မီးလောင်ကျွမ်းမှု

January 4, 2022

ထန်တလန်မြို့ တိုက်ပွဲအတွင်း နေအိမ်များ ထပ်မံမီးလောင်ကျွမ်း

ချင်းပြည်နယ်၊ ထန်တလန်မြို့  အမှတ် ၁ ရပ်ကွက်မှာ ဇန်နဝါရီ ၃ ရက်နေ့ နေ့လယ် ၂ နာရီခွဲလောက်က စတင်တဲ့ တိုက်ပွဲအတွင်း စစ်ကောင်စီက မီးလောင်ဗုံးတွေနဲ့ ပစ်ခတ်တာကြောင့် နေအိမ်တွေ   မီးလောင်ခဲ့တယ်လို့ ထန်တလန်ဒေသခံတွေဆီက သိရပါတယ်။

ထန်တလန်မြို့ထဲမှာ CDF Thantlang  တပ်ဖွဲ့နဲ့ စစ်ကောင်စီတို့ တိုက်ပွဲဖြစ်ပွားကြရာမှာ စစ်ကောင်စီက မီးလောင်ဗုံး အသုံးပြုပြီး ပစ်ခတ်ခဲ့တာလို့ ဒေသခံတစ်ဦးက ပြောပါတယ်။

“နှစ်ဘက် ပစ်ခတ်ရင်း စကစ ဘက်က မီးလောင်ဗုံးသုံးပြီး ပစ်တယ်။ အိမ်တွေထဲကိုလည်း ပစ်တယ်။ ဘယ်နှလုံး လောင်သွားပြီလဲတော့ ဒီနေ့လောင်တာတော့ မသိရသေးဘူး။ ၃၀ ရက်နေ့က လောင်တာ ၅၅ လုံး ပါသွားတယ်။ ထန်တလန်မှာ အဲဒီနေ့အထိ အားလုံးပေါင်းဆိုရင် ၆၀၀ ကျော် လောက်အထိ မီးလောင်ပြာကျသွားပြီ၊ လူတွေလည်း နေစရာမရှိတော့ဘူး။” 

ဇန်နဝါရီ ၃ ရက်နေ့ မီးလောင်မှုမှာ Johson Memorial Baptist Church ကျောင်းလည်း မီးလောင်တဲ့အထဲ ပါသွားနိုင်ပြီး မီးလောင်ဆုံးရှုံးခဲ့တဲ့ နေအိမ်အရေအတွက်ကိုတော့ အတိအကျ မသိရသေးဘူးလို့ ဆိုပါတယ်။

ဒီဇင်ဘာ ၃၀ ရက်နေ့ မနက် ၁၀ နာရီကလည်း စစ်ကောင်စီတပ်က ဝင်ရောက်မီးရှို့တာကြောင့် ထန်တလန်မြို့က လူနေအိမ် ၅၅ လုံးနဲ့ AG အသင်းတော်ဘုရားကျောင်း မီးလောင်ကျွမ်းသွားခဲ့တယ်လို့ သိရပါတယ်။

စစ်ကောင်စီတပ်ဟာ ထန်တလန်မြို့က နေအိမ်တွေကို ဖျက်ဆီး မီးရှို့မှုတွေ ပြုလုပ်နေတာကြောင့် ဒေသခံအားလုံး မြို့ကိုစွန့်ခွာပြီး ထွက်ပြေးတိမ်းရှောင်နေကြရပါတယ်။

ထန်တလန်မြို့ကို စက်တင်ဘာ ၁၈ ရက်မှာ တစ်ကြိမ်၊ အောက်တိုဘာ ၂၉ နဲ့ ၃၀ မှာ နှစ်ကြိမ်၊  နိုဝင်ဘာ ၆ ရက်နဲ့  ၂၇ ရက်နေ့မှာ နှစ်ကြိမ်၊ ဒီဇင်ဘာ ၃၀ ရက်နေ့မှာ တစ်ကြိမ်၊ ဒီဇင်ဘာ ၄ ရက်နေ့နဲ့ ၈ ရက်နေ့မှာ နှစ်ကြိမ်၊ စစ်ကောင်စီတပ်က မီးရှို့ဖျက်ဆီးခဲ့တယ်လို့ ဒေသတွင်း သတင်းဌာနတွေမှာ ဖော်ပြထားပါတယ်။

2 weeks Ago

February 13, 2020

မင်းဘူး(စကု)မြို့နယ်တွင် တောမီးကတဆင့် မီးကူးဆက်လောင်၊ အိမ်ခြေ ၇၀ ခန့်ဆုံးရှုံး

မင်းဘူး(စကု)မြို့နယ်၊ အိုင်းမကျေးရွာအုပ်စုထဲက အိုးပြင်မဲကျေးရွာမှာ ဖေဖော်ဝါရီ ၁၂ ရက် ညနေ ၅ နာရီလောက်က တောမီးကတဆင့် ကူးစက်ပြီး လူနေအိမ်ခြေ ၇၀ ဝန်းကျင်ခန့် မီးလောင်ကျွမ်းဆုံးရှုံးသွားတယ်လို့ မကွေးတိုင်း မီးသတ်ဦးစီးဌာနက သိရပါတယ်။ တောမီးလော​င်​ကျွမ်းရာကနေ အိုးပြင်မဲကျေးရွာနေ ဦးတင်ရွှေ (အသက် ၅၂) ပိုင် သက်ကယ်မိုး၊ ဝါးထရံကာ နွားတင်းကုတ်ပေါ် မီးပွားကျရောက် ကူးစက်လောင်ကျွမ်းခဲ့တာ ဖြစ်တယ်လို့ တိုင်းမီးသတ်တပ်ဖွဲ့ တိုင်းဦးစီးမှူး ဦးအောင်ဝင်းစိန်က ပြောပါတယ်။ “စလောင်တာက ညနေ ၅ နာရီလောက်ကပါ။ ကျနော်ဦးဆောင်ပြီး တိုင်းမီးသတ်ကားနဲ့ တပ်ဖွဲ့ဝင်တွေ၊ မင်းဘူးခရိုင်မြို့နယ်၊ စကု၊ ရွှေစက်တော်မီးသတ်ကားတွေ တပ်ဖွဲ့ဝင်တွေ ခက်ခက်ခဲခဲ မီးငြှိမ်းသတ်ရပါတယ်။ ရွာက လမ်းမ ၁ ခုပဲ ရှိတယ်။ မီးသတ်ကားတွေ ဝင်ရခက်တယ်။ ရောက်လာတဲ့ မီးသတ်ကားတွေ၊ ဒေသခံပြည်သူတွေ ကြိုးစားပမ်းစား ဝိုင်းငြှိမ်းသတ်ခဲ့ရပါတယ်” မီးလောင်တဲ့နေရာက ဆည်တော်အပန်းဖြေစခန်းနဲ့ နီးတာကြောင့် ဒေသခံတွေရော၊ အပန်းဖြေလာကြတဲ့သူတွေပါ ထိန့်လန့်တကြားဖြစ်ခဲ့ရတယ်လို့ ဆည်တော်ရောက်နေတဲ့ ပွင့်ဖြူမြို့က ဦးကိုကိုဦးက ပြောပါတယ်။ ညနေ ၆ လောက်မှာ မီးထိန်းနိုင်ခဲ့ကာ လက်ရှိအချိန်မှာ မီးကြွင်း၊မီးကျန်တွေကို ဆက်လက် ငြှိမ်းသတ်နေတယ်လို့ မင်းဘူးခရိုင်မီးသတ်တပ်ဖွဲ့ ခရိုင်မီးသတ် ဦးစီးမှူး ဦးထွန်းထွန်းက ဒီဗွီဘီကို ပြောပါတယ်။ အိုးပြင်မဲ‌ကျေးရွာမှာ အိမ်ခြေ ၁၈၀ လောက်ရှိပြီး  မီးလောင်ကျွမ်းမှုကြောင့် ကနဦးပျက်စီးဆုံးရှုံးမှု တန်ဖိုး ကျပ်သိန်း ၁၀၀ ကျော်လောက်ရှိနိုင်​တယ်လို့ ခန့်မှန်းထားပါတယ်။  လူ၊ အိမ်မွေးတိရစ္ဆာန်တွေ ထိခိုက်ဒဏ်ရာရရတာ၊ သေတာပျောက်တာ မရှိပါဘူး။ သတင်း- တင်ရွှေ(မင်းဘူး)၊ ဓါတ်ပုံ - ဦးကျော်စွမ်းရည်
2 years Ago
Up