မုံရွာတွင် ကလေးငယ်များ ရေဆင်းကူးရာမှ ၂ ဦး ရေနစ်သေဆုံး

A d v e r t i s e m e n t With Us

March 2, 2016

မုံရွာတွင် ကလေးငယ်များ ရေဆင်းကူးရာမှ ၂ ဦး ရေနစ်သေဆုံး

မုံရွာမြို့ ရှေးဟောင်းကန်သာယာကန်အတွင်း မတ်လ ၂ ရက်နေ့ နေ့လယ် ၁၂ နာရီအချိန်က ဆယ်ကျော်သက်အရွယ် ကလေးငယ် ၄ ဦး ရေဆင်းကူးရာမှ ၂ ဦး ရေနစ်သေဆုံးခဲ့ပါတယ်။ ရေနစ်သေဆုံးခဲ့တဲ့ ကလေး ၂ ဦးမှာ သလ္လာအမှတ် (၇) ရပ်ကွက်မှ ဖြစ်ပြီး အဌမတန်းဖြေဆို ထားတဲ့ ကျောင်းသား ဖိုးသင်္ကြန် ၁၅ နှစ်နဲ့ ဟိန်းဇေယျာ ၁၅ နှစ်တို့ ဖြစ်ပါတယ်။ ကလေးငယ် ၄ ဦးဟာ ကန်သာယာကန်အတွင်း ရေသွားကူးရာမှ တစ်ဦးရေနစ်နေစဉ် ဝင်ရောက်ကယ်ဆယ်ရင်း ၂ ဦး ပြိုင်တူနစ်ပြီး သေဆုံးသွားခဲ့တယ်လို့လည်း သိရပါတယ်။ ရေနစ်နေစဉ် ဘေးပတ်ဝန်းကျင်မှာ လူသူမရှိတာကြောင့် ကျန်တဲ့ ကလေး ၂ ဦးက သူတို့အိမ်တွေကို ဖုန်းဆက်အကြောင်းကြားရာကတဆင့် မိဘဆွေမျိုးတွေ၊ ကယ်ဆယ်ရေး၊ မီးသတ်တပ်ဖွဲ့နဲ့ ရေငုပ် ကျွမ်းကျင်သူတွေက ၂ နာရီကြာ ၀ိုင်းဝန်း ဆယ်ယူခဲ့ကြပါတယ်။ ကလေး ၂ ဦး ရေနစ်တဲ့နေရာဟာ ကန်အလယ်လမ်း ဖောက်လုပ်ဖို့ လမ်းမြေရရှိရေးအတွက် ဘတ်ဖိုးနဲ့ တူးယူထားတဲ့ ချိုင့်နေရာဖြစ်ကြောင်း သိရပါတယ်။ ရေနစ် သေဆုံးခဲ့တဲ့ ကလေး ၂ ဦး အလောင်းကို ဒေ၀ဂတိ လူမှုကူညီရေးအသင်း ကားနဲ့ မုံရွာဆေးရုံကြီးသို့ ပို့ဆောင်ခဲ့ပြီး မြို့မရဲစခန်းက သေမှုသေခင်းဖွင့်ကာ စစ်ဆေးနေပါတယ်။ သတင်းဓာတ်ပုံ - ရန်နိုင်စိုး
5 years Ago
Up