မိုးကောင်းမြို့နယ်

February 17, 2017

မိုးကောင်းတွင် အိမ်မိုးရန် သက်ကယ်ခုတ်သွားရာမှ အမျိုးသမီး ၁ ဦး မိုင်းထိသေဆုံး

  ကချင်ပြည်နယ်၊ မိုးကောင်းမြို့နယ်၊ လွဲလောကျေးရွာအုပ်စု၊ လွဲစွန်းကျေးရွာမှာ နေထိုင်သူ အမျိုးသမီးတဦး အိမ်မိုးဖို့ သက်ကယ်ခုတ်သွားစဉ် မိုင်းတလုံးနင်းမိပြီး သေဆုံးခဲ့ပါတယ်။ ဖြစ်စဉ်မှာ လွဲလောကျေးရွာအုပ်စု၊ လွဲစွန်းကျေးရွာမှာ နေထိုင်တဲ့ အသက် ၂၃ နှစ်အရွယ် မစိုးစိုးအေးဟာ ဖခင်ဖြစ်သူ ဦးအောင်အောင်၊ အစ်မဖြစ်သူ မစိုးစိုးအောင်တို့နဲ့အတူ ဖေဖော်ဝါရီ ၁၇ ရက်၊ မနက် ၁၀ နာရီခွဲအချိန်က လွဲလောကျေးရွာအရှေ့ဘက် လွဲစွန်းတောင်ကြော၊ နိမ်မိတဘုရားတောင်အနီးကို အိမ်မိုးရန် သက်ကယ်ခုတ်သွားချိန်မှာ တိုက်မိုင်းတိုက်မိပေါက်ကွဲမှု ဖြစ်ခဲ့တာပါ။ မိုင်းထိသေဆုံးခဲ့တဲ့ အမျိုးသမီးရဲ့ ဖခင်ဖြစ်သူက မိုင်းပေါက်ကွဲသံကြောင့် သမီးဖြစ်သူ မစိုးစိုးအောင်က တောင်ကြောအောက်ကို အရင်ဆင်းပြေးသွားကြောင်း၊ သူ ရောက်ရှိချိန်မှာတော့ သမီးငယ် လူးလှိမ့်နေတာကို တွေ့ရှိပြီး သွားရောက်ထူပွေ့ခဲ့ပြီး ၁၀ မိနစ်ခန့်အကြာမှာ သေဆုံးသွားခဲ့တယ်လို့ ပြောပါတယ်။ အဆိုပါ မိုင်းထိဒဏ်ရာကြောင့် သေဆုံးသူရဲ့ ဆီးစပ်၊ ဝမ်းဗိုက် မိုင်းစထိမှန်၊ ဝဲ ယာ ပေါင်မှ ခြေသလုံးတို့မှာ မိုင်းစထိမှန်ဒဏ်ရာ၊ ယာဘက်ခြေချင်းဝတ် ထက်ပိုင်းကျိုးဒဏ်ရာများ ရရှိခဲ့ပါတယ်။ သေဆုံးသူကို လောကတ္ထစရိယ လူမှုကူညီရေးအသင်း(မိုးကောင်း) ဥက္ကဋ္ဌ ဦးကျော်လွင်စိုးမှ အခင်းဖြစ်တဲ့နေရာအထိ သွားရောက်ယူဆောင်ကာ မိုးကောင်းပြည်သူ့ဆေးရုံကို ပို့ဆောင်ခဲ့ပါတယ်။ မိုးကောင်းမြို့မရဲစခန်းမှ သေမှုသေခင်းဆိုင်ရာ ရဲဆေးစာရေးပြီး မြို့နယ်လက်ထောက်ဆရာဝန် ဒေါက်တာချောစုစုစောမှ ဆေးစစ်ချက်တွေ ရယူခဲ့တယ်လို့ သိရပါတယ်။ အဆိုပါတောင်ကြောမှာ နင်းမိုင်း၊ တိုက်မိုင်းများ ထိမိပြီး ယခုရက်ပိုင်းအတွင်း သေဆုံးသူနဲ့ ထိခိုက်ဒဏ်ရာရရှိသူ ပေါင်း ၅ ဦးထက်မနည်း ရှိခဲ့တယ်လို့ သိရပါတယ်။ သတင်း - ကိုကိုလင်း(အင်းတော်)
4 years Ago

February 8, 2017

မိုးကောင်းမြို့နယ်တွင် မိုင်းပေါက်ကွဲမှုကြောင့် တိုင်းရင်းသူ ၁ ဦးဒဏ်ရာရ

ကချင်ပြည်နယ်၊ မိုးကောင်းမြို့နယ်ထဲမှာ ကချင်တိုင်းရင်းသူ အမျိုးသမီး ၁ဦး ဖေဖော်ဝါရီ ၇ ရက်မွန်းလွဲပိုင်းက ဖက်ခုတ်သွားစဉ် မိုင်းပေါက်ကွဲထိမှန် ဒဏ်ရာရရှိခဲ့ပါတယ်။ မိုးကောင်းမြို့ နတ်ကြီးကုန်းမှာ နေထိုင်တဲ့ အသက် ၅၀ အရွယ် ဒေါ်ထု နဲ့ အသက် ၃၈ နှစ်အရွယ် ဒေါ်ဘောက်တောင်တို့ ၂ ဦးဟာ မိုးကောင်းမြို့ရဲ့ အနောက်တောင်ဘက် လွဲလောကျေးရွာအုပ်စု သိုက်ချောင်းရွာပျက်အနီး တောင်ပေါ်ကနေ ဖက်ခုတ်ပြီး လှည်းလမ်း အတိုင်းပြန်လာစဉ် တိုက်မိုင်း တိုက်မိပေါက်ကွဲခဲ့ပြီး ဒေါ်ထုရဲ့ ဝဲဘက်/ယာဘက် ခြေသလုံးနဲ့ ပေါင်တို့မှာ မိုင်းစတွေ ထိမှန်ခဲ့တယ်လို့ဆိုပါတယ်။ အတူပါလာတဲ့ ဒေါ်ဘောက်တောင်က တောင်ပေါ်အထိ ကျောကုန်းပိုး သယ်ဆောင်ကာ လွဲလောကျေးရွာသို့လှည်းနဲ့ သယ်ဆောင်ခဲ့ပြီး ည ၁၀ နာရီအချိန်လောက်မှာ မိုးကောင်းပြည်သူ့ဆေးရုံသို့ ရောက်ရှိခဲ့ပါတယ်။ မိုင်းကွဲဒဏ်ရာရရှိတဲ့ ဒေါ်ထုကို မိုးကောင်းပြည်သူ့ဆေးရုံမှာ ဆေးဝါးကုသမှုခံယူကာ အတွင်းလူနာအဖြစ် တက်ရောက်ကုသနေတယ်လို့ သိရပါတယ်။ သတင်း - ကိုကိုလင်း(အင်းတော်)
4 years Ago
Up