မဲခေါင်စာပေဆု

October 2, 2019

မဲခေါင်စာပေဆု စာရေးဆရာကြီးဖိုးကျော့နှင့် ကိုရိုးကွန့်တို့ ရရှိ

မြန်မာနိုင်ငံစာရေးဆရာအသင်း မဲခေါင်စာပေဆု ရွေးချယ်ရေးအဖွဲ့က အခုနှစ်အတွက် ရွေးချယ်တဲ့ မဲခေါင်စာပေဆုကို ဝါရင့်စာရေးဆရာကြီးဖိုးကျော့နဲ့  ကိုရိုးကွန့်တို့က ရရှိသွားကြပါတယ်။ စာရေးဆရာ ဖိုးကျော့က “မြေဆီမည်းမည်း သွေးရဲရဲ” (I Gave My Life For Thee) စာအုပ်နဲ့ ဝတ္ထုရှည်ဆုကို ရရှိသွားတာဖြစ်ပြီး စာရေးဆရာ ကိုရိုးကွန့်ကတော့ “ဖြောင့်ဖြောင့်စင်းစင်း ဝတ္ထုတိုများ” (Straight As Snake and Selected Short Stories) စာအုပ်နဲ့ ဝတ္ထုတိုပေါင်းချုပ်ဆုကို ရရှိသွားခဲ့တာပါ။ အသက် ၇၉ နှစ်အရွယ်ရှိနေပြီ ဖြစ်တဲ့ စာရေးဆရာကြီး ဖိုးကျော့ဟာ ရခိုင်ပြည်နယ်၊ ကျောက်ဖြူမြို့နယ်၊ ချောင်းဝကျေးရွာ ဇာတိဖြစ်ပြီး ၁၉၅၆ ခုနှစ်၊ အောက်တိုဘာလထုတ် မြဝတီမဂ္ဂဇင်းပါ ဆင်မာန်နှင့် ငှက်ဉာဏ် အခန်းဆက်ဝတ္ထုရှည်နဲ့ စာပေနယ်ထဲကို  ဝင်ရောက်ခဲ့သူ ဖြစ်ပါတယ်။ အခု မဲခေါင်စာပေဆုရ ‘မြေဆီမည်းမည်း သွေးရဲရဲ’ စာအုပ်ကိုတော့ ၁၉၇၂ ခုနှစ်မှာ ထုတ်ဝေခဲ့တာဖြစ်ပြီး လက်ရှိအချိန်ထိ ဝတ္ထုတိုပုဒ်ရေ ၇၀ ကျော်၊ မဂ္ဂဇင်းဝတ္ထုရှည် အပုဒ် ၂၀ ကျော်၊ လုံးချင်း ၃၀ ခန့် ရေးသားခဲ့ပြီး ဖြစ်ပါတယ်။ ဖိုးကျော့ ရေးတဲ့ ထင်ရှားတဲ့ စာအုပ်တချို့ကတော့ အောင်ပွဲသို့ချီရာဝယ်၊ မြေဆီမဲမဲ သွေးရဲရဲ၊ လောဘမြစ်ပင်လယ်၊ ဆင်လုပ်သား၊ ဆင်မိုးလုံးနှင့် နောက်ဆုံးအဖြေ၊ အင် တွဲပွဲလျက် အရှာထွက်၊ သေရွာပြန်တို့၏ အဏ္ဏဝါခရီး၊ မြန်မာ့မုဆိုး၊ ဆင်သင်္ချိုင်းရှာပုံတော်နှင့် အခြား၊ ဆင်သေကုန်း၊ ကမ္မဇဒ္ဓိစတဲ့ စာအုပ်တွေပဲ ဖြစ်ပါတယ်။ အခုနှစ်ရဲ့ မဲခေါင်စာပေဆုမှာ ဝတ္ထုတိုပေါင်းချုပ်ဆု ရရှိခဲ့သူ စာရေးဆရာ ကိုရိုးကွန့်ကတော့ မန္တလေးမြို့ဇာတိ ရသစာပေ ဖန်တီးရေးသားသူတဦး ဖြစ်ပြီး ထင်ရှားတဲ့ ကာတွန်းဆရာ အော်ပီကျယ်ရဲ့ အစ်ကိုရင်းလည်း ဖြစ်ပါတယ်။ အသက် ၆၄ နှစ်အရွယ် ရှိပြီဖြစ်တဲ့ စာရေးဆရာ ကိုရိုးကွန့်ဟာ ၁၉၈၄ ခုနှစ်၊ မေလထုတ် စန္ဒာမဂ္ဂဇင်းပါ ‘ကြိုဆိုပါသည်’ ဝတ္ထုတိုနဲ့ စာပေနယ်ထဲကို စတင်ရောက်ရှိခဲ့သူ ဖြစ်ပြီး ‘စိန်လွန်တူးသမား၏ အဖွင့်အပိတ်တံခါးနှင့် အခြားဝတ္တုတိုများ’ စာအုပ်ကတော့ သူ့ရဲ့ ပထမဆုံးစာအုပ် ဖြစ်ပါတယ်။ အဲဒီစာအုပ်နဲ့ပဲ ၁၉၈၄ ခုနှစ်အတွက် စာပေဗိမာန်စာမူ ပထမဆု၊ ၁၉၈၇ ခုနှစ်အတွက် အမျိုးသားစာပေဆုတွေ ရရှိခဲ့တာပါ။ ၂၀၁၇ ခုနှစ်အတွက် အမျိုးသားစာပေ တသက်တာစာပေဆုရှင်လည်းဖြစ်ပါတယ်။  စာရေးဆရာ ကိုရိုးကွန့်ကတော့ မြန်မာ့ဓန စီးပွားရေးမဂ္ဂဇင်းအယ်ဒီတာ၊ သက်တန့်ရောင်ဂျာနယ် စီစဉ်သူတွေအဖြစ် လုပ်ကိုင်ခဲ့ဖူးပြီး သတင်းစာဆရာ၊ အယ်ဒီတာတဦးလည်း ဖြစ်ကာ ဘဝသရုပ်ဖော် ရသဟန်ကဲတဲ့ ဝတ္ထုတွေနဲ့ ထင်ရှားသူ ဖြစ်ပါတယ်။ ကိုရိုးကွန့် ‌ရေးသားခဲ့ပြီး ထင်ရှားတဲ့ စာအုပ်တွေကတော့ ကျွန်တော့်အိပ်မက် ၁၃ ချက်၊ ပဉ္စရူပရသဝတ္ထုငါးပုဒ်၊ ဖြောင့်ဖြောင့် စင်းစင်းဝတ္ထုတိုများ ၁+၂ စတဲ့ စာအုပ်တွေပဲ ဖြစ်ပါတယ်။   မဲခေါင်စာပေဆုတွေကို ဗီယက်နမ်၊ ထိုင်း၊ လာအို၊ ကမ္ဘောဒီးယား၊ မြန်မာနဲ့ တရုတ် (ယူနန်ပြည်နယ်) နိုင်ငံတွေ ပါဝင်တဲ့ မဲခေါင်မြစ်ဝှမ်းဒေသ နိုင်ငံတွေအတွက် ချီးမြှင့်တာ ဖြစ်ပြီး အခုနှစ်ကတော့ ၁၀ ကြိမ်မြောက် ရှိခဲ့ပြီ ဖြစ်ပါတယ်။ အခုနှစ်အတွက် မဲခေါင်စာပေဆုချီးမြှင့်ပွဲ အခမ်းအနားကိုတော့ လာမယ့် အောက်တိုဘာလ ၁၂ ရက်နေ့မှာ မြန်မာနိုင်ငံက အိမ်ရှင်နိုင်ငံအနေနဲ့ ရန်ကုန်မြို့မှာ ကျင်းပသွားဖို့ ရှိနေပါတယ်။
2 years Ago
Up