မူးယစ်ဆန့်ကျင်အဖွဲ့ဝင်ပျောက်ဆုံးနေ

August 17, 2017

မူးယစ်ဆန့်ကျင်အဖွဲ့ဝင်တဦးကို သေနတ်ဒဏ်ရာများဖြင့် သေဆုံးလျက် ပြန်တွေ့

စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ ဟဲဖက်ကျေးရွာအနီး ဩဂုတ် ၁၃ ရက်နေ့က သေနတ်ပစ်ခတ်မှုဖြစ်ပွားကာ ပျောက်ဆုံးနေတဲ့ မူးယစ်ဆန့်ကျင်အဖွဲ့ဝင် ကျော်မိုး(ခ) အောင်ကျော်မိုးရဲ့ အလောင်းကို ဦးခေါင်းမှာ သေနတ်ဒဏ်ရာတွေနဲ့ ပြန်လည်တွေ့ရှိခဲ့ပါတယ်။ ပျောက်ဆုံးနေတဲ့ ကျော်မိုး(ခ)အောင်ကျော်မိုး အလောင်းကို ဟဲဖက်ကျေးရွာ မြောက်ဘက် အခင်းဖြစ်ရာ နေရာနဲ့ ၁ မိုင်ခန့်အကွာ ချောင်ကြီးချောင်းကမ်းမှာ  နဖူးမှ နောက်စေ့ ဖောက်ထွက် သေနတ်ဒဏ်ရာ ၁ ချက်၊ ယာနားထင် ပေါက်ထွက် ဒဏ်ရာ ၁ ချက်နဲ့  ဩဂုတ် ၁၅ ရက် မနက် ၁၀ နာရီခွဲအချိန်ခန့်က ရှာဖွေရေးအဖွဲ့က တွေ့ရှိခဲ့ရတာပါ။ တွေ့ရှိရတဲ့ အလောင်းကို ဟုမ္မလင်းမြို့နယ် နမ့်တောတိုက်နယ်ဆေးရုံကို ပို့ဆောင်ထားတယ်လို့ သိရပါတယ်။ ဒီကိစ္စနဲ့ပတ်သက်ပြီး မိုင်းကိုင်းနယ်မြေစခန်းမှူး ရဲအုပ်မျိုးမင်းညွန့်က တရားလိုပြုလုပ်ပြီး ရာဇသတ်ကြီးပုဒ်မ ၃၀၂ အရ အမှုဖွင့်ထားပြီး တရားခံ ဖမ်းဆီးရမိရေးကိုလည်း ဆောင်ရွက်နေတယ်လို့ မိုင်းကိုင်းနယ်မြေ ရဲတပ်ဖွဲ့စခန်းကသိရပါတယ်။
4 years Ago

August 14, 2017

ဟုမ္မလင်းမြို့နယ်၌ သေနတ်ပစ်ခတ်မှုဖြစ်ပွား၊ မူးယစ်ဆန့်ကျင်အဖွဲ့ဝင်ပျောက်ဆုံးနေ

ဩဂုတ်လ ၁၃ ရက်နေ့ နေ့လယ်ပိုင်းက စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ ဟဲဖက်ကျေးရွာအနီးမှာ သေနတ်ပစ်ခတ်မှုဖြစ်ပွားခဲ့ပြီး မူးယစ်ဆန့်ကျင်ရေးအဖွဲ့ဝင်တဦး ပျောက်ဆုံးနေပါတယ်။ ဖြစ်စဉ်မှာ နွဲပတ်ကျေးရွာနေ ဦးခင်မောင်သန်းဆိုသူက ဟဲဖက်ကျေးရွာ ရွှေပွင့်ဖြူအောင်စံကုမ္ပဏီဘက်မှ တယောက်ထဲဆိုင်ကယ်စီးလာစဉ် လမ်းပေါ်မှာ သွေးအိုင်နဲ့ ဆိုင်ကယ်တစီးလဲနေတာ တွေ့ရှိခဲ့ပြီး ဆိုင်ကယ်လဲတယ်အထင်နဲ့ ကူညီဖို့လုပ်နေတုန်း ချောင်းကြီးချောင်းဘက်က သေနတ်သံတချက်ကြားရပြီး ပစ္စတိုသေနတ် ကိုယ်စီကိုင်ထားတဲ့ အသက် ၂၀ ခန့်အရွယ် လူငယ် ၂ ဦး ထွက်လာကာ သေနတ်နဲ့ချိန်ပြီး ခင်ဗျားဘယ်သူ့မှမပြောနဲ့လို့ ပြောဆိုကာ ထွက်သွားခဲ့တာပါ။ ဒီဖြစ်စဉ်နဲ့ပတ်သက်ပြီး အနီးဆုံး မိုင်းကိုင်းနယ်မြေစခန်းကို သွားရောက်အကြောင်းကြားရာ စခန်းမှူး ရဲအုပ်မျိုးမင်းညွန့်နဲ့အဖွဲ့က သွားရောက်စစ်ဆေးခဲ့ပြီး အခင်းဖြစ်ပွားရာနေရာမှာ သွေးအိုင်၊ RAI 08 45 AUTO စာတန်းပါ ကျည်ခွံတစ်ခု၊ နီနက်ကြား ဆိုင်ကယ်တစီးတို့ကို တွေ့ရှိခဲ့ပါတယ်။ ပတ်ဝန်းကျင်ကို ဆက်လက်ရှာဖွေရာ လမ်းဘေးမှာ ဒရွတ်ဆွဲထားတဲ့ ရွတ်ကြောင်းတခုတွေ့ရပြီး စွပ်ကြောင်းအတိုင်းလိုက်လံကြည့်ရှုရာ ဖော့ဖိနပ် ၁ ရံ၊ အရှည် ၁၂ လက်မခန့် ပြောက်ကြားဓား အိမ် ၁ ခု၊ ဂျင်းဦးထုပ် ၁ လုံး၊ ခေါင်းကမ်းစပ်အနီးက PMC 9MM LUGER ကျည်ခွံ ၁ခုတို့ကို ထပ်မံ တွေ့ရှိခဲ့ပါတယ်။ ဒီကိစ္စနဲ့ပတ်သက်ပြီး ဆိုင်ကယ်ပိုင်ရှင်ကို စုံစမ်းရာ ဟုမ္မလင်းမြို့နယ်၊ လက်ပံသာကျေးရွာက မူးယစ်ဆန့်ကျင်ရေးအဖွဲ့ဝင် အသက် ၄၆ နှစ်အရွယ် ကျော်မိုး (ခ) အောင်ကျော်မိုးဖြစ်တယ်လို့ သိရပါတယ်။ ပျောက်ဆုံးနေတဲ့ ကျော်မိုး(ခ)အောင်ကျော်မိုးကို လိုက်လံရှာဖွေနေကြပြီး ဥပဒေအရ အရေးယူနိုင်ဖို့ ဆောင်ရွက်နေတယ်လို့ မိုင်းကိုင်းနယ်မြေရဲစခန်း ကနဦးသတင်းတွေအရ သိရပါတယ်။ ဒီကိစ္စနဲ့ပတ်သက်ပြီး မိုင်းကိုင်းစခန်းမှုး ရဲအုပ်မျိုးမင်းညွန့်နှင့် ဟုမ္မလင်းမြို့နယ်ရဲတပ်ဖွဲ့ကို ဒီဗွီဘီက ဆက်သွယ်မေးမြန်းခဲ့ပေမယ့် အသေးစိတ်ပြန်လည်ဖြေကြားတာ မရှိခဲ့ပါဘူး။
4 years Ago
Up