မီးရှို့ခံရ

December 11, 2022

ထီးချိုင့်တွင် ရွာပေါင်း ၂၁ ရွာ မီးရှို့ခံရပြီး ပြည်သူ ၂ သောင်းဝန်းကျင် စားဝတ်နေရေး အခက်ကြုံ

ထီးချိုင့်မြို့နယ်မှာ ကျေးရွာပေါင်း ၂၁ ရွာအထိ မီးရှို့ခံထားရပြီး  စစ်ကောင်စီက ဆက်လက်အကြမ်းဖက်နေတာကြောင့် စစ်ဘေးသင့် ပြည်သူ ၂ သောင်းဝန်းကျင် စားဝတ်နေရေး အခက်အခဲကြုံနေကြရပါတယ်။ 

ကန့်ဘလူနဲ့ ကျွန်းလှမြို့နယ်တွေမှာလည်း နိုဝင်ဘာတလတည်းမှာ စုစုပေါင်း အိမ်ခြေ ၁၀၀၀ နီးပါး မီးရှို့ဖျက်ဆီးခံထားရပြီး ပြည်သူ ၂၆ ယောက် အသတ်ခံခဲ့ရပါတယ်။ 

စစ်ကိုင်းတိုင်းအထက်ပိုင်း ကသာခရိုင်၊ ထီးချိုင့်မြို့နယ်ကို နိုဝင်ဘာ ၂၇ ရက်ကနေ ဒီဇင်ဘာ ၁ ရက်နေ့ ညပိုင်းအထိ စစ်ကောင်စီက ၅ ရက်ဆက်တိုက် လေကြောင်းပစ်ခတ်မှုတွေ ပြုလုပ်ခဲ့တာပါ။ 

စစ်ကောင်စီတပ်တွေဟာ ဒီဇင်ဘာ ၉ ရက်နေ့အထိ ထီးချိုင့်နယ်ထဲမှာ အကြမ်းဖက်တာတွေ ဆက်လက်လုပ်ဆောင်နေဆဲဖြစ်ပြီး မီးရှို့ခံရတဲ့ ကျေးရွာပေါင်း ၂၁ ရွာအထိ ရှိလာပါတယ်။ 

ထီးချိုင့်ဒေသခံတဦးက “မီးလောင်တဲ့ရွာကတော့ စုစုပေါင်း ၂၁ ရွာရှိပါတယ်ဗျ။ နိုဝင်ဘာ ၂၅ ရက်နေ့က စရှို့တာဗျ။ စစ်ကြောင်းစထိုးတာကတော့ နိုဝင်ဘာ ၂၃ ရက်နေ့က စထိုးတာဗျ။ မနေ့ကတုန်းကဆိုရင် ရေဝတို့ တောင်ကြီး တို့မှာ ရွာလုံးကျွတ်မီးရှို့ခံရတယ်။ ဒုက္ခသည်ပေါင်းကတော့ ၂ သောင်းလောက်ရှိသွားပြီထင်တယ်။ စပါးကျီထဲမှာထည့်ထားတဲ့ စပါးတွေဆို မသယ်ထုတ်နိုင်ဘူးလေ။ သူတို့မီးရှို့တော့ ပါသွားတာလေ။ စစ်ကောင်စီက သူတို့မှာ လူသားချင်းစာနာတဲ့ စိတ်မရှိဘူးလေဗျာ။ မရှိလို့လည်း အကြောင်းမဲ့ ကျေးရွာတွေကို ဝင်မီးရှို့ဖျက်ဆီး ဒီလိုလုပ်တာပေါ့။ အဓိက က သူတို့မှာ စာနာစိတ်ကင်းမဲ့တာပေါ့။ ပြည်သူလူထုက ဘာမှလုပ်တာမဟုတ်ဘူး။ အေးအေးချမ်းချမ်းနဲ့ ရှာဖွေစားသောက် စုဆောင်းထားတာတွေလေ။ သူတို့က သိတဲ့အတိုင်း ရွာတရွာဝင်ပြီဆိုရင် ရိက္ခာမပါဘူးလေ။ ရွာမှာရှိတဲ့ ပစ္စည်းတွေနဲ့ပဲ ရိက္ခာဖြည့်တင်းတာကိုဗျ" လို့ ပြောပါတယ်။

စစ်ကိုင်း-မြစ်ကြီးနားလမ်းပိုင်းမှာတည်ရှိတဲ့ ကန့်ဘလူမြို့နယ်နဲ့ ကျွန်းလှမြို့နယ်တွေမှာလည်း စစ်ကောင်စီက စစ်ကြောင်း ၄ ခု၊ ၅ ခုခွဲပြီး ထိုးစစ်ဆင်နေပါတယ်။ ပြီးခဲ့တဲ့ နိုဝင်ဘာတလတည်းမှာ ကန့်ဘလူနဲ့ ကျွန်းလှ ၂ မြို့နယ်အတွင်းမှာ စစ်ကောင်စီက အိမ်ခြေ ၁၀၀၀ နီးပါးမီးရှို့ဖျက်ဆီးခဲ့ပါတယ်။

ကျွန်းလှဒေသခံနိုင်ငံရေးသမားတဦးက "နိုဝင်ဘာလ တလတည်းမှာကိုပဲ ကန့်ဘလူနယ်ထဲမှာ အိမ်ခြေပေါင်း ၈၉၅ လုံး။ ကျွန်းလှမှာဆိုရင် အိမ်ခြေပေါင်း ၉၀ ကျော်။ ဒါ နိုဝင်ဘာလတခုတည်းစာရင်းပေါ့။ အပြစ်မဲ့ပြည်သူတွေကို သတ်ဖြတ်သွားတာက ကန့်ဘလူမြို့နယ်မှာ ၂၅ ဦးရှိတယ်။ ကျွန်းလှမှာ ၁ ဦးရှိတယ်။ နွေဦးတော်လှန်ရေး စကတည်းကဆိုရင် ကန့်ဘလူနဲ့ ကျွန်းလှမြို့နယ်တွေထဲက မီးရှို့ဖျက်ဆီးခံရတဲ့ အိမ်ခြေပေါင်း ၂ ထောင်ကျော်သွားပြီ။ ကျေးရွာပေါင်းကလည်း ၄၀ နီးပါးအထိ သူတို့ မီးရှို့ဖျက်ဆီးခဲ့တဲ့ အခြေအနေမှာရှိတာပေါ့။ လက်ရှိ ဒီဇင်ဘာလထဲမှာကိုပဲ စစ်ကောင်စီဘက်က အကြမ်းဖက်ပြီးတော့ မီးရှို့တာတွေက ဆက်တိုက်လုပ်ဆောင်နေတယ်ပေါ့။ ကျွန်းလှမြို့နယ်က အင်းဒိုင်းကျေးရွာတို့ ကန့်ဘလူနယ်ထဲမှာလည်း အင်ဒိုင်းကျေးရွာဆိုတာရှိတယ်။ အဲ့ဒီရွာတွေကို ဆက်ပြီးတော့ မီးရှို့တာတွေရှိတယ်။ နောက်ပြီးတော့ ကန့်ဘလူနယ်ထဲက ချောင်းဖျားကျေးရွာ၊ တနေ့က ဝက်သအင်းကျေးရွာကို မီးရှို့ဖျက်ဆီးသွားတာတွေရှိတယ်။ ဝက်သအင်းဆိုရင် အိမ်ခြေ ၇၀ လောက်ရှိတာ ၇၄ လုံး မီးရှို့ခံရတယ်ပေါ့။ မြေပြင်မှာလည်း စစ်ကြောင်း လေးငါးခုခွဲပြီးတော့ ရွာတွေထဲကို လက်နက်ကြီးလက်နက်ငယ်တွေနဲ့ပစ်ပြီး ဝင်တာတွေရှိတယ်။ လက်နက်ကြီးတွေနဲ့ ရမ်းသန်း ပစ်ခတ်တာမို့လို့ ပြီးခဲ့တဲ့ကာလတွေမှာ အပြစ်မဲ့ပြည်သူတွေ သေဆုံးတာတွေရှိခဲ့တယ်ခင်ဗျ" လို့ ပြောပါတယ်။

စစ်ကိုင်းတိုင်းမှာ အင်တာနက်နဲ့ ဖုန်းလိုင်းတွေ ဖြတ်တောက်ခံထားရတဲ့ကြောင့် စစ်ကောင်စီရဲ့ အကြမ်းဖက်တိုက်ခိုက် မီးရှို့ဖျက်ဆီးမှုတွေကို အချိန်နဲ့တပြေးညီ သတင်းမှတ်တမ်းယူဖို့ အခက်အခဲတွေ ရှိနေတယ်လို့ ဒေသခံတွေက ပြောပါတယ်။  

သတင်းနဲ့ ဆက်သွယ်ရေး အမှောင်ချခံထားရတဲ့ စစ်ကိုင်းတိုင်း မြို့ရွာတွေမှာ စစ်ကောင်စီရဲ့ လူမသိသူမသိ အကြမ်းဖက်လုပ်ရပ်တွေ အများကြီးရှိနေနိုင်သေးတဲ့ အခြေအနေလည်းဖြစ်ပါတယ်။ 

2 months Ago

November 26, 2022

အရာတော်နှင့်ဝက်လက် ကျေးရွာအချို့ မီးရှို့ခံရ၊ နေအိမ် ၁၅၀ ခန့်ဆုံးရှုံး

စစ်ကိုင်းတိုင်း ဝက်လက်မြို့နယ်၊ မူးကြီးရွာက နေအိမ်တွေကို နိုဝင်ဘာ ၂၄ ရက် နေ့လယ်ပိုင်းက စစ်တပ်က မီးရှို့ခဲ့တာကြောင့် နေအိမ် ၁၅၀ လောက် မီးလောင်ခဲ့ပြီး အသက် ၈၀ ကျော် အဘွားအို ၁ ဦး သေဆုံးခဲ့တယ်လို့ ဒေသခံတဦးက ပြောပါတယ်။

"စစ်ကြောင်းဝင်လာတော့ ရွာက ပြေးရတယ်။ မီးရှို့သွားတာ ညနေထိပဲ။ ရွာထဲပြန်ဝင်တော့ မီးက ငြှိမ်းမနိုင်တော့ဘူး။ အသက် ၈၀ အဘွားအိုလည်း မပြေးနိုင်လို့ မီးထဲပါသွားရှာတာ။ အခုနေစရာလည်း မရှိတော့ အကုန်ဒုက္ခရောက်ပြီ။" 

ဘုရားပျံရွာမှာ နိုဝင်ဘာ ၂၃ ရက်က ညအိပ်တပ်စွဲခဲ့တဲ့ စစ်ကောင်စီတပ်ဟာ နိုဝင်ဘာ ၂၄ ရက် မွန်းတည့် ၁၂ နာရီလောက်မှာ မူးကြီးရွာရောက်လာပြီး နေအိမ်တွေကို မီးရှို့ခဲ့တာလို့ ဆိုပါတယ်။

ဒါ့အပြင် အိမ်မွေးတိရစ္ဆာန်နွားအကောင်ရေ ၈၀ ကျော် မီးလောင်သေဆုံးခဲ့ပြီး သိုလှောင်ထားတဲ့ သီးနှံတွေလည်း ဆုံးရှုံးခဲ့ရတယ်လို့ ဒေသခံတွေက ပြောပါတယ်။

အဲဒီစစ်ကြောင်းဟာ စစ်ကိုင်းအခြေစိုက် တပ်မ ၃၃ က ဖြစ်ပြီး မူးကြီးရွာကို မီးရှို့ပြီးနောက် လိန်ပင်ရွာမှတဆင့် ဝက်လက်မြို့ကို ပြန်လည်ထွက်ခွာသွားတယ်လို့ ဆိုပါတယ်။

မူးကြီးရွာဟာ အိမ်ခြေ ၃၇၅ အိမ်ရှိပြီး မီးဘေးသင့်ပြည်သူတွေအနေနဲ့ မီးမလောင်ဘဲ ကျန်ခဲ့တဲ့ ဘုန်းကြီးကျောင်းနဲ့ နေအိမ်တွေမှာ ခိုကပ်နေကြရသလို လယ်ကွင်းတွေမှာလည်း မိုးကာတွေနဲ့ တဲထိုးနေထိုင်ကြရတယ်လို့ သိရပါတယ်။

နိုဝင်ဘာ ၂၅ ရက် မနက် ၈ နာရီလောက်ကလည်း  အရာတော်မြို့နယ်၊ နွားမသင်းကျေးရွာ စာသင်ကျောင်းဆောင်ကို စစ်တပ်က မီးရှို့ခဲ့တယ်လို့ ဒေသခံရွာသားတွေက ပြောပါတယ်။

အရာတော်မြို့ကနေ စစ်ကားအကြီး ၂ စီးနဲ့ ရွာအတွင်း ပစ်ခတ်ဝင်ရောက်လာတာကြောင့် ရွာသားတွေ ထွက်ပြေးနေရတယ်လို့ သိရပါတယ်။ 

အိမ်ခြေ ၃၀၀ ကျော်ရှိတဲ့ နွားမသင်းကျေးရွာကို အရာတော် ငွေတွင်းရွာက ပျူစောထီးတွေပါ‌ ရောက်နေတယ်လို့ အရာတော်ပြည်သူ့ကာကွယ်ရေးအဖွဲ့ခေါင်းဆောင် ဗိုလ်ရန်ရှင်းက ပြောပါတယ်။

“ရွာသားတွေ အကုန်အပြင်ရောက်အောင် ကျနော်တို့အဖွဲ့သားတွေ ကယ်ထုတ်နေကြတယ်။ ပိတ်မိသူ မရှိလောက်တော့ဘူး။ လတ်တလောတော့ ရွာကိုပါ မီးရှို့နေပြီ။ စစ်ရေးအခြေအနေ ကတော့ တင်းမာနေပြီလို့ ပြောရမယ်။ ဘာလို့လဲဆိုတော့ ရွာတွေကို မီးရှို့တာကို  လက်ပိုက် ကြည့်မနေနိုင်ဘူး။”

လတ်တလော စစ်ကောင်စီတပ်က ရွာထဲမှ ပြန်မထွက်သေးတာကြောင့် ရွာအတွင်း အဖြစ်အပျက် အသေးစိတ်ကို အတိအကျ မပြောနိုင်သေးဘူးလို့လည်း ဒေသခံတွေက ဆိုပါတယ်။

စစ်ကိုင်းတိုင်းအတွင်း ရွာတွေကို စစ်တပ်က ဒေသခံပျူစောထီးတွေနဲ့ ပူးပေါင်းပြီး အကြိမ်ကြိမ် မီးရှို့နေတာကြောင့် ဒေသခံတွေဟာ ရွာထဲမနေရဲတော့ဘဲ တောတောင်တွေနဲ့ တိုင်းရင်းသားအများစုရှိတဲ့ ဖားကန့် ကျောက်မှော်၊ ရွှေမှော်တွေဘက် ပြောင်းရွှေေနေထိုင်သူ တွေလည်း ရှိနေတယ်လို့ ဒေသခံတွေက ပြောပါတယ်။

2 months Ago
More News
Up