မိုးညို

May 10, 2022

မိုးညို ဒေသခံ ၆ ဦးကို စစ်ကောင်စီတပ် ဖမ်းဆီး

ပဲခူးတိုင်း၊ မိုးညိုမြို့နယ်ထဲက ကျေးရွာတရွာက ဒေသခံရွာသား ၆ ယောက်ကို စစ်ကောင်စီတပ်က ဖမ်းဆီးထားပြီး လူ  ၂၀ ကျော်ကို ဖမ်းဆီးဖို့လိုက်လံရှာဖွေနေတယ်လို့ ဒေသခံတွေက ပြောပါတယ်။ 

မိုးညိုမြို့နယ်ထဲက ဆုံကုံးကျေးရွာအုပ်စု၊ ပြေ့ဇင်ကုန်း ကျေးရွာက ဒေသခံ ၆ ယောက်ကို  ဧပြီ ၈ ရက်နေ့ ညမှာ စစ်ကောင်စီတပ်နဲ့ ရဲတွေက လာဖမ်းသွားတာလို့ ပြေ့ဇင်ကုန်းကျေးရွာ ဒေသခံတဦးက ပြောပါတယ်။

ပြီးခဲ့တဲ့ ဧပြီလ ၈ ရက်က ပြေ့ဇင်ကုန်း ကျေးရွာမှာ အသံဗုံးပေါက်ကွဲမှုတခုဖြစ်ပွားခဲ့ပြီးနောက် ဒေသခံ  PDF အဖွဲ့တဖွဲ့နဲ့ စစ်ကောင်စီတပ် တိုက်ပွဲ ဖြစ်ပွားခဲ့တယ်လို့ ဆိုပါတယ်။

ပြေ့ဇင်ကုန်းကျေးရွာ ဒေသခံက  “အဲ့ဒီကိစ္စတွေဖြစ်ပြီးတော့ အဲနေ့ညမှာပဲ လိုက်ဖမ်းတာ။ ကိုခင်စိုး၊ ကိုဆွေလင်းနိုင်နဲ့ သူ့ဇနီး မလွင်မာ၊ ကိုသန်းဌေး၊ ကိုကျော်ဇင်ဦး၊ ဗျော့ကြီးတို့ ၆ ယောက်ကို သူတို့နေရာအိမ်တွေကနေလာပြီး ဖမ်းသွားတာ။ ဘာအတွက်နဲ့ ဖမ်းတယ်ဆိုတာတော့ မသိရသေးဘူး။ ရေကင်းရဲစခန်းကတောင်မသိဘူး၊ စစ်ကောင်စီတပ်က တိုက်ရိုက်ဖမ်းသွားတာ။ ဒါပေမဲ့ ရဲစခန်းကနေ ထပ်သိလိုက်ရတာက နောက်ထပ် ၂၆ ယောက် ထပ်ဖမ်းဖို့ ရှိတယ်။” 

အဲ့ဒီနေ့ ညနေပိုင်းမှာလည်း ပြေ့ဇင်ကုန်းကျေးရွာက ကျောင်းဆရာမတယောက် သမီးရဲ့ မင်္ဂလာဆောင်မှာ ခိုက်ရန် ဖြစ်ပွားခဲ့တာကြောင့် ရဲတပ်ဖွဲ့က ဝင်ရောက်ရှင်းလင်းရာမှာ ရဲတယောက် ဒဏ်ရာရရှိခဲ့ပါတယ်။

ဒဏ်ရာရရှိသူ ရဲတပ်သားက ရေကင်းအလယ်ရွာသား  ကို‌ဝေလင်းဖြစ်ပြီး မိုးညိုဆေးရုံမှာ ဆေးကုသပေးနေတယ်လို့ ဆေးရုံဝန်ထမ်းတယောက်က ပြောပါတယ်4

မိုးညိုမြို့မှာ ဒလန်သတင်းပေးကြောင့် စစ်ကောင်စီတပ်က ဖမ်းဆီးတာတွေ ပြုလုပ်နေပြီး တချို့ကို ငွေကြေးတောင်း ပြန်လွှတ်ပေးတယ်လို့ ဒေသခံတယောက်က ပြောပါတယ်။

“အခု ဖမ်းထားတဲ့သူတွေတော့ ဘယ်လိုလုပ်မလဲမသိဘူး။ ဟိုနေ့က တိုက်ပွဲကြောင့်ဆိုရင်လည်း အဲ့ဒီလူတွေက ဒီရွာကတယောက်မှ မဟုတ်ကြဘူး၊ ဒီရွာက ဟုတ်ရင်လည်း ဘယ်ရှိကြတော့မလဲ။ သူတို့က ထင်ကြေးတွေ၊  ဒလန်တွေ သတင်းပေးလို့ လျှောက်ဖမ်းနေတာ။ အရင်တုန်းကလည်း ၇ ယောက်လောက်ဖမ်းသေးတယ်။ နောက်တော့ တယောက်ကို ၁၀ သိန်းကနေ သိန်း ၃၀ အထိ ပေးတော့ ပြန်လွှတ်ပေးလိုက်တယ်။ အခုလဲ ပိုက်ဆံလိုချင်လို့ လုပ်တာပဲဖြစ်မယ်။ နောက်  အဲ့ဒီတုန်းက ဖမ်းပြီး သတင်းတင်ရင် ပြန်မလွှတ်ဘူးဆိုလို့ ဘယ်သတင်းဌာနကိုမှ မပြောရဲကြဘူး။ နောက်တော့ ငွေပေးတော့ ပြန်လွှတ်ပေးတယ်” လို့ ဒီဗွီဘီကို ပြောပါတယ်။

ဖမ်းဆီးထားသူတွေကိုတော့ ဘယ်ကိုခေါ်သွားမှန်း မိသားစုကမသိရဘဲ ထပ်မံဖမ်းဆီးဖို့ ရှိနေတယ်ဆိုတဲ့ သတင်းကြောင့် ဒေသခံတချို့ ထွက်ပြေးတိမ်းရှောင်နေရတယ်လို့ သိရပါတယ်။

7 months Ago

December 24, 2021

မိုးညိုမြို့နယ်၊ အမျိုးသားဒီမိုကရေစီအဖွဲ့ချုပ်ပါတီရုံး ဖျက်ဆီးခံရ

ပဲခူးတိုင်းအနောက်ပိုင်း၊ မိုးညိုမြို့၊ ရွှေဥဒေါင်းရပ်ကွက်မှာရှိတဲ့ အမျိုးသားဒီမိုကရေစီအဖွဲ့ချုပ် (NLD) ပါတီရုံးကို ဒီဇင်ဘာ ၂၃ ရက်နေ့မနက် ၁ နာရီဝန်းကျင်က လက်နှက်ကိုင်ဆောင်ထားပြီး အရပ်ဝတ်တွေ ဝတ်ဆင်ထားတဲ့လူတစုက ဝင်ရောက်ဖျက်ဆီးသွားတယ်လို့ သိရပါတယ်။

“ပျူစောထီးတွေလား၊ အရပ်ဝတ်ဝတ်ထားတဲ့ စစ်သားတွေလားမသိဘူး ၅ ယောက်လောက်ရှိတယ်။ ဆိုင်ကယ် ၂ စီးနဲ့လာတာ။ လက်နက်တွေလည်းပါတယ်။ ဝန်းတံခါးကိုဖျက်ပြီး ရုံးထဲကပစ္စည်းတွေကို မွှေနှောက်ဖျက်ဆီးတယ်။ တိုက်ဆိုင်တာပဲလားမသိဘူး၊ သူတို့တွေရုံးထဲ ရောက်တဲ့အချိန် မီးပျက်သွားတယ်” လို့ နီးစပ်သူတဦးက ပြောပါတယ်။

စစ်တပ်က အာဏာသိမ်းပြီးကတည်းက လူနေထိုင်ခြင်းပဲ ရုံးပိတ်ထားတာ ၉ လလောက်ရှိပြီဖြစ်ပြီး ဝင်ရောက်ဖျက်ဆီးသွားသူတွေဟာ ရုံးအတွင်းမှာ ဗုံးထောင်ထားခဲ့တယ်ဆိုတဲ့ ကောလာဟလတွေကြောင့် ရုံးအနီး သွားရောက်မကြည့်ရှုရဲဘူးလို့ ဒေသခံတွေဆီက သိရပါတယ်။

ပြီးခဲ့တဲ့ ဒီဇင်ဘာ ၁၃ ရက်နေ့က လက်ပံတန်းမြို့၊ မြို့နယ် NLD ပါတီရုံးကိုလည်း အမည်မသိလူတစုက ဝင်ရောက်ဖျက်ဆီးသွားခဲ့သေးတယ်လို့ ဒေသခံတွေက ပြောပါတယ်။

မိုးညိုမြို့နယ် NLD ရုံးဖျက်ဆီးခံရတာနဲ့ ပတ်သက်ပြီး အသေးစိတ်သိရှိနိုင်ဖို့ မိုးညိုမြို့မရဲစခန်းကို ဆက်သွယ်မေးမြန်းခဲ့ပေမယ့် “အလုပ်ရှုပ်နေတယ်ကွာ။ ဒါပဲ” လို့သာ တာဝန်ကျရဲအရာရှိက ပြန်လည်ဖြေကြားခဲ့ပါတယ်။

၂၀၂၀ အထွေထွေရွေးကောက်ပွဲမှာ အနိုင်ရရှိခဲတဲ့ မိုးညိုမြို့နယ်၊ အမျိုးသားဒီမိုကရေစီအဖွဲ့ချုပ်၊ ပြည်သူ့လွှတ်တော်ကိုယ်စားလှယ် ဦးဝင်းနိုင်ကိုလည်း အာဏာသိမ်းစစ်ကောင်စီက ရာဇသတ်ကြီးဥပဒေပုဒ်မ ၅၀၅(က) နဲ့ မတရားတရားစွဲပြီး ထောင် ၃ နှစ်ချမှတ်ထားတယ်လို့ သိရပါတယ်။

ရန်ကုန်က NLD ပါတီရုံးချုပ်အပါအဝင် နိုင်ငံအဝှမ်းက NLD ပါတီရုံးတွေ ၇၅ ကြိမ် ဖောက်ခွဲဖျက်ဆီးခံထားရတယ်လို့ NLD ဗဟိုအလုပ်ကော်မတီက ဒီဇင်ဘာ ၁ ရက်နေ့မှာ ထုတ်ပြန်ထားပါတယ်။

12 months Ago
More News
Up