မီးလောင်မှု

November 30, 2022

နမ္မတီးမြို့တွင် နေအိမ် ၂ လုံးမီးလောင်ပြီး အမျိုးသမီး ၁ ဦး ဒဏ်ရာရ

ကချင်ပြည်နယ်၊ နမ္မတီးမြို့မှာ နိုဝင်ဘာ ၂၉ ရက် မနက်ပိုင်းက နေအိမ်နှစ်လုံး မီးလောင်ပြီး အမျိုးသမီးတဦး ထိခိုက်ဒဏ်ရာ ရရှိခဲ့ကြောင်း သိရပါတယ်။

မြို့မ ရွှေဝါရပ်ကွက်မှာ လျှပ်စစ်အိုးတည်ထားရာက လျှပ်စစ်ဝါယာရှော့ဖြစ်ပြီး နှစ်ထပ်တိုက် အိမ်နှစ်လုံး မီးလောင်ဆုံးရှုံးခဲ့ကာ အိမ်ရှင်အမျိုးသမီးတဦး ထိခိုက်ဒဏ်ရာ ပြင်းထန်ခဲ့ကြောင်း ဒေသခံတွေဆီက သိရပါတယ်။

မီးငြှိမ်းသတ်ရာမှာ ပါဝင်ခဲ့သူတဦးက “လျှပ်စစ်အိုးအနားမှာ လူမရှိဘဲ တည်ထားခဲ့တာ။ မီးလောင်နေလို့ အခန်းတံခါးဖွင့်လိုက်တာ မီးဟပ်ပြီး အိမ်ရှင်ရဲ့ ကျောကုန်းနဲ့ ဆံပင်မှာ မီးလောင်ဒဏ်ရာ ရသွားတယ်။ နောက်ပြီး အသက် ၇၀ ကျော်လောက်ရှိတဲ့ အဘွားတဦးလည်း မီးခိုးမွှန်ပြီး မူးလဲသွားတယ်။ နေအိမ်နှစ်လုံး မီးလောင်သွားတယ်။ ဒဏ်ရာရရှိသူတွေကို နမ္မတီးမြို့နယ်က လူမှုကူညီရေးကားတွေနဲ့ ဆေးရုံကို ပို့ဆောင်ပေးခဲ့တယ်” လို့ ပြောပါတယ်။

နမ္မတီးမြို့နယ်မှာ ပြီးခဲ့တဲ့ ဖေဖော်ဝါရီလက နေအိမ်တလုံး မီးလောင်မှုဖြစ်ပွားပြီး အသက် ၄ နှစ်အရွယ် ကလေးငယ်တဦး ထိခိုက်ဒဏ်ရာ ရရှိခဲ့ပါသေးတယ်။

13 hours Ago

November 16, 2022

မြန်မာလုပ်သားများ လုပ်ကိုင်နေသည့် ဘန်ဖရီမြို့က ဖိနပ်စက်ရုံ မီးလောင်

ထိုင်းနိုင်ငံအလယ်ပိုင်း၊ စမွတ်ပရကန်ခရိုင်၊ ဘန်ဖရီမြို့က မြန်မာရွှေ့ပြောင်းလုပ်သားတွေ လုပ်ကိုင်နေတဲ့ AeroSoft အမှတ်တံဆိပ် ဖိနပ်စက်ရုံမှာ နိုဝင်ဘာ ၁၅ ရက် မနေ့ညနေက မီးလောင်ခဲ့ပါတယ်။

ဘန်းနားတလတ်လမ်းမကြီးနဲ့ကပ်လျက် ဖိနပ်အရောင်းပြခန်းမှာ ညနေ ၅ နာရီကျော်လောက် မီးစတင်လောင်ကျွမ်းကြောင်း၊ အဲဒီချိန်မှာ အလုပ်ဆင်းချိန်ဖြစ်လို့ အလုပ်သမားတွေ ပြန်ကုန်ပြီး ညအချိန်ပိုလုပ်သူတချို့သာ ကျန်ခဲ့ကာ အလုပ်သမားတွေ ထိခိုက်ဒဏ်ရာရသူမရှိဘူးလို့ စက်ရုံလုပ်သားတွေက သတင်းထောက်ကို ပြောပါတယ်။ 

မီးစလောင်တဲ့တိုက်မှာ ၅ ထပ်ရှိပြီး ပထမထပ်မှာ အရောင်းပြခန်း၊ ဒုတိယထပ်မှာ ရောင်းကုန်ပစ္စည်းနဲ့ တတိယထပ်မှာ ဖိနပ်ချုပ်ရာမှာ အသုံးပြုတဲ့ ရာဘာပြား၊ ဓာတုဆေးရည် အစရှိတဲ့ ကုန်ကြမ်းပစ္စည်းတွေ ရှိတာကြောင့် လောင်စာသဖွယ်ဖြစ်နေပြီး ဘေးနားက တိုက်တန်းလျားတွေဆီပါ အလျင်အမြန်ကူးစက်လောင်ကျွမ်းသွားတာလို့ မီးသတ်သမားတဦးက သတင်းထောက်တွေကို ပြောပါတယ်။ 

မီးသတ်ကား အစီး ၃၀ ကျော်နဲ့ မီးသတ်တပ်ဖွဲ့ဝင်တွေ၊ ကယ်ဆယ်ရေးလုပ်သားတွေ စုစုပေါင်းအင်အား ၁၀၀ ကျော် လာရောက်မီးငြှိမ်းသတ်ခဲ့ပြီး ည ၁၁ နာရီကျော်မှ မီးငြိမ်းသွားကြောင်း၊ မီးလောင်ရတဲ့အကြောင်းနဲ့ ပျက်စီးဆုံးရှုံးမှုပမာဏကိုတော့ စစ်ဆေးနေဆဲပဲလို့ မီးသတ်တာဝန်ရှိသူက ပြောပါတယ်။ 

Posttoday သတင်းမှာတော့ မီးလောင်မှုကြောင့် ကယ်ဆယ်ရေးလုပ်သား ၃ ဦး ဒဏ်ရာရခဲ့ပြီး ၁ ဦး ဒဏ်ရာပြင်းထန်တယ်လို့ ဖော်ပြပါတယ်။ 

အဆိုပါတိုက်ခန်းတွေဟာ အတန်ငယ်ဟောင်းနွမ်းနေပြီဖြစ်လို့ ကွဲအက်ရာနဲ့ ယိုင်နဲ့တာတွေ ရှိနေကြောင်း၊ ဘန်းနား-တလတ် ၄ လမ်းသွား ထိပ်ဖရတ်လမ်းမကြီးကို ၁ လမ်းသာ အရေးပေါ်အတွက် ဖွင့်ထားပြီး ကျန် ၃ လမ်းကို ပိတ်ထားတယ်လို့ သတင်းမှာ ဖော်ပြပါတယ်။ 

ဖိနပ်စက်ရုံက ဓာတုဆေးရည်တွေပါ မီးလောင်တာကြောင့် လေထုညစ်ညမ်းနေပြီး အနီးနားနေ ပြည်သူတွေအနေနဲ့ မလိုအပ်ဘဲ အပြင်မထွက်ဖို့၊ ထွက်ပါကလည်း အမ်-၉၅ အမျိုးအစား နှာခေါင်းစည်းတွေတပ်ထားဖို့၊ မျက်စိနဲ့ အသက်ရှူလမ်းကြောင်းဆိုင်ရာ ပြဿနာရှိက ဆရာဝန်နဲ့ပြသဖို့ လူထုကျန်းမာရေးဌာနက ကြေညာထားပါတယ်။ 

အဆိုပါစက်ရုံမှာ မြန်မာလုပ်သား ၁ ထောင်ကျော် လုပ်ကိုင်နေပြီး မီးလောင်မှုကြောင့် ထိခိုက်ဒဏ်ရာရသူ မရှိပေမဲ့ တနေ့လုပ်တနေ့စား အောက်ခြေလုပ်သားတွေ အလုပ်လက်မဲ့ ဖြစ်သွားမှာစိုးရိမ်ရတယ်လို့ အလုပ်သမားအရေး ဆောင်ရွက်သူတွေက ပြောပါတယ်။

2 weeks Ago
More News
Up