မိုးကုတ်မြို့

September 22, 2022

မိုးကုတ်မြို့နယ်ရှိ ကျေးရွာ ၃ ရွာကို မီတာခမဆောင်သဖြင့် လျှပ်စစ်မီးဖြတ်

မန္တလေးတိုင်း၊ မိုးကုတ်မြို့အနောက်ပိုင်းက ကျောက်ပြဿဒ်ရွာ၊ ဘောလုံးကြီးရွာနဲ့ ဆင်ခွာရွာတွေကို မီတာမဆောင်တာကြောင့်လို့ဆိုပြီး စစ်ကောင်စီလက်အောက်ခံ လျှပ်စစ်မီတာရုံးက မီးဖြတ်တာကြောင့် ဒေသခံပြည်သူတွေ အခက်အခဲကြုံနေတယ်လို့ ​ကျေးရွာဒေသခံတွေက ပြောပါတယ်။

ကျေးရွာတွေအတွင်းမှာ ဒေသအာဏာပိုင်တွေက အစည်းဝေးခေါ်ပြီး မီတာဆောင်ဖို့နဲ့ မီတာမဆောင်တဲ့အိမ်ရှိရင် မီးဖြတ်မယ်လို့ဆိုကာ စက်တင်ဘာ ၂၀ ရက်နေ့ကစတင် မီးဖြတ်သွားတယ်လို့ ကျေးရွာ​ဒေသခံတစ်ဦးက​ ပြောပါတယ်။ 

ဘောလုံးကြီးကျေးရွာက မီတာဖိုး ကျပ်သိန်း ၃၀၀ ကျော်  အကြွေးကျန်နေတာကြောင့် မီတာဆောင်ဖို့ တစ်အိမ်ကိုပျှမ်းမျှ ကျပ် ၁၂၀၀၀၀ ဆောင်ခိုင်းနေပြီးအကုန်လုံးမီတာဆောင်မှ မီးပြန်ပေးမယ်လို့ ပြောတဲ့အကြောင်း ဒေသခံတစ်ဦးကပြောပါတယ်။

ဘောလုံးကြီးကျေးရွာသား တစ်ဦးက “အခုက မီးဘာမှမသုံးလည်း ပျမ်းမျှ တစ်အိမ်ကို တစ်သိန်းနှစ်သောင်း ပေးခိုင်းတယ်။ သူများသူဌေးအိမ်တွေလို  အများကြီးမသုံးဘဲ တစ်သိန်းကျော် ပေးရတယ်ဆိုတော့ ဘယ်သူမှ မတတ်နိုင်ကြဘူး။ မနေ့ကမှ မီတာဘောက် မီးရတယ်၊ ဒီနေ့ တစ်သိန်းနှစ်သောင်း ဆောင်ရတဲ့အိမ်တွေကျ မတရားတော့ဘူးလေ။ သူတို့က မီတာစာရွက်နဲ့ လာမတောင်းဘူး။ တအိမ်ဘယ်လောက်ဆိုပြီး လာတောင်းတာ"လို့ ပြောပါတယ်။

ဘောလုံးကြီးကျေးရွာအတွင်း နေထိုင်သူတွေအနေနဲ့ လျှပ်စစ်မီးကို မီးလင်းရုံထွန်းတဲ့နေအိမ်တွေအတွက် မီတာခစျေးများနေတာကြောင့် မီတာမဆောင်ကြသူ တွေရှိသလို ပြဿနာတက်မှာစိုးတာကြောင့်မီတာခဆောင်သူတွေလည်း ရှိပါတယ်။ 

ရွာသားတဦးက “အခုက ရှာစားဖို့တောင်မလွယ်ဘူး။ မီတာခ တစ်သိန်းနှစ်သောင်းက မတတ်နိုင်ဘူး။ မတတ်နိုင်တဲ့အိမ်က မပေးနိုင်တော့ မီးက ဖြတ်ခံရတယ်။ အခုထိလည်းမီး မလာဘူး။ အရင်ခေတ်ကို ပြန်​ရောက်သွားတာပါပဲ။ စားဝတ်နေရေးအတွက် မနည်းရုန်းကန်နေရတာကြောင့် မဆောင်နိုင်ကြသူတွေ များတယ်”လို့ ပြောပါတယ်။ 

မိုးကုတ်မြို့အနောက်ပိုင်းက အဆိုပါကျေးရွာသုံးရွာကို မီးဖြတ်ထားတာ ၂ ရက်ရှိပြီဖြစ်ပြီး စက်တင်ဘာလအစပိုင်းတုန်းက သစ်စိမ့်ကုန်းကျေးရွာကိုလည်း မီတာမဆောင်တာကြောင့် စံပြအနေနဲ့ လျှပ်စစ်မီးပေးတဲ့ ထရန်စဖော်မာအိုးက ဖျူးစ်ကို လျှပ်စစ်ဌာနက ဖြုတ်သွားခဲ့ပါတယ်။

1 week Ago

June 15, 2022

မိုးကုတ်မြို့က စာသင်ကျောင်း ၂ ကျောင်းတွင် ဗုံးပေါက်ကွဲ

မန္တလေးတိုင်း၊ မိုးကုတ်မြို့အနောက်ပိုင်း ကျပ်ပြင်ရပ်ကွက်က ကျောင်းသားတွေ ကျောင်းတက်နေတဲ့ ကျပ်ပြင်စျေးကျောင်းနဲ့ အထက ၁ အထက်တန်းကျောင်းတွေမှာ  ဇွန် ၁၅ ရက်က ဗုံးပေါက်ကွဲမှုတွေ ဖြစ်ပွားခဲ့ပါတယ်။

ဒီနေ့လယ် ၁၂ နာရီဝန်းကျင်က ပေါက်ကွဲခဲ့တာဖြစ်ပြီး ကျပ်ပြင်ဈေးကျောင်းမှာ ဗုံးပေါက်ကွဲပြီးတဲ့နောက် ၃ မိနစ်ဝန်းကျင်ခြားကာ နောက်ထပ် အထက ၁ ကျောင်းမှာ ဗုံးပေါက်ကွဲခဲ့တာဖြစ်တယ်လို့ ဒေသခံတွေက ပြောပါတယ်။

ကျောင်းဝင်းအတွင်းမှာ ပေါက်ကွဲခဲ့တာဖြစ်ပေမဲ့ ကျောင်းသားတွေတော့ ထိခိုက်ဒဏ်ရာရရှိတာမျိုး မရှိသလို ကျောင်းတွေကလည်း ထိခိုက်ပျက်စီးခဲ့တာမရှိဘူးလို့ ဆိုပါတယ်။

အဲဒီလို ဗုံးပေါက်ကွဲမှု ဖြစ်ပွားခဲ့ပြီးတဲ့နောက်ပိုင်း နေ့လယ် ၂ နာရီလောက်မှာ ကျပ်ပြင်ရဲစခန်းပါ ထပ်မံတိုက်ခိုက်ခံခဲ့ရပြီး သေနတ်ပစ်ခတ်သံ ၁၀ ချက်လောက်ကြားရကာ ရဲစခန်းအနီးနားက ဆိုင်တွေအားလုံး ပိတ်လိုက်ကြပြီး မိုးကုတ်တမြို့လုံးနီးပါး လူသွားလူလာ မရှိတော့ဘူးလို့ ဒေသခံတွေက ပြောပါတယ်။

လက်ရှိမှာတော့ အဲဒီဖြစ်စဉ်နဲ့ပတ်သက်လို့ ဘယ်အဖွဲ့အစည်းက လုပ်ဆောင်တယ်ဆိုတာကို မသိရှိရသလို ပြီးခဲ့တဲ့ ဇွန် ၁၄ ရက်ကလည်း အမက ၆၉ က Non CDM ကျောင်းအုပ်အိမ်မှာ ဗုံးပေါက်ကွဲမှု ဖြစ်ပွားခဲ့ပါသေးတယ်။

4 months Ago
More News
Up