မိုးညှင်း

May 10, 2021

မိုးညှင်းမြို့နယ်၌ ရပ်ကွက် ဆယ်အိမ်မှူးဟောင်းအပါအဝင် ၂ ဦး ပစ်သတ်ခံရ

ကချင်ပြည်နယ်၊ မိုးညှင်းမြို့နယ်၊ မော်ဟန်ကျေးရွာ ဘူတာစုရပ်ကွက်မှာ  မေ ၉ ရက် မနေ့ည ၇ နာရီလောက်က ရွာသားတစ်ဦး သေနတ်နဲ့ ပစ်သတ်ခံခဲ့ရတယ်လို့ မျက်မြင်တွေ့ရှိသူ အိမ်နီးချင်းတွေဆီက သိရပါတယ်။

သေဆုံးသူဟာ မော်ဟန်ကျေးရွာ ဘူတာစုရပ်ကွက်က ဦးတင်ဇောယု ဆိုသူဖြစ်ပြီး ရပ်ကွက် ဆယ်အိမ်မှူး လုပ်ဖူးသူလို့လည်း သိရပါတယ်။ သူ့ကို နေအိမ်ထဲမှာ ထိုင်နေစဉ် သူစိမ်းနှစ်ယောက်က အိမ်ထဲထိဝင်လာပြီး အနီးကပ် သေနတ်နဲ့ ပစ်သတ်သွားခဲ့တာလို့ သိရပါတယ်။

အဆိုပါဖြစ်စဉ်ကို မျက်မြင်တွေ့ရှိလိုက်သူ အသက် ၇၀ ကျော် အဘွားအိုတဦးလည်း အဲဒီမြင်ကွင်းကြောင့် ရုတ်တရက် မူးမေ့လဲကျခဲ့ပြီး ဆေးကုသမှု ခံယူနေရတယ်လို့လည်း ကာယကံရှင်တွေနဲ့နီးစပ်သူတွေက ပြောပါတယ်။

မနေ့ည သန်းခေါင်အချိန်မှာပဲ မော်ဟန်ကျေးရွာကနေ ဆိုင်ကယ်နဲ့ တစ်နာရီကျော်သွားရတဲ့ ကျောက်စိမ်းထွက်ရှိရာ တောင်းစိမ်းမှော်မှာလည်း  ဒလန်လို့ ယူဆရသူတစ်ဦး သေနတ်နဲ့ ပစ်သတ်ခံခဲ့တယ်လို့ တောင်းစိမ်းရွာသားတွေက ပြောပါတယ်။

5 months Ago

April 19, 2021

မိုးညှင်းတွင် ကုန်တင်ယာဉ် ၄ စီး ပစ်ခတ်ခံရ၊ ယာဉ်မောင်း ၁ ဦးသေဆုံးပြီး ၂ ဦး စိုးရိမ်ဒဏ်ရာရရှိ

ကချင်ပြည်နယ် မိုးညှင်းမြို့နယ် လယ်မှီးကျေးရွာအနီးမှာ ဧပြီလ ၁၉ ရက်နေ့လယ်က ကုန်ကား ၄ စီးအား အကြမ်းဖက်စစ်တပ်က ပစ်ခတ်မှုကြောင့် ၁ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

ခလရ ၄၀ တပ်နဲ့ ၃၆၇ တပ်ရင်း အနားမှာရှိတဲ့ တံတားတခုအနားမှာ စောင့်ကြပ်နေတဲ့ အရပ်ဝတ်အကြမ်းဖက် စစ်ကောင်စီဝင်တွေက တားဆီးပြီး ငွေကြေးအဆမတန်တောင်းခံတာကို ကားသမားတွေက မပေးတာကြောင့် စကားများရာက သေနတ်နဲ့ ပစ်ခတ်ခဲ့လို့ အခုလို သေဆုံးဒဏ်ရာရခဲ့တာပါ။

ပစ်ခတ်ခံရမှုကြောင့် ၁ ဦးက အခင်းဖြစ်နေရာမှာ သေဆုံးသွားပြီး ၂ ဦးက သွေးအရမ်းထွက်တာမို့ အခြေအနေစိုးရိမ်ရတယ်လို့ ဒေသခံတဦးက ပြောပါတယ်။

မိုးညှင်းခရိုင်အတွင်း တိုက်ပွဲတွေ ဖြစ်ပွားနေပြီး အကြမ်းဖက်စစ်ကောင်စီတပ်တွေက ကေအိုင်အေကို လေယာဉ်တွေသုံး၊ ဗုံးကြဲတိုက်ခိုက်တာတွေ ပြုလုပ်နေတယ်လို့ ဆိုပါတယ်။

ဧပြီလ ၁၇ ရက် ကလည်း ကချင်ပြည်နယ်နဲ့ စစ်ကိုင်းတိုင်း နယ်စပ်ဂိတ် နန့်စီးအောင်ဂိတ်မှာ ၁၂ ဘီးယာဉ် ကုန်ကားတစ်စီးကို စစ်ကောင်စီတပ်ဖွဲ့ဝင်များက ဖြတ်သန်းခ မတန်တဆတောင်းတာကြောင့် မပေးဘဲ မောင်းပြေးရာ သေနတ်နဲ့ပစ်ခတ်ခဲ့တဲ့အတွက် ယာဉ်မောင်း ၁ ဦးသေဆုံးပြီး ယာဉ်အကူ ဒဏ်ရာရရှိခဲ့တယ်လို့ ကားသမားတွေက ပြောပါတယ်။

6 months Ago
More News
Up