မူးယစ်ဆေးသယ်အဖွဲ့

September 1, 2021

ထိုင်း-မြန်မာနယ်စပ်တွင် မူးယစ်ဆေးသယ်အဖွဲ့နှင့် ထိုင်းစစ်တပ် ပစ်ခတ်မှုဖြစ်

ထိုင်းမြောက်ပိုင်း၊ ချင်းမိုင်ခရိုင်၊ ချင်းဒေါင်းမြို့နယ်၊ မိုင်းနကျေးရွာအုပ်စုရှိ မြန်မာနယ်စပ်အနီးမှာ ထိုင်းစစ်တပ်နဲ့ မူးယစ်ဆေးဝါးသယ်ဆောင်လာသူကြား ပစ်ခတ်ဖြစ်ခဲ့ပြီး မူးယစ်သယ်ဆောင်လာတဲ့ဘက်က ၁ ဦးသေဆုံးကာ စိတ်ကြွဆေး အလုံးရေ ၄၃၀,၀၀၀၊ ဘိန်းစိမ်း ၈ ကီလိုဂရမ်၊ သေနတ်နဲ့ ကျည်ဆန်တို့ ဖမ်းဆီးရမိတယ်လို့  တာဝန်ရှိသူတွေက ဩဂုတ် ၃၁ ရက် သတင်းစာရှင်းပွဲမှာ ပြောပါတယ်။ 

နယ်စပ်ဒေသရာဇဝတ်မှုပပျောက်ရေး၊ တရားမဝင် ဝင်ထွက်မှုတားဆီးရေးအတွက် တပ်မဟာ ၅   သံချပ်ကာတပ်ရင်းတပ်ဖွဲ့ ဝင်တွေဟာ ပြီးခဲ့တဲ့ ဩဂုတ် ၃၀ ရက်နေ့ညက နယ်မြေထဲမှာ စောင့်ကြပ်စစ်ဆေးနေကြောင်း၊ မြန်မာနယ်စပ်နဲ့ မီတာ ၈၀၀ ခန့်အကွာမှာ ကျောပိုးအိတ်ကိုယ်စီ နဲ့ သေနတ်တွေပါ ကိုင်ဆောင်ပြီး ပြောင်းခင်းတွေထဲဝင်လာတဲ့ လူ ၁၀ မှ ၁၅ ဦးခန့်ကို တွေ့ရှိလို့ စစ်ဆေးဖို့ လူယောင်ထွက်ပြစဉ် တဖက်က စတင်ပစ်ခတ်ခဲ့တာလို့ တပ်မဟာ ၅ သံချပ်ကာတပ်ရင်းမှ ဒုတပ်ရင်းမှူး ဗိုလ်မှူးကြီးတေချထွဏ်းဆိုင်ယုဒ်က သတင်းစာရှင်းပွဲမှာ ပြောပါတယ်။ 

ပစ်ခတ်မှု ၁၀ မိနစ်ခန့် ၁၅ မိနစ်ကြာမြင့်ပြီး ညဉ့်မှောင်နေတာက တကြောင်း၊ ပြောင်း ပင်တွေ ကွယ်နေတာကတကြောင်းမို့ နယ်မြေရှင်းလင်းရေးကို ချက်ချင်းမလုပ်နိုင်ဘဲ အဖွဲ့ ၃ ဖွဲ့ခွဲပြီး ပတ်ပတ်လည်မှာ စောင့်ကြပ်ခဲ့ကြောင်း၊  ဩဂုတ် ၃၁ မနက် ၆ နာရီမှ နယ်မြေဝင်ရှင်းရာမှာ မူးယစ်သယ်ဆောင်သူဘက်က အလောင်း ၁ လောင်း၊ အမ် ၁၆ ပြောင်းရှည်သေနတ်တလက်၊ ကျည်ဆန်  ၂ ထောင့် နဲ့ ကျောပိုးအိတ်အစိမ်းရောင် ၅ လုံးစွန့်ပစ်ခဲ့တာ တွေ့ရပြီး အထဲမှာတော့ ကြယ် ၅ လုံးနဲ့ ၉၉၉ တံဆိပ်ပါ စိတ်ကြွဆေးပြား ၄၃၀,၀၀၀၊ ဘိန်းစိမ်း အလေးချိန် ၈ ကီလိုဂရမ်ကို ဖမ်းမိခဲ့တယ်လို့ ဆိုပါတယ်။ 

ထိုင်း-မြန်မာနယ်စပ်တလျှောက်မှာ ဥပဒေမဲ့လုပ်ရပ်တွေပပျောက်ရေး၊ တရားမဝင် မူးယစ်ဆေးသယ်ဆောင်မှု၊ တရားမဝင်အလုပ်သမားတွေ ဝင်ရောက်လာမှု ထိန်းချုပ်ရေးအတွက် နယ်စပ်ကနေ အတွင်းပိုင်းထိ  ကြည့်ရှုစောင့်ကြပ်တဲ့ အဖွဲ့ပေါင်း ၁၀၈ ဖွဲ့ ထားရှိပြီး စစ်ဆေး ရေးဂိတ်ပေါင်း ၄၀ နေရာ ချထားတယ်လို့ ဒုတပ်ရင်းမှူးက ပြောသွားပါတယ်။ 

ကိုးကား - Thairath / MGRonline

3 months Ago
Up