မူဆယ် ၁၀၅ မိုင်

December 6, 2021

မူဆယ် ၁၀၅ မိုင်မှ တရုတ်ဘက်ပို့မည့် ဖရဲသီးများ ပျက်စီး

မူဆယ် ၁၀၅ မိုင် ကုန်သွယ်ရေးဇုန်ကနေတဆင့် တရုတ်ဘက်တင်ပို့မယ့် ဖရဲသီးအများစု အခွန်စနစ်ကြောင့် စောင့်ဆိုင်းနေရတဲ့အတွက် ပျက်စီးကုန်ပြီလို့ ကုန်သည်၊ ကားသမားနဲ့ ပွဲရုံတွေဆီက သိရပါတယ်။

ဖရဲတင် ယာဉ်မောင်းတဦးက "ကျနော်ကတော့ ရောက်နေတာ ၁ ရက်နေ့ကစ ရောက်တယ်။ မနေ့က အသစ်ဝင်လာတာ ၈ စီးလောက်ရှိမယ်ဗျ။ ရှမ်းပြည် ဖရဲတွေ ၈၀ ရာခိုင်နှုန်းပါ။ ကျနော်တို့ အသုတ်မှာက ဖရဲသီးကွင်းထဲကို ၃၇ စီး၊ အဲဒီ ၃၇ စီးမှာမှ ကောင်းတဲ့ဟာက ၁ စီး ၂ စီးပဲ ရှိတော့တယ်။ ကျန်တဲ့ဟာက အကုန်လုံး အရည်တွေ ထွက်ကုန်ပြီ" လို့ ပြောပါတယ်။

လက်ရှိ ၁၀၅ မိုင် သစ်သီးကုန်စည်ဒိုင်မျက်နှာချင်းဆိုင်ကွင်းထဲ ၃၇ စီး၊ ၁၀၅ မိုင် ဖရဲရောင်းကွင်းမှာ အစီးရေ ၃၀ ဝန်းကျင်၊ လွယ်အင်ကားချိန်းကွင်းမှာ အစီးရေ ၅၀ ရှိနေပြီး တရုတ်ပြည်ထဲ ဝင်သွားတဲ့ ဖရဲသီးကား ၂၁ စီးကို ချိန်းသွားတဲ့ ခေါက်တိုကားတွေက အရောင်းဈေးကွက်ထဲ မရောက်သေးဘူးလို့ ဆိုပါတယ်။

အောက်ဘက်က တက်လာတဲ့ ဖရဲကားတွေကို မန္တလေးအထွက် ၁၆ မိုက်ဂိတ်မှာ နိုဝင်ဘာ ၃၀ ရက်နေ့ကစ တားထားပေမယ့် အခုတော့ ပြန်တက်ခိုင်းပြီ ဖြစ်ကြောင်း၊ တချို့ကားတွေက ၁၆ မိုင်နားမှာပဲ ဖရဲသီးတွေ ရောင်းနေကြတာရှိပြီး ဒီဇင်ဘာ ၅ ရက်နေ့က မူဆယ်လေယာဉ်ကွင်းနားမှာ ၁ လုံး ၃၀၀၀ ကျပ်၊ ၂ လုံး ၅၀၀၀ ကျပ်နဲ့ ရောင်းနေကြတယ်လို့ ဖရဲကားသမား နောက် ၁ ဦးက ပြောပါတယ်။ 

"ခေါက်တိုက ၅ စီးတည်း ရှိတယ်။ နောက်ထပ် သူတို့ခေါ်ထားတဲ့ ကားတွေတောင် အကုန် ပြန်လွှတ်နေပြီ။ အဲဒီ အလုပ်လုပ်တဲ့ ၅ လုံးကလည်း ပဲတီစိမ်းတို့၊ ဆန်တို့ဘက်ပဲ ဦးစားပေးနေတာ။" 

ပြည်တွင်းနဲ့ ပြည်ပ ဈေးကွက်က တော်တော်လေးကွာဟနေကြောင်း စိုက်ခင်းပိုင်ရှင် ၁ ဦးက ပြောပါတယ်။

"ပြည်တွင်း ၁၆၅၀၀ ကီလိုဂရမ်ကို ခြံထဲရောင်းတာ သိန်း ၂၀ ပဲရတော့ ၁ ကီလိုဂရမ်ကို ၉ ယွမ် ဆိုလို့ ကား ၁ စီးကို ၁၆၅၀၀ ကီလိုဂရမ် တင်ပြီး ၄ စီး သီပေါကနေ တက်လာတာ။  အပယ်တွေက ဘယ်လိုထွက်မှာလဲ မသိသေးတော့ ပြောရနည်းနည်းခက်မယ်ဗျ။"

ပိတ်မိနေတာကြောင့် ဝင်လို့ မရသေးကြောင်း ပြောပေမယ့် နေ့တိုင်ကားအဝင်ရှိနေပြီး ရှမ်းပြည်ကနေ ဝင်လာတာပိုများတယ်လို့ စိုင်းမြင့်ဗိုလ် သစ်သီးပွဲရုံမှ မနန်းခမ်းခင်က ပြောပါတယ်။ 

"အသီး အရည်အသွေးအများကြီးကျသွားတယ်။ ပျက်စီးသွားတယ်။ မြန်မာပြည်ဘက်ကလည်း အသီးက ထွက်နေပြီ။" 

တရုတ်ဘက်ကို ကွန်တိန်နာနဲ့ မဟုတ်တော့ဘဲ ရိုးရိုးကားနဲ့ တင်ပို့ရပြီး တချိန်လုံး ပြောင်းလဲနေတဲ့ တရုတ်ဘက်က ပေါ်လစီကို လိုက်လုပ်နေရတာကြောင့် အချိန်နဲ့ တပြေးညီ ဖြစ်မလာဘူးလို့ ဆိုပါတယ်။

တောင်သူတွေအနေနဲ့ လိုင်းပေါ်မှာတွေ့သမျှ သတင်းတွေ မယုံကြည်ဖို့၊ ပွဲရုံ ပွဲစားတွေနဲ့ အဆက် အသွယ်လုပ်ပြီးမှ တက်လာသင့်ကြောင်း တရုတ်ဘက်မှာ ၁ ကီလိုကို ၉ ယွမ်ရတယ်ဆိုတဲ့ သတင်း ထွက်ပေါ်နေပေမယ့် တရုတ် ပေါက်ဈေး မသိရသေးဘူးလို့ မနန်းခမ်းခင်က ပြောပါတယ်။

တရုတ်ဘက်က ပြောင်းလဲကောက်ခံလာတဲ့ အခွန်စနစ်ကြောင့် စောင့်ဆိုင်းနေရပြီး အချိန်ကြာနိုင်တဲ့အတွက် နောက်ထပ် မဆင်းလာ‌ကြဖို့ ခွာညိုသစ်သီးပွဲရုံကလည်း အသိပေးကြေညာထားပါတယ်။

ကိုဗစ် အကြောင်းပြချက်နဲ့ နှစ်နိုင်ငံ သစ်သီးနဲ့ ပင်လယ်ထွက်ကုန် အဓိကကုန်သွယ်ရာ ကျင်းစန်း‌ဂိတ်ကို ဆေးဝါးပစ္စည်းကလွဲလို့ ဇူလိုင် လ ၈ ရက်နေ့ကစ ပိတ်ခဲ့ကာ နိုဝက်ဘာ ၂၆ ရက်နေ့က ပြန်လည်ဖွင့်လှစ်ခဲ့တာပါ။

Pra Jaw

3 days Ago

September 25, 2021

၁၀၅ မိုင်ရှိ Mytel တာဝါတိုင်အနီး အမျိုးသား ၁ ဦး မိုင်းထိ

မူဆယ်မြို့နယ်၊ မိုင်းယု ၁၀၅ မိုင် အုပ်စု၊ အောက်နမ့်ဟွယ်ရွာ ဘုန်းကြီး ကျောင်းအနီးက Mytel တာဝါတိုင်နားမှာ အမျိုးသားတစ်ဦး စက်တင်ဘာလ ၂၄ ရက်နေ့ နေ့လယ်ပိုင်းက မိုင်းထိတာကြောင့် ဒဏ်ရာရရှိသွားတယ်လို့ ဒေသခံတွေနဲ့ လူမှုကူညီရေးအသင်းဆီက သိရပါတယ်။

ဒေသခံတစ်ဦးက “Mytel တိုင်နားမှာ မိုင်းနင်းမိတာ ခြေထောက်တော့ ထိသွားတယ်။ အဲဒါ ကွတ်ခိုင်စစ်ဆေးရုံကို ပါရမီက လိုက်ပို့တယ်” လို့ ပြောပါတယ်။

မိုင်းနင်းမိသူမှာ အသက် ၂၉ နှစ်ရှိ ကိုအောင်သူ ဆိုသူဖြစ်ပြီး နမ့်ဟွယ်‌က မဟုတ်ဘူးလို့ ကူညီပေးသူတဦးက ပြောပါတယ်။

“သူက ဖုန်းကုမ္ပဏီဝန်ထမ်းတွေ။ မန္တလေး တမ္ပဝတီဘက်က။ သူ့နေရပ်ပေါ့နော်။ လာပြင်ရင်း ဖြစ်သွားတဲ့ ပုံစံမျိုးပဲ။ သူတစ်ယောက်တည်းတော့ မဟုတ်ဘူး။ သူတို့ ဝန်ထမ်းတွေပါတယ်လေ။ လေး၊ ငါး၊ ခြောက်ယောက်လောက်ပါမယ်ထင်တယ်။ ထိတာက သူပဲ။ ညာဘက်ခြေထောက် ထိသွားတာ။ ခြေဖျား ခြေဖမိုးပေါ့ ပြောမယ်ဆိုရင်။ အဲဒါပြတ်သွားတာ။”

ဒဏ်ရာပြင်းထန်တာကြောင့် ကွတ်ခိုင်ဆေးရုံကနေ စစ်ဆေးရုံကို ပိုဆောင်လိုက်ပြီး အသေးစိတ်ကိုတော့ မသိရဘူးလို့ ဆိုပါတယ်။

မိုင်းထိ ပေါက်ကွဲမှုဖြစ်ပြီးနောက် နမ့်ဟွယ်ကျေးရွာအနီးအနားမှာ စစ်ကောင်စီတပ်တွေ လုံခြုံရေး တိုးမြှင့် ကင်းစောင့်ချထားတာကြောင့် ဒေသခံတွေ တောင်ယာဘက် အလုပ်မသွားရဲကြဘူးလို့ သိရပါတယ်။

မြန်မာနိုင်ငံတဝန်း စစ်ကောင်စီပိုင် မိုင်တယ်တာဝန်တိုင်တွေ ဖျက်ဆီးခံနေရတာ ၈၀ ကျော်ရှိလာပြီ ဖြစ်သလို  စစ်ကောင်စီကလည်း ဖုန်းတာဝါတိုင်အနီးတွေ ကင်းစောင့်ပြီး မိုင်းချတာတွေ ပြုလုပ်နေတယ်လို့ သိရပါတယ်။ 

Photo - ပါရမီလူမှုကူညီရေးအသင်း၊ ၁၀၅ မိုင်

2 months Ago
More News
Up