မိုးညို

February 28, 2021

မိုးညိုရဲတပ်ဖွဲ့ဝင်တစ်ဦး CDM လှုပ်ရှားမှုတွင် ပူးပေါင်းပါဝင်လာ

ပဲခူးတိုင်း၊ သာယာဝတီခရိုင်၊ မိုးညိုမြို့နယ်မှာ ဒီနေ့မနက်ပိုင်းက ရဟန်းသံဃာတွေ၊ ပညာရေး ဝန်ထမ်းတွေ အပါအဝင် ပြည်သူ သောင်းချီ စစ်အာဏာရှင်အလိုမရှိကြောင်း ဆန္ဒပြခဲ့ကြပါတယ်။

စစ်အာဏာရှင်လက်အောက်မှာ အလုပ်မလုပ်လိုတော့တာကြောင့် ဒီနေ့ကစပြီး CDM လှုပ်ရှားမှုမှာ ပါဝင်သွားမယ်လို့ မိုးညိုမြို့မရဲစခန်းမှ ရဲတပ်သားတစ်ဦးက ပြောပါတယ်။

“မတရားသဖြင့် လက်နက်နဲ့ နိုင်ငံတော် အာဏာသိမ်းတာကို ကျနော်လက်မခံနိုင်ပါဘူး။ ကျနော့်လိုပဲ ကျန်တဲ့ရဲတပ်ဖွဲ့ဝင်တွေလည်း ရုန်းထွက်ချင်တဲ့သူတွေ ရှိတယ်ပေါ့။ ဒါပေမဲ့ မရုန်းထွက်နိုင်ကြဘူး၊ ဖိနှိပ်ခံရမှာ၊ ထောင်ကျမှာကို ကြောက်ကြတယ်။ ဘာလို့လဲဆိုတော့ ကျနော်တို့က ရဲစခန်းထိန်းသိမ်းရေးဥပဒေတွေလည်း ရှိတယ်။ ကျန်တဲ့ ဥပဒေတွေလည်း ရှိတော့ ချက်ချင်း ထောင်ထဲထည့်လို့ရတာပေါ့နော်။ ကျနော်ကတော့ ရှောင်တိမ်းနေရတာပေါ့။ ရဲတပ်ဖွဲ့ဝင်တွေကို ဘာပြောချင်လဲဆိုတော့ ရုန်းမထွက်နိုင်တောင် လူသားချင်းစာနာပြီးတော့ ပြည်သူလူထုကို ဆက်ဆံပေးကြပါ” လို့  ပြောပါတယ်။

မိုးညိုမြိုနယ်မှာ စစ်အာဏာရှင် အလိုမရှိကြောင်း နေ့စဉ်ဆန္ဒပြနေကြပြီး ဆန္ဒထုတ်ဖော်သူတွေကို ဖမ်းဆီးထိန်းသိမ်းတာတော့ မရှိသေးဘူးလို့ သိရပါတယ်။

2 months Ago

February 19, 2021

မိုးညိုတွင် ပညာရေးဝန်ထမ်း ၆၀၀ အပါအဝင် အင်အား သောင်းချီဆန္ဒပြ

ပဲခူးတိုင်း မိုးညိုမြို့မှာ ဖေဖောဝါရီ ၁၉ ရက် စစ်အာဏာရှင်ဆန်ကျင်ရေးလှုပ်ရှားမှု ၁၇ ရက်မြောက်‌နေ့မှာတော့ ပညာရေးဝန်ထမ်း ၆၀၀ အပါအဝင် အင်အား သောင်းချီဆန္ဒပြခဲ့ကြပါတယ်။

ပညာရေးဝန်ထမ်းတွေဟာ “ကျနော်တို့သည် မိုညိုမြို့နယ်မှာ ပညာရေးဝန်ထမ်းများဖြစ်ပါသည်၊  ၂၀၂၀အထွေထွေရွေးကောက်ပွဲကြီးတွင် မဲရုံတာဝန်များကို မဲမသမာမှု ကင်းရှင်စွာဖြစ် သမာသမတ်ကျစွာဆောင်ရွက်ခဲ့သူများဖြစ်ပါသည်ဟု သစ္စာစကားဆိုပါသည်။ ဤမှန်ကန်သော သစ္စာစကားကြောင့် စစ်အာဏာရှင်စနစ် အမြန်ဆုံးကျရှုံးပါစေ" ဟု ကြွေးကြော်ခဲ့ကြပါတယ်။

စစ်အာဏာရှင် ဆန့်ကျင်ရေးဆန္ဒပြသူတွေကလည်း  မြို့တွင်းလူစည်းကားရာ လမ်းမတွေ ပေါ်မှာ ဆန္ဒထုတ်ဖော်ပြီး မြို့နယ်ပညာရုံးမှူးရှေ့မှာလည်း CDM မှာ ပူးပေါင်းပါဝင်ဖို့ တောင်းဆိုခဲ့ကြပါတယ်။

မိုးညိုမြို့နယ်မှာ စစ်အာဏာရှင်ဆန့်ကျင်ရေး ဆန္ဒထုတ်ဖော်လာတာ ၁၇ ရက်မြောက် ရှိလာပြီး ဆန္ဒထုတ်ဖော်သူတွေကိုတော့ ဖမ်းဆီးသွားတာ မရှိ‌သေးဘူးလို့ သိရပါတယ်။

သက်နိုင်ဝင်း

2 months Ago
More News
Up