မုံရွာ

December 6, 2022

မုံရွာတွင် စစ်ကောင်စီတပ် စစ်ဆေးရေးဂိတ် တိုက်ခိုက်ခံရ

စစ်ကိုင်းတိုင်း၊ မုံရွာမြို့‌၊ နတ်လူထိပ်ပန်ရပ်ကွက်အတွင်း မုံရွာ-မန္တလေးအထွက် စစ်ကောင်စီ စစ်ဆေးရေးဂိတ်ကို မနေ့ ဒီဇင်ဘာ ၅ ရက် မနက် ၁၀ နာရီမှာ ပြည်သူ့ကာကွယ်ရေးအဖွဲ့တွေက ဝင်ရောက်ပစ်ခတ်ပြီး နှစ်ဖက်တိုက်ပွဲ ဖြစ်ပွားခဲ့တယ်လို့ ဒေသခံတွေဆီကနေ သိရပါတယ်။

အဲဒီစစ်ဆေးရေးဂိတ်ဟာ မုံရွာ-မန္တလေး ခရီးသည်ကားတွေနဲ့ ချောင်းဦးမြို့ဘက်လာတဲ့ ဈေးသည်တွေဆီကပါ ဆက်ကြေးတောင်းတဲ့ စစ်ဆေးရေးဂိတ် ဖြစ်တယ်လို့လည်း ဆိုပါတယ်။

PDF အဖွဲ့ဝင်တဦးက “တိုက်တာက အလစ်ဝင်တိုက်ခဲ့တာ။ ဂိတ်အပြင်ထွက်ပြီး ဆက်ကြေးကောက်နေတဲ့ စခ ၂ ဦး၊ ဘန်ကာသဲအိတ်ထပ်ကာ ဝပ်ကျင်းထဲက ၅ ဦး၊ ဝရန်တာပေါ်က ၁ ဦး၊ စုပေါင်း ၈ ဦး သေဆုံးတယ်လို့ သတင်းပြန်ကြားထားတယ်။ PDF ဘက်ကလည်း စစ်ကောင်စီနဲ့ အပြန်အလှန် ပစ်ခတ်မှုကြောင့် ပူးပေါင်းတပ်ဖွဲ့ ရဲဘော်တဦး ကျဆုံးပြီး တဦး ဒဏ်ရာရရှိတယ်ဗျ။ စစ်ကောင်စီဘက်က ရမ်းသန်းပစ်လို့ ရပ်ကွက်ထဲက ကလေးငယ် ၃ ဦးလည်း ကျည်မှန်တာတွေ ရှိတယ်” လို့ ပြောပါတယ်။

စစ်ကောင်စီ အကျအဆုံးနဲ့ပတ်သက်ပြီး စစ်ကောင်စီဘက်က သတင်းထုတ်ပြန်မှုမရှိသလို ဒီဗွီဘီအနေနဲ့လည်း သီးခြားအတည်ပြုနိုင်ခြင်း မရှိသေးပါဘူး။

ဒီတိုက်ခိုက်မှုကို Black Dragon Special Task Force-Monywa၊ Golden Eagle Force-Monywa၊ Monywa Ranger Army၊ မိုင်းမင်းသား မြေအောက်ပြောက်ကျားတပ်ဖွဲ့နဲ့ သပြေညို ပြောက်ကျးတပ်ဖွဲ့တို့ ပူးပေါင်းလုပ်ဆောင်ခဲ့တာလို့လည်း သိရပါတယ်။

1 day Ago

မုံရွာတွင် စစ်တပ်ပစ်ခတ်မှုကြောင့် ကလေး ၁ ဦးသေဆုံး၊ ကလေးမြို့ပြပြောက်ကျားအဖွဲ့ဝင် ၂ ဦး ဖမ်းဆီးသတ်ဖြတ်ခံရ

စစ်ကိုင်းတိုင်း​ မုံရွာမြို့၊ မုံရွာ-မန္တလေးလမ်းပိုင်းမှာ ဒီဇင်ဘာ ၅ ရက် မနက်ပိုင်းက ရေဦးဆန်ဆိုင်ဂိတ် တိုက်ခိုက်ခံရပြီးနောက် စစ်ကောင်စီဘက်က ပြန်လည်ပစ်ခတ်လို့ ကလေးငယ် ၁ ယောက် သေဆုံးပြီး ၁ ယောက် ဒဏ်ရာရတယ်လို့ မြို့ခံတဦးက ပြောပါတယ်။ ။

"မနက် ၁၀ နာရီခွဲလောက်က စစ်သားတွေနဲ့ ရဲတွေ အယောက် ၂၀ ကျော်လောက်ရှိတဲ့ ဂိတ်ကို လက်နက်ကိုင်အဖွဲ့တခုက ပစ်ခတ်တိုက်ခိုက်ခဲ့တာ။" 

ဂိတ်ကို ပစ်ခတ်တိုက်ခိုက်ခံရလို့ စစ်တပ်က ပြန်လည်ပစ်ခတ်ရာ ​ကလေးငယ် ၁ ယောက် သေဆုံးကာ ၁ ယောက် ဒဏ်ရာရသွားကာ အနီးနား ရပ်ကွက်ထဲက အမျိုးသား ၁ ယောက်ကို လည်း ဖမ်းသွားတယ်လို့ မြို့ခံတွေက ပြောပါတယ်။

ပစ်ခတ်မှုဖြစ်ပြီးနောက် စစ်ကားတွေရောက်လာပြီး လမ်းပိတ်စစ်ဆေးကာ အနားရှိ ရပ်ကွက် အတွင်း ဝင်ရောက်ဆဲဆိုပြီး သေနတ်ပစ်ဖောက်သွားတယ်လို့ မျက်မြင်အမျိုးသား တဦးက  ပြောပါတယ်။

ပစ်ခတ်မှုအတွင်း နှစ်ဖက်ထိခိုက် သေဆုံးမှုအခြေအနေကို မသိရသေးသလို ဘယ်အဖွဲ့က လာရောက် ပစ်ခတ်တိုက်ခိုက်တယ်ဆိုတာ မထုတ်ပြန်သေးပါဘူး။

ကလေးမြို့၊ ဒိုဝိုင်းချောင်းကျေးရွာအနီးမှာလည်း (Operation Mo Mo) ကလေးမြို့ပြ ပြောက်ကျား အဖွဲ့ဝင် ၂  ယောက်ကို စစ်တပ်က ဒီဇင်ဘာ ၅ ရက်မှာ ဖမ်းဆီးပစ်သတ်ခဲ့တယ်လို့ ဒေသခံတွေက ပြောပါတယ်။

ပြောက်ကျား အဖွဲ့ဝင် ၂  ယောက်ကို 3S ဆီဆိုင်နဲ့ ဒိုးဝိုင်းချောင်းအဝင်ဆိုင်းဘုတ်ကြားမှာ စစ်တပ်က ဖမ်းဆီးပြီး ပစ်သတ်ခဲ့တာဖြစ်နိုင်တယ်လို့ ‌‌ဒိုးဝိုင်းချောင်းရွာခံတဦးက‌ ပြောပါတယ်။

"သူတို့နှစ်ယောက်ကို ဖမ်းသွားတာ မြင်တယ်။ နှစ်‌ယောက်လုံးကို လက်ပြန်ကြိုးတုတ်ပြီး ခြောက်ထောက်နဲ့ ကန်နေကြတာ။ ဘာသေနတ်သံမှ မကြားရဘူး။"

စစ်‌တပ်သတင်းတွေကို ရေသားတဲ့ တယ်လီဂရမ်ချန်နယ်မှာ PDF  အဖွဲ့ဝင် ၂ ယောက်ကို ဆိုင်ကယ်ရပ်တန့်ခိုင်းရာမှာ ရပ်တန့်ခြင်း မရှိဘဲ မောင်းနှင်ထွက်ပြေးလို့ ပစ်ခတ်ဖမ်းဆီးခဲ့ပြီး  ဖြစ်စဉ်အတွင်း ပစ္စတိုသေနတ် ၁ လက်၊ ကျည်အိမ် ၂ ခု၊ PDF  ‌အလောင်း ၂ လောင်းနဲ့ ဆိုင်ကယ် ကို သိမ်းဆည်းရမိခဲ့တယ်လို့ ရေးသားထားပါတယ်။

ကိုခုက်ပီး နဲ့ ကိုငဝိုင်းတို့ ဖမ်းဆီးသတ်ဖြတ်ခံရတာနဲ့ ပတ်သက်ပြီး ဒေသခံတော်လှန်ရေးသမား တွေက ဆိုရှယ်မီဒီယာဖေ့စ်ဘွတ်ခ်အ‌ကောင့်တွေနဲ့ ပေ့ခ်ျတွေမှာ အနက်ရောင် ပရိုဖိုင်းပုံတွေ ပြောင်းလဲထားကြပြီး Operation Mo Mo အဖွဲ့ကို ဒီဗွီဘီက အွန်းလိုင်းကနေရော တယ်လီဖုန်းကပါ ဆက်သွယ်ခဲ့ပေမဲ့ လက်ခံ မဖြေကြားပါဘူး။

1 day Ago

December 1, 2022

မုံရွာနှင့် ဆားလင်းကြီးတွင် စစ်ကောင်စီတပ်ဖွဲ့ဝင် ၂၀ ခန့် သေဆုံး

စစ်ကိုင်းတိုင်း၊ မုံရွာနဲ့ ဆားလင်းကြီးမြို့နယ်ထဲမှာ ပြီးခဲ့တဲ့ ၂ ရက်အတွင်း  ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အကြမ်းဖက်စစ်ကောင်စီတပ်သား ၂၀ လောက် သေဆုံးခဲ့တယ်လို့ Aung San Force - A.S.F က နိုဝင်ဘာ ၃၀ ရက် ညမှာ ထုတ်ပြန်ပါတယ်။

လေယာဉ်ဆီတွေတင်ပြီး ချင်းတွင်းမြစ်ကြောင်းအတိုင်း ဆန်တက်လာတဲ့ မော်တော်တွေကို နိုဝင်ဘာ ၂၈ ရက် မနက် ၁၀ နာရီလောက်က Aung San Force - A.S.F မုံရွာခရိုင် အမှတ်-၅ တပ်ရင်း၊ SRA၊ SGF၊ Spring Dove Force၊ မုံရွာခရိုင် သံမဏိတပ်ရင်းနဲ့ မဟာမိတ် တပ်ဖွဲ့တွေက ရှေ့ထွက်မိုင်းတွေနဲ့ ကြားဖြတ်တိုက်ခိုက်ခဲ့တာပါ။

ညနေ ၃ နာရီလောက်မှာတော့ မုံရွာဘက်ကနေ စစ်ကူအဖြစ် စုန်ဆင်းလာတဲ့ စစ်ကောင်စီတပ်သားတွေပါလာတဲ့ မော်တော်တွေကို ရှေ့ထွက်မိုင်းတွေဆွဲပြီး လက်နက်ငယ်တွေနဲ့ ကြားဖြတ်ပစ်ခတ်တိုက်ခိုက်ခဲ့လို့ မော်တော်တွေပေါ်မှာပါလာတဲ့ စစ်သားတချို့ သေဆုံးခဲ့တယ်လို့ ဆိုပါတယ်။

နိုဝင်ဘာ ၂၉ ရက် နေ့လယ်ပိုင်းမှာလည်း ချင်းတွင်းမြစ်အောက်ဘက်ကနေ အထက်ကို ဆန်တက်လာတဲ့ စစ်ကောင်စီတပ်သားတွေပါတဲ့ မော်တော်တွေကို Aung San Force မုံရွာခရိုင် အမှတ်-၅ တပ်ရင်း၊ SRA၊ SGF နဲ့ မဟာမိတ်တပ်ဖွဲ့တွေက ရှေ့ထွက်မိုင်းတွေ၊ လက်နက်ငယ်တွေနဲ့ ကြားဖြတ်တိုက်ခိုက်ခဲ့ပြီး ပြည်သူ့ကာကွယ်ရေးတပ်တွေကတော့ အထိအခိုက်မရှိဘဲ ပြန်ဆုတ်ခွာနိုင်ခဲ့တယ်လို့ ဆိုပါတယ်။

တိုက်ပွဲကာလမှာ စစ်ကောင်စီတပ်သားတွေရဲ့ အသေအပျောက်ကို မသိခဲ့ရဘဲ အနောက်မြောက်ပိုင်း စစ်ဌာနချုပ်ဆီကို စစ်ကြောင်းတွေပြန်ရောက်မှ မြစ်ထဲမှာ သေဆုံးတဲ့ အရေအတွက်ကို စုံစမ်းသိရတာလို့ အဖွဲ့နဲ့ နီးစပ်သူတယောက်က ပြောပါတယ်။

6 days Ago
More News
Up