စစ်ကိုင်းတိုင်း၊ ကလေးမြို့မှာ ဇွန် ၂၆ ရက်နေ့ ဒီဗန့ ကျရောက်တဲ့ ၃၅ ကြိမ်မြောက် အပြည်ပြည်ဆိုင်ရာ မူးယစ်ဆေးဝါးအလွဲသုံးမှုနဲ့ တရားမဝင်ရောင်းဝယ်မှုတိုက်ဖျက်ရေးနေ့ အထိမ်းအမှတ်အဖြစ် ကလေးမြို့နယ်ပြည်သူ့ရဲတပ်ဖွဲ့ (KPS) က ၆ လတာအတွင်း ဖမ်းဆီးမိခဲ့တဲ့ မူးယစ်ဆေးတွေကို ဖျက်ဆီးခဲ့ပါတယ်။
အမျိုးသားညီညွတ်ရေးအစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနအောက်ရှိ ကလေးမြို့နယ်ပြည်သူ့ရဲတပ်ဖွဲ့ (KPS) က အပြည်ပြည်ဆိုင်ရာမူးယစ်ဆေးဝါးအလွဲသုံးမှုနှင့် တရားမဝင်ရောင်းဝယ်မှုတိုက်ဖျက်ရေးနေ့ အခမ်းအနားကျင်းပပြီး ဖျက်ဆီးခဲ့တာလို့ ကလေးမြို့နယ်ပြည်သူ့ရဲတပ်ဖွဲ့က သိရပါတယ်။
အခမ်းအနားကို ဒီနေ့မနက် စတင်ခဲ့ပြီး ကလေးမြို့နယ်ပြည်သူ့အုပ်ချုပ်ရေးအဖွဲ့ခေါင်းဆောင်နဲ့ အဖွဲ့ဝင်တွေ၊ ကလေးမြို့နယ်ပြည်သူ့ရဲတပ်ဖွဲ့ (KPS) ဝင်တွေ၊ ကလေးခရိုင်ပြည်သူ့ကာကွယ်ရေးတပ်မတော် (PDF Kalay) တပ်ဖွဲ့ဝင်များ၊ ရပ်/ကျေးပြည်သူ့အုပ်ချုပ်ရေးအဖွဲ့ဝင်တွေနဲ့ ရပ်/ကျေးပြည်သူ့ကာကွယ်ရေး အဖွဲ့ဝင်တွေ တက်ရောက်ခဲ့ကြတယ်လို့ ဆိုပါတယ်။
အဲ့ဒီအခမ်းအနားမှာ ကလေးမြို့နယ်ပြည်သူ့ရဲတပ်ဖွဲ့ (KPS) အခြေစိုက်စခန်း တည်ရှိရာနေရာတွေမှာ ၆ လတာအတွင်း ဖမ်းဆီးရမိတဲ့ မူးယစ်ဆေးဝါး ဘိန်းဖြူ (၂၉၃) ဂရမ်၊ ကာလတန်ဖိုး (၂,၆၄၅,၀၀၀) ကျပ်၊ ဘိန်းမည်း (၂,၉၈၃) ဂရမ် ကာလတန်ဖိုး (၈,၀၀၀,၀၀၀)ကျပ်၊ WY တံဆိပ်ပါစိတ်ကြွဆေးပြား ၃,၉၅၄ ပြား၊ ၄၅၂ ဂရမ်၊ ကာလတန်ဖိုး ၁,၃၁၀,၀၀၀ ကျပ်၊ မူးယစ်ဆေးဝါးသုံးစွဲရာမှာ အသုံးပြုတဲ့ ဆေးထိုးအပ် ၁ ချောင်းတို့အား မီးရှို့ဖျက်ဆီးခဲ့တယ်လို့ ကလေးမြို့နယ်ပြည်သူ့ရဲတပ်ဖွဲ့က ထုတ်ပြန်ထားပါတယ်။
စစ်ကိုင်းတိုင်းအထက်ပိုင်း မော်လိုက်မြို့နယ်ထဲက ကျေးရွာတွေကို စစ်ကောင်စီတပ်က အခုလအတွင်း ဝင်ရောက်မွှေနှောက်ပြီး တန်ဖိုးရှိပစ္စည်းတွေ၊ ရွှေ၊ ငွေ လက်ဝတ်ရတနာတွေနဲ့ စားသောက်ကုန်တွေ လုယက်ခိုးယူပြီး ရွာလုံးကျွတ် မီးရှို့ဖျက်ဆီးခဲ့တာကြောင့် နေအိမ် ၆၀၀ ကျော် မီးလောင်ပြာကျခဲ့တယ်လို့ ဒေသခံတွေက ပြောပါတယ်။
လုံခြုံရေးအရ အမည်မဖော်လိုသူ ရွာခံတဦးက “ရွာတွေကို မွှေနှောက် လုယက်သောင်းကျန်းနေတဲ့ အကြမ်းဖက်စစ်အုပ်စုကို ဒေသတွင်း ကာကွယ်ရေးတပ်ဖွဲ့တွေက တိုက်ခိုက်တာ စကစတွေ အထိနာ အသေများပြီး ယူးဝကျေးရွာအုပ်စုက အိမ်ခြေ ၄၀၀ ကျော်နဲ့ တပ်ကုန်းကျေးရွာက အိမ်ခြေ ၂၀၀ ကျော်ကို အကြောင်းမဲ့ မီးရှို့ဖျက်ဆီးသွားတယ်" လို့ ဒီဗွီဘီကို ပြောပါတယ်။
ဘေးလွတ်ရာတိမ်းရှောင်နေရတဲ့ စစ်ဘေးရှောင် ရွာသူရွာသား ၄,၀၀၀ ကျော်မှာ အခြေခံစားသောက်ကုန်နဲ့ ကျန်းမာရေးအတွက် ဆေးဝါး၊ အရေးပေါ် အသုံးအဆောင်ပစ္စည်းတွေ လိုအပ်နေတယ်လို့ မော်လိုက်မြို့နယ် စစ်ဘေးရှောင်တွေကို ကူညီဆောင်ရွက်ပေးနေသူ ဒေသခံတဦးက ဆိုပါတယ်။
အကြမ်းဖက်စစ်အုပ်စုဟာ အမည်မသိ အရပ်သားနှစ်ဦးကိုလည်း ဖမ်းဆီးနှိပ်စက်ပြီး ခေါင်းဖြတ်သတ်ထားခဲ့ကာ သေဆုံးသူတွေက ဘယ်သူတွေဆိုတာ မသိရသေးဘူးလို့ ဒေသခံတွေက ပြောပါတယ်။
စစ်ကိုင်းတိုင်းထဲက မြို့နယ်တွေကို စစ်ကောင်စီက အင်တာနက်လိုင်း ဖြတ်တောက်ထားပြီး ရွာတွေကို မီးရှို့ဖျက်ဆီး လုယက် ဖမ်းဆီးသတ်ဖြတ် အကြမ်းဖက်လုပ်ဆောင်နေတယ်လို့ ဒေသခံတွေဆီက သိရပါတယ်။
