟာ ဘိန်းကို အခြေခံတဲ့ မူးယစ်ဆေး သုံးစွဲသူတွေလည်း အများအပြားရှိနေတာကြောင့်လို့ ပြောဆိုသူတွေလည်း ရှိနေပါတယ်။

9 months Ago
More News
Up