မိုးနှမ်း

July 5, 2020

မြိုင်မြို့နယ်တွင် မိုးရွာသွန်းမှု နည်းပါးသဖြင့် မိုးနှမ်းစိုက် တောင်သူများ အရှုံးပေါ်

မကွေးတိုင်း၊ မြိုင်မြို့နယ် ကျေးရွာတချို့မှာ မိုးရွာသွန်းမှုနည်းပါတဲ့အတွက် မိုးနှမ်း သီးနှံပျက်စီးပြီး အရှုံးပေါ်နေတယ်လို့ ဒေသခံတောင်သူတွေက ပြောပါတယ်။ မြိုင်မြို့နယ် တောင်ဘို့ကျေးရွာ တောင်သူ ကိုမျိုးမင်းထွေးက “မိုးဦးနှမ်း ပွင့်တဲ့အချိန်မှာ မိုးရွာသွန်းမှုမရှိတဲ့အတွက် အပင်တွေသေပြီး အသီးတွေ မအောင်မြင်တော့တာလို့ ဆိုပါတယ်။ မိုးခေါင်တဲ့အတွက် မြိုင်မြို့နယ် မြောက်ဘက်ခြမ်းရှိ ကျေးရွာပေါင်း ၃၀ လောက်က ဒေသခံတောင်သူတွေ သီးနှံအထွက်နှုန်းမရှိလို့ အရှုံးပေါ်နေကြတာပါ။ မိုးဦးနှမ်း စိုက်ပျိုးတဲ့ တောင်သူတွေအနေနဲ့ လုပ်သားစရိတ်၊ မျိုးဖိုးအပါဝင် ကုန်ကျစရိတ် တစ်ဧကကို နှစ်သိန်းကျပ်နှုန်းလောက် ဆုံးရှုံးခဲ့တယ်” လို့ ဒီဗွီဘီ ကိုပြောပါတယ်။ အခုလိုမျိုး မိုးဦးနှမ်း သီးနှံ ဆုံးရှုံးနေတာဟာ လေး ငါးနှစ်လောက် ရှိနေပြီး မျိုးနှမ်း ၁ တင်းကို ၆၀၀၀၀ ကျပ်ဝန်းကျင်လောက် ဝယ်ယူစိုက်ပျိုးရပြီး နှမ်းပေါ်ချိန်မှာလည်း သုံးသောင်းကျပ်လောက်ပဲ ရောင်းချရလို့ အရှုံးပေါ်နေကြတာလို့ တောင်ဘို့ကျေးရွာဒေသခံ တောင်သူ ဦးမြင့်စိန်က ပြောပါတယ်။ “အသီးအပွင့် ဖြစ်မယ့်အချိန်မှာ မိုးရွာသွန်းမှုမရှိလို့ မိုးဦးနှမ်းခင်းတွေ ပျက်စီးဆုံးရှုံးတာပါ။ နှမ်းသီးနှံကို ဒေသခံတောင်သူတွေအနေနဲ့ မိုးရာသီမှာ မိုးဦး၊မိုးနှောင်း နှစ်ကြိမ် စိုက်ပျိုးကြပြီး မိုးဦးနှမ်း မရရှိတာ နှစ်အတော်ကြာပြီ” လို့ ပြောပါတယ်။ မကွေးတိုင်းမှာ ပြီခဲ့တဲ့နှစ်က မိုးနှမ်း စိုက်ဧက ၁၀ သိန်းကျော် စိုက်ပျိုးနိုင်ခဲ့ပြီး အခုနှစ်အတွင်းမှာတော့ မိုးနှမ်းစိုက်ဧက ၁၁ သိန်းကျော်အထိ စိုက်ပျိုးဖို့ လျာထားတယ်လို့ တိုင်းဒေသကြီး စိုက်ပျိုးရေးဦးစီးဌာနက သိရပါတယ်။ မင်းထီး
11 months Ago

May 4, 2020

ချောက်တွင် GAP စနစ်ဖြင့် မိုးနှမ်း သုံးဆတိုး စိုက်ပျိုး

မကွေးတိုင်းဒေသကြီး၊ ချောက်မြို့နယ်အတွင်း အခုနှစ် မိုးရာသီကာလမှာ GAP စနစ်နဲ့ မိုးနှမ်းစိုက်ဧက သုံးဆ တိုးမြှင့်စိုက်ပျိုးသွားမယ်လို့ ချောက်မြို့နယ် စိုက်ပျိုးရေးဦးစီးဌာနက ပြောပါတယ်။ "GAP စနစ်နဲ့ သုံးဆတိုးပြီး စိုက်ပျိုးထုတ်လုပ်သွားမယ်။ ပြီးခဲ့တဲ့ နှစ်က နှမ်းဈေးက ကောင်းလိုက်တော့ မိုးနှမ်းစိုက်ဧက ပိုများတယ်။ တောင်သူတွေက နှမ်းမျိုးယူတာ ပိုများလာတယ်။ တောင်သူကလည်း ဒီနှစ် စိုက်ဧက ပိုများလာမယ်။ ဒီနှစ် မိုးရရခြင်း နှမ်းစတင်စိုက်ပျိုးတယ်" လို့ စိုက်ပျိုးရေးဦးစီးမှူး ဒေါ်အေးမြင့်မြတ်သင်းက ပြောပါတယ်။ ပြီးခဲ့တဲ့နှစ် မိုးရာသီမှာ ကျေးရွာ ၇ ရွာမှ တောင်သူ ၂၆၁ ဦးက GAP စနစ်နဲ့ မိုးနှမ်း ၈၄၆ ဧက စိုက်ပျိုးခဲ့ပြီး အခုနှစ် မိုးရာသီမှာတော့ ကျေးရွာ ၁၉ ရွာ တောင်သူ ၆၂၀ ဦးရဲ့ စိုက်ပျိုး‌မြေဧက ၂၅၀၀ ကျော်ကို GAP စနစ်နဲ့ မိုးနှမ်းစိုက်ပျိုးထုတ်လုပ်သွားမယ်လို့ ဆိုပါတယ်။ ချောက်မြို့နယ်မှာ နှစ်စဉ် မိုးနှမ်းစိုက်ပျိုး‌မြေဧက ၃ သောင်းကျော် ရှိပြီး ၁ ဧက ပျမ်းမျှအထွက်နှုန်း ၇ တင်းကျော် ထွက်ရှိတယ်လို့ သိရပါတယ်။   ပြီးခဲ့တဲ့နှစ်က မိုးနှမ်း ၁ တင်းကို ကျပ် ၈ သောင်းကျော်အထိ ဈေးကောင်းခဲ့တာကြောင့် တောင်သူတွေက​ မိုးနှမ်းကို ပိုပြီး စိုက်ပျိုးလာကြတာပါ။ ကိုလင်း(ချောက်)
1 year Ago
Up