မီးလောင်

November 28, 2022

ကွတ်ခိုင်တွင် နေအိမ်မီးလောင်ပြီး ကလေး ၁ ဦး သေဆုံး

ရှမ်းပြည်နယ်မြောက်ပိုင်း၊ ကွတ်ခိုင်မြို့၊ ရပ်ကွက် ၇ မှာ နိုဝင်ဘာ ၂၇ ရက် ည ၁၀ နာရီဝန်းကျင်က နေအိမ်မီးလောင်ကျွမ်းပြီး ကလေး ၁ ဦး မီးစွဲလောင်ပြီး သေဆုံးသွားတယ်လို့ ဒေသခံတွေက ပြောပါတယ်။

ဒေသခံတဦးက “ဟုတ်တယ်။ ရပ်ကွက် ၇ ဘက်။ ကလေးတယောက် အသက်ဆုံးရှုံးတဲ့အထိ လောင်သွားတယ်။ ဆေးရုံဘက် သေပြီးသား သယ်လာတာ ထင်တယ်။ ထိုးထိုးထောင်ထောင်နဲ့ မ လာတယ်” လို့ ပြောပါတယ်။

အသက် ၁၂ နှစ်အရွယ် ကလေးတဦး မီးစွဲလောင် သေဆုံးသွားပြီး တခြားထိခိုက်သူ မရှိဘူးလို့ အကူအညီပေးခဲ့တဲ့ လူမှုကူညီရေးအသင်းက တာဝန်ရှိသူတဦးက ပြောပါတယ်။

“သူတို့တအိမ်လုံးတော့ ပြာကျသွားတာပဲ။ ကလေးတယောက် သေသွားတယ်။ ယောက်ျားလေး။ စာကျက်ရင်းနဲ့ ဒီကောင် အိပ်ပျော်သွားတယ် ထင်တယ်။ သူ့ခြင်ထောင်ကနေစပြီး စွဲပြီး လောင်တာလို့ သိရတယ်။”

သေဆုံးတဲ့ကလေးကိုတော့ မနေ့ညက ကောင်းသောရှမာရိ လူမှုကူညီရေးအသင်းနဲ့ ဗြဟ္မစိုရ်နှလုံးသား လူမှုကူညီရေးအသင်းတို့ ပူးပေါင်းကာ ကွတ်ခိုင် ပြည်သူ့ဆေးရုံ ရင်ခွဲရုံကို ကူညီပို့ဆောင်ခဲ့တယ်လို့ ဆိုပါတယ်။  

သေဆုံးတဲ့ကလေးကို ဒီက‌နေ့ တရုတ်ထုံးတမ်းအစဉ်အလာအတိုင်း သင်္ဂြိုဟ်မယ်လို့ ပရဟိတအသင်းတွေဆီက သိရပါတယ်။

ကလေးတွေ ဖယောင်းတိုင် အသုံးပြု စာကျက်နေရရင် မိဘတွေ ဒါမှမဟုတ် မိသားစုဝင် လူကြီးတွေအနေနဲ့ ပိုသတိထား စောင့်ကြည့်နေသင့်တယ်လို့ ဒေသခံ ကျောင်းသားမိခင်တဦးက ပြောပါတယ်။

ပြီးခဲ့တဲ့နှစ် ၂၀၂၁ ဇူလိုင် ၁၆ ရက် မနက်အစောပိုင်း ၁ နာရီလောက်ကလည်း ကိုဗစကပ်ရောဂါကြောင့် အသွားအလာကန့် သတ်ထားတဲ့ကြားက ကွတ်ခိုင်မြို့ ရပ်ကွက် ၅ ထဲရှိ မြို့မဈေးကြီး မီးလောင်မှုဖြစ်ပွားပြီး ဆန်ဆိုင်၊ တိုင်းရင်းဆေးဆိုင်၊ ကုန်စုံဆိုင်၊ ခေါက်ဆွဲဆိုင်၊ အပ်ချုပ်ဆိုင်တွေ စုစုပေါင်း ၃၇ ဆိုင်၊ ဈေးကြီးရဲ့ ၅ ပုံ ၁ ပုံခန့် မီးလောင်ကျွမ်း ပျက်စီးခဲ့ပါသေးတယ်။

2 days Ago

November 22, 2022

တရုတ်နိုင်ငံတွင် စက်ရုံမီးလောင်ပြီး လူ ၃၆ ဦးသေဆုံး

တရုတ်နိုင်ငံ၊ ဟီနန်ပြည်နယ်၊ အန်းညန်မြို့ရှိ စက်ရုံတရုံမှာ မီးလောင်မှုဖြစ်ပွားပြီး လူ ၃၆ ဦး သေဆုံးကာ ၂ ဦး ဒဏ်ရာရရှိခဲ့ကြောင်း နိုင်ငံပိုင်မီဒီယာက နိုဝင်ဘာ ၂၂ ရက်မှာ ကြေညာပါတယ်။

နိုင်ငံပိုင်ရုပ်သံ CCTV သတင်းဌာနမှာတော့ ကောင်းကင်ယံမှာ မည်းမှောင်နေတဲ့ မီးခိုးလုံးကြီးတွေ ထူထပ်နေပြီး မီးသတ်သမားတွေက မီးငြှိမ်းသတ်နေကြတာကို ပြသပါတယ်။

ဒီမီးဟာ နိုဝင်ဘာ ၂၁ ရက် နေ့လယ်ပိုင်းက အန်းညန်မြို့က High-tech ဇုန်လို့ သိကြတဲ့ ဝမ်ဖုန်းခရိုင်ရှိ ခိုင်ရှင်းဒါ ကုန်သွယ်ရေးကုမ္ပဏီမှာ စတင်လောင်ကျွမ်းခဲ့တာပါ။

မီးကို ဒေသစံတော်ချိန် ည ၈ နာရီမှာ ထိန်းချုပ်နိုင်ခဲ့ပြီး ည ၁၁ နာရီမှာ မီးလုံးဝငြိမ်းသွားခဲ့ပါတယ်။

နိုဝင်ဘာ ၂၂ ရက် မနက်ပိုင်းအထိ လူ ၃၆ ဦး သေဆုံးပြီး ၂ ဦးမှာ ဒဏ်ရာအနည်းငယ်နဲ့ ဆေးကုသမှုခံယူဖို့ ဆေးရုံကို ပို့ဆောင်ခဲ့ကြောင်း CCTV က ဖော်ပြပြီး လူ ၂ ဦးလည်း ပျောက်ဆုံးနေတယ်လို့ ဆိုပါတယ်။

1 week Ago

ရွှေတောင်မြို့၌ ကုန်သွယ်ရေး ဂိုဒေါင် မီးလောင်

ပဲခူးတိုင်း၊ ရွှေတောင်မြို့မှာ နိုဝင်ဘာ  ၂၁ ရက် နေ့လယ် ၃ နာရီလောက်က ဓာတ်ဆီဆိုင်အနီး ကုန်သွယ်ရေး ဂိုဒေါင်ကုန်လှောင်ရုံအဟောင်း မီးလောင်လို့ ဒေသခံတွေ အထိတ်တလန့် ဖြစ်ခဲ့ကြပါတယ်။

ရွှေတောင်မြို့၊ ကြာနီကန်ရပ်ကွက်၊ ရန်ကုန်-ပြည်လမ်းဘေးရှိ ဂိုဒေါင်အဟောင်း မီးလောင်မှုကို ရွှေတောင်မြို့နယ်နဲ့ ပေါင်းတည်မြို့နယ်မီးသတ်စခန်းက မီးသတ်ကားတွေနဲ့ မီးသတ်တပ်ဖွဲ့ဝင်တွေ သွားရောက်မီးငြှိမ်းသတ်ရာမှာ နေ့လယ် ၃ နာရီ မိနစ် ၅၀ လောက်မှာ  မီးထိန်းနိုင်ခဲ့ပြီး ညနေ ၄ နာရီ ခွဲလောက်မှာ မီးငြိမ်းသွားတယ်လို့ မီးသတ်တပ်ဖွဲ့က သတင်းထုတ်ပါတယ်။ 

ရွှေတောင်ဒေသခံတဦး “မီးလည်းပျက်နေတာ၊ ဝါယာရှော့လို့လည်း ပြောလို့မရဘူး။ အဲ့ဒီဂိုဒေါင်က   လူလည်း နေတာမဟုတ်ဘူး။ မီးလည်းသွယ်တန်းထားတာမရှိဘူး။ မီးကြွင်းမီးကျန် ဆိုရအောင်လည်း နေ့လယ် ၃ နာရီ လောက်ပဲရှိသေးတာ။ လူမနေတော့ ဘယ်ကမှ မီးကြွင်းမီးကျန် မရှိနိုင်ဘူး။ အဲ့ဒိတော့ ရှို့မီးပဲ ဖြစ်ဖို့များတယ်။ ဘေးမှာက ဓာတ်ဆီဆိုင်ကြီးကလည်း ရှိနေတာ မီးကတော်တော်လေးများတာ၊‌ တဖက်မှာလည်း လူနေရပ်ကွပ်က ကပ်နေတာ၊ ဓာတ်ဆီဆိုင်က မြေအောက်သိုလှောင်ကန်တွေ ထပေါက်ရင် တမြို့လုံးပြာကျသွားမှာ ဘာမှလုပ်လို့ရမှာမဟုတ်ဘူး။ လူမနေတဲ့နေရာနဲ့အလွယ်တကူ မီးပျံ့နိုင်မယ့် နေရာကိုတမင်ရွေးလုပ်သွားတာဖြစ်မယ်။ လေကလည်း မြောက်လေတိုက်နေတော့ ဘေးက ခမောက် ရှမ်းတန်းရပ်ကွက်ကို ကူးစက်မှာစိုးရိမ်နေရတာ မီးသတ်တွေက အဲ့ဒိဘက်ကနေ မီးမကူးအောင် ကြိုးစားကြလို့ အခုလို မီးကျသွားတာ” လို့ ပြောပါတယ်။

မီးသတ်ကားတွေက ရွှေတောင်မြို့ကတင်မက ပြည်မြို့ကပါ အမြန်ရောက်လာလို့ မီးထိန်းနိုင်တာလို့ ရွှေတောင်မြို့က အရန်မီးသတ်တပ်ဖွဲ့ဝင်တယောက်က ပြောပါတယ်။ 

မီးစတင်လောင်ကျွမ်းရတဲ့ အကြောင်းရင်းကို မသိရသေးဘဲ ဒေသခံတွေကတော့ ရှို့မီးလို့ ခန့်မှန်း ပြောဆိုနေကြပါတယ်။

အခုမီးလောင်တဲ့ ဂိုဒေါင်တွေဟာ အရင်တုန်းက အစိုးရက စပါးတွေသိုလှောင်ထားလေ့ရှိတဲ့ သစ်သား၊ သွပ်မိုးအဆောင်ဖြစ်ပြီး  အဆောင်အားလုံးမီးလောင်ပြာကျသွားပါတယ်။

မီးလောင် မီးလောင်ရတဲ့ အကြောင်းရင်းနဲ့ ပျက်စီးဆုံးရှုံးမှုအခြေအနေကို သိရဖို့  ရွှေတောင်မြို့နယ် မီးသတ်တပ်ဖွဲ့မှူးရုံးကို  ဖုန်းနဲ့ဆက်သွယ်မေးမြန်းဖို့ ကြိုးစားခဲ့ပေမဲ့ ဆက်သွယ်လို့မရခဲ့ပါဘူး။

ပြီးခဲ့တဲ့ နိုဝင်ဘာ  ၂၀ ရက်ကလည်း ပဲခူးတိုင်း၊ ဇီးကုန်းမြို့မှာ ဈေးမီးလောင်ခဲ့ပြီး ဘာကြောင့်လောင်တယ်ဆိုတာကို အခုထိ မသိရသေးပါဘူး။

1 week Ago
More News
Up