ရှမ်းပြည်နယ်မြောက်ပိုင်း၊ လားရှိုးမြို့နယ်အတွင်း မြသင်းကြူ လျှပ်စစ်ဓာတ်အားဖြန့်ဖြူးရေး ကုမ္ပဏီက မီတာခတွေ အတင်းအကျပ် ကောက်ခံနေတာနဲ့ မီတာခမဆောင်တဲ့ ပြည်သူတွေရဲ့ နေအိမ်တွေကို လျှပ်စစ်မီးဖြတ်တောက်တာတွေကို ရပ်တန်းကရပ်ဖို့ လားရှိုးပြည်သူ့ကာကွယ်ရေးတပ်ဖွဲ့ (Lashio Civil Defence Force) က သတိပေးလိုက်ပါတယ်။

LCDF ရဲ့ ထုတ်ပြန်ချက်ကို လျစ်လျူရှုကာ အထက်ပါလုပ်ရပ်တွေကို ဆက်လက်ဆောင်ရွက်နေ ပါက မိမိတို့ LCDF (CT-UG) မှ လုပ်သင့်လုပ်ထိုက်တာတွေကို လုပ်ဆောင်သွားမှာဖြစ်ကြောင်း EPC နဲ့ စစ်အာဏာရှင် လက်အောက်ခံဌာနတွေကို နိုဝင်ဘာ ၁၅ ရက်နေ့မှာ နောက်ဆုံးအကြိမ် သတိပေးအကြောင်းကြားထားပါတယ်။

ဒါ့အပြင် မိဘပြည်သူများအနေနဲ့ စစ်ကောင်စီလက် အောက်ခံရုံးတွေကို မသွားကြပါရန်နဲ့ CCTV တွေကို ဖြုတ်သိမ်းထားခြင်းဖြင့် ပူးပေါင်းပါဝင်ပေးဖို့လည်း LCDFက မေတ္တာရပ်ခံကြောင်း ထုတ်ပြန်ပါတယ်။

စစ်အာဏာသိမ်းပြီးနောက်ပိုင်း လားရှိုးမြို့နယ်ရဲ တပ်ဖွဲ့မှူးရုံး၊ အမှတ် (၅) ရပ်ကွက် အုပ်ချုပ်ရေးမှူးရုံး၊ မြို့နယ် လ.ဝ.က ရုံး၊ ယာဉ်ထိန်းရဲရုံးနဲ့ စစ်တပ်သတင်းပေး (ဒလန်)လို့ အများက သတ်မှတ်ခံထားရသူနေ အိမ်တစ်အိမ်ကို ဗုံးပစ်တိုက်ခိုက်တာတွေ ရှိခဲ့ပါတယ်။

ကမာရွတ်မြို့နယ်၊ အမှတ် ၄ ရပ်ကွက်က ဘုရင့်နောင်တာဝါနဲ့ အမှတ်  ၈ ရပ်ကွက်က Diamond ကွန်ဒိုတို့မှာ နိုဝင်ဘာ ၁၂ ရက် မနက် ၁၀ နာရီလောက်မှာ  စစ်ကောင်စီ လူကြီးတချို့နဲ့ EPCဝန်ထမ်းတွေက လာရောက် မီးဖြတ်သွားတယ်လို့ ဒေသခံတွေက ပြောပါတယ်။

အမှတ် ၄ ရပ်ကွက်က  ဘုရင့်နောင်တာဝါကို   လူ ၁၀ ယောက်လောက်က လာရောက်ပြီး မီတာမပေးဆောင်ရသေးတဲ့ အခန်း ၇၀ ကျော်ကို မီးဖြတ်ချခဲ့​တာလို့ ဆိုပါတယ်။

" မီတာမဆောင်တဲ့အခန်းတွေချည်း ရွေးဖြတ်သွားတယ်။ အိမ် ၈၀  ကဆောင်ထားပြီးသားတဲ့။ ၇ လပိုင်းစာ အထိ မီတာဆောင်မှ မီးပြန်ပေးမယ် ​ပြောတယ်။ Online paymentနဲ့ဖြစ်ဖြစ် မီတာရုံးသွားပြီးဖြစ်ဖြစ် ဘေလ်ဆောင်ပြီးရင် တိုက်သာယာ​ရေးရုံးကို ​ပြောတဲ့။ ပြန်တပ်​ပေးမယ် ​ပြောတယ်။ ရုတ်တရက်ဆို​တော့ ဘာလုပ်ရမှန်းမသိဘူး။ ဒီချိန်ထိ ​တောင့်ခံလာခဲ့တာ " လို့  ဒေသခံပြည်သူတစ်ဦးက ပြောပါတယ်။

" အခန်း ၇၀ ကျော်ကို မိန်းချရုံပဲ ဖြတ်ခဲ့တာပါ။  ပြန်ဖွင့်လို့ရပေမယ့် မိရင်အဖမ်းခံရမယ်လို့ ခြိမ်းခြောက်သွားတယ်။ ပေးရမယ့်မီတာခများတဲ့ အိမ်ကိုတော့ ကြိုးဖြတ်တာတွေ့တယ် "လို့ လည်း ဆိုပါတယ်။

   အလားတူ ၈ ရပ်ကွက်က Diamond ကွန်ဒိုကိုလည်း EPCဝန်ထမ်း ၁၀ ယောက်လောက်  လာရောက်ပြီး မီတာလာမဆောင်ပါက မီးမပေးဘူးလို့ ပြောသွား​တယ်လို့ဆိုပါတယ်။

   "အရပ်ဝတ်တွေနဲ့ လာတာ။ မီတာမဆောင်ရင် မီးမရဘူးလို့ပြောတယ်။ Fuse လည်း ယူသွားကြတယ်။ မီးဖြတ်ဖြတ်ချင်း ပေးဆောင်ကြတဲ့ လူတွေလည်းရှိတယ်။ တစ်ခန်းကို အနည်းဆုံး ၄-၅-၆ သိန်းဝန်းကျင် လောက်ကျကြတယ်။ မဆောင်ချင်တာ ငွေပေးရမှာကြောက်လို့ မဟုတ်ဘူး အခုလိုအချိန်မှာ ဘယ်လိုနည်းနဲ့မှ အာဏာရှင်လက်ထဲ သေနတ်ဖိုးတွေ မထည့်နိုင်ဘူး" လို့ ကွန်ဒိုမှာ နေထိုင်သူတစ်ဦးက ပြောပါတယ်။

ရွှေထီး ၁ ၊ရွှေထီး ၂ နဲ့ ထူးကွန်ဒို တို့မှာလည်း  မီတာစစ်ဆေးမှုတွေပြုလုပ်ပြီး  မီတာခပေးဖို့ ကျန်နေတဲ့ ငွေပမာဏများတဲ့  နေအိမ်တွေကို မီတာဖြတ်သွားတယ်လို့ သိရပါတယ်။

အလားတူ ဘုရင့်နောင်လမ်းမက ရွှေ (၅) ရွှေ အိမ်ရာ၊ Hi-Way Complex အိမ်ရာတွေကိုပါ မီတာခ ကောက်ခံနေပြီး မီးဖြတ်တောက်ခြင်းတော့ မရှိသေးဘူးလို့ သိရပါတယ်။

စစ်ကိုင်းတိုင်း၊ ရေဦးမြို့က  လျှပ်စစ်ဦးစီးမှူးကို မီတာခမကောက်လို့ဆိုပြီး စစ်ကောင်စီက   နိုဝင်ဘာ ၁၂ ရက်မှာ ရာဇသတ်ကြီး ပုဒ်မ ၅၀၅(က) နဲ့အမှုဖွင့်ခဲ့လို့  ထွက်ပြေးတိမ်းရှောင်နေရတယ်လို့ ဒေသခံတွေထံက သိရပါတယ်။

“သူ့ကို မီတာကြေး မကောက်လို့ဆိုပြီး အမှုဖွင့်တာလို့တော့ ကြားတယ်။ ဒါပေမဲ့ စစ်ကောင်စီက လျှပ်စစ်မီးဖြတ်ခိုင်းတာ ဖြတ်မပေးတဲ့ကိစ္စတွေလည်း ပါတယ်။ စစ်ကောင်စီက သူတို့ခိုင်းတာ မရလို့  ၅၀၅(က) နဲ့တရားစွဲတာဖြစ်နိုင်တယ်”လို့မြို့ခံတစ်ဦးကပြောပါတယ်။

တရားစွဲခံရတဲ့ လျှပ်စစ်ဦးစီးမှူးဟာ Non-CDM တစ်ဦးဖြစ်ပေမဲ့ စစ်ကောင်စီက မီတာကြေး အတင်းအကြပ်ကောက်ခိုင်းတာနဲ့ လျှပ်စစ်မီး ဖြတ်တောက်ခိုင်းမှု ကိစ္စတွေမှာ လိုက်လျော လုပ်ဆောင်ပေးခြင်း မရှိလို့ စစ်ကောင်စီက တရားစွဲဆိုလိုက်တဲ့အတွက် ထွက်ပြေးတိမ်းရှောင်နေရတာ ဖြစ်ပါတယ်။

ရေဦးမြို့နယ်မှာ လျှပ်စစ်မီးရရှိတဲ့ကျေးရွာပေါင်း ၁၀၀ ကျော်ရှိပြီး မြို့နယ်ရဲ့ ၇၀ ရာခိုင်နှုန်း လျှပ်စစ်မီး ရရှိပြီးပြီလို့ သိရပါတယ်။