ပါကစ္စတန်တောင်ပိုင်း ဆင်းန်ဒ်ပြည်နယ်မှာ ရာနဲ့ချီတဲ့ အလုပ်သမားတွေဟာ ရေလွှမ်းမိုးမှုကြောင့် ပျက်စီးသွားတဲ့ မီးရထားသံလမ်းတွေကို စက်တင်ဘာ ၂၈ ရက်က ပြုပြင်နေကြပြီး လာမယ့်သီတင်းပတ်မှာ ရထားပြေးဆွဲမှု ပြန်စတင်ဖို့ မျှော်မှန်းထားပါတယ်။

ကိုထရီလမ်းဆုံ မီးရထားဘူတာမှ ရုံပိုင်ကြီး အာရစ်ဖ် အလီက “မီးရထားသံလမ်း ပြုပြင်ရေးကို ဝန်ထမ်းအားလုံး လုပ်ဆောင်နေပြီးတော့ ရထားလမ်းစနစ်ကို အောက်တိုဘာ ၅ ရက်မှာ စတင်အသုံးပြုနိုင်ဖို့ မျှော်လင့်ထားတယ်” လို့ ပြောပါတယ်။

ပါကစ္စတန်ရဲ့ နှစ် ၃၀ ကျော်ကာလမှာ ရွာသမျှမိုးတွေထက် ၃ ဆလောက် ပိုပြီးရွာသွန်းခဲ့တဲ့ သမိုင်းဝင် မုတ်သုံမိုးကြမ်းကြောင့် ထောင်ပေါင်းများစွာသော မီးရထားဝန်ထမ်းတွေဟာ ဝင်ငွေအတွက် တလကျော်ကြာ ရုန်းကန်ခဲ့ရပါတယ်။

ရေကြီးမှုကြောင့် မီးရထားဘူတာရုံတွေကို ရပ်နားထားရပြီး ရထားကို မှီခိုနေရသူအားလုံး အသက်မွေးဝမ်းကြောင်း ဆုံးရှုံးခဲ့လို့ ရထားပြေးဆွဲမှုကို အမြန်ဆုံးပြန်စပေးဖို့ အထမ်းသမား နာဒီးမ် မဲဘုဘ်က အာဏာပိုင်တွေကို မေတ္တာရပ်ခံခဲ့ပါတယ်။

မီးရထားဆိုင်ရာ ပြည်ထောင်စုဝန်ကြီး ခါဝါဂျာ ဆာ့ဒ် ရာဖစ်က်က ပုံမှန်အလုပ်တွေကို အမြန်ဆုံး ပြန်စကြဖို့ အမိန့်ပေးထားကြောင်း ဗုဒ္ဓဟူးနေ့က အစိုးရအဖွဲ့ အစည်းအဝေးမှာ ပြောကြားခဲ့ပါတယ်။ ဒါပေမဲ့ ရေအရင်ကျဆင်းဖို့တော့ စောင့်ရဦးမှာ ဖြစ်ပါတယ်။

မန္တလေးမြို့၊ မဟာအောင်မြေမြို့နယ်၊ ရဲမွန်တောင်ရပ်ကွက်လမ်း ၆၀ နဲ့  ၅၉ လမ်းကြား၊ သိပ္ပံလမ်းနဲ့ ၃၅ လမ်းကြားရှိ မီးရထားသံလမ်း ကျူးကျော်တွေကို ဒီဇင်ဘာ ၂၇ ရက်မှာ စည်ပင်သာယာက လက်နက်ကိုင်လုံခြုံရေးတွေနဲ့ အင်အားသုံး ဖယ်ရှားခဲ့ပါတယ်။

ကျူးကျော်တွေကို သတ်မှတ်ရက်အတွင်း ဖယ်ရှားပေးဖို့ စည်ပင်သာယာက သတိပေး စာပို့ထားပြီး နေအိမ် ၂၀၀ ကျော်ကို ဖယ်ရှားခဲ့တယ်လို့ သိရပါတယ်။

ရပ်ကွက်နေပြည်သူတစ်ဦးက “ကျူးကျော်နေတဲ့သူတွေ သူတို့ဘာသာ သူတို့ ဖယ်သွားပြီးသား။ ကျန်ခဲ့တဲ့ အပိုင်းအစတွေကို စည်ပင်က လာရှင်းတာ။ စည်ပင်ချည်းပဲလည်း မဟုတ်ဘူး၊ လက်နက်ကိုင်ထားတဲ့ ရဲတွေ စစ်သားတွေလည်း ပါတယ်” လို့ ပြောပါတယ်။

ဒါ့အပြင် ၅၂ လမ်း၊ သိပ္ပံလမ်းနဲ့ ၃၅ လမ်းကြားရှိ ကျူးကျော်နေထိုင်သူတွေကို ဒီကနေ့ ဒီဇင်ဘာလ ၂၈ ရက်မှာလည်း ရှင်းလင်းဖယ်ရှားတာတွေ လုပ်ကြတယ်လို့ သိရပါတယ်။

အလားတူ ရန်ကုန်မှာလည်း  လှိုင်သာယာနဲ့ ဒဂုံမြို့သစ်အပါအဝင် ကျူးကျော်တွေကို စစ်ကောင်စီက  အင်အားသုံး ဖယ်ရှားရှင်းလင်းနေတာ ဖြစ်ပါတယ်။