မဲဆွယ်စည်းရုံးရေး

October 17, 2020

ဘီးလင်းတွင် Stay at Home ကြောင့် နိုင်ငံရေးပါတီများ မဲဆွယ်စည်းရုံးရေး အခက်အခဲကြုံ

မွန်ပြည်နယ်၊ ဘီးလင်းမြို့နယ်ထဲမှာ ကိုဗစ်-၁၉ အတည်ပြုလူနာများလာပြီး Stay at Home ကြေညာထားတဲ့အတွက် မဲဆွယ်စည်းရုံးဖို့ အခက်အခဲတွေ ရှိနေတယ်လို့ နိုင်ငံရေးပါတီတွေက ပြောပါတယ်။ အမျိုးသားဒီမိုကရေစီအဖွဲ့ချုပ်ကတော့ ဘီးလင်းမြို့နယ် မဲဆန္ဒရှင်ပြည်သူတွေအတွက် လူမှုကွန်ရက် facebook စာမျက်နှာကနေတဆင့် မဲဆွယ်စည်းရုံးနေရတယ်လို့ မြို့နယ်ပါတီဥက္ကဋ္ဌ ဦးကျော်မျိုးမင်းက ပြောပါတယ်။ “ဒီကာလက လူစုလူဝေးလည်း လုပ်လို့မရတော့ ငုတ်တုတ်ထိုင်နေရတာပေါ့။ ရပ်ကျေးဆိုင်းဘုတ်တင်တာတို့ ပန်းဖလပ်ဝေတာတို့ကျတော့ အလှပြယာဉ် ၂ စင်းလောက်နဲ့ ထွက်တာတော့ရှိတယ်။ ဒီလိုထွက်တဲ့အပေါ်မှာလည်း ရွာတွေထဲထိ ဝင်တာမရှိပါဘူး။ အဓိက Lock Down ချထားတဲ့ နေရာတွေဆိုရင် ဘာမှကို အဆက်အသွယ်မရှိတော့ပါဘူး။ ပြောရရင် ကိုဗစ်လည်း အနိုင်ယူ အောင်နိုင်ရေးလည်း အနိုင်ယူဆိုသလို လူမှုကွန်ရက် facebook စာမျက်နှာကနေ တစ်ဆင့်ပဲ ကိုယ်စားလှယ်လောင်းတွေက လုပ်ဆောင်နေကြရတယ်။ တိုင်းရင်းသားပါတီတွေအနေနဲ့ကလည်း သူတို့အနေအထားနဲ့ စည်းရုံးရေးတော့ လုပ်နေကြတာပဲ။” ဘီးလင်းမြို့နယ်ထဲမှာ လာမယ့် ၂၀၂၀ ရွေးကောက်ပွဲအတွင်း ကရင်ပြည်သူ့ပါတီ၊ ညီညွတ်သောတိုင်းရင်းသား လူမျိုးများ ဒီမိုကရေစီပါတီ အပါအ၀င် ပါတီပေါင်း ၉ ပါတီက ကိုယ်စားလှယ်လောင်း ၅၃ဦးက ပါဝင်ယှဉ်ပြိုင်သွားမယ်လို့ သိရပါတယ်။ ဘီးလင်းမြို့နယ်မှာ နိုင်ငံရေးပါတီကြီးတွေအနေနဲ့ မဲဆွယ်စည်းရုံးမှုကို ကျယ်ကျယ်ပြန့်ပြန့် မလုပ်ဆောင်နိုင်တဲ့အပြင် ရပ်ကျေးပါတီဆိုင်းဘုတ်ထောင်တာတွေ၊ ပါတီအမာခံတွေကတဆင့် ပြည်သူတွေ မဲပေးမှုစနစ်မှန်ကန်အောင် အသိပညာပေးမှုတွေ၊ ကျန်းမာရေးနှင့်အားကစားဝန်ကြီးဌာနက ထုတ်ပြန်ချက်တွေ၊ ရွေးကောက်ပွဲကော်မရှင် ထုတ်ပြန်ချက်တွေနဲ့အညီ မဲဆွယ်မှုတွေကိုပြုလုပ်နေကြပါတယ်။ ဘီးလင်းမြို့နယ် ညီညွတ်သောတိုင်းရင်းသားလူမျိုးများ ဒီမိုကရေစီပါတီ ပြည်သူ့ လွှတ်တော်ကိုယ်စားလှယ် ဒေါ်စန္ဒာက “ကျမတို့ပါတီရုံး စတည်ထူထောင်ချိန်က ကိုဗစ်ပထမလှိုင်းနဲ့ ဆုံတယ်။ ဒုတိယလှိုင်းပြန်လာတဲ့အခါကျတော့လည်း Stay Home နဲ့ ကိုဗစ်-၁၉ ဥပဒေတွေကြောင့် မဲဆွယ်စည်းရုံးမှုက အခက်ခဲတွေဖြစ်လာတာပေါ့။ တစ်ချို့ရွာတွေကျတော့ ပေးမ၀င်တာတွေရှိတယ်။ ကျမတို့ပါတီကလည်း ဒီမိုကရေစီပါတီဖြစ်တဲ့အတွက် တန်းတူအခွင့်အရေးကို ဦးစားပေးတဲ့အနေနဲ့ မဲဆွယ်စည်းရုံးမှုကို နားထားပါတယ်။ ဥပမာ မဲဆွယ်သွားတဲ့သူတွေထဲက တစ်ယောက်ယောက်ကို ကူးစက်သွားမယ်ဆိုရင်လည်း မကောင်းဘူး။ အဓိက မဲရခြင်းမရခြင်းထက် ပြည်သူတွေရဲ့ကျန်းမာရေးက အရေးကြီးပါတယ်” လို့ ပြောပါတယ်။ ဘီးလင်းမြို့နယ်ထဲမှာ Lock Down Area ၈ ခု သတ်မှတ်ထားရာကနေ ၇ ခု ပြန်လည်ဖြေလျှော့ပေးခဲ့တယ်လို့ ဘီးလင်းမြို့နယ်အထွေထွေအုပ်ချုပ်ရေးဦးစီးဌာနရုံးက သိရပါတယ်။ ဘီးလင်းမြို့နယ်မှာ အောက်တိုဘာ ၁၃ ရက်နေ့အထိ ကိုဗစ်-၁၉ အတည်ပြုလူနာ ၉၀ ကျော်ရှိခဲ့ပြီး ရောဂါသက်သာလာတဲ့အတွက် ဆေးရုံဆင်းသူ ၆၀ ကျော်ရှိပြီလို့ သိရပါတယ်။ သတင်း၊ ဓာတ်ပုံ - ယူမင်းစိုး
12 months Ago

October 7, 2020

ကိုဗစ်စည်းကမ်းများကြောင့် SNLD ပါတီ မဲဆွယ်စည်းရုံးရေး အခက်အခဲရှိနေ

ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ပါတီအနေနဲ့. ကိုဗစ်-၁၉ ကပ်ဘေး ကာလမှာ မဲဆွယ်စည်းရုံးရေးပြုလုပ်ရာမှာ ထုတ်ထားတဲ့ စည်းကမ်းချက်တွေကြောင့် အခက်ခဲတွေ ရှိနေတယ်လို့  ရွေးကောက်ပွဲအောင်နိုင်ရေး အဖွဲ့ခေါင်းဆောင် ဦးစိုင်းအောင်သန်းက ပြောပါတယ်။ လတ်တလော ပါတီ ကိုယ်စားလှယ်လောင်းတွေ  ရှမ်းရွာတွေကို ဦးစားပေးမဲဆွယ်သွားရောက်နေတာဖြစ်ပြီး မဲဆွယ်တဲ့အခါ ရွေးကောက်ပွဲ ကျော်မရှင်က သတ်မှတ်ထားတဲ့ စည်းကမ်းချက်တွေအတိုင်းလိုက်နာပြီး  အဓိကအနေနဲ့ Door to Door ပုံစံနဲ့ပဲ  လုပ်ဆောင်နေရတယ်လို့ ဆိုပါတယ်။ မန္တလေးလမ်းကရှမ်းရွာတွေ၊ ချောင်းကြီးဘက်သွားတဲ့ ရှမ်းရွာတွေနဲ့ မိုင်းလုံလမ်းက ရှမ်းရွာတွေမှာ လက်ကမ်းစာစောင်တွေဝေပြီး မဲဆွယ်နေတာ ဖြစ်ပြီး  လူစုလူဝေးမဖြစ်စေရဆိုတဲ့အတွက် ဟောပြောစည်းရုံးရတဲ့နေရာမှာလည်း အခက်ခဲဖြစ်တယ်လို့ ဆိုပါတယ်။ ကျန်းမာရေးနဲ့ အားကစားဝန်ကြီးဌာနက ထုတ်ထားတဲ့ စည်းကမ်းချက်အတိုင်း နှာခေါင်းစည်း mask တပ်၊ လက်ဆေး ၊ လူစုလူဝေးရှောင်ပြီး လုပ်ဆောင်နေတယ်လို့လည်း သိရပါတယ်။ မြန်မာနိုင်ငံမှာ ကိုဗစ်-၁၉ ရောဂါကူးစက်ဖြစ်ပွားမှု မြင့်တက်နေချိန်ဖြစ်လို့ နိုင်ငံတဝန်းမှာ လူ ၃၀ ထက်ပိုစုဝေးခြင်းမပြုဖို့နဲ့ ရွေးကောက်ပွဲအတွက် မဲဆွယ်စည်းရုံးရာမှာ လူ ၅၀ ထက်မပိုစေဖို့ ကျန်းမာရေးနဲ့ အားကစားဝန်ကြီးဌာနက အမိန့် ထုတ်ပြန်ထားပါတယ်။  ဦးခွန်ထွန်းဦး ခေါင်းဆောင်တဲ့ ရှမ်းတိုင်းရင်းသားများဒီမိုကရေစီအဖွဲ့ချုပ် SNLD ပါတီအနေနဲ့ ၂၀၂၀အထွေထွေရွေးကောက်ပွဲမှာ  ကိုယ်စားလှယ်လောင်း  ၁၃၂ ဦး ပါဝင်ယှဉ်ပြိုင် အရွေးခံဖို့ရှိတယ်လို့ ပါတီက ထုတ်ပြန် ကြေညာထားပါတယ်။ ပါတီကိုယ်စားလှယ်လောင်းတွေဟာ ရှမ်းပြည်နယ်၊ ကချင်ပြည်နယ်၊ ကယားပြည်နယ်နဲ့ မန္တလေးတိုင်းဒေသကြီးရှိ မြို့နယ်ပေါင်း ၄၅ မြို့နယ်ထဲက တိုင်းရင်းသားလူမျိုး မဲဆန္ဒနယ် ၃ နေရာ၊ အမျိုးသားလွှတ်တော် ၁၂ နေရာ၊ ပြည်သူ့လွှတ်တော် ၃၈ နေရာ၊ ပြည်နယ်လွှတ်တော် ၇၉ နေရာမှာ ဝင်ပြိုင်ကြမယ်လို့ SNLD ပါတီက ထုတ်ပြန်ထားပါတယ်။  သတင်း - ဟန်နာထက်အောင်
12 months Ago
Up