မီးဘေးသင့်

March 28, 2021

မန္တလေးက မီးဘေးသင့် အိမ်ခြေ ၈၀ ကျော် အကူအညီလိုအပ်နေ

မန္တလေးမြို့မှာ မတ်လ ၂၈ ရက် မနက် ၁ နာရီခွဲလောက်က ပြည်ကြီးတံခွန်မြို့နယ် ညည ၂၅ နဲ့ ၂၆ ရပ်ကွက်မှာ မီးလောင်မှုဖြစ်ပွားခဲ့တာကြောင့် အိမ်ခြေ ၈၀ ကျော် မီးဘေးသင့်ခဲ့တယ်လို့ သိရပါတယ်။

အဆိုပါ မီးလောင်မှုဟာ မနက်အစောပိုင်း တစ်နာရီခွဲလောက် လူမနေတဲ့ နေအိမ်တစ်လုံးကို ဆိုင်ကယ်စီးသူတစ်ဦး လာရောက်ပြီး မီးကွင်းပစ်ရာကနေ စတင်လောင်ကျွမ်း ကူးစက်ခဲ့တာ ဖြစ်တယ်လို့ သိရပါတယ်။ 

မီးလောင်မှုကို ငြှိမ်းသတ်ဖို့ လာရောက်မယ့် မီးသတ်ကားတွေနဲ့ မီးသတ်တပ်ဖွဲ့ဝင်တွေကိုလည်း စစ်တပ်နဲ့ ရဲက ပစ်ခတ်တားမြစ်ခဲ့တာကြောင့် အချိန်မီ မငြှိမ်းသတ်နိုင်ခဲ့ရဘူးလို့ သိရပါတယ်။

အဲဒီနေရာဟာ ကျူးကျော်နေထိုင်သူတွေ အများစုဖြစ်ပြီး လူနေအိမ်ထူထပ်တာကြောင့် မီးကူးစက်မှု ပိုမိုများပြားခဲ့တာဖြစ်တယ်လို့ သိရပါတယ်။ ရုတ်တရတ် မီးလောင်ကျွမ်းမှုကြောင့် နေအိမ်ကို စွန့်ခွာထွက်ပြေးကြရတဲ့အတွက် အဝတ်တထည် ကိုယ်တခုနဲ့ ထွက်ပြေးခဲ့ကြရပြီး အဝတ်အစားကအစ အခက်အခဲ ရှိနေကြတယ်လို့ မီးဘေးသင့် ပြည်သူတဦးက ပြောပါတယ်။

မီးလောင်ကျွမ်းမှုကြောင့် လူဦးရေ ငါးရာခန့် မီးဘေးသင့်ခဲ့တာဖြစ်ပြီး လတ်တလောအနေနဲ့ အိမ်ရာ ပြန်လည်ဆောက်လုပ်ဖို့တောင် အခက်အခဲဖြစ်နေကြတယ်လို့ မီးဘေးသင့်သူတွေက ပြောပါတယ်။

မီးဘေးသင့်ပြည်သူတွေအတွက် ရပ်ကွက်အတွင်းက သာသနဝေပုလ ဒီပါဧမြ ဓမ္မာရုံမှာ ကယ်ဆယ်ရေးစခန်း ဖွင့်လှစ်ထားတယ်လို့လည်း သိရပါတယ်။ 

လတ်တလောမှာတော့ မန္တလေးမြို့ခံ တချို့က အစားအသောက်နဲ့ အဝတ်အစားတွေကို တတ်နိုင်သမျှ ကူညီနေကြပြီး အကူအညီလိုအပ်နေဆဲ ဖြစ်တယ်လို့ သိရပါတယ်။

3 months Ago

December 7, 2020

ငပုတောတွင် မီးလောင်ပေါက်ကွဲမှုကြောင့် နေအိမ် ၁၈ လုံးဆုံးရှုံး၊ လူဦးရေ ၇၀ ကျော်မီးဘေးသင့်

ဧရာဝတီတိုင်းဒေသကြီး၊ ငပုတောမြို့နယ်၊ ဆင်ကူးကြီးကျေးရွာမှာ ဒီဇင်ဘာလ ၆ ရက်နေ့ ညနေပိုင်းက မီးလောင်ပေါက်ကွဲမှုဖြစ်ပေါ်ခဲ့ပြီး နေအိမ် ၁၈ လုံး ဆုံးရှုံးပြီး လူဦးရေ ၇၀ ကျော် မီးဘေးသင့်ခဲ့တယ်လို့ မြို့နယ်မီးသတ်ဦးစီးဌာနက သိရပါတယ်။ ဆင်ကူးကြီးကျေးရွာနေ ဦးလှိုင်ဝင်းအောင်ရဲ့ နေအိမ်ရှိ အင်ဗာတာမှတဆင့်စတင့်ကာ မီးလောင်ခဲ့တာဖြစ်ပြီး အနီးရှိ ဓာတ်ဆီပုံးကား မီးကူးစက်လောင်းကျွမ်းကာ ပေါက်ကွဲခဲ့တာလို့ ငပုတောမြို့နယ်မီးသတ်ဦးစီးမှူး ဦးမင်းအောင်က DVB ကိုပြောပါတယ်။ "ဖြစ်တာကတော့ ဝါယာရှော့ဖြစ်ပြီး စလောင်တာ၊ အနီးက ဓာတ်ဆီပုံးကားကို ကူးပြီးပေါက်ကွဲမှု ဖြစ်တာပါ၊ ကျေးရွာက နေအိမ် ၁၈ လုံးမီးလောင် ဆုံးရှုံးပါတယ်၊ သေဆုံး ထိခိုက်ဒဏ်ရာရတာတော့ မရှိပါဘူး" လို့ ပြောပါတယ်။ မီးလောင်မှုကြောင့် မီးဘေးသင့်ခဲ့တဲ့ အိမ်ထောင်စု ၁၈ စုက လူဦးရေ ၇၈ ဦးဟာ ကျေးရွာအထက်တန်းကျောင်းနဲ့ နီးစပ်ရာဆွေမျိုးတွေ နေအိမ်မှာ နေထိုင်နေရတယ်လို့ ဆိုပါတယ်။ မီးလောင်တဲ့ နေအိမ်တွေကို သတ်မှတ်ထားတဲ့ နှုန်းထားတဲ့အတိုင်း ၁ အိမ်ကို ၂ သိန်းနှုန်း၊ လူဦးကို ၁ ပတ်စာ ဆန်ရိက္ခာအတွက် ၂၁၀၀ နှုန်းနဲ့ စုစုပေါင်း ငွေကျပ် ၃၇ သိန်းကျော်အပြင် ကယ်ဆယ်ရေးပစ္စည်ပုံး ၁ ပုံးစီ ထောက်ပံ့ပေးထားတယ်လို့ တိုင်းဒေသကြီးသဘာဝဘေးစီမံခန့်ခွဲမှု ဦးစီးဌာန တိုင်းဦးစီးမှူး ဦးစဝီဖရန့်က DVB ကိုပြောပါတယ်။ မီးလောင်ကျွမ်းမှုနဲ့ပတ်သက်ပြီး နေအိမ်ပိုင်ရှင်ကို ရဲစခန်းမှာ ရာဇသတ်ကြီးပုဒ်မ ၂၈၅ နဲ့ အမှုဖွင့်အရေးယူထားတယ်လို့ မြို့နယ် မီးသတ်ဦးစီးဌာနက သိရပါတယ်။  သတင်း - မင်းထက်မုန်း (ပုသိမ်) ဓာတ်ပုံ - လှမင်းထွဋ်
6 months Ago
More News
Up