မိုးစပါးစိုက်ဧက

August 4, 2020

မကွေးတိုင်းတွင် မျိုးသန့်ထုတ်မည့် မိုးစပါးစိုက်ဧက ၈၀၀၀ ကျော်အတွက် ထောက်ပံ့ငွေပေးမည်

မကွေးတိုင်းဒေသကြီးအတွင်းမှာ မျိုးကောင်းမျိုးသန့် ထုတ်လုပ်မယ့် မိုးစပါးစိုက်ဧက ၈၀၀၀ ကျော်က တောင်သူတွေအတွက် ကိုဗစ်-၁၉ စီးပွားရေးကုစားမှု အစီအစဉ်အရ ထောက်ပံ့ငွေတွေ ပေးအပ်သွားမယ်လို့ တိုင်းဒေသကြီးစိုက်ပျိုးရေးဦးစီးဌာနကနေ သိရပါတယ်။ မျိုးသန့် ထုတ်လုပ်ပေးမယ့် မိုးစပါး စိုက်ဧက ၈၀၅၀ က တောင်သူတွေအတွက် တဧကကို ကျပ် တစ်သိန်းခွဲနှုန်းနဲ့ ထောက်ပံ့ပေးမှာ ဖြစ်တယ်လို့ မကွေးတိုင်းဒေသကြီး စိုက်ပျိုးရေးဦးစီးဌာန ညွှန်ကြားရေးမှူး ဦးလင်းမြတ်က ပြောပါတယ်။  “ မျိုးသန့်ထုတ်လုပ်တဲ့အခါ အထွက်နှုန်းကောင်းမျိုးနဲ့ အရည်သွေးကောင်းမျိုး ဆိုပြီးတော့ ၂ မျိုး ခွဲခြားထားပြီး မျိုးအပေါ်မှာ မူတည်ကာ ထောက်ပံ့ငွေ အနည်းငယ်ကွာဟမှု ရှိနိုင်တယ်။ မျိုးနဲ့စိုက်စရိတ်၊ မျိုးကွဲပယ်တဲ့လုပ်ငန်းစဉ်နဲ့ ရိတ်သိမ်းတဲ့လုပ်ငန်းတွေအတွက် ထောက်ပံ့မှာ ဖြစ်ပါတယ်။ မျိုးစေ့ထုတ် သမဝါယမအသင်းနဲ့၊ မျိုးစေ့ထုတ် တောင်သူအသင်းတွေ အားကောင်းလာအောင် ရည်ရွယ်ပြီးတော့ ဌာနအနေနဲ့ မျိုးစေ့ထုတ်လုပ်ငန်းတွေအတွက် ကွင်းဆင်း နည်းပညာပေးတာတွေ လုပ်ဆောင်ပေးနေတယ်။ မျိုးစေ့ထုတ်တဲ့အခါမှာလည်း မှတ်ပုံတင်ပြီး ထုတ်လုပ်တာဖြစ်လို့ စီးပွားဖြစ်ဖြန့်ချိနိုင်မယ့် မျိုးကောင်းမျိုးသန့်တွေ ထွက်ပေါ်လာကာ ကိုဗစ်-၁၉ အလွန်ကာလမှာ တောင်သူတွေ လိုအပ်နေတဲ့ မျိုးကောင်းမျိုးသန့်တွေ လုံလုံလောက်လောက်ရရှိမှာ ဖြစ်တယ်။” မကွေးတိုင်းမှာ ဆည်ရေ၊ မြစ်ရေတင်၊ မြေအောက်ရေ၊ မိုးရေ စတဲ့ ရေရရှိရေး နည်းလမ်းတွေနဲ့ မိုးစပါးစိုက်ပျိုးဧက ၆၃၀,၀၀၀ လောက် လျာထား စိုက်ပျိုးနေတယ်လို့ တိုင်းဒေသကြီးစိုက်ပျိုးရေးဦးစီးဌာနကနေ သိရပါတယ်။ သတင်း- မင်းထီး
1 year Ago
Up