မြင်းမူ

February 17, 2021

အာဏာသိမ်းစစ်‌အစိုးရပြုတ်ကျရေး မြင်းမူမြို့ သပိတ်စစ်ကြောင်း အင်အား ပိုများလာ

စစ်ကိုင်းတိုင်း‌ မြင်းမူမြို့နယ်က စစ်အာဏာရှင်ပြုတ်ကျရေး အထွေထွေသပိတ်စစ်ကြောင်းဟာ ဒီနေ့ ဖေဖော်ဝါရီ ၁၇ ရက်နေ့မှာတော့ မြို့ပေါ်က မြန်မာ့စီးပွားရေးဘဏ်ရှေ့နဲ့ မြို့တွင်းလမ်းမကြီးတွေမှာ အင်အား ၄ သောင်းကျော်ဖြင့် စီတန်းလှည့်လည်ဆန္ဒပြခဲ့ကြပါတယ်။

နိုင်ငံတော်အတိုင်ပင်ခံအား တရားစွဲဆိုမှု ပုဒ်မ ထပ်တိုးပြီးနောက် အထွေထွေသပိတ်စစ်ကြောင်းမှာ ဌာနဆိုင်ရာအသီးသီးက ဝန်ထမ်းတွေအများအပြား ပါဝင်ပြီး အရင်ရက်ကထက် ပိုမိုများပြားလာတယ်လို့ သိရပါတယ်။

သပိတ်စစ်ကြောင်းမှာ ပါဝင်သူ မြင်းမူမြို့ဒေသခံတစ်ဦးက “ဝန်ထမ်းတွေထဲက ကျန်းမာရေး၊ ပညာရေး၊ မြေစာရင်း စတဲ့ ဌာနဆိုင်ရာအသီးသီးက ဝန်ထမ်းတွေ ပိုမိုပါဝင်လာတာ တွေ့ရတယ်။ ဒါပေမဲ့ ကျနော်တို့မြို့က အထွေထွေအုပ်ချုပ်ရေးဌာနက ပါလာတာမတွေ့ရသေးတဲ့အတွက် စိတ်ပျက်မိတယ်။ အခု ဒီနေ့ဆို အရင်ရက်ကထက် အင်အား ပိုမိုများပြားလာတယ်။ စထွက်တုန်းက အင်အားသိန်းချီများပေမယ့် ဒီကြားရက်တချို့မှာ ၂ သောင်းလောက်ပဲ ရှိရာကနေ ဒီနေ့က အင်အား ၄ သောင်းကျော်အထိ ပြန်လည်အင်အားများလာဝာာ တွေ့ရတယ်။ မနေ့က နိုင်ငံတော်အတိုင်ပင်ခံကို စစ်အာဏာရှင်တွေဘက်က ပုဒ်မထပ်တိုး တရားစွဲတာနဲ့ဆိုင်မယ်လို့ ယူဆရတယ်” လို့ ပြောပါတယ်။

ဆန္ဒပြသပိတ်မှောက်ရာမှာ နိုင်ငံ့ခေါင်းဆောင်တွေနဲ့ အာဏာရှင်ဆန့်ကျင်ရေးမှာ ဖမ်းဆီးခံထားရသူ အားလုံးကို ပြန်လွှတ်ဖို့၊ စစ်ကောင်စီဝင်တွေအနေနဲ့ အာဏာစွန့်လွှတ်ဖို့ အပါအဝင် ၂၀၂၀ ရွေးကောက်ပွဲရလဒ်ကို အကောင်ထည်ဖော်ဖို့နဲ့ စစ်အာဏာရှင်ကို ဆန့်ကျင်တဲ့ CDM မှာ ပြည်သူ့ဝန်ထမ်းများ ဒီ့ထက်ပိုမိုပါဝင်လာကြဖို့ကို တောင်းဆိုခဲ့ကြပါတယ်။

မြင်းမူမြို့မှာ စစ်အာဏာရှင်ပြုတ်ကျရေးသပိတ်စစ်ကြောင်းကို ဖေဖော်ဝါရီ ၃ ရက်နေ့က စတင်ခဲ့တာဖြစ်ပါတယ်။

ရန်နိုင်စိုး

2 months Ago

January 4, 2021

မြင်းမူမြို့နယ်တွင် နေအိမ်မီးလောင်၊ ကလေးငယ်နှစ်ဦး သေဆုံး

စစ်ကိုင်းတိုင်း မြင်းမူမြို့နယ် ဆပ်ပြာကျေးရွာမှာ  ဇန်နဝါရီလ ၃ ရက်နေ့ မွန်းလွဲ ၂ နာရီက လူနေအိမ်မီးလောင်ရာကနေ ကလေးနှစ်ဦး ပိတ်မိပြီး သေဆုံးခဲ့တယ်လို့ သိရပါတယ်။ ၅ နှစ်အရွယ်ကလေး ၂ ဦးဟာ နွားစာတိုက်ထဲ ဝင်ရောက်ပြီး မီးဆော့ကစားရာကနေ ကူးစက်လောင်ကျွမ်းခဲ့တာ ဖြစ်ပါတယ်။ မြင်းမူမြို့နယ် မီးသတ်ဒုဦးစီးမှုး ဦးငြိမ်းချမ်းအောင်က "နွားစာတိုက်ဆိုတာ လောင်စာလိုဖြစ်နေတာကိုး။ အဲဒီထဲဝင်ပြီး ကလေးတွေက ခေါင်ဘက်ပေါ် မီးသွားဆော့တာ။ မီးလောင်တော့ ကလေးတွေက ကြောက်ကြောက်နဲ့ အိမ်ထဲဝင်ပြေးပြီး ခုတင်အောက် စောင်ပတ်ပြီးပုန်းနေတယ်။ အိမ်ကိုပါ ကူးစက်လာတော့ ပြေးစရာထွက်ပေါက်မရှိ ဖြစ်သွားရာကနေ သေဆုံးသွားတာပါ။"  သေဆုံးသွားတဲ့ ကလေးငယ်တွေဟာ အိမ်ရှင်ရဲ့ သားဖြစ်သူ မောင်ဉာဏ်လင်းအောင်နဲ့ တူဖြစ်သူ မောင်တေဇာပိုတို့ ဖြစ်တယ်လို့ သိရပါတယ်။ မီးလောင်မှုကြောင့် ထန်းလျက်မိုးကပ်ကာ လူနေအိမ် ၁ လုံးနဲ့ နွားစာတိုက် ၁ လုံး လောင်ကျွမ်းခဲ့ပြီး ဆုံးရှုံးမှုတန်ဖိုး ၄၃၂,၀၀၀ ကျပ် ရှိတယ်လို့ သိရပါတယ်။ မီးလောင်မှုကိုတော့ အရန်မီးသတ်ရေယာဉ် ၁ စင်းနဲ့ မီးသတ်တပ်ဖွဲ့ဝင် ၁၀ ဦးအပါဝင် ကျေးရွာဒေသခံများက ဝိုင်းဝန်းငြှိမ်းသတ်ခဲ့ရတယ်လို့ သိရပါတယ်။ အခုလို မီးလောင်ကျွမ်းပြီး လူသေဆုံးမှုနဲ့ ပတ်သက်လို့ မြင်းမူမြို့မရဲစခန်းက သေမှုသေခင်း ဖွင့်လှစ်ထားတယ်လို့ သိရပါတယ်။ သတင်း - ရန်နိုင်စိုး
3 months Ago
Up