မျောက်

August 30, 2021

မန္တလေး ရေတံခွန်တောင်ပေါ်ရှိ မျောက်များ အစာရေစာရှားပါးပြတ်လပ်နေ

မန္တလေးမြို့၊ ပုသိမ်ကြီးမြို့နယ် ရေတံခွန်တောင်ပေါ်ရှိ မျောက်တွေ အစာရေစာ ရှားပါးပြတ်လပ်နေတယ်လို့ ဒေသခံတွေဆီက သိရပါတယ်။

မျောက်တွေ အစာရေစာ ရှားပါးပြတ်လပ်လာတာက ကိုဗစ်ပထမလှိုင်းစတင်ချိန်က စတင်ခဲ့တာ ဖြစ်ပြီး  အခု ကိုဗစ်တတိယလှိုင်းကာလမှာတော့ ရှားပါးပြတ်လပ်တဲ့ထိ ဖြစ်နေတာပါ။ 

“ကိုဗစ်ပထမလှိုင်းတုန်းက အခါကြီးရက်ကြီးနဲ့ စနေ၊ တနင်္ဂနွေ လာကျွေးကြတာများတယ်၊ ကြားရက်ကတော့ နည်းပါတယ်၊ ဒုတိယလှိုင်းကတော့ ပထမထက်နည်းလာတယ်၊ အခု တတိယလှိုင်းမှာတော့ အစားလာကျွေးသူ လာသူ မရှိသလောက်ကို ဖြစ်သွားတယ်” လို့ ဒေသခံတစ်ဦးက ပြောပါတယ်။

ရေတံခွန်တောင်မှာ မျောက်တွေ စတင်ရောက်ရှိလာချိန်က တောင်ခြေဘုန်းကြီးကျောင်းမှာ ကျွေးမွေးခဲ့ပေမဲ့ အကောင်ရေ များပြားလာချိန် ဘုရားဖူးလာသူ အလည်ပတ်လာသူတွေရဲ့ အစာကျွေးမှုအပေါ် အဓိက မှီခိုလာရတာပါ။ 

ရေတံခွန်တောင် မျောက်တွေဟာ ကိုဗစ်ကာလ တစ်နှစ်ခွဲကျော်အကြာ အစာရေစာပြတ်လပ်လာတာကြောင့် ခုအခါ ပိန်လှီနေတဲ့ အကောင်ရေ များလာတယ်လို့ ကိုယ်တွေ့မြင်ခဲ့တဲ့ ပရဟိတသမားတစ်ဦးက ပြောပါတယ် 

“ကိုဗစ်က တစ်နှစ်ခွဲကျော်လာပြီး လာလည်သူတွေ ကျွေးတာနဲ့ ရပ်တည်နေရတဲ့ သူတို့လေးတွေက အစာရေစာ ကောင်းကောင်းမစားရတော့ ပိန်လှီနေကြပြီ” လို့ အွန်လိုင်းပရဟိတမိသားစုအဖွဲ့မှ ဦးအောင်စိုးဦးက ပြောပါတယ်။ 

မန္တလေးမြို့ ပုသိမ်ကြီးမြို့နယ်ရှိ ရေတံခွန်တောင်ကို ၂၀၀၇ ခုနှစ်နောက်ပိုင်းမှ မျောက်အကောင်ရေ တိုးပွားလာတာဖြစ်ပြီး ၂၀၂၁ ခုနှစ်မှ မျောက်အကောင်ရေ ၅၀၀၀ လောက် ရှိလာတယ်လို့ သိရပါတယ်။

5 months Ago

October 15, 2020

ရှင်မတောင်နှင့် ပုပ္ပါးတောင်ပေါ်က မျောက်များအတွက် အစားအစာအလှူရှင် လိုအပ်နေ

မကွေးတိုင်းရှိ ရှင်မတောင်နဲ့  မန္တလေးတိုင်းရှိ ပုပ္ပါးတောင်ပေါ်ကို အခုကိုဗစ်ကာလမှာ ခရီးသွားလာခွင့် ပိတ်ထားတဲ့အတွက် တောင်ပေါ်မှာရှိတဲ့ မျောက်တွေ အစာရေစာ ရှားပါးလာလို့ နယ်ကျွံပြီး အစာရေစာ ရှာလာကြတယ်လို့ ဒေသခံတွေက ပြောပါတယ်။ ဒီလို အစာရေစာရှားပါးလာတဲ့ မျောက်လေးတွေအနေနဲ့ မိုင် ၃၀ ကျော်လောက်အထိ နယ်ကျွံ အစာရှာလာတာတွေရှိနေတာကြောင့် ပခုက္ကူမြို့နယ်က လူငယ်ပရဟိတအဖွဲ့က သွားရောက် လှူဒါန်းချင်သူတွေကို ကူညီပေးသွားမယ်လို့ သိရပါတယ်။ ပခုက္ကူမြို့နယ်က မျောက်စာကျွေးနိုင်ဖို့ ဖွဲ့ထားတဲ့ လူငယ်ပရဟိတ ခေါင်းဆောင် ကိုသော်တာထက်က “အလှူရှင်တွေရှာပြီးတော့ အစ်ကိုတို့က နီးတယ်ဆိုတော့ ဆက်တိုက်အလှူရှင်ရှာပြီးတော့ ကျွေးသွားချင်တယ် အဲ့လို လှူပေးချင်တာပေါ့ Stay at Home မဟုတ်တဲ့ ဒေသတွေကလာပြီး မျောက်ကလေးတွေ အစာကျွေးချင်တယ်ဆို စာရွက်စာတမ်းအပြည့်သာယူခဲ့ပါ အစအဆုံး ကူညီပေးမယ်”လို့ ပြောပါတယ်။ အလှူရှင်တွေအနေနဲ့ ရှင်မတောင်က မျောက်ကလေးတွေအတွက် ကိုယ်တိုင်ကိုယ်ကျ ကျွေးခွင့်ရှိပါတယ်။  ပုပ္ပါးတောင်က မျောက်တွေအတွက်ကတော့ စာရွက်စာတမ်း အစုံပါပေမယ့်လည်း ပုပ္ပါးရဲစခန်းအကျော်မှာရှိတဲ့ မောင်းတံဂိတ်စောင့်တွေရဲ့ အ၀င်ဟန့်တားမှု တွေကြောင့် ကျွေးဖို့ အခက်အခဲတွေရှိတယ်လို့ မျောက်စာသွားကျွေးတဲ့ ပရဟိတအဖွဲ့ ခေါင်းဆောင်ဆီက သိရပါတယ်။ “အစ်ကိုတို့သွားလှူတယ် အစ်ကိုတို့လှူတာလေးနဲ့ပြီးသွားတယ်ဖြစ်မှာစိုးလို့ အဆိုတော် ဇွဲပြည့်ပါတယ်။ သူ့ရဲ့ ပေ့ခ်ျကနေလည်း အနုပညာရှင်တွေကိုလှမ်းပြီးတော့ Live လွှင့်တာမျိုး ဒီမှာ ဒီလိုကျွေးလို့ရတယ် ဒီလိုအခက်အခဲတွေရှိနေတယ် အဓိက ကအလှူရှင်တွေလိုချင်တာပါ။ သူ့ဆီက အချိတ်အဆက်တွေ အစ်ကိုတို့ဆီကအချိတ်အဆက်တွေ အချင်းချင်းချိတ်ဆက်ပြီးကာမှ လာလှူ ကြရင် အဆင်ပြေအောင်လို့ အဓိက ကတော့ ဒီကမျောက်ကလေးတွေ အတွက်အစာရေစာ မပြတ်တောက်အောင်ရည်ရွယ်ပြီးလုပ်တာပဲ။”လို့ ကိုသော်တာထက်က ပြောပါတယ်။ ပုပ္ပါးတောင်ပေါ်က မျောက်တွေကို ဘုရားဂေါပက အဖွဲ့က အစာခြောက်ပြောင်းဖူးတွေကို ကျွေးနေတာတွေရှိပေမယ့်လို့ ခုချိန်မှာ ဘုရားဖူး ခရီးသွားမရှိတဲ့အတွက် အစာလိုအပ်နေတာ ဖြစ်တယ်လို့ ဒေသခံတွေက ဆိုပါတယ်။ ရှင်မတောင် တောင်ပေါ်က မျောက်တွေအနေနဲ့လည်း ဘုရားဖူး ခရီးသွားတွေ မလာကြတဲ့ အချိန်ဖြစ်တာကြောင့် အစာကျွေးလိုသူ အလှူရှင်တွေ လာမယ်ဆိုရင် သံဃာတော်တွေက ကြိုဆိုတယ်လို့  ဒေသခံတွေက ဆိုပါတယ်။ လှူဒါန်းလိုသူတွေအနေနဲ့ မျောက်စာကျွေးဖို့ ကူညီရေး ပရဟိတ အဖွဲ့ခေါင်းဆောင် ကိုသော်တာထက် 09401501461ကို ဆက်သွယ် လာရောက်လှူဒါန်းနိုင်တယ်လို့ သိရပါတယ်။ သတင်း- ခင်ပြည့်စုံဝင်း ဓာတ်ပုံ- ကိုသော်တာထက်
1 year Ago
More News
Up