မဲပေးခွင့်ဆုံးရှုံး

November 8, 2020

မူဆယ်တွင် အဝေးပြေးကားသမားများနှင့် ရွှေ့ပြောင်းလုပ်သားများ မဲပေးခွင့်ဆုံးရှုံး 

ရှမ်းပြည်မြောက်ပိုင်း၊ မူဆယ်ခရိုင်ထဲမှာ အနယ်နယ်အရပ်ရပ်က လာရောက်လုပ်ကိုင် စားသောက်နေတဲ့ ရွှေ့ပြောင်းအလုပ်သမားတွေ၊ အဝေးပြေးကုန်တင်ကားသမားတွေနဲ့ ယာဉ်နောက်လိုက်တွေ  အများအပြား မဲပေးပိုင်ခွင့် ဆုံးရှုံးခဲ့ရပါတယ်။  အဓိကကတော့ သူတို့ဟာ မူဆယ်မှာ အိမ်ထောင်စုစာရင်းမရှိဘဲ မူဆယ်မှာလည်း အိမ်ခန်း ငှားပြီးနေထိုင်ကြရတာမို့ ပုံစံ ၁၅ မဲပေးခွင့်တောင်းရာမှာလည်း အခက်အခဲတွေရှိနေလို့ မဲမထည့်နိုင်ကြကြောင်း  မူဆယ်ဂရုဏာလူမှုကူညီရေးအသင်းဥက္ကဋ္ဌ ဦးသောင်းထွန်းက ဒီဗွီဘီကို ပြောပါတယ်။  “အလုပ်သမားတွေရော၊ ကားသမားတွေရော ဒီမှာလာပြီး အခြေချတဲ့သူတွေက သောင်းဂဏန်း ရှိတယ်။ သူတို့က မဲထည့်ချင်ကြတယ်၊ ဒါပေမဲ့ အဆင်မပြေကြဘူး။ ဘာလို့လဲဆိုတော့ အများစုက ဒီမှာအိမ်ငှားနေကြတာ၊ အိမ်ငှားနေတယ်ဆိုတော့ကာ စာချုပ်စာတမ်း အထောက်အထားတွေ ပြရတယ်။ ရွှေ့ပြောင်းအလုပ်သမားဆိုတော့ကာ ဘယ်လောက်ကြာနေမယ်မသိဘူး။ စာချုပ်တွေ လုပ်မထားရဘူး။ စာချုပ်မရှိတော့ ရပ်ကွက်ထောက်ခံစာမရှိဘူးပေါ့။ အဲဒီတော့ ပုံစံ ၁၅ လည်း မတင်ရဘူးပေါ့။” မူဆယ် ၁၀၅ မိုင်ဘက်မှာတော့ မဲပေးခွင့်မရတဲ့ ကုန်တင်ကားသမားတွေ စုပြီး မဲပေးခွင့်ရဖို့ သက်ဆိုင်ရာမဲရုံမှူးတွေဆီ တောင်းခံခဲ့ကြောင်း၊ မရရင် ဆန္ဒပြမယ်လို့လည်း ကြားတာကြောင့် တာဝန်ရှိသူတွေက သွားရောက်ဖြေရှင်းဖျောင်းဖျခဲ့တယ်လို့ မူဆယ်ဒေသခံတဦးက ဒီဗွီဘီကို ပြောပါတယ်။  မူဆယ်ခရိုင်ထဲမှာ အမျိုးသားဒီမိုကရေစီအဖွဲ့ချုပ်၊ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ၊ ပလောင်အမျိုးသားပါတီ၊ ရှမ်းတိုင်းရင်းသားများဒီမိုကရေစီအဖွဲ့ချုပ်၊ ရှမ်းတိုင်းရင်းသား ဒီမိုကရက်တစ်ပါတီနဲ့ ကချင်အမျိုးသားပါတီတို့ ဝင်ရောက်ယှဉ်ပြိုင်ကြပါတယ်။
1 year Ago

မီးနင်းချောင်းစစ်ဆေးရေးဂိတ်တွင် ပိတ်မိနေသူ ၄၀ ခန့် မဲပေးခွင့်ဆုံးရှုံး

ပဲခူးတိုင်းအတွင်း မြို့နယ်တွေက တခြားဒေသတွေကို အလုပ်သွားရောက်လုပ်ကိုင်နေတဲ့ မိသားစုဝင်တွေကို ကျေးရွာတွေကလက်မခံတဲ့အတွက် နေရပ်ပြန်ခွင့်မရဘဲ ပဲခူးတိုင်းအဝင် မီးနင်းချောင်း ကျန်းမာရေးစစ်ဆေးရေးဂိတ်တွင်ပိတ်မိနေတဲ့ အိမ်ထောင်စု ၁၀ စု၊ လူဦးရေ ၄၀ လောက် မဲပေးခွင့်မရဖြစ်နေတယ်လို့ သိရပါတယ်။ နေရပ်ပြန်ခွင့်မရတဲ့ မိသားစုဝင်တွေကတော့ ပဲခူးတိုင်း၊ ကြို့ပင်ကောက်မြို့နယ်ကဖြစ်ပြီး ကျေးရွာအုပ်ချုပ်ရေးမှူးက အသိမပေးဘဲပြန်လာပါက တရားစွဲဆို ထောင်ချမယ်လို့ ပြောဆိုတာတွေကြောင့် မပြန်ရဘူးလို့ ကြို့ပင်ကောက်မြို့နယ်နေ ဒေါ်တင်ဝင်းက ပြောပါတယ်။ “နိုင်ငံရေးအကြောင်း မသိပေမယ့် သူများတွေ မဲထည့်နေတဲ့အချိန်မှာ ပြည်သူတစ်ယောက် အနေနဲ့ တာဝန်ကျေချင်တယ်။ ကျေးရွာက လက်မခံတာကြောင့် မဲထည့်ခွင်မရတဲ့ ဝမ်းနည်းမိတယ်”လို့  ပထမဆုံးအကြိမ်မဲပေးရမယ့်သူ ကြို့ပင်ကောက်မြို့နယ်နေ မအိခိုင်က ပြောပါတယ်။ ကျေးရွာကို ပြန်ရောက်ခဲ့ပေမဲ့ လက်မခံဘဲ မောင်းထုတ်ခံခဲ့ရပြီး အတင်းပြန်ဝင်လာပါက တရားစွဲဆိုတာတွေ ပြုလုပ်မယ်လို့ ကျေးရွာအုပ်ချုပ်ရေးမှူးက ပြောဆိုခဲ့ပြီး ဘယ်အချိန်ပြန်ခေါ်မယ်ဆိုတာကိုလည်း အတိအကျမသိရဘူးလို့ သာယာဝတီမြို့နယ်   စံရွှေးကျေးရွာနေ နေရပ်ပြန်ခွင့်မရသူ ပြောပါတယ်။ သာယာဝတီခရိုင်ရွေးကောက်ပွဲကော်မရှင် ဥက္ကဋ္ဌ ဦးရဲမြင့်က “ကိုဗစ်ကာလမှာ မဲရုံမှူးအချို့ ကိုဗစ်-၁၉ ရောဂါပိုးတွေ့ရှိခဲ့တာကြောင့် အခက်အခဲတွေဖြစ်ပေါ်နေပြီး နေရပ်ပြန်တွေ လက်မခံရဲတဲ့အတွက် ဒီနေ့တစ်ရက်တော့ ပဲခူးတိုင်းအဝင်မှာ ကျန်းမာရေးစစ်ဆေးတာတွေ ပြုလုပ်ပြီးမှ အဝင်ခံမှာဖြစ်ပြီး ရောဂါပိုးတွေ့ရှိခဲ့ရင်တော့ ကျန်းမာရေးစင်တာတွေကို ပို့ဆောင်သွားမှာဖြစ်တယ်” လို့ ပြောပါတယ်။ လက်ရှိအချိန်မှာတော့ သာယာဝတီခရိုင်အတွင်း မဲပြန်ပေးမယ့်သူတွေကို ပဲခူးတိုင်းအဝင် မီးနင်းချောင်းမှာ ကျန်းမာရေးစစ်ဆေးတာတွေကို မနက် ၆ နာရီအချိန်ကနေ စတင်လုပ်ဆောင်ပေး နေတာ အခုအချိန်ထိ ကိုဗစ်-၁၉ ရောဂါပိုးတွေ့ရှိသူ ၉ ဦးရှိတယ်လို့ တာဝန်ရှိသူတဦးက ပြောပါတယ်။ သတင်း - မေသွယ်
1 year Ago
Up