မော်လမြိုင်

November 14, 2022

မော်လမြိုင်မြို့တွင် စစ်တပ်နှင့် PDF အပြန်အလှန် ပစ်ခတ်မှုဖြစ်ပွား

အာဏာသိမ်း စစ်ကောင်စီက လုံခြုံရေးအထူးတင်းကြပ်ထားတဲ့ မွန်ပြည်နယ်၊ မော်လမြိုင်မြို့ပေါ်မှာ ဒီကနေ့ နိုဝင်ဘာ ၁၄ ရက်နေ့ ညနေ ၅ နာရီခွဲလောက်စပြီး နှစ်ဖက် အပြန်အလှန် ပစ်ခတ်မှု ဖြစ်ပွားခဲ့တယ်လို့ ဒေသခံတွေက ဒီဗွီဘီကို ပြောပါတယ်။

အဲဒီပစ်ခတ်မှုဟာ မော်လမြိုင်မြို့၊ ဇေယျာသီရိရပ်ကွက်က နေအိမ်တလုံးမှာ ပြည်သူ့ကာကွယ်ရေးတပ်ဖွဲ့တွေ ရောက်ရှိနေကြောင်း ဒလန်သတင်းပေးမှုကြောင့် စစ်ကောင်စီတပ်ဖွဲ့ဝင်တွေ လာရောက်စီးနင်းစဉ် နှစ်ဖက်အပြန်အလှန် ပစ်ခတ်မှု ဖြစ်ပွားခဲ့တာပါ။

အချိန်  ၁ နာရီခွဲအကြာ နှစ်ဖက်အပြန်အလှန် ပစ်ခတ်မှုအတွင်း စစ်ကောင်စီရဲတပ်ဖွဲ့ဝင် ၂ ဦးနဲ့ ရပ်ကွက်အုပ်ချုပ်ရေးမှူး သားဖြစ်သူတို့ ထိခိုက်ဒဏ်ရာရရှိထားတယ်လို့ သိရပါတယ်။

နှစ်ဖက်အပြန်အလှန် ပစ်ခတ်မှုအတွင်း ပြည်သူ့ကာကွယ်ရေးတပ်ဖွဲ့ဝင် (PDF) ၃ ဦး ကျဆုံးပြီး ၁ ဦး ဖမ်းဆီးခံထားရတယ်လို့ သတင်းထွက်ပေါ်နေပေမယ့် ဒီဗွီဘီအနေနဲ့ သီခြားအတည်မပြုနိုင်သေးပါဘူး။

မော်လမြိုင်မြို့ပေါ် ပစ်ခတ်မှုမှာ စစ်ကောင်စီဘက်က လက်နက်ကြီး ၈ လုံးထက်မနည်း ရမ်းသန်းပစ်ခတ်ခဲ့သလို ရပ်ကွက်နေသူတွေကိုလည်း နေအိမ်အပြင်ထွက်ရင် ပစ်ခတ်သတ်ဖြတ်မယ်လို့ ခြိမ်းခြောက်ထားပါတယ်။

လက်ရှိမှာတော့ စစ်ကောင်စီဟာ မော်လမြိုင်မြို့ ဒိုင်ဝန်းကွင်းရပ်ကွက်နဲ့ ဇေယျာသီရိရပ်ကွက်ရှိ လမ်းတချို့ကို ဖြတ်သန်းသွားလာခွင့် ပိတ်ဆို့ထားသလို မြို့အဝင်အထွက် နေရာတွေမှာ လုံခြုံရေးတင်းကျပ်ထားတာပါ။

2 weeks Ago

November 12, 2022

မော်လမြိုင်မြို့၌ အသတ်ခံထားရသည့် အမျိုးသားတဦးအလောင်း တွေ့ရှိ

မွန်​ပြည်နယ် မော်လမြိုင်မြို့ မြေနီကုန်းဘူတာအတက်ဘက် ဘုရားနှစ်ဆူကျောင်းဘက်နေရာမှာ နိုဝင်ဘာ ၁၂ ရက်နေ့ မနက်က အသတ်ခံထားရတဲ့ အမျိုးသားလောင်း တလောင်း တွေ့ရှိရတယ်လို့ လူမှုကယ်ဆယ်ရေးသမားတွေက ပြောပါတယ်။

လူမှုကယ်ဆယ်ရေးသမားတဦးက “အသတ်ခံထားရတဲ့အမျိုးသားဟာ ဆိုင်ကယ်ပွဲစား မုတ်ဆိတ် (ခ) ဇော်ဇော်လို့ သိထားရတယ်။ လက်ရောခြေရော ကြိုးတုပ်ထားပြီး အသတ်ခံထားရတာ။ အလောင်းကကြာပြီး ကြည့်ရှုလို့ မသင့်ဘူး” လို့ ပြောပါတယ်။

ကယ်ဆယ်ရေးအဖွဲ့တွေနဲ့ နာရေးကူညီမှုအဖွဲ့တွေ သက်ဆိုင်ရာ တာ၀န်ရှိသူတွေက ရုပ်အလောင်း သယ်ဖို့ လုပ်ဆောင်နေပြီး အသတ်ခံထားရတဲ့အကြောင်းရင်းကိုတော့ မသိရှိရသေးပါဘူး။

မွန်​ပြည်နယ်အတွင်းမှာတော့ ခိုးဆိုးလုယက်လူသတ်မှုတွေက စစ်ကောင်စီလက်ထက်မှာ ဒါဇင်နဲ့ချီရှိပြီး စစ်ကောင်စီရဲ့လက်အောက်ခံရဲတပ်ဖွဲ့ဝင်တွေဟာ ဖော်ထုတ်ဖမ်းဆီးနိုင်ခြင်းလည်း မရှိသေးတဲ့အပေါ်မှာ ပြည်သူတွေကြား ဝေဖန်မှုတွေ တနေ့တခြားမြင့် တက်လာနေပါတယ်။ 

2 weeks Ago
More News
Up