မေလသံစဉ်

February 2, 2021

စီးတီးအက်ဖ်အမ် တေးဂီတဆု ဇော်ဝင်းထွဋ်၊ မေလသံစဉ်နှင့် အနုပညာရှင်များရရှိ

နှစ်စဉ် ခမ်းခမ်းနားနား ကျင်းပလေ့ရှိတဲ့ စီးတီးအက်ဖ်အမ်ရဲ့ တေးဂီတဆုပေးပွဲကို  အခုနှစ်မှာတော့ ကိုဗစ်-၁၉ ကူးစက်ပျံ့ပွားမှု အန္တရာယ်ကြောင့် အွန်လိုင်းကတဆင့် ကျင်း ပခဲ့ပြီး ဆု ၆ ဆုသာ ချီးမြှင့်နိုင်ခဲ့ပါတယ်။

အခုနှစ်မှာတော့ ဒီဆုပေးပွဲကို ကျင်းပလာတာ ၁၉ ကြိမ်မြောက် ရှိလာခဲ့ပြီဖြစ်ကာ Virtual Ceremony အနေနဲ့ ဇန်နဝါရီ ၃၀ ရက်ညပိုင်းက ထုတ်လွှင့်တင်ဆက်ပေးခဲ့တာ ဖြစ်ပါတယ်။

ဆုရရှိသွားကြတဲ့ အနုပညာရှင်တွေကတော့ မြန်မာသံစဉ်တေးသီချင်း သီဆိုသူဆု ကို ဂန္ထဝင်တေးအလှများ တေးအယ်လ်ဘမ်နဲ့ တေးသံရှင် ဘာဘရာ၊ အကောင်းဆုံး အ မျိုးသားတေးသံရှင်ဆုကို ဇော်ဝင်းထွဋ်၊ အကောင်းဆုံး အမျိုးသမီးတေးသံရှင်ဆုကို မေလ သံစဉ်၊ ဂီတမျိုးဆက်သစ်ဆုကို ကမ္ဘာ့အပြင်သွားပါ ကိုရိုနာ-Go Away Corona သီချင်းကို ရေးသားခဲ့သူ ဒေါက်တာ ဖြိုးဝေလင်း၊ စီးတီးအက်ဖ်အမ်မှာ တေးသီချင်းတောင်းဆိုခံရမှု အများဆုံး အမျိုးသားတေးသံရှင်ဆုကို ဖြိုးမြတ်အောင်နဲ့ တေးသီချင်းတောင်းဆိုခံရမှု အ များဆုံး အမျိုးသမီးတေးသံရှင်ဆု ကို နီနီခင်ဇော်တို့က ရရှိခဲ့ပါတယ်။

ပြီးခဲ့တဲ့ ၁၈ ကြိမ်မြောက် ဆုပေးပွဲ အခမ်းအနားမှာတော့ ဆုပေါင်း ၈ ဆုရွေးချယ် ချီးမြှင့်ခဲ့ပြီး ဆုရရှိခဲ့ကြတဲ့ ဂီတအနုပညာရှင်များကို ဆုတံဆိပ်နဲ့ ရွှေ ၁ ကျပ်သားစီ ချီး မြှင့်ခဲ့တာ ဖြစ်ပါတယ်။ 

အခုနှစ်ရဲ့ Virtual Ceremony အခမ်းအနားမှာတော့ အစီအစဉ်တင်ဆက်သူအဖြစ် ဆန်းထွဋ်က  ပါဝင်ခဲ့ပြီး နာမည်ကြီး အင်ပါယာတေးဂီတအဖွဲ့နဲ့အတူ ပရိသတ်အချစ် တော် တေးသံရှင်တွေဖြစ်ကြတဲ့ ဇော်ဝင်းထွဋ်၊ မေဆွိ၊ ဖြိုးပြည့်စုံ၊ ဝိုင်းစုခိုင်သိန်း၊ ရတ နာမိုင်၊ သားသား၊ Eternal Gosh၊ နီနီခင်ဇော်၊ မိစန္ဒီ၊ ဖြိုးမြတ်အောင်၊ ဂျူဝယ်လ်၊ မေလ သံစဉ်၊ ချမ်းမြေ့မောင်ချိုစတဲ့ အဆိုတော်တွေ အများကြီးက ပါဝင်တင်ဆက်ပေးခဲ့ကြတာ ဖြစ်ပါတယ်။

2 months Ago

November 23, 2020

Project K၊ မေလသံစဉ်တို့ ပါဝင်သည့် တန်ဆောင်တိုင်ဂီတဖျော်ဖြေပွဲ ကျင်းပမည်

ပရိသတ်အချစ်တော် မြန်မာကေပေါ့ပ်တေးဂီတအဖွဲ့တဖွဲ့ဖြစ်တဲ့ Projet K၊ မေလသံစဉ်တို့ ပါဝင်ကြမယ့် တန်ဆောင်တိုင်ဂီတဖျော်ဖြေပွဲကို လာမယ့် နိုဝင်ဘာ ၂၉ ရက်နေ့ ကျင်းပသွားဖို့ ရှိနေပါတယ်။ မိန်းကလေးပရိသတ်တွေ အများစု အားပေးမှု အခိုင်အမာရရှိထားတဲ့ Project K အဖွဲ့ဟာ အမျိုးသားလူငယ် ၇ ယောက်နဲ့ ဖွဲ့စည်းထားတဲ့အဖွဲ့ဖြစ်ပါတယ်။ သူတို့အဖွဲ့ဟာ ၂၀၁၆ ခုနှစ်က ကိုရီးယာနိုင်ငံမှာ ပြုလုပ်ခဲ့တဲ့ Seoul K-Pop International Cover Dance မှာ မြန်မာနိုင်ငံကိုယ်စားပြုအဖြစ် သွားရောက်ယှဉ်ပြိုင်ခဲ့ပြီး ဒုတိယဆုကို ဆွတ်ခူးနိုင်ခဲ့ပြီးတဲ့နောက်မှာတော့ မြန်မာအကနဲ့ ကိုရီးယားအက ပေါင်းစပ်တီထွင် သရုပ်ဖော်ကပြမှုတွေနဲ့အတူ နာမည်ကြီးလာခဲ့တာပါ။ ၂၀၁၈ ခုနှစ်မှာတော့ သူတို့အဖွဲ့ဟာ The Beginning အမည်နဲ့ တေးအယ်လ်ဘမ် တချပ် ထွက်ရှိထားပြီး Project K အဖွဲ့မှာ ထက်ဘုန်းနိုင်၊ ဝီလျှံ၊ ဘုန်းနေမင်း၊ ဘုန်းနေ လင်း၊ ဟိန်းရာ၊ ရဲရင့်သော်၊ မင်းခန့်ဟိန်းတို့ ပါဝင်ပါတယ်။ နောက်ပိုင်းမှာလည်း Project K အနေနဲ့ ပြည်တွင်း ပြည်ပဖျော်ဖြေပွဲတွေ များစွာမှာ ပါဝင်ဖျော်ဖြေခဲ့ကြပြီး ပရိသတ်အားပေးမှုတွေ အခိုင်အမာ ရရှိထားခဲ့ပြီ ဖြစ်ပါတယ်။ ကာဗာသီချင်းတွေကို သီဆိုရင်း အင်တာနက်စာမျက်နှာတွေပေါ်မှတဆင့် ပရိသတ်တွေ ရင်ထဲရောက်ရှိလာခဲ့တဲ့ မေလသံစဉ်ကိုတော့ အထူးမိတ်ဆက်ပေးဖို့ လိုမယ် မထင်ပါဘူး။ သူဟာ ငယ်ငယ်ကတည်းက ဂီတကို ဝါသနာပါခဲ့ပြီး စန္ဒရား၊ ဂစ်တာ စတဲ့ တူရိယာတွေကို ကိုယ်တိုင်တီးခတ်ပြီး ဖျော်ဖြေလေ့ရှိသလို သီချင်းတွေကို ရေးဖွဲ့နိုင်တဲ့ တေးရေး တယောက်လည်း ဖြစ်ပါတယ်။ ချစ်စဖွယ်သွင်ပြင်နဲ့ မူဟန်ပိုပို သရုပ်ဆောင်နိုင်တဲ့ မေလသံစဉ်ဟာ မြန်မာ့ရုပ်ရှင် ရာပြည့်ပွဲအတွက် ရွှေကြိုမောင်မယ်ပြိုင်ပွဲမှာ ပါဝင်ခဲ့ပြီး Grand Final အဆင့်ထိ တက် ရောက်ခွင့်ရခဲ့ပေမယ့် အဘိုးဖြစ်သူရဲ့ ကျန်းမာရေးကြောင့် ပြိုင်ပွဲကနေ နုတ်ထွက်ခဲ့တာ ဖြစ်ပါတယ်။ သူ့ရဲ့ ပထမဆုံး တကိုယ်တော် တေးအယ်လ်ဘမ်ဖြစ်တဲ့ Celebrity တေးအယ်လ်ဘမ်၊ သီချင်း ၂ ပုဒ်ပါ လူကြီးကိုရစ်ခွင့်ပေးပါစတဲ့ တေးအယ်လ်ဘမ်တွေအပြင် တကိုယ်တော် ဆင်ဂယ်လ် သီချင်းတွေဖြစ်တဲ့ နတ်သားပုံပြင်၊ ကိုယ်ချင်းစာ စတဲ့ သီချင်းတွေဟာလည်း ထင်ရှားပါတယ်။ သိပ်မကြာခင်က နောက်ဆုံးထွက်ရှိထားတဲ့ မြန်မာသံစဉ်တေးသီချင်းဟောင်းတွေကို ပြန်လည်ခံစားသီဆိုထားတဲ့ “ပြန်လည်ဆန်းသစ်နှောင်းတစ်ခေတ်” တေး အယ်လ်ဘမ်ဟာလည်း ပရိသတ်တွေကြား ရေပန်းစားတဲ့ တေးအယ်လ်ဘမ်တချပ်ဖြစ်ခဲ့ပါတယ်။        လတ်တလောမှာတော့ သူတို့တွေ ပါဝင်ထားကြတဲ့ ဒီဂီတဖျော်ဖြေပွဲကို အွန်လိုင်း ပွဲတော်အနေနဲ့ Oramin F နဲ့ V7Entertainment တို့ရဲ့ ဖေ့စ်ဘွတ်ခ်အင်တာ နက်လူမှု ကွန်ရက်စာမျက်နှာတွေပေါ်ကတဆင့် တိုက်ရိုက်ထုတ်လွှင့်တင်ဆက်ပေးသွားမှာ ဖြစ်ပါတယ်။ ဒီဂီတဖျော်ဖြေပွဲမှာ  Project K ၊ မေလသံစဉ်တို့နဲ့အတူ တခြားအနုပညာရှင်‌တွေ ဖြစ်ကြတဲ့ အုပ်စိုးခန့် ၊ koso ၊ မေဂရေ့ပယ်ရီ တို့ကလည်း အတူတွဲဖက် ဖျော်ဖြေသွားကြမှာ ဖြစ်ပါတယ်။
5 months Ago
More News
Up