မူးယစ်ဆေး

December 1, 2022

ထိုင်းကျောင်းတိုက်တခုတွင် သံဃာအားလုံး မူးယစ်ဆေးသုံးထားကြောင်း စစ်ဆေးတွေ့ရှိ

ထိုင်းနိုင်ငံမြောက်ပိုင်း ဖစ်ချ်ဘွန်းခရိုင် ဘင်ဆမ်ဖန်းမြို့နယ်ရှိ ဘုန်းကြီးကျောင်းတကျောင်းမှာ ကျောင်းထိုင်ကိုယ်တော်အပါအဝင် သံဃာအားလုံး မူးယစ်ဆေးသုံးထားတာကို စစ်ဆေးတွေ့ရှိတယ်လို့ ထိုင်းသတင်းတွေမှာ ဖော်ပြပါတယ်။ 

ဖစ်ချ်ဘွန်းခရိုင် ဘင်ဆမ်ဖန်းမြို့နယ်က မူးယစ်ဆေးနှိမ်နင်းရေးအဖွဲ့ဟာ ပြီးခဲ့တဲ့ နိုဝင်ဘာ ၂၈ ရက်နေ့က စက်ရုံအလုပ်ရုံ၊ စာသင်ကျောင်း၊ ဘုန်းကြီးကျောင်း စတဲ့နေရာတွေ လိုက်လံစစ်ဆေးရင်း ဘုန်းကြီးကျောင်းတကျောင်းက ကျောင်းထိုင်ကိုယ်တော်နဲ့ သံဃာတွေကို ဆီးစစ်ရာမှာ အားလုံးခရမ်းရောင်တွေ ထွက်ရှိတယ်လို့ ဆိုပါတယ်။ 

ကိုယ်တော် ၁ ပါးက မူးယစ်ဆေးသုံးတယ်ဆိုတာ ဝန်ခံကြောင်း၊ ဒါပေမဲ့ နေ့တိုင်းသုံးတာမဟုတ်ဘဲ ကြာကြာနေမှ တခါသုံးကြောင်း တာဝန်ရှိသူတွေအနေနဲ့ လာစစ်မယ်ဆို ကြိုတင်အကြောင်းကြားသင့်တယ်လို့ သတင်းထောက်ကို ပြောပါတယ်။ 

အဆိုပါကျောင်းမှာ သံဃာစုစုပေါင်း ၄ ပါးရှိပြီး ဝါတော် ၄ ဝါမှ ၁၀ ဝါထိရှိပါတယ်။ ဆီး စစ်ချက် အဖြေထွက်ပြီးတဲ့နောက် ကျောင်းထိုင်ကိုယ်တော် ပျောက်ဆုံးနေပြီး ကျန်တဲ့ သံဃာ ၃ ပါးကို  လူ ဝတ်လဲစေကာ မူးယစ်ဆေးဖြတ်ဂေဟာကို ပို့ဆောင်မယ်လို့ မြို့နယ်မူးယစ်ဆေးဝါးနှိမ်နင်းရေး စီမံချက်ကော်မတီဥက္ကဋ္ဌက ပြောပါတယ်။

ကျောင်းထိုင် အပါအဝင် သံယာတွေ ဘယ်လိုမူးယစ်ဆေးမျိုး သုံးစွဲတယ်ဆိုတာတော့ သတင်းမှာ မဖော်ပြထားပါဘူး။ 

ထိုင်းမှာ မူကြိုကျောင်းပစ်ခတ်မှုဖြစ်ပွားပြီးတဲ့နောက် မူးယစ်ဆေးဝါးကာကွယ်နှိမ်နင်းရေး လုပ်ငန်းတွေကို စီမံချက်တရပ်အနေနဲ့ ဆောင်ရွက်နေပြီး ရပ်ရွာတိုင်းမှာ ကော်မတီဖွဲ့ကာ မူးယစ်ဆေး သုံးစွဲရောင်းဝယ်မှုတွေ စစ်ဆေးနေတာပါ။ 

ကိုးကား - thairath news

10 mins Ago

October 28, 2022

ဘန်ကောက်တွင် မူးယစ်ဆေးပါ ချောင်းဆိုးပျောက်ဆေးများ ဘတ် ၂ သန်းခွဲဖိုးခန့် ဖမ်းဆီး

ထိုင်းနိုင်ငံ၊ ဘန်ကောက်နဲ့ ပထုန်ဌာနီခရိုင်တွေမှာ မူးယစ်ဆေးဝါးပါဝင်တဲ့ ချောင်းဆိုးပျောက်ဆေး၊ ယားယံ ပျောက်ဆေးရည်တွေ ဆယ်ကျော်သက် လူငယ်တွေကြား ပျံ့နှံ့နေတဲ့အတွက် သက်ဆိုင်ရာ တာဝန်ရှိသူတွေက လိုက်လံစစ်ဆေး ဖမ်းဆီးခဲ့ပါတယ်။

ထိုင်းအမျိုးသားဆေးဝါးနဲ့ အစားအစာကွပ်ကဲရေးဌာနရဲ့ တိုင်ကြားချက်အရ လိုအပ်သလို စုံစမ်းထောက်လှမ်းပြီး တန်ဖိုးဘတ် ၂,၄၀၀,၀၀၀ ကျော်ရှိ ချောင်းဆိုးပျောက်ဆေး၊ ယာယံပျောက်ဆေး အမျိုးအစားပေါင်း ၃၅ မျိုးကို ဖမ်းဆီးခဲ့တယ်လို့ ထိုင်းအမျိုးသားရဲတပ်ဖွဲ့ ရဲချုပ် ကျီလဖုပ်ဖူရိတေချ်က ဒီကနေ့ အောက်တိုဘာ ၂၈ ရက် သတင်းစာရှင်းပွဲမှာ ပြောပါတယ်။

လူငယ်တွေဟာ အဆိုပါချောင်းဆိုးပျောက်ဆေးကို အချိုရည်ထဲထည့်ပြီး သောက်လေ့ရှိကြောင်း၊ အဆိုပါချောင်းဆိုးပျောက်ဆေးထဲမှာ (၄ x ၁၀၀) အမျိုးအစား မူးယစ်ဆေး ပါဝင်တဲ့အတွက် အန္တရာယ်ဖြစ်စေကြောင်း၊ ဒါ့အပြင် ဆေးဆိုင်တချို့က ဆေးရောင်းဝန်ထမ်းတွေဟာလည်း ဆေးဝါးကျွမ်းကျင်သူလက်မှတ် မရှိဘူးလို့ ဆိုပါတယ်။

ဒါကြောင့် အောက်တိုဘာ ၁၂ ရက်မှ ၂၀ ရက်နေ့အတွင်း သတင်းရထားတဲ့ နေရာပေါင်း ၁၉ နေရာကနေ ဆေးရောင်းချမှု ပါဝင်ပတ်သက်သူ အ‌ယောက် ၂၀ ကို ဖမ်းဆီးခဲ့တယ်လို့ ဆိုပါတယ်။

အစားအစာနဲ့ ဆေးဝါးကာကွယ်ရေးဥပဒေအရ ခွင့်ပြုချက်မရတဲ့ ဆေးဝါးတွေ ရောင်းချပါက ဒဏ်ငွေ ဘတ် ၂,၀၀၀ မှ ၁၀,၀၀၀ ထိ ၊ ဆေးဝါးကျွမ်းကျင်သူလက်မှတ်မရှိဘဲ အရောင်းဝန်ထမ်းလုပ်ပါက ဒဏ်ငွေ ဘတ် ၁,၀၀၀ မှ ၅,၀၀၀ ထိ၊ ဆေးဝါးတုပရောင်းချပါက ထောင်ဒဏ် ၁ နှစ်မှ ၂၀ နှစ်ထိ သို့မဟုတ် ငွေဒဏ် ဘတ် ၂,၀၀၀ မှ ၁၀,၀၀၀ ထိ၊ ခွင့်ပြုချက်မရဘဲ ဆေးဝါးပစ္စည်းဆိုင်ဖွင့် ရောင်းချပါက ထောင်ဒဏ် ၃ နှစ်ထက်မပို ဒါမှမဟုတ် ငွေဒဏ် ဘတ် ၃၀,၀၀၀ ထိ ပြစ်ဒဏ်ထိနိုင်တယ်လို့ ဆိုပါတယ်။

1 month Ago
More News
Up