မရှိသောခါ၊ အခြားဟာများ

ပေါ်လာပေကြ၊ နည်းလမ်းရ၍

ဘဝသစ်များ ဖြစ်တော့၏။    ။

အမျိုးသားဒီမိုကရေစီအဖွဲ့ချုပ် (NLD) ကို ၂၀၂၃ မတ်လ ၂၉ ရက်ကစ ဖျက်သိမ်းလိုက်ကြောင်း အာဏာသိမ်းစစ်ကောင်စီက ကြေညာသံကြားလိုက်ရတယ်။ MRTV မှာ အမျိုးသားတယောက်က ကြေညာတာပါ။ ပါတီ ၆၃ ပါတီ မှတ်ပုံတင်ထားကြောင်း ပထမ ကြေညာတယ်။ ကြံ့ဖွတ်ပါတီ ဦးဆောင်ပြီး ၈၈ ပါတီတွေ ကရင်၊ ရခိုင်၊ ကချင်၊ မြို၊ ခမီ စသဖြင့် စစ်တပ်အလိုကျပါတီတွေ ၆၃ ပါတီ‌ပေါ့။ ကိုကိုကြီးရဲ့ ပြည်သူ့ပါတီလည်းပါရဲ့။

နောက်ထပ် ပါတီ ၄၀ ဖျက်သိမ်းကြောင်း ကြေညာတယ်။ ဒီထဲမှာ NLD နဲ့ SNLD တို့လည်းပါတယ်။ ရက် ၆၀ အချိန် ပေးထားလျက်က လာပြီးမှတ်ပုံမတင်လို့တဲ့။ သွားပြီး မှတ်ပုံတင်ဖို့မပြောနဲ့၊ တွေ့ရာသင်္ချိုင်း ဓားမဆိုင်း ဖမ်းနေတာကို ဘယ် NLD ခေါင်းဆောင်က သွားရဲမလဲလို့လည်း တွေးလိုက်မိပါတယ်။ အာဏာသိမ်းကာလမှာ NLD ပါတီဝင်တွေ အဖမ်းခံကြရတယ်။ အသတ်ခံကြရ သေဆုံးကုန်ကြရတယ်။ တချို့ဆို ဖမ်းသွားပြီး နာရီပိုင်းအတွင်းမှာပဲ ရိုက်သတ်ခံကြရတာပါ။ စစ်တပ်အာဏာသိမ်းထားတဲ့ တနှစ်ကျော်အတွင်း လွှတ်တော်အမတ်သုံးဦး အပါအဝင် အမျိုးသားဒီမိုကရေစီအဖွဲ့ချုပ် ပါတီဝင် ၄၈ ဦး သေဆုံးပြီး ပါတီဝင် ၉၆၀ ကျော် အဖမ်းခံထားရတယ်လို့ NLD ပါတီရဲ့ လူ့အခွင့်အရေးချိုးဖောက်မှု မှတ်တမ်းကောက်ယူရေးအဖွဲ့က ထုတ်ပြန်ထားတာလည်း တွေ့ပါတယ်။ ဒါက ၁ နှစ် စာရင်းနော်။ ၂ နှစ်ကျော်ကာလမှာဆို ဘယ်လောက်အဖမ်းခံရမလဲ။ ဘယ်လောက်သတ်လိုက်ပြီလဲ။ ဒီလို ဖမ်းနေ သတ်နေတဲ့ကြားက ပါတီခေါင်းဆောင် ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့ကို ဖမ်းထားတဲ့ကြားက ဘယ် NLD ခေါင်းဆောင်က သွားပြီး မှတ်ပုံတင်ရဲပါ့မလဲ။ NLD က မှတ်ပုံတင်ပြီး ရွေးကောက်ပွဲဝင်ပြီ ဆိုပါတော့ဗျာ။ ၂၀၂၀ တုန်းကလို သောင်ပြိုကမ်းပြိုနိုင်ရင်ကော မဲမသမာမှုတွေ လုပ်တယ်ဆိုပြီး အာဏာလွှဲမပေးဘဲ မနေပါဘူးလို့ အာမခံမှာလား။ အာမခံရင်ကော ယုံရမှာလား။ ခြံခုန်ဖူးတဲ့နွားက ခုန်ဦးမှာလေ။ ကျားကောင်ကြီးက သတ်သတ်လွတ်စားတယ်ပြောတာကို ယုံသူမရှိပါ။ ထားပါတော့ ဘာပဲပြောပြော NLD ကို ဖျက်သိမ်းလိုက်ပါပြီ။ ဘာတွေဆက်ဖြစ်မလဲပေါ့။ လမ်းဆုံးပြီလားပေါ့။ ရှေးစကားအရကတော့ လမ်းဆုံးရင် ရွာတွေ့ရမယ်လေ။

နတ္ထိပစ္စယော

ဗုဒ္ဓအဘိဓမ္မာထဲက ပဋ္ဌာန်းကျမ်းကြီးမှာ ၂၄ ပစ္စည်း ရှိတယ်။ အမှတ်စဉ် ၂၂။ “နတ္ထိပစ္စယော- မရှိဘဲ ကျေးဇူးပြုတတ်သောတရား” ကို NLD ပါတီ ဖျက်သိမ်းလိုက်ပြီ မရှိတော့ဘူးဆိုတာနဲ့ တွဲပြီး စဉ်းစားမိလာတယ်။ တပြိုင်တည်းပဲ ကွယ်လွန်သူ NLD ခေါင်းဆောင်တယောက်ဖြစ်တဲ့  ဦးဝင်းတင်ကိုလည်း သတိရလာတယ်။ ဘဘဦးဝင်းတင်နဲ့ အတူတူနေခဲ့ဖူးတဲ့ အခု စစ်ကောင်စီက ဖမ်းထားတဲ့ ကိုရာဇာက ရေးဖူးတယ်။ ၂၀၁၀ မတိုင်ခင်က NLD ကို ဖျက်သိမ်းလုနီးပါး ဖြစ်ခဲ့တယ်။ ကြုံခဲ့ဖူးတယ်တဲ့။ အဲ့သည်တုန်းက ဦးဝင်းတင် ပြောခဲ့တာက နတ္ထိပစ္စယော တရားကိုပါပဲ။ ရာဇာရေ... နတ္ထိပစ္စယောပဲကွ။ မရှိတဲ့အခါ ဖြစ်လာတဲ့ အကျိုးကျေးဇူးတွေလို့ ပြောပါသတဲ့။ ဆိုလိုတာကတော့ NLD ပါတီ ဖျက်သိမ်းခံရခြင်းကြောင့်သည်ပင်လျှင် ဖြစ်ပေါ်လာမယ့် အကျိုးကျေးဇူးတွေ ရှိနေမယ်လို့ ဦးဝင်းတင်က ပြောခဲ့တာ ဖြစ်ပါတယ်။ ပညာရှိစကား၊ ခေါင်းဆောင်ကောင်းရဲ့စကားကို ပြန်ပြောပြတဲ့ သူ့ဖေ့စ်ဘွတ်ခ်မှာ ရေးတင်ခဲ့တဲ့ NLD ပါတီဝင် ထောင်ထဲက ကိုရာဇာကိုလည်း ကျေးဇူးပါ။ အမြန်လွတ်မြောက်ပါစေဗျာ။

နတ္ထိ ဆိုတဲ့ တရားရဲ့ အဓိပ္ပာယ်ကို စာအုပ်မှာ ရှာဖတ်တဲ့အခါ အခုလို တွေ့တယ်။ (နတ္ထိပစ္စယော = မရှိသည်ဖြစ်၍ မရှိမှ ကျေးဇူးပြုတတ်သောတရား။ ဆီမီးငြိမ်းသွားခြင်းသည် အမိုက်အမှောင်ကိုရခြင်းငှာ ကျေးဇူးပြုသကဲ့သို့လည်းကောင်း၊ ညအခါကုန်လွန်သွားခြင်းသည် နေ့အခါရောက်ဖို့ရန် ကျေးဇူးပြုသကဲ့သို့လည်းကောင်း၊ ရှေးရှေးစိတ်တို့ ချုပ်ငြိမ်း၍ မရှိခြင်းသည် နောက်နောက်စိတ်ဖြစ်ဖို့ရန်အတွက် မရှိသောအဖြစ်ဖြင့် ကျေးဇူးပြုခြင်းငှာ နတ္ထိပစ္စည်းတရားကို ဟောတော်မူသည်။) လို့ တွေ့ပါတယ်။ ဒါ ဗုဒ္ဓရဲ့ ဟောကြားစကားပါ။ မှတ်သားနာယူရလို့လည်း အသိထူးရရှိတယ်မို့ ကျေနပ်မိပါတယ်။ NLD နတ္ထိ မရှိရာကနေ ဒီစာကိုရေးတော့ ဒီတရားကို ရှာတွေ့ရတာပါ။ “နတ္ထိကျေးဇူး၊ အသိထူး၊ သိဖူးနားလည်ရပါပြီ” လို့ အားပါးတရ ဆိုလိုက်ချင်ရဲ့။

ဘုရင့်နောင်ဖောင်နတ္ထိစစ်အောင်သည့်တိုင်

ဘုရင့်နောင်ရဲ့ နောင်ရိုးတိုက်ပွဲဟာ ထင်ရှားပါတယ်။ တောင်ငူဘုရင် တပင်ရွှေထီးက ဟံသာဝတီကို ၃ ကြိမ်မြောက် လုပ်ကြံရာမှာ မခုခံနိုင်တော့တဲ့ မွန်မင်း သုရှင်တကာရွတ်ပိဟာ ရေတပ်နဲ့ ပြည်ကို အမြန်ပြေးတယ်။ နောင်ရိုးအရပ်ရောက်တော့ ချောင်းကိုကူးပြီး တပ်ချ ရပ်နားတယ်။ အဲ့ဒါကို နောက်ကလိုက်လာတဲ့ ကျော်ထင်နော်ရထာ (ဘုရင့်နောင်) တောင်ငူတပ်တွေက မီလာပြီး ချောင်းကိုဖြတ်တဲ့အခါ တောင်ငူ-ဟံသာဝတီ နှစ်ဖက် တိုက်ပွဲပြင်းထန်တယ်။

နောင်ရိုးကိုရောက်တော့ တဖက်ကမ်း ရန်သူတပ်အင်အားကို စုံစမ်းတော့ မွန်တပ်အင်အားက မိမိတပ်ထက် ကြီးနေတယ်။ ဒါကို နောက်ပါ မှူးမတ်တို့က မင်းတရားရွှေထီးတပ် ရောက်တဲ့အထိ စောင့်ပြီးမှ တိုက်သင့်ကြောင်း၊ လက်ရှိအင်အားနဲ့တိုက်လျှင် နိုင်ဖို့မလွယ်ကူကြောင်း လျှောက်ကြတယ်။ ဒီအခါ ဘုရင့်နောင်က “စစ်သဘောမှာ အင်အားငယ်သည်ကြီးသည်မှာ ပဓာနမဟုတ်၊ သူရသတ္တိနဲ့ စစ်ပရိယာယ်သာ ပဓာန” လို့ဆိုပြီး ချောင်းကိုကူးတယ်။ ချောင်းတဖက်ကမ်းရောက်တော့ ဖောင်အားလုံးကို ဖျက်စေတယ်။ တကယ်လို့များ စစ်ရေးမလှဘဲ ရှုံးနိမ့်လျှင် အားကိုးအားထားပြုပြီး ပြေးဖို့ ဖောင်တွေမဖျက်ဖို့ မှူးမတ်တွေက လျှောက်ကြတယ်။

ဒီအခါ ဘုရင့်နောင်က “ဖောင်တို့ကိုမဖျက်လျှင် အနည်းငယ် စစ်ရေးမလှသည်တွေ့လျှင် နောက်သို့ချည်းလှည့်ပြေးရန် စဉ်းစားကြလိမ့်မည်။ ဖောင်တို့ကိုဖျက်မှသာ ရှေ့မှရန်သူကို နောက်မှရေဘေးဟူသော အသိဖြင့် ယတိပြတ်အနိုင်တိုက်ရန် စိတ်ရှိကြမည်။” လို့ဆိုပြီး ဖျက်စေပြီးမှ စစ်တိုက်တယ်။

နောက်ပြန်ပြေးဖို့လမ်းမရှိ (နတ္ထိ) ဖြစ်နေတဲ့ ဘုရင့်နောင်တပ်တွေဟာ မွန်တပ်တို့ကို တဟုန်ထိုး တိုက်ခိုက်တော့တယ်။ အထင်သေးပြီး ပေါ့လျော့နေတဲ့ မွန်တပ်ကြီးဟာ အမှန်တကယ် ရင်ဆိုင်တဲ့အခါ တောင်ငူတပ်ရဲ့ ရွပ်ရွပ်ချွံချွံတိုက်ခိုက်မှုကို ခံရပြီး စစ်ရှုံးရတယ်။ နောင်ရိုးတိုက်ပွဲမှာ ဘုရင့်နောင် ဖောင်နတ္ထိ ဖောင်ဖျက်တိုက်လို့ စစ်နိုင်ခဲ့ဖူးပြီ။

ဒေါ်အောင်ဆန်းစုကြည်၊ NLD နှင့် ပြည်သူ့ရွေးချယ်မှု

ပြည်သူများ စစ်အာဏာရှင်အား အပြုတ်တိုက်ရန် စစ်အာဏာရှင်တွေကပဲ လမ်းပြပေးလိုက်တာပါ။ ဒီစကားဟာ အညာဒေသ သပိတ်ခေါင်းဆောင်တဦးက ပြောသွားခဲ့တာပါ။ လူထုဟာ ဒီမိုကရေစီ လိုချင်တယ်။ တောင့်တတယ်။ ဆန္ဒပြတောင်းဆိုကြတယ်။ လက်သီးဆုပ်တွေ ထောင်မြှောက်ပြီး တောင်းဆိုကြတယ်။ လက်သီးဆုပ်ထောင် တောင်းဆိုခဲ့ကြတယ်။ ၈၈၈၈ မှာ။ မရတဲ့အဆုံး ၁၉၉၀ ဒီမိုကရေစီရွေးကောက်ပွဲမှာ NLD ကို မဲပေးပြီး ရွေးချယ်လိုက်ကြတယ်။ ဒါပေမဲ့ စစ်တပ်က ကလိမ်ကျပြီး အာဏာမလွှဲပါ။ ၂၀၁၅ ရွေးကောက်ပွဲမှာလည်း NLD ကို အပြတ်အသတ် သောင်ပြိုကမ်းပြို မဲပေးပြီး အစိုးရဖွဲ့စေတယ်။ ဒီမိုကရေစီလမ်းစပေါ် ၅ နှစ်တက်ခဲ့ပြီ။ ဒါပေမဲ့ အစရဲ့ အစသာပဲ ရှိပါသေးတယ်။ ၂၀၂၀ ရွေးကောက်ပွဲမှာလည်း တခါထပ်ပြီး NLD ပါတီကို သောင်ပြိုကမ်းပြို ထပ်မဲပေးလိုက်ကြတယ်။ လက်သန်းကိုယ်စီပြာလို့ပေါ့။ လက်သန်းကိုယ်စီပြာလို့ပေါ့။

ဒါပေမဲ့ NLD က မဲစာရင်းမမှန်လို့ဆိုပြီး စစ်တပ်ဟာ အာဏာပြန်သိမ်းလိုက်တယ်။ ၂၀၂၁ ဖေဖော်ဝါရီ ၁ ရက်။ အဲ့ဒီနောက် ရွေးကောက်ပွဲ ၂၀၂၃ ပြန်လုပ်မယ်လို့ ပြင်လာပြန်ပြီ။ တချို့ကလည်း ရွေးကောက်ပွဲဝင်ချင်ကြတယ်။ ကောင်းနိုးနိုးပေါ့။ ဟုတ်နိုးနိုးပေါ့။ PDF တွေလို လက်နက်ကိုင်နည်းနဲ့ ငါးသိန်းလောက် စစ်တပ်ကြီးကို မနိုင်နိုင်ဘူး ဆိုသူတွေကလည်း ရှိပြန်။ နောက်ဆုံးမှာ စားပွဲဝိုင်းတွေ့ကြရမှာ ဆိုသူတွေလည်း ရှိကြရဲ့။ အခုတော့ ဒီလိုပြောစရာ မလိုတော့ပြီ။ လူထုပါတီ NLD လည်း ဖျက်သိမ်းခံလိုက်ရပြီ။ စားပွဲဝိုင်းတွေ့ဆုံပွဲလမ်း။ ရွေးကောက်ပွဲလမ်းတွေလည်း ပိတ်ပြီ။ စစ်ကောင်စီက ပိတ်ပေးလိုက်တာလို့ ပြောနိုင်တယ်။ NLD ပါတီဝင်တွေကော ပြည်သူတရပ်လုံးကော ဘုရင်နောင်ဖောင်နတ္ထိလို နောက်ဆုတ်ဖို့လမ်း မရှိတော့ပြီ။ နတ္ထိ။ စစ်အာဏာရှင်ကို လက်နက်ကိုင် အပြုတ်တိုက်ရေးနည်းလမ်း PDF တို့ရဲ့လမ်းကသာ ဖက်ဒရယ်ဒီမိုကရေစီကိုသွားရာ တခုတည်းသောလမ်း ဖြစ်လာပါပြီ။ လက်နက်ကိုင်တိုက်တဲ့နည်းပေါ့။ လက်ညှိုးကွေး သေနတ်ပစ်တာပေါ့။ လက်ညှိုးကိုယ်စီကွေးကြပြီ။ လက်ညှိုးကိုယ်စီကွေးကြပြီ။

တပြိုင်တည်းပဲ ပြည်တွင်း ပြည်ပ ဆန္ဒပြပွဲတွေနဲ့ ဝန်းရံ၊ CDM တွေက အားတင်း တောင့်ခံထား၊ ထောက်ပို့တွေကလည်း ဆက်လက်လှုပ်ရှား (နည်းမျိုးစုံနဲ့) တိုင်းရင်းသားလက်နက်ကိုင်တွေရဲ့ အင်အားတွေကလည်း အစွမ်းကုန်ပါဝင်၊ NUG ဦးဆောင်မှုကို ပိုကောင်း ပိုကျစ်လျစ်အောင်လုပ်၊ သံတမန်ရေးတိုက်ပွဲတွေပါပေါင်းပြီး လုပ်ကြ တိုက်ပွဲဝင်ကြရေးသာ အဓိက ဖြစ်ပါတော့တယ်။

လက်သီးဆုပ်ဆန့်တန်းကြလို့လည်း မရတော့ပြီ။

လက်သန်းပြာ မဲပေးရွေးချယ်ကြလို့လည်း အာဏာမလွှဲတဲ့ခါ

လက်သန်းကွေး တိုက်ပွဲဝင်ရေးနည်းလမ်းမှတပါး အခြားမရှိပြီ။    ။

မောင်တူး

နွေဦးစစ်ပွဲ၊ ခုခံနွှဲနေ

"အသည်းကြားမှ၊ မဲတပြား" တို့

တရားမဲ့စွာ၊ စစ်အာဏာအောက်

အရာမဝင် ပျောက်သောကြောင့်။ ။

စစ်ပွဲဘာကြောင့်ဖြစ်ရပါသနည်း

"စစ်ကို မလိုလားသောကြောင့် စစ်ကိုတိုက်နေရတာပါ"လို့ နိုင်ငံရေး ခေါင်းဆောင်တွေ၊ စစ်ဗိုလ်ချုပ်တွေက ပြောခဲ့ကြတာ ကြားဖူးပါရဲ့။ "စစ်ကို လိုလားသူ၊ စစ်နဲ့ အကျိုးစီးပွား ဖြစ်နေသူတွေက စစ်ဆင်စစ်တိုက်လာတာကို ရိုက်ချိုး တားဆီးဖို့ စစ်တိုက်နေရတာပါ"လို့လည်း ပြောကြပါတယ်။

အမှန်ပဲဖြစ်ပါတယ်။ စစ်ကို မတိုက်ချင်ဘဲလည်း တိုက်ကြရပါတယ်။ တိုက်ချင်လည်းပဲ တိုက်ရတာပါ။ စစ်မတိုက်ချင်ဘူးဆိုပြီး ထိုင်နေလို့မရ။ စစ်မတိုက်ချင်ဘူး ဆိုပြီး အိပ်နေလို့မရ။ စစ်သွေးဆာသူတွေက လာတိုက်ရင် ပြန်မတိုက်လို့ မရပါ။ ရပ်ကွက်ထဲက ရည်းစားလုဖက်နဲ့ ရန်မဖြစ်ချင်လို့ဆိုပြီး ဟိုဖက်ရပ်ကွက် သွားရှောင်နေတာမျိုး မရပါ။ ရရာလက်နက်၊ စွဲကိုင်လျက်ဖြင့်၊ တွဲလက်ပြည်သူ၊ ဝိုင်းကူကြပြီး ပြန်တိုက်ရတာပါပဲ။ ဒီလိုနဲ့ ကမ္ဘာစစ်ကြီးတွေလည်း ဖြစ်ခဲ့ကြပြီးပြီ။ ကရူးဆိတ်စစ်ပွဲများ။ ကိုလိုနီနယ်ချဲ့ နယ်လု စစ်ပွဲတွေ၊ ပထမကမ္ဘာစစ်၊ ဒုတိယကမ္ဘာစစ်၊ လက်ရှိ ပြည်ပက စစ်ပွဲတွေ၊ လက်ရှိ ကျနော်တို့ ပြည်တွင်းက အကြမ်းဖက် အာဏာသိမ်း စစ်ကောင်စီ ထိုးစစ်တွေကို ခုခံတိုက်ပွဲဝင်နေကြတဲ့ နွေဦးတော်လှန်ရေးစစ်ပွဲတွေဟာ မြင်တွေ့နေကြရတာပေါ့။

နွေဦးတော်လှန်စစ် ဘာကြောင့်ဖြစ်

မြန်မာပြည်သူတွေဟာ စစ်ကို မလိုလားကြပါဘူး။ စစ်ကို ရှောင်လွှဲကြပါတယ်။ ၁၉၅၈ ခုနှစ်က စလာခဲ့တဲ့ ဦးနေဝင်း စစ်အာဏာရှင် စစ်တပ်ဟာ ပြည်သူလူထုကို ဗိုလ်ကျစိုးမိုးခဲ့ပေမဲ့ မြန်မာပြည်သူတွေ သည်းခံခဲ့ကြတယ်။ ၂၆ နှစ်အကြာ ၈၈၈၈ ဒီမိုကရေစီ အရေးတော်ပုံကြီးမှာလည်း ဒီမိုကရေစီ ရရှိရေး၊ လူ့အခွင့်အရေးတွေကို လက်သီးဆုပ်တန်း၊ စုရုံးလမ်းလျှောက်၊ ဆန္ဒလောက်သာ သပိတ်မှောက် ပြသခဲ့ကြတယ်။ သွေးဆာနေတဲ့ ဦးနေဝင်း မဆလ စစ်တပ်ဟာ ပြည်သူတွေကို ပစ်သတ်ခဲ့ကြတယ်။ ဒါပေမဲ့ ပြန်တိုက်မယ်ဆိုပြီး တောခိုခဲ့ကြသူတွေဟာ အခုလောက် မများခဲ့ပါဘူး။ လူထုဟာ လက်သီးလက်မောင်တန်း ဆန္ဒပြခဲ့ကြသလို ၁၉၉၀ ရွေးကောက်ပွဲမှာ ကျတော့လည်း "အသည်းကြားက မဲတပြား" နဲ့ ဒီမိုကရေစီပါတီ NLD ကိုပဲ လက်သန်းမင်ပြာ ဖြစ်စေပြီး တိုက်ပွဲဝင်ခဲ့ကြတာပါ။ ဒါပေမဲ့ ၁၉၉၀ ရွေးကောက်ပွဲအနိုင်ရ NLD ကို အာဏာလွှဲမပေးတဲ့အခါ လူထုဒေါသ ဖြစ်ပေမဲ့ သည်းခံခဲ့တာပါပဲ။ ၂၀၁၅ နဲ့ ၂၀၂၀ ရွေးကောက်ပွဲတွေမှာလည်း လူထုဟာ လက်သန်းမင်ပြာဖြစ်စေပြီး NLD ကို သောင်ပြိုကမ်းပြို မဲပေးခဲ့ကြတာပေါ့။ ၂၀၁၅ မှာ အာဏာလွှဲပေမဲ့ ၂၀၂၀ မှာ အာဏာမလွှဲပဲ ဖေဖော်ဝါရီ ၁ ရက် အာဏာသိမ်းတော့ လူထုဒေါသဟာ အထွတ်အထိပ်ရောက်သွားပြီ။ ဒါပေမဲ့ သည်းခံတယ်။ ဆန္ဒပြတောင်းဆိုကြပါသေးတယ်။ တပြည်လုံးမှာ လူပင်လယ်ကြီးတွေလေ။ ဒါပေမဲ့ မင်းအောင်လှိုင် စစ်တပ်က ဆန္ဒပြသူတွေရဲ့ ခေါင်းတွေကို ပစ်၊ သတ်၊ ရိုက်၊ ဖမ်းလာတဲ့နောက် ပြည်လူထု ရွေးစရာ တလမ်းပဲ ရှိပါတော့တယ်။ အဲ့ဒါကတော့ ပြည်သူ့အတွက် ပြည်သူရှိတဲ့ ခုခံ စစ်ပွဲပါပဲ။ ခုခံစစ်ပွဲနော်၊ ပြည်သူ့ကာကွယ်ရေးတပ် PDF တွေ တိုင်းရင်းသားတပ်တွေက စစ်ကောင်စီ ထိုးစစ်ဆင်လာရင် ခုခံတိုက်တယ်။ ပြောက်ကျား တိုက်တယ်။ ဒီလောက်ပါပဲ။ စစ်ကို ပြည်သူက စတိုက်တာမဟုတ်ပါ။ စစ်အာဏာရှင်ကသာ စတိုက်ခဲ့တာလေ။ မတိုက်ချင်ပေမဲ့ မတိုက်ရင် မြောက်ကိုရီးယားလို ဖြစ်သွားမှာစိုးလို့။ တိုက်ရင် တောင်ကိုရီးယားလို ဖြစ်လာမှာကြောင့် တိုက်ကြရပါတယ်လို့တောင် ပြောနေကြပါပြီ။ 

စစ်နဲ့ ဒီမိုကရေစီယဉ်ကျေးမှု

ဒီမိုကရေစီဆိုတာ လူထုပြည်သူတွေက သူတို့ကိုယ်တိုင် သမာသမတ်ကျတဲ့ ရွေးကောက်ပွဲကော်မရှင်ရဲ့ ကြီးကြပ်မှုနဲ့ အမတ်တွေကို မဲပေးရွေးချယ်တဲ့ စနစ်ပါ။ အဲ့ဒါကို ဒီမိုကရေစီ နည်းကျတယ်လို့ခေါ်သပေါ့။ ဒီမိုကရေစီယဉ်ကျေးမှုပေါ့။ ၅ နှစ်တကြိမ် မဲပေးရွေးချယ်မယ်။ နိုင်သူ အစိုးရဖွဲ့ပေါ့။ တိုင်းပြည်တိုးတက်အောင် အဲ့သည် မဲနိုင် အစိုးရက လုပ်ပေ‌တော့။ ၅ နှစ်မှာ ကောင်းအောင်လုပ်ပေးတဲ့ ပါတီကို နောက်တကြိမ် ရွေးကောက်ပွဲမှာ ထပ်ရွေးမယ်။ ကောင်းအောင်မလုပ်ရင်တော့ ဂျောင်း ပေါ့။ ဒီမိုကရေစီယဉ်ကျေးမှုပါ။ စစ် အာဏာရှင်ဟူသည်မှာတော့ မဲပေးပွဲစစ်စစ်ကို မလိုလားပါ။ မဲပေးရွေးချယ်ပြီး ဒီမိုကရေစီပါတီက နိုင်ရင် အာဏာသိမ်းမယ်ဆိုတဲ့သူတွေပါ။ စစ်တပ်ကြိုက် ဒီမိုကရေစီမဲ့တဲ့ပါတီက နိုင်ရင်တော့ စစ်အာဏာရှင် သဘောတော် ကျတာပေါ့။ ဒီမိုကရေစီ အားကောင်းရင်၊ ဒီမိုကရေစီ ရှင်သန်ရင် စစ်တို့ စစ်တပ်တို့ဆိုတာ အရာမဝင်တော့ပါဘူး။ ငြိမ်းချမ်းနေပြီ ဖြစ်မှာကိုး၊ ပြောင်းပြန် ပြောရရင် ဒီမိုကရေစီနည်းကျ လူထုအကြိုက် ရွေးချယ်လိုက်တဲ့ ဒီမိုကရေစီပါတီကို အာဏာလွှဲမပေးဘဲ စစ်တပ် အာဏာသိမ်းသောအခါ စစ်ပွဲကြီးငယ် အသွယ်သယ်ကို ဖိတ်ခေါ်လိုက်သလို ဖြစ်တော့တာပေါ့။ 

နွေဦးတော်လှန်ရေးစစ်ပွဲ

မကျေနပ်ချက်တွေ၊ ရပိုင်ခွင့်တွေ၊ ဒီမိုကရေစီတွေကို နှုတ်နဲ့ ပြောဆိုဆွေးနွေး တောင်းဆိုလို့ မရတော့တဲ့အခါ စစ်ပွဲဟာ ရှောင်လွဲလို့ မရတော့ပါ။ ချောင်ပိတ်၍ရိုက်၊ ပြန်တိုက်ခိုက်ရ၊ ဦးစိုက်တောင်းပန်လို့ မရတော့ပါပြီ။ ဒီလိုမျိုး အခြေအနေဟာ ၁၉၈၈ ကလည်း ဖြစ်ဖူးခဲ့တာပါ။ ဒါကို ဒီကဗျာကလေးက သက်သေပြနေတာပါ့။ 

“ABSDF ကို ဖြတ်သန်းခြင်း ၂ “

သွေးပလက်ဖောင်း

စာသင်ကျောင်းတို့

ရွှေ့ပြောင်းမြိုင်ရပ်နှင်သောအခါ။

သမိုင်းမီးလျှံ

မုန်တိုင်းထန်သည်

ဓား လှံ လေး မြား ပွားစီး၏။ ။

(မောင်လွမ်းဏီ)

၁၉၈၈ ခုနှစ်မှာ ABSDF ကျောင်းသားတပ်မတော် ပေါ်ပေါက်လာရတဲ့ အကြောင်း နောက်ခံကို ကဗျာဆရာ မောင်လွမ်းဏီက ရေးထားတာပါ။ အခုလည်း PDF တပ်တွေ နွေဦးတော်လှန်ရေး တပ်ဖွဲ့တွေ ပေါ်ပေါက် လာရတာဟာလည်း ဒီသဘောနှင်နှင်ပါပဲ။ ၈၈ လမ်းတွေပေါ်မှာ ဆန္ဒပြသူတွေကို အစုလိုက် အပြုံလို ပစ်သတ်ခဲ့တယ်။ ဒါကြောင့် လက်နက်ကိုင် ပြန်တိုက်ဖို့ ကျောင်းသားတွေ တောခိုခဲ့ကြတယ်။ ABSDF ပေါ်လာတယ်။ စစ်ပွဲတွေ ဖြစ်ကြတယ်။ နယ်စပ်ဒေသတွေမှာသာပါ။ ၁၉၈၈ ဆန္ဒပြပွဲတွေဟာလည်း အာဏာသိမ်းလိုက်အပြီး ရပ်ကုန်ပါတယ်။ ဒါပေမဲ့ အခုအခါ ၂၀၂၁ နွေဦးတော်လှန်ရေးမှာတော့ သပိတ်မှောက် ဆန္ဒပြပွဲတွေကလည်း ၂ နှစ်ကျော်တဲ့ အထိ ပြဆဲပါ။ ပြည်တွင်း ပြည်ပ နေ့စဉ်အပတ်စဉ် လမ်းလျှောက် ချီတက် ဆန္ဒပြ သပိတ်တွေကလည်း မရပ်ပါ။ ဒီမိုကရေစီ ယဉ်ကျေးမှုအရ အမှန်တရား ပြန်လည်ရရှိရေး ဆန္ဒပြပြီးကြေညာကြတာလေ။

မြက်ရိုင်းမာန

ပန်းအိုးထဲတွင်

စိုက်ပျိုးလျှင်မူ

မြေပြင်ကျဉ်းကြောင်းကြေညာမည်။ ။ 

(အောင်ဇင်မင်း)

ဆရာ အောင်ဇင်မင်းက စာပေကင်ပေတိုင်ကို ဦးတည်ပြီး ဒီကဗျာကို ရေးတယ်လို့ ဆိုပေမဲ့ ဒီနေ့ ကျနော်တို့ ပြည်သူတွေကတော့ ဖေဖော်ဝါရီ ၁ ရက် အာဏာသိမ်းပွဲဟာ စစ်ခမောက်ထဲမှာ တိုင်းပြည်ကံကြမ္မာကို ထည့်သွင်းလိုက်တာလို့ ခံစားနေကြရပါတယ်။ ဒါကြောင့်လည်း အာဏာသိမ်း အကြမ်းဖက် မင်းအောင်လှိုင် စစ်ကောင်စီကို ဆန့်ကျင်ပြီး ၂ နှစ်ကျော်ကာလတိုင်အောင် မြန်မာပြည်မှာ တနေ့မပြတ် သပိတ်စစ်ကြောင်းတွေနဲ့ ဆန္ဒပြနေကြတုန်းပါ။ ဒါပေမဲ့ ဒီလို ဆန္ဒပြတောင်းဆိုချက်တွေက်ုလည်း မလိုက်လျောကြတဲ့အခါမှာတော့ ရရာ လက်နက်စွဲကိုင်ပြီး ပြည်သူ့ကာကွယ်ရေးတပ် PDF တွေဟာ ၂၀၂၁ ခုနှစ် မေလ ၅ ရက်မှာ ပေါ်ပေါက်လာခဲ့ရပါတယ်။ ၂ နှစ်ပြည့်ပါတော့မယ်။

“မမဲ့နဲ့”

လက်မဲ့ဟာ အမြဲငိုမဲ့မဲ့

အလုပ်လက်မဲ့

အိမ်ယာမဲ့

ဥစ္စာမဲ့

လက်သည်မဲ့ ပိုင်ရှင်မဲ့

စည်းမဲ့ကမ်းမဲ့ကောင်တွေက

ထီးနဲ့နန်း အဓမ္မ လုယက်ကုန်ကြပြီ။ 

လက်မဲ့ရင် အသက်မဲ့ဖို့လွယ်လွန်းတဲ့ခေတ်မှာ

အသက်ဓာတ်မြဲဖို့ လက်နက်စွဲရတာ ဓမ္မပဲညီလေး။ ။ 

ပန်းတော်ဆက်

နိဂုံး သို့မဟုတ် နွေဦးစစ်နိုင်မှ ဒီမိုကရေစီယဉ်ကျေးမှုရှင်သန်မည်

စာရေးဆရာ အကြည်တော် ပြောခဲ့သလို "ပြည်သူလူထုက နိုင်နေပါပြီ။ အရှက်မရှိ စစ်အာဏာရှင်က ထွက်မသွားသေးလို့ မောင်းထုတ်နေရတာ" ဆိုသလို။

မင်းကိုနိုင် ပြောခဲ့သလို "အမှတ်နဲ့ဆို ပြည်သူလူထုက နိုင်နေပါပြီ။ ဒိုင်တွေက စစ်အာဏာရှင်ဘက်က လိုက်နေလို့ အလဲထိုးကြရပါမယ်" ဆိုသလိုပေါ့။ 

စစ်အာဏာရှင်ကို အလဲထိုးရပါမယ်။ ၁၀၀ ရာခိုင်နှုန်းပြည့် ညီညွတ်ကြရပါမယ်။ PDF တွေချည်းမရပါ။ ဘုံရန်သူကို ဦးတည်တိုက်မယ့် တိုင်းရင်းသားတော်လှန်ရေးတပ်တွေ အားလုံးရော၊ CDM တွေ အားလုံးရော၊ ပြည်သူလူထု တရပ်လုံးပါဝင်တဲ့ ပြည်တွင်းပြည်ပ သပိတ်မှောက် ဆန္ဒပြသူတွေ အားလုံးရော၊ အားလုံးအားလုံး ညီညွတ်မှ နွေဦးစစ်ပွဲအောင်မှာပါ။ နွေဦးတော်လှန်ရေး အောင်မြင်မှသာ ရွေးကောက်ပွဲ မဲနိုင်ပါတီကို စစ်တပ်က အာဏာသိမ်းလေ့ရှိတဲ့  စစ်မီးမွှေးဝါဒတွေလည်း ပျောက်မှာပါ။ တချိန်တည်းမှာပဲ နွေဦးစစ်ပွဲအနိုင်ရပါမှ ဒီမိုကရေစီယဉ်ကျေးမှု ပြန်လည် ထွန်းကားလာရမှာပါ။ ။

မောင်တူး