မုံရွာမြို့

April 27, 2022

မုံရွာမြို့ စစ်ဆေးရေးဂိတ် တိုက်ခိုက်ခံရပြီး စစ်သားနှင့် ရဲ ၄ ဦး သေဆုံး

စစ်ကိုင်းတိုင်း၊ မုံရွာမြို့က စစ်ဆေးရေးဂိတ်တခုကို ပြည်သူ့ကာကွယ်ရေး ညီနောင်မဟာမိတ် ပူးပေါင်းတပ်ဖွဲ့ ၃ ဖွဲ့က တိုက်ခိုက်ခဲ့ပြီး စစ်ကောင်စီ စစ်သား ၃ ယောက်နဲ့ ရဲတပ်သား ၁ ယောက်၊ စုစုပေါင်း ၄ ယောက် သေဆုံးခဲ့တယ်လို့ မုံရွာ ပြည်သူ့ကာကွယ်ရေးတပ်ဖွဲ့ (MPDF) က ထုတ်ပြန်ပါတယ်။

ဧပြီ ၂၇ ရက် ဒီမနက်ပိုင်းမှာ မုံရွာမြို့၊ ဘိုးဘွားရိပ်သာ အဝိုင်းပတ်အနီးက စစ်ဆေးရေးဂိတ်ကို မုံရွာပြည်သူ့ကာကွယ်ရေးတပ်ဖွဲ့ (MPDF)၊ Monywa The Boy အထူးကွန်မန်ဒိုအဖွဲ့ (မုံရွာခရိုင်တပ်ရင်း ၂) နဲ့ Special Force 11 အဖွဲ့တွေက လက်နက်ငယ်တွေနဲ့ အနီးကပ် ဝင်ရောက်တိုက်ခိုက်ခဲ့ကြတာဖြစ်ပြီး စစ်ကောင်စီဘက်က ပြင်းထန် ထိခိုက်ဒဏ်ရာ ရရှိသွားသူ ၃ ယောက် ရှိခဲ့တယ်လို့ ဆိုပါတယ်။

နိုင်ငံတဝန်းမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ၊ ပြည်သူ့ခုခံစစ်ကို ဆင်နွှဲနေကြတာဖြစ်ပြီး မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

လူထုသပိတ်တိုက်ပွဲတွေအနေနဲ့ မနေ့က တရက်တည်းမှာ ကချင်ပြည်နယ်၊ ရန်ကုန်တိုင်းနဲ့ မကွေးတိုင်းတို့မှာ ၁ ကြိမ်စီ၊ တနင်္သာရီတိုင်းမှာ ၃ ကြိမ်၊ စစ်ကိုင်းတိုင်းမှာ ၁၁ ကြိမ်နဲ့ အများဆုံး ဖြစ်ပွားခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ထားပါတယ်။

ဒါ့အပြင် မြန်မာပြည်တွင်း ပြည်သူ့ခုခံတော်လှန်စစ် အရှိန်မြှင့်ဖြစ်ပွားနေပြီး ပြီးခဲ့တဲ့ ဖေဖော်ဝါရီ ၇ ရက်ကနေ မတ် ၆ ရက်အထိ ၁ လအတွင်း စစ်ကောင်စီတပ်ဖွဲ့ဝင် ၂,၀၉၅ ယောက် သေဆုံးခဲ့တယ်လို့လည်း NUG က နောက်ဆုံး သတင်းထုတ်ပြန်ထားပါတယ်။

1 month Ago

April 15, 2022

မုံရွာမြို့ တော်လှန်သင်္ကြန် ရာနှုန်းပြည့်အောင်မြင်ဟု သပိတ်ဦးဆောင်ကော်မတီပြော

စစ်ကိုင်းတိုင်းဒေသကြီးအတွင်း မုံရွာမြို့အပါအဝင် မြို့ကြီးတွေမှာ စစ်ကောင်စီက သင်္ကြန်ပွဲတော် စည်ကားသိုက်မြိုက်စွာကျင်းပဖို့ စီစဉ်ခဲ့ပေမယ့် သင်္ကြန်ရက် ၃ ရက်ကြာလာတဲ့အထိ ပြည်သူတွေက မပူးပေါင်းဘဲ တော်လှန်သင်္ကြန်ကို ဆင်နွှဲနေကြပါတယ်။

သင်္ကြန်မတိုင်ခင်ကတည်းက ဒေသတွင်း PDF တွေက စစ်ကောင်စီမဏ္ဍပ်တွေနားကို မသွားဖို့ ပြည်သူတွေကို တိုက်တွန်းခဲ့တဲ့အတိုင်း ပြည်သူတွေက PDF တွေဘက်က ရပ်တည်နေကြတဲ့ အကြောင်းနဲ့ မုံရွာမြို့တော်လှန်သင်္ကြန်ကတော့ ၁၀၀ ရာခိုင်နှုန်းအောင်မြင်နေပြီး စစ်ကိုင်းတိုင်းထဲက မြို့တွေအားလုံးမှာလည်း တော်လှန်သင်္ကြန်အောင်မြင်နေတယ်လို့ မုံရွာသပိတ်ဦးဆောင်ကော်မတီဝင်တစ်ယောက်က ပြောပါတယ်။

မုံရွာသပိတ်ဦးဆောင်ကော်မတီ ကိုဝင်းမိုးဇော်က "မုံရွာမြို့က တော်လှန်သင်္ကြန်က ၁၀၀ ရာခိုင်နှုန်းအောင်မြင်တယ်။ Silence Strike လိုမျိုးပဲ တိတ်ဆိတ်ငြိမ်သက်ခြင်းပုံစံ ရောက်နေတယ်။ စစ်ကောင်စီကဖွင့်တဲ့မဏ္ဍပ်တွေမှာ သူတို့ဘောမတစ်သိုက်ပဲ ပျော်ရွှင်နေပြီးတော့ ကျနော်တို့ ပြည်သူတွေ ဘယ်သူမှမသွားဘူး။ သူတို့ကတော့ လုံခြုံရေး အပြည့်အဝယူထားတယ်။ မုံရွာသင်္ကြန်က အရင်တုန်းက ချင်းတွင်းသင်္ကြန်တွေဘာတွေနဲ့ တော်တော် စည်စည်ကားကားရှိခဲ့တဲ့မြို့။ အခုကတော့ ဒေသတွင်း PDF အဖွဲ့တွေက ပြောထားတဲ့အတိုင်းပဲ ပြည်သူတွေက ပူးပေါင်းပါဝင်ကြတယ်။ ညီညွတ်ကြတယ်။ ပြည်သူက သူတို့တတ်နိုင်တဲ့ဘက်က ပါဝင်ပေးကြတယ်။ သူတို့ ငွေအားမတတ်နိုင်လို့ မလှူနိုင်တာပဲရှိမယ်။ စိတ်ဓာတ်ကတော့ တော်လှန်ရေးမှာပဲ နှစ်မြှုပ်ပြီးသားပဲ။ PDF တွေကပဲဖြစ်ဖြစ် သပိတ်ကော်မတီတွေကပဲဖြစ်ဖြစ် တစ်ခုခုပြောလိုက်တယ်၊ လမ်းပိုင်းတွေပိတ်လိုက်တယ်ဆိုရင်တောင် ဘယ်သူမှမသွားကြတော့ဘူး။ ပူးပေါင်းပါဝင်ပေးတယ်။"လို့ပြောပါတယ်။

စစ်ကိုင်းတိုင်းမှာ တော်လှန်သင်္ကြန်အောင်မြင်နေသလို မန္တလေးတိုင်းမှာလည်း အောင်မြင်တယ်လို့ မြင်းခြံ Zero ပြောက်ကျားအဖွဲ့ခေါင်းဆောင်က ပြောပါတယ်။ စစ်ကောင်စီက သင်္ကြန်ကိုအသုံးချပြီး ပြည်သူတွေကို အာရုံပြောင်းဖို့ကြိုးစားနေပေမဲ့ ပြည်သူတွေကတော့ တော်လှန်ရေးမှာပဲစိတ်စွဲနေတယ်လို့ မြင်းခြံ Zero ပြောက်ကျားတပ်ဖွဲ့ မှ ဗိုလ် Zero က ပြောပါတယ်။

"ပြည်သူတွေရဲ့ တော်လှန်သင်္ကြန်မှာ ပူးပေါင်းပါဝင်မှုကတော့ မန္တလေးရော စစ်ကိုင်းရော အားကောင်းနေပါတယ်။ ပြည်သူတွေ ကျနော်တို့ ဘက်မှာ ပါပါတယ်ဗျ။"

သင်္ကြန်မဏ္ဍပ်တွေမှာ စစ်ကောင်စီက လုံခြုံရေးအပြည့်ယူထားပြီး တစ်ဖက်နဲ့ တစ်ဖက်မျက်ခြေမပြတ်စောင့်ကြည့်နေတဲ့  အခြေအနေမျိုးဖြစ်ပြီး ပစ်ခတ်မှုတွေတော့ မရှိသေးဘူးလို့ ပြောပါတယ်။ 

ဧပြီ ၁၅ ရက် ဒီကနေ့ သင်္ကြန်အကြတ်နေ့ဟာ မုံရွာသပိတ်ခေါင်းဆောင် ကိုဝေမိုးနိုင် မတရားဖမ်းဆီးခံရတဲ့ ၁ နှစ်ပြည့် အထိမ်းအမှတ်ဖြစ်တာမို့  ယင်းမာပင်နဲ့ ဆားလင်းကြီးဒေသက ကျေးရွာပေါင်းစုံပြည်သူတွေ စုပေါင်းပြီး  စစ်အာဏာရှင်ကို ဆန့်ကျင်ဆန္ဒပြခဲ့ကြပါတယ်။

ဒါ့အပြင် ကနီမြို့နယ် မုံရွာ - ယာကြီး - ကလေးဝလမ်း လယ်ရှည်ဇရပ်တိုက်ပွဲမှာ ကျဆုံးခဲ့တဲ့ PDF ရဲဘော် ၅ ယောက်အတွက် ၁ နှစ်ပြည့် အထိမ်းအမှတ် ကျဆုံးသွားသော အာဇာနည်သူရဲကောင်းတွေကို အလေးပြုတာနဲ့  လွမ်းသူ့ပန်းခွေချတာတွေ ပြုလုပ်ခဲ့ပါတယ်။

စစ်ကောင်စီက အကြမ်းဖက်တိုက်ခိုက်ခဲ့တာကြောင့် စစ်ကိုင်းတိုင်းထဲမှာ အိမ်ခြေ ၄၀၀၀ နီးပါး  မီးလောင်ပျက်စီးခဲ့ပြီး ပြည်သူ ၃ သိန်းကျော်ဟာ ဦးတည်ရာမဲ့ ထွက်ပြေးတိမ်းရှောင်နေရတာပါ။

ဒါ့အပြင် နေအိမ်တွေပျက်စီးဆုံးရှုံးတာ၊ စိုက်ပျိုးရေးနဲ့စီးပွားရေးလုပ်ငန်း တွေမလည်ပတ်နိုင်တော့တာ၊ မိသားစုဝင်တွေသတ်ဖြတ်ဖမ်းဆီးထောင်ချခံရတာတွေရှိနေပေမဲ့ စစ်ကိုင်းတိုင်းထဲက ပြည်သူတွေဟာ စစ်အာဏာသိမ်းမှုကို အချိန်တစ်နှစ်ကျော်ကြာတဲ့အထိ နည်းမျိုးစုံနဲ့ ဆန့်ကျင်နေတာ ဖြစ်ပါတယ်။

1 month Ago
More News
Up