မိုးမောက်

November 29, 2021

မိုးမောက် ခလရ ၄၃၇ တပ်အနီး ဗုံးပေါက်၊ စစ်တပ်က ပစ်ခတ်သဖြင့် ၁ ဦး သေဆုံး

ကချင်ပြည်နယ် မိုးမောက်မြို့နယ် ကြံခင်းရွာအနီးက ခလရ ၄၃၇ တပ်နားမှာ နိုဝင်ဘာ ၂၈ ရက် နေ့လယ် ၂ နာရီလောက်က ပေါက်ကွဲမှုဖြစ်ပွားပြီးနောက် စစ်တပ်က မြို့တွင်းဝင်ရောက် ပစ်ခတ်တာကြောင့် ဒေသခံ ၂ ဦး ဒဏ်ရာရကာ ၁ ဦး သေဆုံးခဲ့တယ်လို့ သိရပါတယ်။

စစ်ယာဉ်တန်းကို ကချင်ပြည်သူ့လွတ်မြောက်ရေးတပ်မတော် KIA က မိုင်းဆွဲတိုက်ခိုက်ရာက ပေါက်ကွဲမှု ဖြစ်ပွားခဲ့တာလို့ ဒေသခံတွေက ပြောပါတယ်။

ပေါက်ကွဲမှုဖြစ်ပြီး ၁ နာရီခန့်အကြာမှာ စစ်ကောင်စီတပ်ဖွဲ့ဝင်တွေက မြို့တွင်း ပစ်ခတ်ဝင်ရောက်ပြီး  လမ်းသွားလမ်းလာနဲ့ ဒေသခံတချို့ကို ဖမ်းဆီးခဲ့တယ်လို့ မိုးမောက်မြို့ခံ တစ်ဦးကပြောပါတယ်။

“လက်နက်ကြီးသံ ၁၃ ချက်လောက်ကြားရတယ်။ ဗုံးပေါက်ကွဲသံရောပဲ။ တိုက်ပွဲဖြစ်တဲ့နေရာက ဒေသခံတွေ မြို့ထဲ တိမ်းရှောင်လာကြတယ်။ စစ်သားတွေက  မြို့ထဲဝင်လာပြီး ပစ်ခတ်ခဲ့တယ်။ အဲဒီနောက် ဒေသခံ အမျိုးသမီး၊ လူငယ်၊ လူကြီး၊ ကလေးတွကို ဖမ်းဆီးခဲ့တယ်။” 

စစ်ကောင်စီတပ်ရဲ့ ပစ်ခတ်မှုကြောင့် ဒေသခံ ၂ ဦး သေနတ်ထိမှန်ဒဏ်ရာရရှိခဲ့ပြီး ၁ ဦး သေဆုံး ခဲ့တယ်လို့ မြို့ခံတစ်ဦးက ပြောပါတယ်။

စစ်တပ်က ဒေသခံ ၃၀ လောက်ကို ဖမ်းဆီးခဲ့ကာ အမျိုးသမီး တချို့နဲ့ လူကြီးတချို့ကို ညနေပိုင်းမှာ ပြန်လွှတ်ပေးခဲ့ပြီး လူငယ်တချို့ကိုတော့ ခလရ-၄၃၇ တပ်အတွင်း ဖမ်းဆီးခေါ်ဆောင်သွားတယ်လို့ သိရှိရပေမဲ့ နိုဝင်ဘာ ၂၉ ရက်မနက်ပိုင်းအထိ ဘယ်နှဦး ခေါ်ဆောင်သွားလဲဆိုတာ အတည်မပြု နိုင်သေးပါဘူး။

ဖောက်ခွဲတိုက်ခိုက်မှုတွေ များလာတဲ့ မိုးမောက်မြို့အဝင်အထွက်တိုင်းမှာ စစ်ကောင်စီတပ်က စစ်ဆေးရေး တင်းကြပ်နေတာကြောင့် ဒေသခံတွေ သွားရေးလာရေး ခက်ခဲနေတယ်လို့ သိရပါတယ်။

ဖြစ်စဉ်နဲ့ပတ်သက်လို့ ဒေသခံ KIA ထံ ဆက်သွယ်ခဲ့ပေမဲ့ ဆက်သွယ်လို့ မရခဲ့ပါဘူး။

မိုးမောက်မြို့နယ်အတွင် စစ်တပ်အာဏာသိမ်းခဲ့ပြီးနောက် ဗုံးပေါက်ကွဲတာတွေ၊  တိုက်ပွဲဖြစ်ပွား တာတွေ အချိန်အတန်ကြာ ငြိမ်သက်နေရာမှာ အခုအခါ ပြန်လည်ဖြစ်ပွားလာတာပါ။

13 hours Ago

October 23, 2021

မိုးမောက်တွင် ကေအိုင်အေနှင့်စစ်ကောင်စီတပ် တိုက်ပွဲဖြစ်၊ လမ်းအချို့ပိတ်ထား

ကချင်ပြည်နယ် မိုးမောက်မြို့နယ်အထွက် ဝဝမ်တောင်ကြောဘက်မှာ ကေအိုင်အေနဲ့ စစ်ကောင်စီတပ်တို့ အောက်တိုဘာ ၂၂ ရက်နေ့ မနက် ၆ နာရီကျော်လောက်ကနေ ညအထိ  တိုက်ပွဲဖြစ်ပွားခဲ့တယ်လို့ ဒေသခံတွေဆီက သိရပါတယ်။

ဒေသခံရွာသားတစ်ဦးက “လက်နက်ကြီး၊ လက်နက်ငယ်သံတွေ ဝဝမ်ဘက်မှာဖြစ်နေကြတာ ကြားနေရတယ်၊ လူအသေအပျောက်တော့ မသိရဘူး။ ကိုဗစ်ကာကွယ်ဆေး ထိုးမလို့ သွားဖို့ရာတောင် စစ်ကောင်စီတပ်က ကျောက်စခန်းလမ်းနဲ့ မိုးမောက်ဘက်လမ်းမှာ ဖြတ်သန်းသွားလာခွင့်ပိတ်ထားတယ်” လို့ ပြောပါတယ်။

လွယ်ဂျယ်ဘက်သွားဖို့ တိုက်ပွဲကြောင့် လမ်းတွေပိတ်ထားတဲ့အတွက် ခရီးသည်တွေကို အောက်လမ်းကသွားမယ့် ကားတွေကို ပေးလိုက်ရတယ်လို့ လွယ်ဂျယ်-ဗန်းမော် ခရီးသည်တင် ယာဉ်မောင်းတဦးက ပြောပါတယ်။

“ကျနော်တို့က လွယ်ဂျယ်တက်မလို့ စောစောထွက်လာတာ ခရီးသည်တွေလည်းပါတယ်၊ မိုးမောက်ဘက်ရောက်တော့ တိုက်ပွဲဖြစ်နေတော့ လမ်းပိတ်ထားလို့ မိုးမောက်မြို့ထဲမှာပဲ ထားရတယ်။ နေ့လယ်ပိုင်းအထိဖြစ်နေတော့ ခရီးသည်တွေကို သူများ ပေးလိုက်ရတယ်၊ အောက်လမ်းက သွားတယ်လို့ပြောတယ်။ မြို့သစ်ဘက်မှာလည်း ၉ နာရီကျော်လောက်ကနေ ဂိတ်ပိတ်ထားတယ်။”

တိုက်ပွဲအခြေအနေနဲ့ပတ်သက်ပြီး ကချင်လွတ်မြောက်ရေးတပ်မတော် (ကေအိုင်အ) ကို ဆက်သွယ်မေးမြန်းရာမှာ တိုက်ပွဲဖြစ်စဉ် မှန်ကန်ကြောင်း၊ စစ်ကောင်စီဘက်က ရမ်းသမ်းပစ်ခတ်တာတွေ ပိုလုပ်နေပြီး ၆ နာရီလောက်ထိ ပစ်ခတ်နေကြဆဲဖြစ်ပြီး အ သေးစိတ်အခြေအနေတော့ ပြောမရသေးဘူးလို့ ဆိုပါတယ်။

တိုက်ပွဲကြောင့် နှစ်ဖက်ထိခိုက်ဒဏ်ရာမှု အခြေအနေကိုတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။

မိုးမောက်မြို့နယ်မှာ စစ်တပ်အာဏာသိမ်းပြီးနောက်ပိုင်း ဗုံးပေါက်ကွဲတာနဲ့ တိုက်ပွဲတွေ မကြာခဏ ဖြစ်ပွားနေတယ်လို့ သိရပါတယ်။

အောက်တိုဘာ ၂၁ ရက်နေ့ည ၆ နာရီလောက်ကလည်း မိုးမောက်မြို့၊ ခါနန်ရပ်ကွက်အတွင်း နေထိုင်တဲ့ စစ်ကောင်စီတပ်က တပ်ကြပ်ကြီး တင့်ဆွေဦးနဲ့ ယောက်ဖဖြစ်သူတို့အား အမည်မသိအဖွဲ့က သေနတ်ထောက် ဖမ်းဆီးခေါ်ဆောင်သွားခဲ့တယ်လို့ သိရပါတယ်။

1 month Ago
More News
Up